عطل في الفتك أريد منكم المساعده

[الجبخان]

السلام عليكم ورحمه الله وبركاته
أشتريت باترول سوبر سفاري 2006 وبعد مااخذتها بيوم ولع معي لمبه بالطبلون ورحت للفحص وقالوا حساسات شكمان المهم برمجوها قالوا اذا طلعت ارجع وبدلهن المهم الموتر يقطع وصار اذا شغلته بعد ماطفيته بساعه اول ماأعشق القير يقطع واذا رجعته او فضيته صفى واذا دست بانزين وصفى وعشقت يمشي بس المشكله اذا عشق برابع كأنه يهدي واذا دست بانزين شد معي وعشق واذا كملت ريح طبيعي واذا ارتخيت عنه تقل يقطع ويفضي او مادري عجزت لاعرف له تكفون اللي له عرف يفزع لنا وجزاكم الله خير

[عين حصنان]

مبروك الله يعطيك خيره و يكفيك شره

اذا كان قير توماتيك

اكيد الموتر ماشي قريب الـ 100 او اقل بقليل

المهم

تروح للوكاله ( نيساااااااان ) سمعت نيسااااان فقط

لاحد يلعب عليك و يفر مخك يقولك برا أرخص و احسن

انا قلت لك نيسااااااان و بس

وخللهم يغيرووون زيت القير

بيكللف عليك حدود 700 او 800 رياااال

بس خذ سياااااااره .... شف اللي بتوقيعي مثله

ورد لي خبر ظروووووري ... انا انتظرك

[جهام القصيم]

يوجد في المنتدى موضيع كثير عن مشاكل الباترول وعن القير تبي تفيدك بإذن الله (يمكن يكون كتاوت) وفقك الله لكل خير

[الجبخان]

jimmeyبيض الله وجهك ويعطيك الف عافيه
نعم موتري نفس موترك حتى باللون ماشاء الله وكانك تقصد ان اللعله نفسه معاك الله يعينك طلعت ماهي حساسات القير ولا الكتاوت ولا الزيت ولا القير حتى، طلعت بلف الطرمبه الرجيع يجي تحت الثلاجه قيمته 240 بس ماحصلته بالشركه لازم طلب

جهام القصيم الله يعطيك العافيه لاهنت وماقصرت على الفزعه

للفائده
البلف هذا عمله تنظيم البانزين الخارج من الطرمبه وترجيع الزايد للطرمبه على حسب طلب الدعسه للبانزين فاذا صار خربان يسبب ردائه العزم والتقطيع وتشكيل القير بالنمر بسبب ظعف البانزين الخارج من البلف ويحسبه الواحد القير مخبط الله يستر 7ورشات قالوا القير مخبط يبي توظيب والله قهر لو انا موظبه لاكن الحمدلله والشكر وانتبهوا من هاشغله للفائده
دمتم بالف خير

[slooom755]

الله يسهـــل عليك .. وتلقـــاهـ بأسرع وقت ,,

بيض الله وجهــــك أخوي الجبخـــان ,, على إفادة إخـــوانك ..

[عين حصنان]

jimmeyبيض الله وجهك ويعطيك الف عافيه
نعم موتري نفس موترك حتى باللون ماشاء الله وكانك تقصد ان اللعله نفسه معاك الله يعينك طلعت ماهي حساسات القير ولا الكتاوت ولا الزيت ولا القير حتى، طلعت بلف الطرمبه الرجيع يجي تحت الثلاجه قيمته 240 بس ماحصلته بالشركه لازم طلب

جهام القصيم الله يعطيك العافيه لاهنت وماقصرت على الفزعه

للفائده
البلف هذا عمله تنظيم البانزين الخارج من الطرمبه وترجيع الزايد للطرمبه على حسب طلب الدعسه للبانزين فاذا صار خربان يسبب ردائه العزم والتقطيع وتشكيل القير بالنمر بسبب ظعف البانزين الخارج من البلف ويحسبه الواحد القير مخبط الله يستر 7ورشات قالوا القير مخبط يبي توظيب والله قهر لو انا موظبه لاكن الحمدلله والشكر وانتبهوا من هاشغله للفائده
دمتم بالف خير

اللهم لك الحمد و الشكررر

ومشكووووور على الافاده

بارك الله فيك