شكوى دولية على ( خرائط مكشات )

[ملبد]

سلام يامكشاتيين
أعرف مكشاتي من جيل مازالت- إلى وقت قريب- حدود معرفتهم باستخدام أجهزة (الجي بي اس) في حدود ( Go To ) على الإحداثي ويحطه على البوصلة ويدور على السهم ويخليه ( صالب ) لايمين ولا يسار حتى لو ( تدغشم) الحزوم مع تقطيع السكك . :director:
هذا المكشاتي قدر الله عليه وطاح بـ ( خرائط الصحراء) واكتشف ان البر والرحلات صار لها رونق جديد .. والبركة بالسعلو = مصممها.
كل ماقابلت هالمكشاتي كرر عبارته ( واسفا بوقتي اللي راح مع Go To ) ويسمعني ألوان الدعاء لمن انتشله من ( مستنقع قو تو) .. يستاهل ابو عبدالعزيز. :good2: :heart:
ويبدو أن استمتاعه بالتعامل مع خرائط الصحراء اوقعه في (مستنقع جديد) فيقول: يسيطر علي هاجس بأنني سأصمم بقدراتي بعد معرفتي بالسكاريب والمفاتيح والليات والزراديات ومقصات لازمة لإنتاج الخرائط اللي أبيها بالوقت اللي أريده <( تطورت منفوحة ).
هات >> ( سوالف آخر الليل بالكشتة ).
قال : سيأتي يوم تكون الخرايط ومايلزمها موجودة بشنطة معاميل ( ثاية ) المكشاتي مع الدلة البغدادية والبريق الهندي جنبا إلى جنب.. وبعد ( سنترة ) بكل خيمة من ( اقسام مكشات ) نطلع بخريطة شكل .. فمثلا بعد مايمر على موضوع من نوع ( اصناف الثعابين (http://www.mekshat.com/vb/showthread.php?s=&threadid=8983)) يستطيع ( المكشاتي )انتاج ( خرايط الديبان ) باستخدام برنامج ( داب عس ) لتتمكن باستخدام شريحتها من معرفة مواقع العقارب والثعابين وبالإمكان وضع خاصية التحذير عند توصيل كيبل جهازك بكفرات السيارة ليعطيك تحذير صوتي بدل الجرس يقول : ( عقرب طين .. عقرب طين ) يعني المكان اللي أقبلت عليه فيه حشرات سامة.
أما الصياد المكشاتي فيستعين بموضوع ( أسرار هجرة الطيور (http://www.mekshat.com/vb/showthread.php?t=22335)) كقاعدة بيانات أولية مع صور من الأقمار الصناعية .. ومن خلال برنامج ( ييزي فشقلورر ) يصمم ( خرايط الصيد ) بعدها حط شريحتك .. وهات يااحداثيات ( على الهواء مباشرة ) لكل قميرية أو كرك أو قطاة .. لكن عيب هالشريحة إنك لازم تحط الجهاز ( فوق هامتك) لزوم الشوف على الطبيعة .. إنما فيه ميزتين هنا .. وهي بأنك تقدر بكيبل خاص توصله بقير السيارة إذا صرت تصيد لوحدك لتجد السيارة تسوق وتوقف من حاله وانت ماعليك إلا تكيل من الفشق وترمي .. وفيه كيبل ثاني توصله بلوحة السيارة الغرض منه لو اقتربت سيارة شرطة أو امارة يعطيك الجهاز تحذير بدل الجرس صوت يقول : ( جاك الذيب جاك وليده .. جاك الذيب جاك وليده ).
نجي لبرنامج ( فقعلوجيا) .. فعن طريقه وباستخدام قاعدة بيانات المكشاتيين ( السيول والأمطار (http://www.mekshat.com/vb/showthread.php?t=23962)) مع موضوع ( التعريف بالنباتات (http://www.mekshat.com/vb/showthread.php?s=&threadid=2320)) تصمم خرائط ( الفقع حول الرقروق) وتضيف معلومات عن الزبيدي والجبا والخلاسي وبعد ماتحط الشريحة وانت كاشت ( تنشق) الجهاز ورقة رقروق .. ثم راقب الشاشة.. وأكلف ماعليك سكروب أو ملعقة وهات ( يانبث فقع).
وعندك ( خرائط الزقرت ) تعتمد على معلومات مستوحاة من( المشراق (http://www.mekshat.com/vb/showthread.php?s=&threadid=19581)) + أرقام بطاقات الأحوال لربعك .. ولو اضفت صورهم يكون عندك نسخة مطورة تعرف بـ( خرائط اللزقات) والغرض منها لو بغيت تسج لحالك بالبر صبح خميس طلعت لك إحداثيات مكاشيت كل شلة وما عليك إلا تختار .. :D << بس تنتبه هنا من فيروس ( فلوق وصعارير ) بسبب ان قاعدة البيانات الأساسية مصدرها هاكرز مازالت روس اصابعة شكلها مربع . :mad:
----
أشوفك يالحبيب رايح في خرايطها ..إنما الميزة ان قواعد البيانات أرجعتها لمكشات .. وهذا اللي محليك ..
لكن ما علاقة ( الدولية ) بالموضوع؟

-------- يتبع

[المربد]

لا تـبـطي الله يعتق والديك من النار

[المترو]

السلام عليكم و رحمة الله
هلا ولا تبطي بس بصراحه كل هالميزات كوم وفقعوجيا كوم ثاني لو يحطون مثل هالميزات ويضيفون للحبارى حبرلوجيا والصقر صقرلوجيا عاد والقارمن اصلا تعريبه بمصطلحات غريبه عجيبه هي بوادي والغه العربيه بوادي الله اعلم من اخترعها
حياك ربي بالانتظار

الرحال2003

[خشم الحصان]

الاخ الغالي
(ملبد)
السلام عليكم
اخي الحبيب ابعد عن الداب وشجرته الله يغفر لنا ولك ولا تنشب(خشم الحصان) خله الين يغلق من مشراقه
لا يجيك مره وحده مثل كورة الثلج
اخوك
خشم الحصان

[رعد الجنوب]

السلام عليكم ورحمة الله وبركاته

اخوي الملبد اسلوب رائع بالكتابة الطريفة ماشاءالله هذا وانت ملبد
وشلون اذا فزيت ، اسلوبك يذكرني باسلوب كاتبنا الرائع الذي نفتقده من مدة حفرلوجيا
اخوي الملبد لاتبطي علينا فاسلوبك رائع ومشوق ومكشات كسب كاتب رائع .

اجمل تحية وسلام

[ريف النشاما]

:)

صدز إن الذهب في أعماق الأرض ولازم يبيلك منجملوجيا علشان تطلع

بس ياخوك هالجهاز مافيه شعرلوجيا ولسانن يلعلع بالقيفان :no:

أما أصابع لوجيا فهذه سلعه نادره ولاتوجد إلا في خشم لوجيا :cool:

تحيهلوجيا

[ملبد]

نرجع لصاحبنا راعي الخرايط..
----------
اخشى ( كما يقول المكشاتي ) من دعوى ترفعها شركة ( حارمن ومنطلان ) أو وكلائهم ..لأن هالخريط تبي تكسر ( احتكارهم ) .. ويتورط منتدى مكشات برفع الدعاوي ضده عالميا وماهي بعيد تصل الشكوى للأمم المتحدة.. لكن لو تحقق ذلك فهناك مكسب .. فقد نجد مرة , مالك المنتدى في حوار ببرنامج الاتجاه المعاكس يكشف الحقائق .. ومرة نجد المشرف على المنتديات في مؤتمر صحفي يعقده بمقر الأمم المتحدة يشرح ( خرايط مكشات ) وتشتهر عالميا .. وبعدها خذ ياعقود من كشاتة سويسرا واستراليا يبون خرايط لمكاشيتهم. :alarm:
-----
بعد أيام من هالسوالف قابلت هالفلتة المكشاتية .
* هاه .. وش أخبار خرايطك.
= اسكت تراني في مشكة وياليتك تشوف لنا طريق على السعلو يفزع لي .. واحد من عيالي لعب بالجهاز وطلع الشريحة ولا عرفت أعيدها.
* أفا .. وين ( ابداعك يامليح ) .. خل السعلو بطريقه وهات جهازك نصلحه .. انت يبي لك خرايط بدون شرايح .. وعساها بالحمل تثور.. :j
= قصدك تستهتر بي وبخرايطي... مابقى إلا تقول يا( الدبشة ). :no2:
* لا يامكشاتي .. افكارك ماعليها غبار .. وحتى لاتزعل .. اقول لك العمل المتقن يبدأ ( باشتعال) فكرة لاتأتي من فراغ.. وأنت تبارك الله أفكارك ( مولعة). :light: :hot:

[SilverSniper]

.... لا تعطني السمكة لآكلها.. ولكن... أرني كيف أصطادها...
----- أليس كذلك يا ملبد -------

[خشم الحصان]

الاخ الغالي
ملبد
السلام عليكم
اخي الحبيب هذي مشكلتنا معك سنك جلبة بزبوز خربانه مغبر تنقيط علينا في المواضيع ورا ماتجي مره وحده الله يغفر لنا ولك وتريحنا من الهواجيس اقول ياملبد خلك صريح وترك عنك مثل لي يقول
(اياك اعني واسمعي ياجاره)
مدامك حذرة كلن ينام علي الجنب لي يريحوه
تدري وش المشكله اخاف اذا قضو من خريطهم طلع لي يلخبطهم والمثل يقول( مابني علي باطل فهو باطل)
لكن قليبك حنين ماودك لوجع الراس ولا تحب المثل لي يقول
(انسانه حسين فروح ياحسين وان سانه ولدكم فالله ينزع عمره)
وانا اقول الله يجزك عنل كل خير
لئنه (مايحك جلدك احسن من ضفرك) ولا وشلك بضفر الناس ولا تحوم حول حلالهم
خلك مع اخونك
لئنه كانو امس وانت اليوم وباسر غيرك ولاياك طالب الناس مدامك (انت بديت وانت تحمل)
الا علي فكره فيه شربحه (متي يدخل الوسمي)
اخوك
خشم الحصان

[السمح]

طبيعة الغيور على مكشات ، والحريص على مكشات ، أن يتلمس هموم الأعضاء والمنتدى بشكل عام ، وهذا المقال مثال على ذلك .. فبارك الله فيك أخي الغالي وفي محاولاتك الدؤوبة من أجل لم الشمل والمساعدة .. وبدوري أضم صوتي إلى صوتك وأقول :

يامكشاتي .. افكارك ماعليها غبار .. وحتى لاتزعل .. اقول لك العمل المتقن يبدأ ( باشتعال) فكرة لاتأتي من فراغ.. وأنت تبارك الله أفكارك ( مولعة).

سلمت لنا وسلمت لنا خرايط رفيقك الجميلة

[المربد]

((.. خل السعلو بطريقه وهات جهازك نصلحه ))

هذا العشم بك وبكل مكشاتي دايم حاضرين للفزعة ،
مشكور اخوي الملبد على هالاهتمام والشعور الطيب نحو اخواننا في المنتدى

[المسفهل]

يا زين اللوبدة اللي يجينا منها مثل هالحكي
أنا أقرأ هنا لأستمتع مع أسلوب الملبد ونقده
وتوجيهاته ونصحه .. فلا تتاخر علينا .

[ابو شكاع]

رائع جدا ماشاء الله عليك

جازت لي قو تو ومطامر الجرفان ههههههههههههههه رهيب انت

طيب ابحث لي عن حبحرلوجيا ...........

[ملبد]

الأخوة : المربد , الرحال2003 .. خشم الحصان .. رعد الجنوب .. ريف النشاما .. SilverSniper .. السمح ..المسفهل ..ابو شكاع : أشكركم على كل ماجاء في ردودكم من مضامين :
:D :heart: :director: :alarm: ;) :( :(

ونتمنى لرفيقنا صاحب .. قو تو .. ولكل المكشاتيين أن يبقى مكشات ساحة لكل من ينتج وينشد الإبداع

[ذيب الجبال]

اخوي الملبد
ماشاالله عليك
اسلوب في الكتابه اكثر من رائع :good2:
واسئل خويك تسان عنده .... ربيعلوجيا.... :D
نورت مكشات بكتابتك اخوي الملبد
والسلام عليكم

[محبوب الجميع]

الاخ الكريم ملبد مشكور على الموضوع الرائع والجميل ... ماشاالله عليك

[ملبد]

ذيب الجبال : اشكرك .. اما الربيع هذه السنة .. الله يجيب الخير ..ماهنا زود .. والعرابجة ( أتلفوا الفياض بمخلفاتهم ) .. ودك بفيروس تزرعه في ( عقولهم ) بحيث إذا نووا يكشتون يوجههم لاقرب ( محرقة ومخمة ) في ديرته .. ويطلع له هناك لوحة ( زاهية وجميلة ) .. تقول : هذا المكان الأنسب لامثالك :good:

محبوب الجميع : اشكرك يابو عبدالعزيز أن رأيت الموضوع رائع وجميل ..

[الوهاج]

السلام عليكم ورحمة الله وبركاته ،،،
يعطيك العافية بس عندي ملاحظة صغيرورة على البيت الي في توقيعك وهي (الي يبينا عيت النفس تبغيه .... :p
مشكور على الموضوع مرة اخرى
اخوك الوهاج

[الوهاج]

السلام عليكم ورحمة الله وبركاته ،،،
يعطيك العافية بس عندي ملاحظة صغيرورة على البيت الي في توقيعك وهي الي يبينا بدلا من الي نبيه
مرة اخرى مشكور على الموضوع الرائع
اخوك الوهاج