المساعد الشخصي الرقمي

مشاهدة النسخة كاملة : المشراق 28(بيت امي نوره (3))


خشم الحصان
07/02/2005, 12:32 AM
الاخوه الغالين
السلام عليكم
اخواني اليوم مشرقنا بيتكلم عن ادوات الاهل منول وفيما تستعمل له
.........................................
السحره
السحره منول يطلقونها علي الصندوق الخاص بحفظ الملابس ولوزم المره مثل الكحل و الذهب والفضه وغيرها
ولي الحين نسميه دالوب الملابس واهل الخليج اضن والله وعلم يسمونه كبج وهو مصنوع من الخشب ويتم نقشه
وتلوينه والبعض يزود عليه بوضع قطه من القزاز (مريه) و كذلك مسامير صفر تسمي (قمع) لونها صفرا
شفو وش صغره يعني منول درعه درعتين بالكثير
حنا اليوم دواليب مركومه خلاقين يمكن مانلبسها الا مره مرتين ثم يضيق الدلوب نعمه الله لا يغيرها علينا امين
وهذي صورة سحره

http://www.mekshat.com/pix/upload/images7/mk2673_p185-1.jpg
..........
قرع
القرع منول يستخدمونه بعد مايمخرون بطنه يعني يجوفون ويبسونه في مكان ضلال مهوب في الشمس واذا جف يستعملون لحفظ اللبن والحليب والدهن
ويتم تعليقه في الغرفه حتي لا يجيه لاحوس او( البرصي) او قطو (عتوي) او فاره الله يكرمكم
وهي تقريبآ تبرد الشي لي يحط فيها ولا يستعملونها الا نادرآ في السفر ليئنها تنكسر بسرعه
وهذي صورة القرعه
http://www.mekshat.com/pix/upload/images7/mk2673_p191-2.jpg
.......................
مد
المد سلمكم الله وحدة مكيال للحبوب ويصنع من جذع الشجر مثل الاثل السبير او السدر ويكال به الحبوب والدخن والذره
وغيرها وهذي صورو المد
http://www.mekshat.com/pix/upload/images7/mk2673_p193-1.jpg

....................
ميقعه
الميقعه عباره عن اناء يوضع فيه الطعام يعني (الاكل ) والبعض منول اذكر انه ياكل فيها وهي تصنع من جذوع الشجر
ويحز علي طرفها العلوي (أي يربط) بمصير او جذاذ جلد وهو رطب وبعد ان يجف يشد ويحاقظ علي الميقعه لا تنشلخ
أي تنفقم وتعمر مده من الوقت
وهذي صورة الميقعه
http://www.mekshat.com/pix/upload/images7/mk2673_p192-2.jpg

..............................
منخل
المنخل الله يغفر لنا ولكم وعاء منول يستعملونه لتنقية الحبوب أي (يطيبونه) من القشور والشويب وهو يصنع من الخشب واسلاك دقيقه من الحديد وكذالك يستعملونه في عملية نخل الطحين أي البر وبازيه أي الشويب يعطونه الدجاج وتلقاء ذك اليوم الدجاج يركظ اذا هم
جابو المنخل لئنه بيدري ان فيه بقايا قمح والله يعظم اجر اهلنا منول هم يهشون الدجاج ولا ينخلون البر
وهذي صورة المنخل لي نسميه الحين مشخال
http://www.mekshat.com/pix/upload/images7/mk2673_p194-1.jpg
..........................
الصاع
الصاع من ادوات راعي الدكان منول حيث انه يكيل به البر والتمر والحب والفصفص وغيرها الكثير وهو مثل اخوانه مصنوع من جذوع الشجر انتبهو مهوب من جذوع النخل لا واذكر منول يزبرونه أي يملونه الله يغفر لهم علشان مايلحقهم مشاريه او عذروب
وفوق ذلك خوفآ من الله سبحانه راحو الله يجعلهم في جنات النعيم
وهذي صورة الصاع وشوفو وهو مربوط بجلد مع النص علشان ماينشلخ
http://www.mekshat.com/pix/upload/images7/mk2673_p193-3.jpg

............................
مغرفه
المغرفه ادات منول تستعملها الحرمه في غرف المرقه او (الشوربه) وهي مصنوعه من الخشب القوي ويغرفون ابها منول الجريش
والمرقوق ولا يستعملونها للرز علشان مايتلبد اذا غرفوه بها
وهذي صورة المغرفه
http://www.mekshat.com/pix/upload/images7/mk2673_p195-2.jpg
.......................
مطحنه
المطحنه سلمكم الله هذي تستعمل لطحن القهوه بس والهيل وعندي وحده قديمه جدآ مثل لي في الصوره وارد (الهاجري ) من دولة الكويت الشقيقه) والهاجري معروف منول في الكويت وعمرها فوق 80 سنهو انقليزيه الصنع
وهذي صورة المطحنه
http://www.mekshat.com/pix/upload/images7/mk2673_mthnh.jpg
..................................
مبرد
مبرد القهوه هقوتي معروف للجميع ويستعملونه علشان يبردون القهوه بعد حمسها والبعض يتفنن في المبرد وذلك بنقشه
وهذ صورة مبرد القهوه
http://www.mekshat.com/pix/upload/images7/mk2673_p194-3.jpg
.............................
مثعوبه
المثعوبه الله يغفر لنا ولكم تستعمل منول لصب البينه والدهينه والسمن البري والودسه بعد مايصخنونها أي (بحمونها )
وهي تصنع من النحاس
وهذي صورة المثعوبه
http://www.mekshat.com/pix/upload/images7/mk2673_p195-5.jpg
...........................
ارجو ياخوني اني نفعتكم وذكرتكم بماضي الاهل ولاجداد الله يغفر لهم ولنا ويسكنهم في فسيح جناته
الكاتب
اخوكم
خشم الحصان
مصدر الصور
الكتاب الاكتروني عن مدينة رغبه
تاليف الاستاذ خالد الجريسي حفظه الله
ريف النشاما
07/02/2005, 01:18 AM
السلام عليكم ورحمة الله

بارك الله فيك أخي خشم الحصان على هذه المعلومات النيره وبارك فيك

تعليقك على الموضوع له طعم خاص جدا مثل طعم الودسه :D

:good2:
ذيب الجبال
07/02/2005, 01:45 AM
يابعدهم ياخشم الحصان
والله موضوع ولا احسن وصور ......الله يطول عمرك
ذكرتنا للماضي واغراضه البسيطه مهو هالحين والعياذ بالله حتى غسيل الصحون آله تغسله؟!! :confused:
الله يجزاك الجنه والقارئين اجمعين
دمتم>>>>>>>>>>
<<<<<<<<<<<<<<<<<ذيب الجبال
المربد
07/02/2005, 08:45 AM
ابو يراح
الله يغفر لك ولوالديك
من اول كان الصندوق يزينونه بقمور (جمع قمر) نحاسيات . والقمع هو المحقان نصب به الكاز والسوايل
واذكر كانوا يسمون الرجال القصير "مد" لأن المد اصغر من الصاع وشكله مدلقم كانه رجال قزم.


ومشراق عامر بسلامتك
الظافر
07/02/2005, 09:02 AM
يعطيك العافيه على هذا الموضوع الذي يعيدنا الى الماضي
حيث اصبح الكثير منا لو يمر على هذه الاشياء لايعرف عنها شىء

ولكم تحياتي
تبريزة
07/02/2005, 09:15 AM
بيض الله وجهك اخوي خشم الحصان

الله يغفر لنا ويغفر لك ويغفر لوالدينا ووالديك وجميع المسلمين

اجل المطحنه عمره حول 80 سنه ، :p الله يزديلك ياعم ويحسن خاتمتنا وخاتمتك :good2:

يعني يوم تشتري المطحنه كان عمرك 25 صح :good2:

الله يطول بعمرك على طاعته

تسلم ياخلفهم على هالموضوع

ودمتم
اخوك
تبريزة
حد السيف
07/02/2005, 09:48 AM
الغالي خشم الحصان
حياك الله والحمد لله على السلامة بعد العودة من ام الكروش
اخيي ذكرتني ببيت جدتي الله يمد بعمرها على الطاعه
وانت ذكرت ان اللبن يوضع في القرع المجوف والمنشف لتبريدة وحفظه من اللواحيس
سؤالي ابا محمد
وابيك تجيب من الاخر
الحبحر (الفلفل الحار جدا ) كيف يحفظ سابقا
ويقال انك من اكالت الحبحر بشكل جنوني ولا تسقم عنه لدرجة انه معك بشنطة الملابس من نوعية لاتوجد بالسوق وانت سميتة القاذفة بي 52 صحيح :director: :director: :director:
وانك اخترعت طريقة لتبريد الحبحر :bounce: :bounce: هل نعرف سر الخلطه وهذة الطريقه
:dance: :dance: :dance: :dance: :dance:
هات من الاخر لو سمحت وعلى امهل من مهلك


محبك اخيك حد السيف
ملبد
07/02/2005, 11:45 AM
تبارك الله ياخشم الحصان .. المشراق اصبح خيمة وسط خيمة :good: :good: .. أدام الله تثبيت اعمدتها ..
وهذا واحد من نتائج ( المشراق ) المفيدة .. فلعلك تسعى دوما إلى استمرارها .. ولك منا كل التقدير والمحبة.
-----
وعن ( الدالوب ) والكلمة التي ذكرت ان بعض الخليجيين يطلقونها عليه .. هل المقصود ( الكَبَت )..
وبعدين وشي ( السحرة ) .. هل المقصود ( السحارة ) .. وإلا أنا غلطان وروس اصابعي شكلها مربع :) :heart:
-----
ولي سؤال جانبي :
هل تطور ( المشراق المصور ) هو الذي جعل المشرف أيمن - في موضوع آخر- يصف خشم الحصان بـ وحيد ( قرنه ) ;)
أحاول ان أربط بين وصف ايمن وبين رد حد السيف ( الحبحري ).. فلم افهم :looney:
ليتك ياخشم الحصان تفصح عن طريقتك في حفظ الحبحر .. والعلوب .. خاصة إذا كانت ( مزدوجة ) يعني مقترنه .. ياوحيد ( قرنه ) .. وماذا لو كانت اكثر من علبين .. يعني مفرقعات مجتمعة كأنها قنابل عنقودية .. وكيف أحفظها بعيدا عن ولد ( شري ) لايطيح بها ويجيب العيد :D
خشم الحصان
12/02/2005, 11:29 PM
الاخوه الغالين
السلام عليكم
حياكم الله وكل عام وحنا بالف خير وصحه وعافيه امين والله يديمها نعمه علينا وعلي المسلمين
حيالله الاخوان كلن بسمه.
.........................
الاخ الغالي
ومشرقنا الفاضل
ريف النشاما
هلا والله بك يابعدهم وشلونك الله يغفر لنا ولك امين ياخيي انت مثل لي ينذكر ولا ينشاف.
الودسه لي انت خابر راحت مع اهلها الله يرحمهم برحمته اما الحين معاد فيه ودسه فيه (خرج ودسه) تدري ليش
انا اعلمك الله يثيبك منول البهم او الغنم ما تاكل الا ربيع او (زت) والحين لا ياخيي اهنا كلمه تسمعها من راعي الغنم الا وهي (شق الكيس ياولد) تدري وشو الكيس الشعير ثم خذ طلوع وخرج ثم بعد فتره يطلع فينا خرج وطلوع يعني (كيس دهني) منيب قول راحو وراحت معهم الودسه
مشكور يالغالي
اخوك
خشم الحصان
..........................
الاخ الكريم
ذيب الجبال
هلا بك الله يغفر لك
مهيب مشكله ان فيه غسالة موعين المشكله انهم يقلون يبي يصلحون غساله للخشش يعني اذا انت تغديت ثم لحقت فذحة جحه ثم دزيتها بسحيلة لبن غيمة ثم معاد فيه شده علي تغسيل اليدين انت بس انسهل وضغط الرموت ويجيك ربوت يقوم بغسل اليدين والخشه بس مطابخنا اذا دخلتها ولا سنك داخل مستودع معاملات في القبو متركمه الله بس يستر من القادم اما صارت موعينا استعمال لمره واحده ثم ذبها مره واحده (يعني عجز)
مشكور يالغالي علي مرورك والمشاركه
اخوك
خشم الحصان
....................
الاخ الغالي
المربد(.......)
حياك الله يابعدهم كلهم الله يغفر لنا ولك ويرفع قدرك
حنا يغينا نكتب (قمر) بس خفنا يروح تفكيرهم يم قمر الصلصه ولا قمر الببسي ولا كلامك صح بعضهم يسميه قمر وبعضهم يسميه قمع لكن فارق المكان والسان يختلف
اجل القصير منول يسمونه (مد) مدلقم اقول دنق لا يطقك السقف :D
الله مير يسلمك من كل مكروه امين
وحياك الله ومشكور علي المشاركه
اخوك
خشم الحصان
.............................
الاخ الحبيب
الظافر
هلا بك يالغالي
وش دعوا ماتعرف لا ياخيي انت تعرف وسيد العارفين الله يثيبك يابعدهم
والقادم ان شاء الله احسن ونبي نوريك اغرض اهلنا قبل
حياك ربي ومشكور كل الشكر علي المرور والمشاركه
اخوك
خشم الحصان
...........................
الاخ الغالي
تبريزه
هلا بك وشلونك ياضلوع ابوي وش دعوا قطوعه مره وحده الله يغفر لنا ولك
اقول سن يبيلك ترصيص وش عم عمية عيون العدو انا منيب عم احد
الله اكبر ورا ماتقول من العصور الوسطي وتريح عمرك اجل
80+25=105 ول اجل ماقوم الا بشترك :D
امين الله يتقبل منك
وبعدين انا ماشريتها الله يثيبك اقر وتاكد يابعدهم
مشكور الله يغفر لنا ولك علي المشاركه
اخوك
خشم الحصان
.....................
الالالالالالالالالالالالالالالاخ
المميز ححححححححححححححح الحبرحر (السيف)
اعلمك من الاخر الله يعفو عنا وعنك (زرطه)وقمت :bounce: وغدا ثمي :o ولا عاد تعودونها الله يحللكم ويبيحكم سنه مزروع في (....نم)
اخوك
خشم الحصان
......................

اااااااااااااااوووووووووووهههههه
جانا لي ماينسد له دريشه او باب
الاخ الغاااااااااااااااااااااالي
(ملبد)
اقول ياخيي ورا ماتصير مثل اسمك وتفكنا من حربثك
ايه ياخيي( الكبت) وبعدين اذا انت لقيت زله( مر وعدي وصح التحدي) هذي منول يكتبونها في قفا الشفرات وحنا منول نكتبها في لوحه ونحطها في قفا السياكل لي يشوفنا يقول ايه يادبابات هارلي
اقول السحره هي (السحره) افتكينا من (حفرلوجيا) طلع لنا (ملبد لوجيا) ولاصابع عدلناها بصاير الباب
الحين ابنشدك وش جاب الاخ الغالي(ايمن) هو مسكين يجيبها ديم بحسن نيه وانتم تجيبونها عوجا نيه
اقول اخوي ايمن ياكثر مارحنا في خريطها بسبب حسن نيتك
منول صورة السياره وسموها شفط النمل والحين وحيد قرنه اقول لاعاد يجينا شي الله يغفر لنا ولك يابعدهم زين اخوي ايمن
لا تعرف تربط بينهم ماشاء الله عليك ابو جلنبو معليك خوفه اذا انت اهتوية اعلمك
البعض يسمي علب الحبحر (قرن) حبحر عرفتا :mad: :alarm:
حفظها احطها في صرار ثم ارفعها فوق السيمان*
الحين ياخيي علب واحد او قرن و احد وبغيت اولع تبيني اكل او ازرط اثنين والله لوني (ببغا)يبي يعلمونه الحسي
ودك الواحد اذا قالو يمه عطني سفن اب او مناديل لالالالالالالالالالالالالالالا يلتفت ثم يدسون له لغم حبحري في كتره ثم تطامر من الحراره سنك ولد شري اذا انت كلت حبحر شقردي
لا ياخيي جابو العيد فيني وانشد ابو مالك الله يسمح دروبه
وبعدبن تعال انا لي ابنشدك انت وحد السيف وش دخل هالموضوع بالموضوع يحبكم حق نشر الغسيل
هلا بك ياملبد ولبد الله يغفر لنا ولك
اخوك
خشم الحصان
السيمان.......... عباره عن لوح خشب يزكرش ويدق في الجدار ويوضع عليه الاشياء التي يخشي عليها من الضياع
المربد
15/02/2005, 08:16 AM
إ يــــــــه ، يقولون الدنيا حظوظ !!
اخوي (ملبد ) وسع صدرك واطلب ربك يعطيك حظ مثل حظ ايمن اللي نواياه صارت زينه وانت نواياك شينه
ناس يرد عليها بـقـشـــارة وناس الله يطامنهم باسمه !!

ليت اسمي ايمن !!
المربد
15/02/2005, 08:21 AM
:j

:j
كشوتي
16/02/2005, 03:19 PM
ماشاء الله هذا الشغل السنع خشومي <===== اسم الدلع لجدو خشم الحصان
تراث مصور وشرح وافي وعلومن سفره وابداع فيى النت اثمر عن مواضيع غاية في الروعه
الله يجعلك في الجنه ووالدين جابوك ياخشومي ياليتك رزيت صورة جنابكم مع ها التراثيات
علشان يعرف الجيل الجديد الفرق بين رجالات الماضي وبين شباب الحاضر ويشاهدون الصبر
والجلاده ومدى المعاناة التي مربها ابائنا واجدادنا من خلال صورتكم واثار الزمن
على محيا الجيل السابق من خلالكم .

وفي الختام ما اقول الله يرزقك الجنه انت وكل من يشاهد ويقراء هالموضوع .
نقا هشال
16/02/2005, 03:24 PM
يعطيك الف عافيه ياغالي

موضوع ولااروع
خشم الحصان
17/02/2005, 12:07 AM
الاخ الغالي
المربد(معقد الشوش)
السلام عليكم
اخي الغالي ابو يوسف زاد ياربي من يوم شفتك تهايق من ورا الجدير سنك واحد يسبر له شي وانا قايل ان الرجال
يحتري الطقه بس مايدري وين بتجيه منه
طيب انت وشوله شوش علي (ملبد)
اقول لاياك تعقد الشوش ترا راسي شعره عراده يعني سنه قعوسه متشابكه مايفله الا موس حلاقه ويمكن يشقص او ينكسر
وانت ياخيي مثل ايمن في محبتنا لك في الله
لكن خذ ماكتبت بحسن نيه الله يغفر لنا ولك ويثيبك
اخوك
خشم الحصان
.......................................
الاخ الحبيب
كشوتي
اقول الله يغفر لنا ولك ويرفع قدرك (خشومي) ;) وش دعوا الله لا يصغرك امين
ارز صورتي ورا ماتجيبها من قريب وتقول اني اكبر من هالموعين :D
وفي الختام ما اقول الله يرزقك الجنه انت وكل من يشاهد ويقراء هالموضوع .
الله يجزك عنا بدخول الجنه علي هالدعاء وانت مثل
اخوك
خشم الحصان
خشم الحصان
17/02/2005, 12:12 AM
الاخ الغالي

نقا هشال
السلام عليكم
حياك الله يالغالي
وياهلا كل الهلا بك يابعدهم وعسي الموضوع اعجبك
مشكور علي المرور والمشاركه الله يثيبك ويغفر لنا ولك امين
اخوك
خشم الحصان
د.الكاشت
22/02/2005, 08:24 PM
والله معلومات قيمة
شكرا
شكرا
شكرا
عبدالله الدوسري
27/02/2005, 03:29 PM
خشم الحصان
أشكرك على هذا الموضوع

لكن تصدق
صاعنا اللي نتسيل فيه الفطرة صاع خشب مثل اللي بالصورة

جعل والدينا في الجنة :)
خشم الحصان
27/02/2005, 11:57 PM
الاخوه الغالين
السلام عليكم
..................
الاخ
د.الكاشت
مشكور علي مرورك والمشاركه الله يغفر لنا ولك
عفوآ
عفوآ
عفوآ
جدآ
اخوك
خشم الحصان
.......................
الاخ الغالي
عبدالله الدوسري
حياك الله يابعدهم الله يثيبك وصاعكم احفضوه ورفعوه تراه عقب شيبان الله يجعلهم في الجنه ولي عقب الشيبان غالي
يالغالي
مشكور علي مرورك والمشاركه يابعدهم
اخوك
خشم الحصان
Bader-M
28/02/2005, 04:57 PM
في الحقيقه

تعجز الحروف ان تعبر عن روعة موضوعك و جماله

وخاصه انه يتكلم عن الاولين و اغراضهم الشخصيه

.............

تسلم انملك يا خشم الحصان

ولك مني كل محبه وتقدير
عبدالله الدوسري
25/03/2005, 03:35 AM
هذي صور لصاع جدي يا شايبنا
إن شاء الله أنه بيعجبك

الصاع من زاوية مرتفعة
http://www.geocities.com/mekshatpic/01.JPG
http://www.geocities.com/mekshatpic/02.JPG
http://www.geocities.com/mekshatpic/03.JPG
http://www.geocities.com/mekshatpic/04.JPG
طبعًا هناك خطوط ورموز على الصاع <== من العهد الإغريقي :)
وهذي صورة لأحدها مقرّبًا
http://www.geocities.com/mekshatpic/05.JPG
لاحظ آثار الرز (الفطرة) على حزام الجلد اللي يمسك الصاع
http://www.geocities.com/mekshatpic/06.JPG


أنا قاهرتني العلامات اللي على الصاع
أبو محمد... تسوي خير تعلمني وش هي له؟

في حالة عدم ظهور الصور حاول إظهارها مرة أخرى وشكرًا <== لأن مكشات ما يسمح بصور أكبر من 70 كيلو بايت وبعرض معين الله يهداهم