من عنده طريقه لتدفئة الماء من تانكي السياره ؟؟

[الابهق]

من عنده طريقه لتدفئة الماء من تانكي السياره ؟؟

[الضاري]

أذكر صار فية مواضيع ومناقشات بين الأعضاء حول هذا الموضوع ..

فياليت اللي عندة رابط لأحد المواضيع التي تهتم بهذا الأمر أنزال الرابط ليستفيد منة الجميع..

[بــرق الشمال]

اخوي الابهق..عندي طريقتين وعساه تنال اعجابك
الأولى:قلب صخانه تشبكه على البطاريه وتحطه في التانكي قبل تنام تقوووم الصبح ولااروع..
والثانيه:غلايه شاهي..وطريقتها مثل الاولى هذا اللي اعرفه واتمنى اني افدتك..

[الابهق]

شكرا على الرد لكن قلب السخانه وغلاية الشاهي تحتاج الى كهرب اكثر من الكهرب اللي يعطيكياه المحول

[بواسامه]

فيه حركه حلوه مسويها واحد من الشباب
وهي سلمكم الله كالآتي
راس دافور بريموس
لف عليه صاجه واحد ملم بارتفاع 15 سم
ثمن لف داخل الصاجه بطريقه مرتبه ودائريه ماصوره نحاسه مثل تمديد المكيف الداخلي
مقاس قطرها واحد سم
ثمن فتح في الصاجه الحديد فتحتين اعلى واسفل
اسفل يشبك بها اللي الجاي من التانكي حق السياره
والفتحه العلوية بها اللي للمويه الحاره الخارجه من اللف النحاسي
طبعا المويه تدفئ اذا شبيت الدافور وحسب حاجتك من الحراره تزود او تنقص من الشعله
المهم الحركه جدا روعه
ورفيقي جدا مبدع الله لا يضره
واذا تيسر اضفت لكم الصوره اذا عنده شي جاهز

[googl11]

فك تانكي البانزين وولع بالسياره وصدقن راح تسوي شاهي وقهوه بعد الله من العجز هههههههههههههههه

[محمد الحماد]

فك تانكي البانزين وولع بالسياره وصدقن راح تسوي شاهي وقهوه بعد الله من العجز هههههههههههههههه




أنا مع هذه الفكرة

والله لقد أضحكتني كثيراً

تقبلوا مني التحية ..

[البّري]

اخوي الأبهق

يرهم للتانكي قلب سخانه ويشبك على البطاريه أو محول كهرباء

تراها مجربه وفعاله

وعلى فكره تراي جربت كل انواع التدفئة
ما لقيت احسن من انك تتوضأ بماء بارد

حيث انك اذا توضأت بالبارد اي شيء يدفيك

أما اذا توضأت بالماء الحار ما يدفيك شيء

تقبل مرور اخوك البرّي

[جهام القصيم]

كلام البري صحيح الى يبي الماء الحار يجلس في البيت عند الصخانات

[ابوطاقية]

يوجد قلب مثل حق الصخانه يشتغل على 12 فولت و 24 فولت وقيمته رخيصه لايتعدي 120 ريال
هذي صوره للقلب
http://www.svhotwire.com/assets/htr12_120.jpg
http://www.hydrogenappliances.com/12Vheater.jpg
http://www.hydrogenappliances.com/stocktankheaterdraft.jpg

[مساير الليل]

عندي لك طريقه زينه قبل لاترقد وتطفي الضو أملاْ بريق التفويح وحطه على الجمر ألي باقي

ولاقمت الصبح ألهو دافي وش زينه

الطريقه مجربه في كل رحله وعلى كل من يريد الوضوء يصب له مويه باردهـ ويدفيها بشوي من الحار

[عالم الوسام]

السلام عليكم
اخي ابو طاقية وين احصل السخان اللي ذكرته

[حجازي20]

المرباع منزل سخان للتانكي

[أبوصالح9]

الله يعينك على المشق اذا سخنت الماء شكلك ماعمرك شفت شطوب بيدينك

غسل بالبارد وتلهلم بالشماغ والفروه والحمدلله

واذا تبي ماء دافي لاتنسى تشري فازلين تراه زين بالحيل للمشق

بالتوفيق

[أبوي أنت]

هذي افضل طريق واسرع للتدفئه
واعتقد انه يبيعها السنيدي

ولع النار وينزلك الماي حار


http://www.mekshat.com/pix/upload07/images/2014/01/mk197554_1.488753416E+15_image.jpg

[كاش مكشات]

قبل لاتقوم من النار حط المفواح على النار ويوم تقوم تبى تنام خذ المفواح وافرغه بترمس الماء بشرط ان لايكون مغلى مررره ويوم تقوم من نومك تجد الماء دافى بس لازم تكون الترمس من النوع اللى مخرج الماء من الترمس يكون فرار مو ضغط عشان تفتح الفرار حتى تخلص وتغلقه مثل البزبوز

[رائدبن سليمان]

الافكار واجد وكلها جميله

[ساقان]

سخان 12 فولت وين أماكن بيعه يالربع

[مجالس الرجال]

كنت سابقا حاط بالحوش سخان واذا بغيت اكشت عبيت التانكي منه على درجة 80
حاليا حاط بالتوانك قلوب سخان حق البيت واشبكهن بعد ما افلل التوانك وياخذن تقريبا 6 او 7 ساعات
وعندي محول 2000 وات يشغل قلب السخان لكن لابد الموتر يصير شغال
لاني جربت تشغيل السخان والموتر طافي ابد 25 دقيقة تقريبا واشتغل منبه المحول
وفحصت البطارية بجهاز رقمي طلع فولت البطارية 9 فولت وكسور
علما ان البطارية الاضافية 200 امبير

[ابوامال1]

الطريقه سهله جدا هوتمد هوز يدش داخل التانكي ويدور الماي داخل التانكي من السياره ويتر الما اتمنا فهمتها اتصل وافسرلك ٠٥٩١٧٣٠٠٠٠ ابوامال

[مفكر إسلامي]

الشتاء مقفي عسى الله يعيده على خير وطاعه

[عطارد]

سخن ماء وحطها في ترمس مويه و بتلقاها حاره لا قمت الصبح لان الترمس يحفظ الحرارة زي ما يحفظ البروده

[مطر وسم]

ماله داعي الخساره ووجع الراس ولع ضو :f بعيد شوي عن السياره او الخيمه وحط ابريق تفويح حجم كبير على جال الضو ونم واذا صحيت تحصله دافي يكفي للوضوء والتروش والغسيل وكلش



تحياتي للجميع