مصافحة اخرى بعد غياب

[صامل واصامل]

السلام عليكم ورحمة الله وبركاته



مصافحة بعد طول انقطاع


هذه احدى قصائدي المتواضعة


اتمنى ان تحوز على اعجابكم



ابا انشد هل التجاريب المديدة
هل تصعب الدمعة على خد رجّال

من عقب ماراحت سنين(ن) سعيدة
حداني الوقت وانحاست الحال

ياناشد(ن) عن علومي لاجديدة
على خبرك انا وهمومي طوال

وكانك تبي صاحبك في صديده
اتلا العهد راحت على شان مال

وانا الفقر من ايده لا ايده
من زود فقري مادخل جيبي ريال

وان قدّر اللـه بلقيا جديدة
معك امانة لاشفتها اطرح سؤال

هل هي نست لي عطايا عديدة؟!
عطيتها وفايه على كل الاشكال

ماخنتها وطوّعت نفسي للشديدة
من عقبها جريت مليون موال

خلْها تندّم رجوعها مااريده
دام انّها تنكر وجحّادة ارجال

خلّت حياتي يوم راحت نكيدة
ساري على درب(ن) للاحلام رحّال

يااهل التجارب والاريا السديدة
كد طاحت الدمعه على خد رجّال

ردوا سؤالي مابي منكم سنيدة
دمعي ذرفته على الخد همّال

[جرير]

ياصامل اصمل والليالي مديدة=يعيضك المولى بزينات الابدال
هذي هي الدنيا تجارب عديده=كم عذبت قبلك صناديد ورجال
لا تذكر الماضي ولا تستعيده=وارفع حجاجك لسما تصلح الحال

[اميرة الظلام]

ماخنتها وطوّعت نفسي للشديدة
من عقبها جريت مليون موال




صامل واصامل

قصيده مؤلمه ومؤثرهـ,,

لكم مني كل الود

[صامل واصامل]

جرير صح لسانك

ولاهنت

ومجاراتك اروع من القصيدة على بعضها

[صامل واصامل]

اميرة

مشكورة على اطلالتك الجميلة

[الحربي 777]

عسى الله يجعل حالك في أفضل حال
شاعرنا
صامل وأصامل
وصح لسانك واسم على مسمى إن شاء الله , ولاهنت وبارك الله فيك والله يعطيك العافية ,,
:good: :good: :good:

[أبو فهد العيد]

الدمعة اللي فوق خدك بديدة
....................................يا شينها الدمعة على خد رجال
ماتنزل الا بالبلاوي الشديدة
....................................ما هيب عيب ولكن الــدمع قتال
قبلك غزتني بالظروف العنيدة
....................................الي بعضها زال والبعض ما زال
لاتبدي الدمعه على الي يريده
.................................. اللي يبيك تضيق في كل الاحوال
تفرح بها اهل القلوب الحقيده
....................................ناس ٍ مكايدهم عريضات وطوال
دنياك هذي مثل ظل الجريده
...................................... ظلالها لازم يجي وقت ينزال
اصمل وصامل بالخصال الحميدة
..................................... بالصبر والطيبه وحلم ٍ بالاجهال
وابعد عن الي يقهرك في جديده
........................................ يوم ٍ معك وايام يقلب ويختال
مثله مثل نار ٍ لهبها وقيده
....................................ومن ثم تطفي مالها جمر واشعال
والا كما طفل ٍ لعب بالحديده
..................................... وثم ٍ رماها ما سوت عنده ريال
هذا شعوري ترجمته القصيده
......................................... ابيات موزونه على قافية آل
جريتها مسحوب جره فريدة
.........................................موجّهه للصامل اللي بها قال
ابا انشد هل التجاريب المديدة
.....................................هل تصعب الدمعة على خد رجّال

[صامل واصامل]

الحربي

الله يعافيك

ومشكورة على مرورك الكريم

[صامل واصامل]

ابوفهد

وافي وردك زافي

وصح لسانك

ابدعت انت واخوك جرير

وشكرا على مرورك