يا شباب والله اني منقهر ومنهبل والفيوز طاقه ابي فزعتكم

[صياد المجمعه]

السلام عليكم ورحمة الله وبركاته

يا حبايب قلبي انا شريت لي طير حر من واحد والله ما اعرفه بس ما اقول الا الله لا يوفقه ولا يبيحه طبعا انا توني في البدايه يعني ما اعرف للطيور المهم ما لكم بالطويله شريت الطير على انه صايد حمام وكراوين على كلامه ويوم جيت اشريه الا والقى واحد من المخالب مو موجود يعني منكسر وسالته وقال لي اني انا قاصه عشان القرنسه وانا والله ما ادري وش السالفه هاذي مشيتها له المهم رحت هديت الطير على حمام والله يا شباب ان الطير ينحاش من الحمامه قلت يمكن تعبان ولا فيه شي وطلعت عقب اسبوع قلت ابي الوح للطير والله واجيب حمامه واربطها وابدا الوح له والله انه ينحاش من الحمامه وش تشورون علي يا شباب وش السوات والله ويعلم الله اني افكر في هالطير 24 ساعه وادعي على الي باعني الطير في كل سجده وحسبي الله ونعم الوكيل عليه...

[hamdani]

حسبي الله ونعم الوكيل

[صياد المجمعه]

وللمعلوميه اني شاري الطير تقربيا بــــــ 3000 ريال تكفون ابي الاجابه اليوم قبل بكره لاني انا طالع للبر بكره ان شاء الله وابي اخذ الطير معي لعل وعسى انا غلطان ولا فيه طريقة تعلمني عليه وللمعلوميه ان الطير اذا عطيته سماان ياكلها كلها انا الحمام والله ما يقرب عليها يخاف منها هاذا مو صقر هاذا عصفور حسبي الله ونعم الوكيل

[الكايد 123]

انشاء الله يفيدونك الاخوان

[NAWAFQ8]

والله وانا اخوك ان كان بينك وبين الرجال شروط رد له الطير
اما اذا انت ماخذه من غير شروط الله يعينك
افحص الطير واقصر العلف عليه او طوفه يوم او يومين وادعه ملواح وشف عل وعسى يتغير
ان شاء الله
والله يعوضك خير منه(( ملاحظه))(( الطير شنو نوعه وكم طوله وكم عمره ))

[العود&& الازرق]

حسبي الله ونعم الوكيل يااخي استشر احد يعرف في الصقاره قبل تشري لكن نقول الله يعينك تعلم عليه (جسر الطير على الحمام حتى يتعلم ) تقبل مروري ؟.؟؟؟؟؟؟

[ذيب العلايق]

الله يعوضك خير
ولا تشتري شي الامشروط
او على نظر شخص تثق فيه
وبعدين هاالاشياء قد ماتضيق الخاطر
الا ان الواحد يستفيد منها كثير

[راعي جملا]

طيب قل لا اله الا الله
يمكن الطير توه طالع من المربط وفيه وحاشه وعديد
انقل الطير ورببه ونزل من عدته شوي وسم بالله
التمس لخوك العذر يمكنه صادق بس ماعرفت للطير
بالتوفيق

[sasooo315]

يعنى تعترف انك غشيم بالطيور وفوق كل هذا تسلم نفسك بسهوله لشريطى وحنا نعرف ان الشريطيه الله بالخير وحبيبنا محمد يقول (التجار هم الفجار يوم القيانة )

اجل لو جاكم بكرى واحد يبى يخطب منكم ويمدح نفسه قدامكم خلاص تسلمونه قطعه منكم كذا والسلام

لا تزعل منى اخوى ان قسوت عليك فهذه هى الحقيقه المره ومشكلتنا دايم اننا طيبيين بالحيل ولا نطالب بحقنا :mad:

[المري]

يمكن الطير توه مطلع من الربطة!!!

لانه ماهو معقول ان الطير ينحااااش من الحمام !!!!

اخوك - المري

[فالح العرجي]

اخوي الفاضل الطير ماينحاش من الحمامه ينحاش منك انت لان فيه وحوشيه
يمكن توه مشيول من المربط الطير يبيله شغله تدهيل ثم دعو بخيط بعدين تمرجه بخيط طويل شوي
وبعدين توجبه يوم وتدعيه مرج شغله طويله لاتدعي على الرجال ترى على كتف ملك ويقول اذا دعيت
ولك بالمثل قل الله يهديه في مايحب ويرضا ترى كلنا مسلمين مايجوز تدعي على اخوك المسلم وانت
تجهل في الطيور وانا اسف على الكلام اللي طلع مني لاكن احسن شي تسويه وانا اخوك
رح الى اقرب صقار واساله وتعلم منه ترى مهوب عيب الا يزود في عمره
والله يوفقك في مايحب ويرضا ويوفق الجميع واسف على الاطاله

وتقبلوا مروري

[روح الانوثه]

مدري

الله يكون بعونك

وسعع صدرك الدنيا ما تسوى

[الشبانه]

اول شي وانا اخوك مهب كنك مكثر علف الطير يعني سمان كامل مهب واجد؟؟

[ALAMIR]

لا تدعي على أخووك المسلم

بل قل الله يهديه

وفااادووك الأخوااان واستفيد منهم

[صايد وفايد..]

الله يكون بعونك

[القطاوي 2008]

حسبي الله ونعم الوكيل

[واوك]

اخوي :

لا تظلم صاحب الطير يمكن طيرك شاريه ماتدرب على الصيد

وهذذا هو الحل الاكيد والطير اذا ماعلم ولا درب ماصار الطير الي عليه

الكلام

على العموم طيرك اكيد انه ماتدرب هذا هو الجواب

[صقار حائل]

السلام عليكم ورحمة الله وبركاته



والله يا خوي اذا الرجال الي شريت منه الطير قالك انه يصيد ويطرد الحمام والكراوين وماصاد هاذا كذب عليك والله يعوضك ولاكن انت تقول اني توني بادي فالصقاره والطير يبغاله مدابر وناخوك
والشي الي اهم من الكلام هاذا كله يعني الطيور الطيبه ماهي بالسعار هاذي الوكري اذا هوطيب بالكراوين يسواله اكثر من 3 الاف والطير الي انت شاريه ب3 الاف وحر يعني الطير الحر الي يلحق الكراوين ويصيدها مايقل عن ال10 الاف الى 8 للي محتاج
وانا رايي انك تحطه عند واحد شريطي يبيعه منشان ماتخسر فيه او تبادله في شيهانه طيبه

والله يعوضك اخير منه ان شالله

وتقبل تحياتي
اخوك صقار حائل

[صاحب نوماس]

لا تدعي على أخووك المسلم

بل قل الله يهديه

وفااادووك الأخوااان واستفيد منهم
:good: :good: :good: :good: :good:

وياخوي حاول تقصر على الطير ممكن الطير صنيع والطير ماينحاش من الحمام نهائيا بس انت الظاهر انك استعجلت فالحكم على اخوك المسلم انقل الطير ودهلة يمكن الطير فية وحاشة وباذن الله تبي تدعي لة

[نمر الصحراء]

السلام عليكم
اخي بدل ما تدعي على الرجل ادعيله

[صياد المجمعه]

شكرا لكم يا اخوان لكن والله انا وريته صقار وقال لي انه غاشك ما اقول الا حسبي الله ونعم الوكيل

[التميمي11121]

حسبي الله و نعم الوكيل

[@قرناص@]

الطير اكيد انه صنييع ,,

اقصر عليه بالعلف كم يوم وان شاء الله انه بيهد .. ولاتستعجل ,,

[الامبراطوري]

اخوي صقار حاايل :(وانا رايي انك تحطه عند واحد شريطي يبيعه منشان ماتخسر فيه) وشلون يحطة عند شريطي ويبيعة على شان مايخسر فية يعني تبية يغش غيرة المفروض تنصحة غير هالنصيحة والله من وراء القصد .. الدين النصيحة ،

[الهجاني]

السلام عليكم ورحمة الله وبركاته

يا حبايب قلبي انا شريت لي طير حر من واحد والله ما اعرفه بس ما اقول الا الله لا يوفقه ولا يبيحه طبعا انا توني في البدايه يعني ما اعرف للطيور المهم ما لكم بالطويله شريت الطير على انه صايد حمام وكراوين على كلامه ويوم جيت اشريه الا والقى واحد من المخالب مو موجود يعني منكسر وسالته وقال لي اني انا قاصه عشان القرنسه وانا والله ما ادري وش السالفه هاذي مشيتها له المهم رحت هديت الطير على حمام والله يا شباب ان الطير ينحاش من الحمامه قلت يمكن تعبان ولا فيه شي وطلعت عقب اسبوع قلت ابي الوح للطير والله واجيب حمامه واربطها وابدا الوح له والله انه ينحاش من الحمامه وش تشورون علي يا شباب وش السوات والله ويعلم الله اني افكر في هالطير 24 ساعه وادعي على الي باعني الطير في كل سجده وحسبي الله ونعم الوكيل عليه...

كذلك انا مثلك في بدايتي شريت من شخص يدعي الصقارة وان سلعته تمشي والكل يمدحه شريتلي وكرية وهي في المربط طلعتها واشوف الطير يصيح وعلمته وقال هو متوحش توه طالع من المربط انقله واجد وبيهدأ وما اخفيكم نقلته تقريباً شهر ونصف ولا زالت الصيحة في وهذا يقول انه كان راكد معه وصايد حبارى وكله كلام في كلام اتمنى من الناس ان يتحروا المصداقية في البيع والشراء حتى الله يباركلك وكل من اشترا من عندك دعالك بالتوفيق... ولا نقول الا حسبنا الله ونعم الوكيل ...