أقرب ربيع للدمام

[القماري]

السلام عليكم ورحمة الله وبركاته
أخواني أعضاء ومشرفي وزائري مكشات الكرام أتقدم بداية للجميع بالتهنئة بعيد الأضحى المجيد أعاده الله علينا وعليكم وأنتم تنعمون بالصحة والعافية.
ثانيا لي طلب عله يكون خفيف على قلوبكم أجمعين
وهو عن أقرب موقع للربيع في المنطقة الشرقية (بحدود الصمان) لأني وبصراحة حاب أن أكون دليل للشباب في طلعة العيد والنية هي البحث عن هذه الكنوز المسماة فياض وخباري ومياه,
كما وأتمنى وضع الإحداثيات لتلك المواقع
وتقبلوا تحياتي وإحترامي لكل من قراء وأطلع وشارك في الرد ، وكل عام وأنتم بخير

[القماري]

يرفع الموضوع والأمل مازال قائما مع الشكر والتقدير للجميع

[كشات]

بسم الله

الاخ الغالي القماري
كل عام وانت بخير ومن العايدين الفايزين

اخوي يبدو لي والله اعلم انك منقطع عن المنتدى شبه انقطاع كلي
لو لاحظت اغلب المشاركات كانت عن الصمان وفياض الصمان واغلبها ليس بالبعيد عن المنطقه الشرقيه وخصوصا بعد فتح طريق قريه العليا - الرفيعه

اما بالنسبه لاقرب فيضه للمنطقه الشرقيه وقريبه جدا للمزفلت بل ان المزفلت يمر عليها فهي حسب علمي روضة (المصرعيه) جنوب الصرار( 60 كلم تقريبا عن النعيريه) على طريق النعيريه -خط الرياض الدمام السريع

واي طلب انت تامر يا غالي

[القماري]

تسلم أخوي كشات على التعقيب وألف شكر على الرد. بس بعد أذنك خلني أكتب قصتي (البحث عن الربيع)
بعد أن مليت من البحث في مكشات وما يشابهه من مواقع برية (البحث عن ربيع قريب من الدمام)
توكلت على الله وتسلحت بجهاز جارمن وخارطة الفارسي لقطاع الشرقية ورافقني أحد أخوياي (عل وعسى نصل لموقع ومنه نخبر بقية الربع حتى يلتحقون بنا) أنطلقنا من صباح يوم الخميس مع بزوغ الشمس وتوجهنا للنعيرية وطول الخط وعيوننا على البر يمين وشمال (كان في البداية المنطقة مربعة على خفيف - تقريبا في خط موازي لمدينة الجبيل - طريق أبوحدرية) وبعد ذلك بدأ المنظر صحراوي أكثر من أن يكون مربع. وصلنا للنعيرية ونزلنا بالسوق حتى نبحث عن الفقع (إذا وجد بالسوق فالمعنى أنه بالبر موجود) لم يكن له أثر على الإطلاق .
عموما تسوقنا لمدة نصف ساعة وتوجهنا لطريق النعيرية الصرار وسرنا مسافة تعدت ال50 كلم والبر هو البر ولا أثر لربيع (ذاك الزود) فقط بعض المزارع ( مربعة وهذا أمر طبيعي ) عدنا أدراجنا وأنعطفنا يسارا لمنطقة تسمى ( الكهفة ) تبعد تقريبا 20 كلم أو أكثر عن النعيرية ، كان مدخلها يبشر بالخير (خضار متفرق وأبل ترعى هنا وهناك) وصلنا حتى أنقطع الطريق الأسفلت وسرنا بخط صحراوي ممهد مسافة 10 كلم ولم نرى فرق عما رأينا من قبل (أعتقد أننا هنا في حدود الصمان) ، بعد ذالك رجعنا النعيرية وتوجهنا إلى السفانية من الطريق الثاني وبداء الجو وحرارة الشمس تغير المزاج (كأننا بالصيف) وصلنا السفانية والأرض معشبة على خفيف ومتفرق والخيام أكثر من العشب (الخيام عند مدخل النعيرية ومخارجها أكثر من شعر الرأس) ثم عدنا أدراجنا لمنيفة وراس الزور وكل هذا ولم نلحظ ربيع بالمعنى المتعارف أو كما يصلنا من صور في موقع مكشات . بعد ذلك قررنا العودة للمناطق الصحراوية ( الطعوس) حتى وصلنا بحدود الجبيل وأنعطفنا يسار وبالمصادفة رأينا فيضة مربة (الصورة مرفقة) وخيمنا بها وأستدعينا بقية الشباب وكان هو الربيع الأقرب وجلسنا حتى مساء ليلة السبت.
(هذه الفيضة ليس إلا مزرعة مهجورة)

http://www.arab3.com/images14/34323832.jpg

[ابو_حمد]

وعليكم السلام ورحمة الله وبركاتة (((اخوي الكريم القماري ))) موفق والله يسهل اموك وعلي بركة الله استعدو

[cayenne]

حيالله القماري .. وحيالله اهل الشرقيه ..

بالنسبه لسؤالك اخوي ..

عندك الحين السفانيه وبعدها راس مشعاب من افضل المناطق ..

طبعا ما تقارن ابدا بروضات الصمان ...

وعلى فكره ترى الصمان 80% طريقها مزفلت من الدمام ..

الدمام - النعيريه - قريه العليا - الرفيعه ..

قبل الرفيعه وانت طالع من قريه العليا بتجيك لوحة ( بلدة ام الهوشات ) .. لف معها يسار ..

وبتمشي بخط صحراوي يوديك للديره .. وبتلقى على اليمين وعلى اليسار روضات حليوه ..

وفيه عندك بعد ما تعدي الرفيعه امش الين يجيك درب الهدباء .. وبتطلع معه يمين ( شمال غرب )

وهذا الدرب امش عليه بيوصلك الين خبراء الخمه وهي محميه . كمل طريقك على هالدرب وبتجيك روضات يمين ويسار ..

ولو عندك خريطة الصمان اللي مع كتاب الشبانات بتصير الدعوه اسهل بإذن الله ..

وحنا في الخدمه في اي وقت .. :)

[القماري]

مشكور يا ابو __ حمد وسلمك الله ، مليون ألف شكر يا cayenne على التعقيب والتوضيح.
وبصراحة كان بودي لو أنه صار قبل ما أطلع في الرحلة السابقة (تعرف كنا بإجازة)
والقصد ودي بربيع قريب (أنه يكون بحدود الدمام أو في منطقة بين النعيرية و عريعره )
عموما شكرا للجميع