نادر جدا ذيب بالكويت بس ....... تم قتله للاسف [الأرشيف]

ابوفهيدان

12/03/2010, 08:32 AM

بسم الله الرحمن الرحيم

العنوان يقدر يشرح الموضوع بدون تعليق ووصف
والله من النادر وجود ذيب بالكويت
انا حسيت ان الذيب هذا واجه صعوبات حتي وصل عندنا
لو تتبعنا مصدره
للاسف اصبحت ثقافة الصيد عندنا اقتل اي شي يتحرك
اي شي يسمي طائر او حيوان برررري
جرررب شوزنك امدح نفسك عزز رصيدك بالصيد بذيب
انا متاكد ان الذيب هذا ماهجم ولا قتل ولكن وجد يمشي
وتم طرده حتي تعب ومن ثم اطلاق النار عليه
اسالكم بالله قبل لاتردون شوفي نظرة الذيب
من بعد التعب والرمي وهو بالرمق الاخير

http://www.mekshat.com/pix/upload04/images151/mk63246_mk23961_78897.jpg

بالله يالناس ياللي فيكم غيرة علي ثقافتكم وبيئتكم
ياللي قبل هذا كله
فيكم رحمة انزلها ربي عليكم وزرعها في قلوبكم
في القران وفي السنة ذكرت لكم
احسوا في الضعفاء فلم يعد لها مكان
تأوي له
لازم لازم بحكم انتشارنا
نرضي بمشاركتها لنا مثل ماشاركناها في بيئتها

((ولاتقتلوا النفس التي حرم الله الا بالحق))

صدق الله العظيم

اعتذر عن بعض الردود الغير مقبولة بالمقطع
واعتذر للتكرار ان وجد

ذئب بالكويت (http://www.youtube.com/watch?v=UCRMEEGm7jg)

A B D U L L A H

12/03/2010, 08:39 AM

واحد قامط العافيه والثاني مهآيطي

يالله لك الحمد

شبح الصحراء

12/03/2010, 09:27 AM

لا حول ولا قوة إلا بالله الناس ذبحها المهايط يعني فخر ذبحة الذيب بالسلاح؟! لو شجعان قابلوه بلا سلاح وخلنا نشوف شجاعتكم بس الدعوى مهايط واكبر دليل تصوير ذبحة الذيب عشان يورونها ربعهم واهلهم ويقولون شوفوا شجاعتنا ذبحنا ذيب من قدنا !!!! .
عموماً حياتنا الفطرة تحتضر ويجب ايجاد حل للحفاظ على ما بقي منها .

صورة من الفلم ومنظر يجرح المشاعر ، ذئب عربي بكل كبريائه يتلاعب فيه الصبيان بأسلحتهم :mad::

http://www.mekshat.com/pix/upload02/images100/mk23961_78897.jpg

كأني بلسان حال الذئب يقول بفصيح الكلام :

قد كنت يوماً في القفار مهاباً***تهابني القلوب خوفاً واحتراماً
كريم النفس انتقي صيداً كريماً***انوفاً عن الذل لا اعرف نباحاً
تأنف نفسي طعام كلبٍ غريماً***تجوع الذئاب ولا تأكل عظاماً
قطعت الحدود ابتغي عيشاً سليماً***فصار مقتلي للصبية افتخاراً
طاردوني بمطية تشعل حميماً***احرقوني بنار زادت فيني اشتعالاً
اليوم اموت وغداً اكون شنيقاًَ***وعلى الأشجار علقت جثث ذئاباً
انا الذئب قد كنت للناس عزيزاً***واليوم ابادوني بالجهالة اجتثاثاً

واعذروني على اي اخطاء في الأبيات فقد كتبتها بعجالة .

الشنه

12/03/2010, 09:40 AM

المشكله
في الموروث الأجتماعي
يعتقد انه سيفخر بقته للذيب
وسينتشي فخراً اذا قيل له
ما يذبح الذيب الا ذيب

سيقف هذا الذيب امام الله ويقابلهم

فقد أخبر الله تعالى في كتابه الكريم أن الدواب والطيور تحشر يوم القيامة، فقال سبحانه: وَمَا مِنْ دَابَّةٍ فِي الْأَرْضِ وَلا طَائِرٍ يَطِيرُ بِجَنَاحَيْهِ إِلَّا أُمَمٌ أَمْثَالُكُمْ مَا فَرَّطْنَا فِي الْكِتَابِ مِنْ شَيْءٍ ثُمَّ إِلَى رَبِّهِمْ يُحْشَرُونَ [الأنعام:38].
وقال تعالى: وَإِذَا الْوُحُوشُ حُشِرَتْ [التكوير:5].
وأخبر النبي صلى الله عليه وسلم أنه يقضى بينها يوم القيامة: فقال: لتؤدن الحقوق إلى أهلها يوم القيامة حتى يقاد للشاة الجلحاء -التي بدون قرون- من الشاة القرناء. رواه مسلم.
وقال ابن كثير عند تفسير قوله تعالى: وَيَقُولُ الْكَافِرُ يَا لَيْتَنِي كُنْتُ تُرَاباً [النبأ: من الآية40].
وقيل: إنما يود ذلك حين يحكم الله بين الحيوانات التي كانت في الدنيا فيفصل بينها بحكمه العدل الذي لا يجور، حتى إنه ليقتص للشاة الجماء من القرناء، فإذا فرغ من الحكم بينها قال لها: كوني تراباً فتصير تراباً، فعند ذلك يقول الكافر: ياليتني كنت تراباً أي كنت حيواناً فأرجع إلى التراب، وقد ورد معنى هذا في حديث الصور المشهور، وورد فيه آثار عن أبي هريرة وعبد الله بن عمرو وغيرهما.
والله أعلم.

جهل مركب

ابوفهيدان

12/03/2010, 09:43 AM

عبدالله البحري
لاهنت علي الرد
.
.
شبح الصحراء
لاهنت علي المشاركة
ويبقي الذيب ذيب مثل ماعرفه اجدادنا يموت وهو فاتن وغير منكسر
رغم ضعفه في زمننا
واستمحيك عذر لنسخ الصورة من ردك الي الموضوع الاساسي

عصام 861

12/03/2010, 09:50 AM

لاحول ولاقوة الا باللة واللة يكفى تعليق الشباب على الموضوع وشكرا

ابوفهيدان

12/03/2010, 09:56 AM

المشكله

في الموروث الأجتماعي
يعتقد انه سيفخر بقته للذيب
وسينتشي فخراً اذا قيل له
ما يذبح الذيب الا ذيب

شيباننا الله يطول باعمارهم ويرحم من مات برحمته
ماكانوا يلحقونه بالمواتر ولا بالخيل ويذبحونه كذا
كانوا يشوفونه ويمنعونه من الغنم ومن الحلال بالعصا وكانت الكلاب
لها دور بمنع الذيب من الهجوم
ولما كان يهجم علي راس ولا راسين كانوا يتركونه الا اذا استفحل الامر
الحين الواحد يتعشي بماكدونالدز وبكرة يرمي ذيب ويقول هجم علي وجبتي
وخذ من هالاعذار

alkreze

12/03/2010, 01:40 PM

هالحين عشانهم ذبح الذيب طلعوا مهايطيهـ
ولا والله انهم طحاطيح

ياخـوآن الذيب ما تأمنهـ بعدين ماعاقب أهل الغنم والا هالذيابه
الا ابذبحها وبلعن جدفها
وأنت تقول يابوفهيدان

انا متاكد ان الذيب هذا ماهجم ولا قتل

طيب وأنت بتستناهـ لين يهجم على حلال الناس ويلعب فيها

عاشق الحوض99

12/03/2010, 01:58 PM

الامول بزوع والثاني مهايطي

شبح الصحراء

12/03/2010, 02:13 PM

هالحين عشانهم ذبح الذيب طلعوا مهايطيهـ
ولا والله انهم طحاطيح

ياخـوآن الذيب ما تأمنهـ بعدين ماعاقب أهل الغنم والا هالذيابه
الا ابذبحها وبلعن جدفها
وأنت تقول يابوفهيدان

طيب وأنت بتستناهـ لين يهجم على حلال الناس ويلعب فيها

ياخي لو ما كانوا مهايطية ليش صوروا ذبحة الذيب؟ واضح انهم يبون يهايطون في اليوتيوب والمنتديات وعند ربعهم .
بعدين الذيب من فجر التاريخ وهو يفترس الغنم هذا ماهو جديد بس وش معنى الحين صار عذر عشان نذبح الذيابة ؟!!! وعلى فكرة الكلاب أحياناً تفترس الغنم ليش ما سمعنا احد يقول نبي نذبح الكلاب ؟! وش معنى الذيابة؟! السبب المهايطة لأن ذبحة الذيب غير ذبحة الكلب وفلان ذبح ذيب غير عن فلان ذبح كلب كله مهايط في مهايط ولو هم شجعان كان ذبحوا الذيب بدون سلاح أي بزر صغير يقدر يذبح اطلق أسد بسلاح فكيف بذيب هالكه الجوع والعطش ! .
الغريب حاط صورة ذيب في توقيعك :

http://img369.imageshack.us/img369/2605/81296820dj9.gif

شبح الصحراء

12/03/2010, 02:26 PM

شبح الصحراء
لاهنت علي المشاركة
ويبقي الذيب ذيب مثل ماعرفه اجدادنا يموت وهو فاتن وغير منكسر
رغم ضعفه في زمننا

واستمحيك عذر لنسخ الصورة من ردك الي الموضوع الاساسي

الصورة حلالك يابو فهيدان والشكر كل الشكر لك لهذا الموضوع وكلماتك الراقية التي تدل على وعي بيئي كبير وغيرة على حياتنا الفطرية .
تقبل تحياتي .

alkreze

12/03/2010, 03:22 PM

ياخي لو ما كانوا مهايطية ليش صوروا ذبحة الذيب؟ واضح انهم يبون يهايطون في اليوتيوب والمنتديات وعند ربعهم .
بعدين الذيب من فجر التاريخ وهو يفترس الغنم هذا ماهو جديد بس وش معنى الحين صار عذر عشان نذبح الذيابة ؟!!! وعلى فكرة الكلاب أحياناً تفترس الغنم ليش ما سمعنا احد يقول نبي نذبح الكلاب ؟! وش معنى الذيابة؟! السبب المهايطة لأن ذبحة الذيب غير ذبحة الكلب وفلان ذبح ذيب غير عن فلان ذبح كلب كله مهايط في مهايط ولو هم شجعان كان ذبحوا الذيب بدون سلاح أي بزر صغير يقدر يذبح اطلق أسد بسلاح فكيف بذيب هالكه الجوع والعطش ! .
الغريب حاط صورة ذيب في توقيعك :

http://img369.imageshack.us/img369/2605/81296820dj9.gif

يامرحبا بالشيخ
اذا تحكم عليهم انهم مهايطيه عشان هم صور
هالحين حتى اللي يذبح قطو على طول دخل يدهـ بمخباهـ وطلع الجوال وصور
وكلامك صحيح ان الذيب من قديم الزمان وهو يفترس الغنم ولاكن اول مابه لا شعير
ولا خاساير وكانوا على ماقيل حلالهم للأكل لاكن بهالجيل رآعي الحلال يكد على حلالهـ
من حر جيبهـ وخساير من شعير وبرسيم بوجهـ العدو
وكله على شان بس يبيع طلين غنمهـ وتكسب وخرتها يجيك ذيب يحوس اللي بالشبك كلهـ
طيب ياطويل العمر انا بقولك سالفهـ صارت يوم الاربعاء الماضي
عندي ولد عم وعازل طلين بيجلها للسوق والمهم جاى يوم الخميس الصبح يشيل طليانه
يوديهـآ للسوق بيجلبها وناظر بالشبك الا الشبك ماهو على شبككهـ اللي خابرهـ
اثر الذيب مفترس خمس طلين من أطيب مافي الشبك ويلحق ولد عمي بيذكي اللي مامات
يالله لحق على طليين والباقيه رآحت عشى عقبان

وبعدين ياطويل العمر كيف تحكم على الرياجيل اللي ذبحوا الذيب انهم ماهم شجعان
تحياتي

شبح الصحراء

12/03/2010, 03:53 PM

يامرحبا بالشيخ
اذا تحكم عليهم انهم مهايطيه عشان هم صور
هالحين حتى اللي يذبح قطو على طول دخل يدهـ بمخباهـ وطلع الجوال وصور
وكلامك صحيح ان الذيب من قديم الزمان وهو يفترس الغنم ولاكن اول مابه لا شعير
ولا خاساير وكانوا على ماقيل حلالهم للأكل لاكن بهالجيل رآعي الحلال يكد على حلالهـ
من حر جيبهـ وخساير من شعير وبرسيم بوجهـ العدو
وكله على شان بس يبيع طلين غنمهـ وتكسب وخرتها يجيك ذيب يحوس اللي بالشبك كلهـ
طيب ياطويل العمر انا بقولك سالفهـ صارت يوم الاربعاء الماضي
عندي ولد عم وعازل طلين بيجلها للسوق والمهم جاى يوم الخميس الصبح يشيل طليانه
يوديهـآ للسوق بيجلبها وناظر بالشبك الا الشبك ماهو على شبككهـ اللي خابرهـ
اثر الذيب مفترس خمس طلين من أطيب مافي الشبك ويلحق ولد عمي بيذكي اللي مامات
يالله لحق على طليين والباقيه رآحت عشى عقبان

وبعدين ياطويل العمر كيف تحكم على الرياجيل اللي ذبحوا الذيب انهم ماهم شجعان
تحياتي
هلابك اخوي انا ماني شيخ بس مقبول هالإطراء منك دامها من راس شيخ مثلك ;) ههههههه .
نعم صدقني معظم اللي يذبحون الذئاب يبحثون عن الصيت والسمعة على بالهم شجاعة وهي مهايطة لأن الشجاعة انك تواجه الذيب وجه لوجه ماهو بسلاح ناري .
وبعدين صدقني انا متعاطف مع اصحاب الحلال وسبق واقترحت في احد مواضيع مكشات ان الدولة الله يحفظها تعوض اصحاب الحلال اللي تفترسها الذيابة وهذا مطبق في كثير من الدول المتقدمة عشان ما يكون عذر لقتل الذئاب وللمعلومية حوادث افتراس الذئاب للحلال قليلة جداً جداً ولا اتوقع تعويضها يكلف الكثير على الدولة .
ايضاً لو يقوم اصحاب الحلال بتربية كلاب قوية لحراسة الغنم ما اظن الذيب يهجم عليها ، عموماً الذيب جزئ لا يتجزأ من حياتنا البرية وموروثنا التاريخي والثقافي والأدبي ولازم ندور اي حل عشان نحافظ عليه من الأنقراض .

A B D U L L A H

12/03/2010, 04:17 PM

هالحين عشانهم ذبح الذيب طلعوا مهايطيهـ
ولا والله انهم طحاطيح

ياخـوآن الذيب ما تأمنهـ بعدين ماعاقب أهل الغنم والا هالذيابه
الا ابذبحها وبلعن جدفها
وأنت تقول يابوفهيدان

طيب وأنت بتستناهـ لين يهجم على حلال الناس ويلعب فيها

والله يالغالي شوف ...

اللي تروح فيها خرفانه وحلاله من ذيآبه ( هذا ماينلآم )

قد يكون حكيم ومحافظ على الحياه الفطريه بس بسبب - غضب لحضه تجي عكسيه ويروح بنفسه يدور لها بالبر

ولو كان من الفواسق آو يستفاد من لحمه وحلال معقوله

والله يكون بعون اللي عنده حلال وساكنين في القرى

بصراحه الموضوع هذآ لم ولن ينتهي ناس مؤيده وناس معارضه

بس نطلب الله الرحمه والعافيه

مراسل الخير

12/03/2010, 04:17 PM

لاحول ولاقوة الابالله متى تستيقض الظمائر.

mzarkash2000

12/03/2010, 04:26 PM

لاحول ولاقوة الابالله ,,,,

ابوفهيدان

12/03/2010, 04:43 PM

لاهنت يامراسل الخير

ابوفهيدان

12/03/2010, 04:44 PM

هالحين عشانهم ذبح الذيب طلعوا مهايطيهـ

ولا والله انهم طحاطيح

ياخـوآن الذيب ما تأمنهـ بعدين ماعاقب أهل الغنم والا هالذيابه
الا ابذبحها وبلعن جدفها
وأنت تقول يابوفهيدان

طيب وأنت بتستناهـ لين يهجم على حلال الناس ويلعب فيها

اللي يذبح الذيب من دون وجه حق ويصوره مهااايطي وجاااهل
وش الهدف من ذبحه انت تعلم الغيب وتدري انه بهجم علي غنمك ؟؟
ياخي لو حاط كلب عند حلالك مايقربك الذيب
والطحطحة والزحزحة ماهي بقتل الذيب وانت مشغل مسجل الموتر وماسك شوزنك
وتطرده هالمسيكين
خل عندك عقلانية بالحكم هاذي حيوانات بتنقرض وهذا القصد

قصيمي 10

12/03/2010, 04:45 PM

بيض الله وجهك

alkreze

12/03/2010, 04:58 PM

اللي يذبح الذيب من دون وجه حق ويصوره مهااايطي وجاااهل
وش الهدف من ذبحه انت تعلم الغيب وتدري انه بهجم علي غنمك ؟؟
ياخي لو حاط كلب عند حلالك مايقربك الذيب
والطحطحة والزحزحة ماهي بقتل الذيب وانت مشغل مسجل الموتر وماسك شوزنك
وتطرده هالمسيكين
خل عندك عقلانية بالحكم هاذي حيوانات بتنقرض وهذا القصد

[/center]

مرحبابك يابوفهيدان
ياطويل العمر أسئلك بالله لو عندك غنم ورآحت عشى ذيب
وبعد فترهـ وأنت تتمشى بهالخليان وشفت الذيب قدامك وش بتسوي
بتقول حيآهـ فطيرهـ أكيد بتذبحـهـ

ماهي بقتل الذيب وانت مشغل مسجل الموتر وماسك شوزنك
وتطرده هالمسيكين أجل كيف أذبحهـ انزل من السيارهـ وأسحب العجرآء من تحت المرتبهـ ورح للذيب
وأضربهـ لين يمــوتـ :D
أكيد بذبحهـ بالشوزن

وبالنسبهـ للكلاب الله يعز من يقرآ ماهوب أي كلب بيرد الذيب

ابوفهيدان

12/03/2010, 05:20 PM

ياخوي انت تقول طحطيح وماتبي تنزل من الموتر ؟؟

اذبح اي ذيب بالخلا علشان غنمي ماتت
لازم افر الخليان كلها وابيدها يعني

ياخوي قصدنا الذيب الايام هاذي كل من شافه ذبحه وهو لاقرب غنم ولاغيره صار
هواااااية وبس
ناس صادت عقاب وشبوط اي شي يتحرك

الكلاب اعزكم الله لها دور وماربوها اهل الغنم عبث يكفي انها تمنع الذيب
حتي لو ماهرب منها تقعد تنابح عليه الليل كله لين يسري

alkreze

12/03/2010, 05:23 PM

ياخوي انت تقول طحطيح وماتبي تنزل من الموتر ؟؟

ياخوي قصدنا الذيب الايام هاذي كل من شافه ذبحه وهو لاقرب غنم ولاغيره صار
هواااااية وبس
ناس صادت عقاب وشبوط اي شي يتحرك

الكلاب لها دور وماربوها اهل الغنم عبث يكفي انها تمنع الذيب
حتي لو ماهرب منها تقعد تنابح عليه الليل كله لين يسري

ع العموم يالامير الله يكفينا ويكفيك شرهـ

شبح الصحراء

12/03/2010, 07:18 PM

صدقت يابو فهيدان الناس ماخذة الغنم والحلال عذر والدليل مثل ما تفضلت حتى العقبان وطيور البر صادوها وهي ما تذبح الحلال المسألة عبث ومهايط وتصوير والواحد لا علق الذيب على شجرة او على صدام السيارة كأنه عنترة زمانه ! .

محب البشر

12/03/2010, 07:45 PM

جزاه الله كل خير خلص المسلمين من شره

باثفندر

12/03/2010, 10:42 PM

ويستمر المسلسل

لاحول ولا قوة إلا بالله ،،،

_دربيل_999

12/03/2010, 11:13 PM

مشكور أخي الكريم على هذا الحس البيئي ..

بصراحة مناظر محزنة..وجهل متفشي..
انا مدري وش يبون بحيوان يسوون فيه كذا..
سبحان الله..ناس بلا قلوب ولا عقول..
طرد بالسيارة..وصدم..وإطلاق نار..إجرام حقيقة إجرام..

كل التقدبر مني لك..

الروقي

محب الرمنغتون

13/03/2010, 12:56 AM

مراهقين ومعهم سلاح !

بن محفوظ

13/03/2010, 01:57 AM

لاحول ولا قوة الا بالله

الله يهديهم ويهدي شباب المسلمين

حيوان مسكين .. ماهجم عليك ولا جاك ..

فياض الربيع

13/03/2010, 03:43 AM

القطاوي 2008

13/03/2010, 11:11 PM

لاحول ولاقوة الابالله

alkreze

14/03/2010, 03:19 AM

Cyber

14/03/2010, 05:45 AM

ومازال للتخلف بقيه

الله يعين صحرائنا اللتي دمرها التخلف

_دربيل_999

14/03/2010, 06:50 AM

اللحين اللي يحبون الذيابه ويدافعون عنها

قل امين جعله مايقابلك وانت تمشي على رجليك

ولا معك سلاح الحيوانات المفترسه يالربع ماهي

مثل اول تلاقي شئ تاكله لان الجزيره العربيه خاليه

من الصيد من غزلان او ارانب واو غيرها فالذيب ماله

الا الغنم او الانسان ليأكله لانه جائع 24 ساعه في هذه المناطق

ولايجد شئ ياكله انا ارى انه يقتل اذا وجد لانه راح يضر غيرك وسلامتكم

أخي الكريم..

الدعوى ماهي حب زي ما إنتا متصور..الدعوى رأفة بالحيوانات اللي حالها حال أنفسها...
بعدين موتت الذيب غبينة لأنه مثل أكرم وأشجع الرجال..
وبقائه حي أفود من بقاء بعض البشر...
الذئب بتصرف كما خلقه الله ولا يعصاه...
وبعض البشر تتصرف بما تمليه عليه الشياطين ويبطش ويسرق ويظلم ويتجبر وإذا ويبقى في معصية الله حتى يموت..يعني الذئب أفود منهم...

بعدين الخوف الزائد مايصلح..كلنا نخاف والخوف ضروري ولكننا لانصاب بالهلع..
ولمعلوميتك الذئب يستطيع تمييز الجبناء..ويهاجمهم..ويقضي عليهم..لأنه ذيب ويكره الرخوم...
عاشوا أجدادنا في زمن كانت الذئاب تتجول على هيئة قطعان
ولم تهاجم أحد منهم كانت تهاجم الماشية
بيوتهم ليس لها أبواب..هل لبيت الشعر باب..
وليس لديهم سيارات يختبئون فيها..وإنما كانو يتنقلون وفي كل مكان يلتحفون السماء..وكانت الذئاب تخشاهم لآنهم رجال..ولاكانوا يقتلون الذئب كما يقتله جبناء هذا الوقت..
أما رجال اليوم يهلعون من صورة الذئب وربما بغمى عليهم..

وفقنا الله وإياكم لما يحب ويرضى

الروقي

NOYEB

14/03/2010, 07:08 AM

الحيوان الذي يلحق الضرر بالانسان يقتل اما الحيوان الغير موذي ولامنه ضرر فلا يقتل .
وجهة نظر

الشمري911

14/03/2010, 07:52 AM

لا حول ولا قوة الا بالله

بـو بـدر

14/03/2010, 09:21 AM

http://www.youtube.com/watch?v=TVrvXflh1Oc

سيف الظفير

14/03/2010, 10:21 AM

http://img369.imageshack.us/img369/2605/81296820dj9.gif

البارحه والجوع مس الذيـب يـوم انـه يعـوي = علـى سنـام طويـق والقـمـره وراه بليتـهـا

اخايلـه واقـول واعـزي لحـالـك يالـقـوي = اللي تنقى فـي سمـان الفطـح لا مـن جيتهـا

واللي باساميـك يتقلدهـا الخـوي مـع الخـوي = والعـرب تبديـك التحايـا وانـت مـا حييتهـا

واسمك على النخوه يعد وكل روس(ن) تشتـوي = والوجبـه الحيـه تعشاهـا وتـتـرك ميتـهـا

الجوع لـو يدفعـك للمـوت الدحـاح المستـوي = حشمت نفسك عـن عظـام الحرجـه وخليتهـا

ودامك طليق(ن) ما قهـرك المعتـدي والمهتـوي = وخطاك مـن دون المغـازي مـا بعـد سجيتهـا

يا ذيب يا ذيب الخلا اللي ليلك يـروح سـروي = مـا بيـن مرحـان الشواويـه ليـا عشيتـهـا

يا موجل(ن) قلب حضري يا موجل(ن) قلب بدوي = ياللـي تشيّـم خـوة الرجلـيـه ان خاويتـهـا

عامر خوي الذيب في عصر الفـوات المنطـوي = وقصتك فـآذان العـرب واليـا طـرت لبيتهـا

نحر ذلول(ن) مـن وصايفهـا شحمهـا مرتـوي = لعيـون خوتـك الفريـده والبقـا فـي صيتهـا

يـا ذيـب يكوينـي قنيبـك لا توحّيتـه كـوي = على غشـاش الكبـد والخطـوه عمـد رديتهـا

مدري غبى مدري ذكى مدري تسـرع فوضـوي = لكن خطواتي علـى الهيبـه مـا قـد ضريتهـا

ياذيب عزك في زمان السيف مـن قبـل يهـوي = وقبـل زمـان العولمـه للـنـاس وآتيكيتـهـا

وقبل يغيب المنطق الحسـي ويبقـى المعنـوي = والغيـره تـوزع تجمّعهـا عـلـى تشتيتـهـا

وقبـل النوايـا المستقيمـه ماتعـاج وتلـتـوي = والناس تمشـي فـي تعاملهـا حسـب توقيتهـا

يا ذيب مدري كيف ابوصف حالتـك يالمنـزوي = والهاشميـه فـي طـرف عينـي ولا دنيتـهـا

لا جيت ابرثي حالتـك ضـاع الكـلام اللغـوي = والمفـردات اللـي تجملـنـي لـيـا عديتـهـا

والهاجس اللي كـل مـا فليـت حويـه ينحـوي = وافكـاري اللـي تتعـب الخافـق ليـا هليتهـا

واخـاف لا تكمـل وينحـاك النزيـف الدمـوي = وابقى علـى قـول المثـل خميتهـا واخطيتهـا

ياذيب واقنب خل صوتـك يـدوي العالـم دوي = مـادام خانتـك الظـروف الله يخـرب بيتـهـا

بدر الخالدي

بريداوي اصليm

14/03/2010, 05:51 PM

أخس يا شنب قاتل ذيب

يا شيخ أنا أقدر أقتل ذيب بنباطه مو عاد بسلاح

جدودنا كانو يقتلون الذيب بيدينهم يغلونه لمين يموت

سسته

14/03/2010, 06:11 PM

ما اقول الا الله يقلع مبارك اللي ريشوبة وثور فية ...

الشيخ قوقل

14/03/2010, 07:21 PM

شكل الذيب يايكم من شمال
مشكور أخوي
وننطرك بالمواضيع الياية
أخوك

غربي هواوي

14/03/2010, 07:25 PM

لا حول ولاقوة إلا بالله

اذا كان موذي صح

لكن اذا كان في حال سبيله ماله داعي قتله

يدوي الشرق

14/03/2010, 07:33 PM

لاحول ولاقوة الابالله

يدوي الشرق

14/03/2010, 07:34 PM

[quote=يدوي الشرق;4115978]لاحول ولاقوة الابالله[/quote<<<<<<<<<<<<<<<<<<<

قرم العيال

14/03/2010, 07:39 PM

والله ياخوفي بكر ينقرض شي اسمه ذيب

ابوفهيدان

15/03/2010, 02:33 PM

مشكورين علي الردود

aooa

15/03/2010, 02:51 PM

نــــــــــــاس مدري وش يبون

ولد دوارد

15/03/2010, 03:03 PM

الذيب هل الحين ذبح الغزلان الي الرجال جايبهن للمزرعته ودافعن فيهن اكييد واجد
واهل حريملا على كلاهم مستوذين حريمهم وورعانهم في رعب
هو ودك تسوى محمية مشبكة كبيييييييرة
وخلاص

اخو صالحه

15/03/2010, 03:21 PM

لا يجوع الذيب ولا تفنى الغنم

Combat

15/03/2010, 03:41 PM

اوبال

15/03/2010, 06:17 PM

أبو فهيدان شكرا على المشاركه
الشبح شكرا على الكلمات الأكثر من رائعه

عروق الدهنا

17/03/2010, 09:27 AM

ما أقول الا........

آخر زمن يضحك على الذيب جهال #$# جآر الزمن وان جار محدن يلومهـ

فياض الربيع

17/03/2010, 11:10 AM

أخي الكريم..

الدعوى ماهي حب زي ما إنتا متصور..الدعوى رأفة بالحيوانات اللي حالها حال أنفسها...

بعدين موتت الذيب غبينة لأنه مثل أكرم وأشجع الرجال..
وبقائه حي أفود من بقاء بعض البشر...
الذئب بتصرف كما خلقه الله ولا يعصاه...
وبعض البشر تتصرف بما تمليه عليه الشياطين ويبطش ويسرق ويظلم ويتجبر وإذا ويبقى في معصية الله حتى يموت..يعني الذئب أفود منهم...

بعدين الخوف الزائد مايصلح..كلنا نخاف والخوف ضروري ولكننا لانصاب بالهلع..

ولمعلوميتك الذئب يستطيع تمييز الجبناء..ويهاجمهم..ويقضي عليهم..لأنه ذيب ويكره الرخوم...
عاشوا أجدادنا في زمن كانت الذئاب تتجول على هيئة قطعان
ولم تهاجم أحد منهم كانت تهاجم الماشية
بيوتهم ليس لها أبواب..هل لبيت الشعر باب..
وليس لديهم سيارات يختبئون فيها..وإنما كانو يتنقلون وفي كل مكان يلتحفون السماء..وكانت الذئاب تخشاهم لآنهم رجال..ولاكانوا يقتلون الذئب كما يقتله جبناء هذا الوقت..
أما رجال اليوم يهلعون من صورة الذئب وربما بغمى عليهم..

وفقنا الله وإياكم لما يحب ويرضى

الروقي

هلا وسهلا بالروقي على ايام اجدادنا الذيب يلقى

له صيد ولا كان راحوا عشاء ليل:D اما اليوم البر معاد فيه

الا الضبان والظاهر انك تذكر قصه الشايب اللي في الشمال

اللي هاجمه ذيب والحمد لله انه قضى عليه الشايب بتقولي الشايب

كان خايف ودرى الذيب انه خايف كله كلام خالي من الصحه مع احترامي لك

ذيب ومايشوف من الجوع قال ياذابح يامذبوح وفي الاخير توسدها انا ارى ان الحيوانات

المفترسه تقتل وان استطاع الانسان الامساك بها وهي حيه وتسليمها الى الحياه الفطريه

لوضعها في المحميات المخصصه لها ان وجدت يكون احسن والله اعلم

a1Ruwais

17/03/2010, 11:33 PM

الله يعطيك العافية أخوي على التقرير الرائع
تقبل مروري

asdali

17/03/2010, 11:42 PM

هلابك اخوي انا ماني شيخ بس مقبول هالإطراء منك دامها من راس شيخ مثلك ;) ههههههه .
نعم صدقني معظم اللي يذبحون الذئاب يبحثون عن الصيت والسمعة على بالهم شجاعة وهي مهايطة لأن الشجاعة انك تواجه الذيب وجه لوجه ماهو بسلاح ناري .
وبعدين صدقني انا متعاطف مع اصحاب الحلال وسبق واقترحت في احد مواضيع مكشات ان الدولة الله يحفظها تعوض اصحاب الحلال اللي تفترسها الذيابة وهذا مطبق في كثير من الدول المتقدمة عشان ما يكون عذر لقتل الذئاب وللمعلومية حوادث افتراس الذئاب للحلال قليلة جداً جداً ولا اتوقع تعويضها يكلف الكثير على الدولة .
ايضاً لو يقوم اصحاب الحلال بتربية كلاب قوية لحراسة الغنم ما اظن الذيب يهجم عليها ، عموماً الذيب جزئ لا يتجزأ من حياتنا البرية وموروثنا التاريخي والثقافي والأدبي ولازم ندور اي حل عشان نحافظ عليه من الأنقراض .

هو في دولة اصلا الله يرحم الحال بس

الا اذبحه وقطعه تقطيع وما يحس بالنار الا واطيها

الادعج

09/04/2010, 04:18 AM

لاتأسف على غدر الزمان لطالما
رقصت على جثث الذئاب العوازم
لا تحسبا برقصها تعلو على اسيادها
تبقى الذئاب ذئاب والعوازم عوازم

هواوي

09/04/2010, 02:52 PM

الان ومن وجهة نظري ان قتل الذئب جريمه يجب ان يعاقب عليها القانون
الحلال يتعوض وبدل الحلال حلال
ولكن الذيب ما يتعوض
واذا نقص ذيب صعب نشتري بداله
لانه وبكل بساطه معرض للانقراض

ملاحضه
اخي شبح الصحراء
ما ارع قصيدتك فيه رائعه من رائع في رائع

رائعه لشبح الصحراء

قد كنت يوماً في القفار مهاباً***تهابني القلوب خوفاً واحتراماً
كريم النفس انتقي صيداً كريماً***انوفاً عن الذل لا اعرف نباحاً
تأنف نفسي طعام كلبٍ غريماً***تجوع الذئاب ولا تأكل عظاماً
قطعت الحدود ابتغي عيشاً سليماً***فصار مقتلي للصبية افتخاراً
طاردوني بمطية تشعل حميماً***احرقوني بنار زادت فيني اشتعالاً
اليوم اموت وغداً اكون شنيقاًَ***وعلى الأشجار علقت جثث ذئاباً
انا الذئب قد كنت للناس عزيزاً***واليوم ابادوني بالجهالة اجتثاثاً