أنا.... وعمي.... ومكشات

[SilverSniper]

بسم الله الرحمن الرحيم...
السلام عليكم ورحمة الله وبركاته... حيالله كل المكشاتيين ويا هلا والله ومرحبا... :heart:
صار علي سالفة... سولفتها مع عمي الله يسلمه .. وتناقشت أنا واياه فيها وبغى يلهمدني بمرباع لولا ان الأهل حطوا العشا وقاطعوا هذا النقاش الودي والهادئ :j .. بس عجزت اني أوصل له وجهة نظري في هالنقاش مع اني حاولت جاهدا اني أوصله... قلت... خل أطرح الموضوع .. وأشوف رايكم...
كنت بالمزرعة وأنا كنت ناوي أكشت لكن قالوا لي العمال ان القملة لعبت في الغنم وماطور الرش عيا يشتغل.... وأنا ماخذ اللابتوب معي لأني كنت ناوي أطلب صبابات لعمود الكامات وطرمبة بنزين وشوي عدة للمرهم ...طلبتها.. ثم طلعت وقعدت أشتغل في الماطور وأصلحه... ووصل عمي توه جاي من البر.. (( عمي هذا راعي بر بقوة... من النوع اللي يفترش الأرض ويتلحف السما ولا يعترف بعدة كشته ولا فراش ولا غيره ولاهنا مكان الا وقد راح له..ما شاء الله عليه )).. المهم اني صلحت الماطور واشتغل.. ودخلت بيت المزرعة وشغلت اللابتوب وخشيت مكشات... قلت ان ما أمداني أكشت على موتري ... أقدر أكشت في الانترنت.. المهم ... جا عمي وشافني منهمك بالهكمبيوتر حتى يديني ما غسلتها عقب زيت الماطور..وجرى بيننا هالحوار...
عمي..... وش عندك يا عبيّد..
أنا ....... كاشت يا عمي..
عمي..... وين كاشت فيه الله يقطع ابليسك.. تستهبل انت ووجهك.. احترم عمك يا جحش..
أنا........لا والله يا عمي .. أنا صدق كاشت.. شف..
(( يلقي عمي نظرة على الشاشة ))
عمي.....وشو ذا.. من وين صورت هالصور؟؟
أنا......ما صورتهن يا عمي.. هذا منتدى مكشات.. وهذي الصور صوروها أعضاء مكشات النشامى..
عمي...وأعضاء مكشات ذولا.. وش يصيرون.. ؟؟
أنا..... هذولا يا طويل العمر كشاته.. راعين بر مثلي ومثلك.. يروحون لهالأماكن ويصورون ويورون الناس تشوف الربيع والصيد والخير..
عمي... وغير هالصور وش فيه..
(( عارف أنا ان عند عمي نفس الهواية القشرا اللي عندي فدخلت خيمة الأسلحة ))
عمي... الله الله الله.... وش ذا المزيونة يا عبيّد.. اثرك تغازل يا جحش...
(( قالها يوم شاف البنللي سوبر بلاك إيجل 2 بموضوع بري بحري ))
أنا... (( بعد لزخة على الظهر بيد عمي الثقيلة )).. أحححححووه.. احه.. هذي يا عمي توها نازلة وجديدة
عمي...إيه.. هذا الشغل السنع.. بس فيه شي ما جاز لي..
أنا.... وشو يا عم..
عمي... اللي ينشرون صور الرياض والفياض ويدلون الناس على أماكنهن ويصير كل من هب ودب يروح لهن
أنا......البر يا عمي ما حوله شبوك .. وكل من وده يكشت يكشت..
عمي...أنت الظاهر دبشة.. هالحين وش ودك.. تروح لروضة ما قد داسها أحد والربيع فيها يهول؟؟ والا روضة كلها مديوسة وكلها قراطيس وقراشيع وحفايظ بزران وبلاوي؟؟
أنا.... الله يسامحك يا عمي.. هالحين أنا دبشة؟؟.. طبعا الروضة الزينة والنظيفة هي الأفضل.. لكن مهوب كل من طلع يبي يوسخ الروضة..
عمي... شف وأنا عمك.. الناس أجناس.. ناس يحبون الطلعات والبر .. ويخلون المكان إذا طلعوا ما فيه أزين منه.. وناس ما ودك يطلعون... ودك إذا طلعوا انك تلقط هالشوزن هاللي في المنتدى وتثور فيهم.. وسخ وحفايظ وبلاستيك ... يخلون الروضة خوضة..
أنا... أنت صادق يا عمي.. لكن.. وش دخل مكشات..؟؟
(( قنعني عمي بالبيالة مع راسي))
عمي.. أنت يا عبيّد يبيلك من يلهمدك بعمود خيمه حتى يطيح هالطين اللي على دمجتك ويتفتح مخك..افهم يا دلخ..
أنا..... أح.. عمي.. فقعت راسي.. ولا فهمت شي..
عمي... اسمع وأنا عمك.. هالصور ما شاء الله... شي يهول.. يبي يشوفها واحد ما يعرف البر .. ومعه كامري والا كورولا.. ودرزن بزارين كل واحد أشطن من الثاني.. ويشوف احداثية المكان والا يسأل عنه.. ويروح يكشت ويخرب هالمكان ..
أنا.... بس يا عمي الله يسلمك.. اللي ما يعرفون البر.. ما يعرفون مكشات..
عمي.. أنت الظاهر هالانترنت ماخذتن قطعة هالمخ اللي باقية في راسك ولا تقرا جرايد... صور مكشات وعنوانه شفها بالجريدة.. أنت وش بلاك اليوم وأنا عمك..
أنا... ولو يا عمي.. العضو اللي ينشر الصورة .. يبي المكشاتيين يشوفون .. وحاط في باله انه محد بيطلع الا راعي بر..
عمي... لا وأنا عمك.. الصور ذي لو شافها حمار كان هيضته للكشته من زينها.. وبعض هاللي يشوفون هالصور تشب عليهم حريمهم وبزارينهم يبون يروحون لهالمكان.. والنهاية مأساة للروضة أو الفيضة..
أنا... طيب وش الحل يا عمي برايك..
عمي.. الصور زينه.. بس اللي يحطها ودك انه ما يبين وينهي فيه..
أنا... طيب وش الفايدة يا عمي.. المكان مهم عشان نروح له.. العضو لازم يحط المكان والا بننقد عليه..
عمي.... افتح مخك يا بو... لو حط المكان تراه بيصير مزبله.. عندك ناس دبش ودك اللي يطلع منهم عن الزفلت انك تخمع راسه بالعجرا وترده للزفلت.. اللي يوطي الروضة.. واللي يفحط فيها واللي يوسخها..
أنا... طيب .. ممكن نوعي الناس .. لا توسخون .. لا توطون.. لا تفحطون..
عمي... أنت صاحي وأنا عمك؟؟؟.. توعي اثنين والا ثلاثة والا عشرة والا عشرين ؟؟؟.... ذولا عالم .. ولو تقول له رح يمين راح شمال.. مالهم حل وأنا عمك..
أنا... بس مكشات عنده ستيكر..
عمي... أنت الظاهر منقلب راسك وأنا عمك.. ستيك؟؟؟... حنا بنشيل خضرة حنا؟؟؟؟
أنا..... لا يا عمي ستيكر يعني ملصق... ملصق مكشات .. مكتوب عليه حافظوا على نظافة البيئة..
عمي... أنت الظاهر يبيلك رزحة على راسك بهالدولاب.. أقول لك ما يعلمهم شي ذولا .. ما لك الا تردهم عن البر وبس.. ما هامهم ملصق ولا غيره..
أنا... بس يا عمي لازم فيه طريقة نوعيهم..
عمي... لا وأنا عمـ.......
(( رن جوال عمي ورد عليه ))
عمي.. طيب.. ايه.. في المزرعة.. حطيتوه؟؟... وشو....... طيب ... لا .. عندي عبيّد... طيب... فمان الله..
عمي.. يله وأنا عمك.. أهلك حطوا العشا... مر مخبز المحارب وأنت داخل وجب لهم على دربك بريالين بر.. بتلقاني هناك..
أنا.. أبشر يا عمي.. سم..
-----------------------------------------
أترك لكم التعليق على هذا النقاش اخواني الأعضاء وأشكر لكم قراءتكم للموضوع..

[راع الكحيلة]

:D :D :D

سرد جميل



تدري وش اللي حبّبني في موضوعك هذا









إن عمّك شبيهي في كل اللي قاله لك عن هالناس إلا إن يدي أثقل منه شوي بالحيل :D

[رفيع الشان]

عمي... الله الله الله.... وش ذا المزيونة يا عبيّد.. اثرك تغازل يا جحش...

انا وصلت هنا وفقعت ضحك ... لي رجعه بس اصبر كم يوم الين اروح الديره وافضا لمكشات :)


لاهنت يالغالي ...

(( جهز حالك ياسلفر سنيبر :) عندي ام خمس براوينغ ام زناد مذهب اعطا واحد قبل عشر سنوات ورجعها ماعاد تلقم اتوماتيك :D ))


فمان الله

[أبو تركي القطامي]

والله أن عمك مزدي بك :D
وهو صادق يا سنايبر بعض المطافيق يخربون أي مكان يجونه
وتسلم يالغالي على السرد الممتع والحوار :good2: عن هذه النقطه

[نفل]

وعليكم السلام ورحمة الله وبركاته

هلا بالاخ SilverSniper

والله انك صادق وعمك صادق وهذا الموضع يطري على بالي كل ما ادرجت صورة
بالمنتدى والحل بيني وبينك صعب لكن انك ما تعلم وين الفيضة اعتقد بعد ظهور الجي بي اس
وخرائط الصحراء وغيرها اصبح مابه مكان يخفى على الكشاته وغيرهم .
والتركيز الآن على التوعية باهمية نظافة المكان قدر الامكان لكن مع الاسف ما زال هذا الامر
لا يلقى الاهتمام الكافي من وسائل الاعلام او حتى المدارس خاصة الصفوف الاولى .
والكلام يطول والله المستعان ومشكور اخوي وما قصرت على طرحك للموضوع وجزاك الله خير

اخوك ابو محمد

[أبو فالح]

السلام عليكم ورحمة الله وبركاته


:heart: سلفر سلفوري :heart:

تدري أني تمنيت لو كان جوال عمك على الصامت

علشان ما ينقطع ها السرد الشيق

وعلشان ايكمل عليك
ومع السلامة

[رفيع الشان]

أخوي سيلفر سنيبر :) بعد التحيه ...

أحسن شي في موضوعك كلمة ( ياجحش ) :D لأنها بذكرتني بواحد من الشيبان الله يطول بعمره على طاعته لما الواحد يسوس حاجه غبيه يقول( ياجحاااااااش )...

نخش بالموضوع .... عمك هذا من الطراز الأول ... قسمن بالله فيه مواقع اروح لها وأحاول مااحد يدري ولما نروح مجموعه أوصيهم انتبهوا لااحد يعلم على هذا الطريق :) تقول انا سارقين غنم وأمشي واقول انتبه لااحد يشوفنا رايحين مع هالطريق ...

لا والطامه في واحد من الاماكن العزيزه على ودايم اسير هليها غير معروف يعني مااحد يروح لما اروح وانا راجع اقفل الخط يعني اللي يشوف الطريق يقول ماهوب نافذ <== شف الخبث :D

لأن فيه ناس يجيك محمل الددسن ولا الهايلكس طن ونص اكياس ويرجع بثنين كيلوا من الاغراض والباقي مخلفات ... بس انا ملاحظ ان فيه ناس بدأت تتعلم النظافه في المناطق البريه ....

ولاتفكر ترى العرق دساس لما يكون معك واحد اهله طيبين ومتعود على النظافه في البيت تلقاه من يوم يجي .... لاحد يوسخ ... فلاح ارفع الكوب .... حسين شل الكيس شلوا شياطينك :D
7
7
ما ودك تفكنا من الفلسفه

المهم سلمني على عمك وعلى نفسك وودنا تبشر عسى المرهم ضابط وضعه وش سويت عملية سيلكون للرفارف وش (صدر) وتعديل زقم :D


فمان الله

[المترو]

السلام عليكم ورحمة الله

صراحه عمك هذا داهيه وكلامه 100% وصح لسانه ودك اهل الهللللي والكامري مايعرفون هالمناطق لانهم يفسدون الارض اللي يمرون عليها ولا لهم حل ؟؟؟؟؟؟؟؟!!!!!!!!!!
امس انا امشي جنب روضة حسنا السبق وهي تمطر و شلة ورعان معهم هلكسات تدرون وش يسوون بوسط الفيضه يخمسون قال ايش قال نطين المواتر الى ان صار لونها طيني والفيضه صلع العشب اللي فيها

لكن انا شخصيا اي مكان مشهور ما امر عليه ابداً اقل شيء 50 كلم عن المزفت والا اعتبر نفسي ماني كاشت بشرط انه ماحولي احد ولا انوار والا قرى

سلمت انت وعمك وموضوع بمحله


الرحال2003

[كايد]

احسن شي بالقصه انها منك يا سلفر
والله يطول بعمر عمك على طاعته
والله لا يفرقكم

[Bader-M]

والله انه صادق عمك

ولكن لا تخاف نوعيه هذه الناس ما تبعد عن المدينه

حدها الثمامه وان خربوها شعيب الطوقي


كل عام وانت بخير

[المسفهل]

كل الشكر لك أخي الغالي SilverSniper على هذا الحوار
الهادف .. وأنا أميل مع عمك الحكيم فهناك أناس عاشوا وتربوا
على الفوضى ولا يهنأ لهم بال إلا أن يتركوا المكان أقذر من المزبلة
- أعزكم الله - .. ولكن لا حيلة في منع مثل هؤلاء الناس فقد تيسرت
السبل ووجدت المراكب التي تصل لأوعر الأماكن ووجدت أجهزت
الاتصالات وأجهزت تحديد المواقع .. فإلى الله المشتكى ، فلم يبق
إلا التوجية والنصح والإرشاد .

[رعد الجنوب]

السلام عليكم

اخوي الصياد الفضي حفظه الله تعالى
اسلوبك رائع لتوصيل المعلومة بالحوار الجميل
وانا في صف عمك الله يحفظه لك

كلامه صحيح لكن صعب تحقيقه لان مصادر المعلومات كثيرة ،
وللأسف يوجد فئة من الناس لاتقبل بالنصح اوان وعيها لم يصل الى مستوى تقبل التوعية والنصح،
مع انه لاطريقة للحفاظ على البيئة الى بالتوعية والتوعية المكثفة ،
ومن الصعب ان يستخدم المنع وقد جرب في مجتمعنا في نواحي كثيرة
ولم يعطي النتائج المطلوبة ،
الجهات المسؤلة لم تقصر في حماية بعض الفياض ببتسويرها لحمايتها من دخول السيارات
داخل الفياض ولكن للأسف هذه الفئة من الناس تقوم بكسر الابواب وادخال السيارت واتلاف
ارض واشجار هذه الفياض وقد رايت ذلك في بعض فياض الصمان ،
والكلام عن هذا الموضوع يطول ولكن ان اكثر الحلول المجدية هيا التوعية التوعية
والتعاون لنشرها من الجميع ولايعتمد فقط على الجهات الرسمية ،

اجمل تحية

[ماجلان]

ِشكرا لك يا أخي SilverSniper على طرح جميل وممتع لموضوع مهم

أهم قاعدة في الطلعات البرية : لا تأخذ أي شئ إلا الصور، لا تترك أي شئ إلا الذكريات، لا تقتل أي شئ إلا الوقت وفي تقوى الله وأهتم بنظافة وسلامة البيئة

هذه القاعده منسيه أو غير مدركه من قبل الكثير إلا من رحم ربي

المنع ( عن طريق عدم نشر معلومات أو صور في المنتدى أو غيره ) قد يفيد على المدى القصير ولكن زياده الوعي هو الحل على المدى الطويل

الوعي يبدأ في البيت منذ الصغر ومن سبل تعزيزه التذكير المستمر بطرق مختلفه بالنتائج الوخيمه على البيئه
استكر مكشات للمحافظه على البيئه محاوله جريئه وهذا وقت تفعيلها حيث أن اصدار الاستكر جاء في غير موسم
أيضا بالامكان تخصيص موضوع أو مواضيع لنشر الصور التي لا نريد رؤيتها ( جميع أشكال الإساءه للبيئه ) بدلا من أو بالإضافه إلى الصور الجذابه للسيل والربيع

[تالي الاولين*]

.


اسلم ...

وعساك مانسيت الخبز <--------- منسجم مع السالفة

.............

تصدق عاد احترت في راي عمك شوي اقول معه حق وشوي

اقول لا .

لكن تبقى توعية الناس شي مهم

يعطيك العافية ياراعي المجمعة


.