المساعد الشخصي الرقمي

مشاهدة النسخة كاملة : ما رأيكم بها الدافور؟؟


AbuAnas
12/02/2005, 12:26 AM
السلام عليكم و رحمة الله


يا اخوان ايش رايكم بهالدافور؟

http://www.e-kovea.co.kr/catalog/down/TKB/safe.jpg


حصلته في رحلتي على الدائري الشرقي بـ 155 ريال


هل فيكم من جربه؟
و مدى توافر الدبات اللي تركب عليه من غير شركته


أبوأنس
نمر بن حثلين
12/02/2005, 03:54 PM
عليكم السلام ورحمة الله وبركاته

الدافور ما جربته
لكن الدبات متوفره بالمحلات نوعين
بريمس 450 جرام ب 15 ريال
وكوفيا الي هي نفس نوعية الدافور 460 غرام ب 12 ريال
وتجي مقاس اصغر 230 جرام مثل الي بالصوره ب 8 ريال

لكن اوفر لك بكثير انك تشتري المقاس الاكبر
أبو يوسف
12/02/2005, 05:27 PM
اخوي ابو أنس

الدافور لايعلى عليه
توكل على الله واشتره
بس سؤال السعر اللي قلته هو سعر الكوفيا ولا بريمس
اذا كان للكوفيا فلا تقربه لأن عند المقناص لاقيه بمية وخمس طعش ريال
واذا بريمس توكل على الله مع اني ما أظنه بريمس لأن البريمس اغلى


اتمنى اني اكون افدتك


مع التحية
AbuAnas
12/02/2005, 07:30 PM
جزاكم الله خير يا اخوان ..


أبوهديل الظاهر انه 115 و لكن الواحد و الخمسة تداخلن :D
بروق الوشم
12/02/2005, 10:28 PM
جربته ولا يعلى عليه
والدبات متوفره في اكثر المحلات
وفيه محل في تمير يعبيها وانا معبيها من عندة
عروان
19/02/2005, 01:02 PM
أخوي أبو أنس

أنا مدري وش هدفك من الدافور الصغير. هل شنطة العزبة صغير وتبي دافور سغير؟ أو معجبك شكل الدافور اللي بالصورة و ودك تستعملة.

ونا أخوك تراني مريت بهالدوافير الصغيرة. ضنيت أنها صغيرة و لا تضايق بحملها في العزبة. لكن طلعت علي أغلى من بيع السوق.

كم مرة تخلص دبات الغاز ولا ألقا لها من يبيعها غير في محلات الرحلات, وهذي المحلات ما توجد الا بالمدن الكبار, يعني لو خلص عليك بالبر بلشت به.

قلت في نفس أخذ معي أحتياط دبات غاز. ورجعت لمشكلتي اللي منحاش منها الا وهي الضيق بشنطة العزبة. و غير كذا أسعار الدبات غالية و تخلص بسرعة يعني كشتة و حدة فيها طبخ لمرة وحدة بس تخلص معك دبّـة وحدة على الاقل.


قلت مالها الا الدوافير الزرق, ورحت للسنيدي و خذيت دافور بريمس اصلى مع الرأس و عبيتة بـستة ريال وله معي شهرين أكشت به ولا خلص العاز.

نصيحة أن كانك كثير مشاوير للبر خذ لك دافور بريمس الأزرق أصغر حجم يفكك من غثا الدبات.

أطيب تحية لك
شاهد عيان
19/02/2005, 02:15 PM
حط بالك تراه مزعج !
الجيب الربع
19/02/2005, 06:43 PM
شفت مع واحد من الشباب واحد مثله بريموس ومعه وصله تحول اللي عشان يركب للدبة, والدبة اللي معه من النوع اللي يتعبا من محلات الغاز وهي اللي تجي طويلة ونحيفة وماشية معاة تمام يعبيها من البيت وتكفية كشتتين أو ثلاث وأكثر مايستعملها للشاهي والقهوة والطبخ الخفيف حميس أو كبدة

تحياتي
AbuAnas
20/02/2005, 10:10 PM
السلام عليكم و رحمة الله و بركاته

جزاك الله خير يا عروان ..

البريموس احصله في السنيدي بشارع الغرابي؟؟


أبوأنس
عروان
21/02/2005, 05:04 PM
أخوي أبو أنس

أنا شريتة من سنيدي القصيم (بريدة) ولكن أبحث عنه عند محلات الرحلات. و ترى فيه بريموس أصلي هندي و سويدي.

أن لقيت السويدي فهو أفضل شي.
خوي النشاما
28/02/2005, 10:27 PM
السلام عليكم ورحمه الله وبركاته
اخوي ابو انس هذا الدافور قد سويت عليه تعديل وخليته يجي عينين وسويت محول يجي على الدبه الزرقاء
وهو موجود في منتدي مكشات ونزالت معه صور وموجود في هذا المنتدي الجيد والمفيد ولك شكري
ولاخوان الاعضاء والمشاركين :alarm:


خوي النشاما_________
راعي المجاهيم
01/03/2005, 01:53 PM
لا تشاور وانا اخوك تراه مسكت ودور الرخيص تراه في السبالة
الوشاح
04/03/2005, 11:20 AM
خلك من هلمطاريس

اسمع و نا اخوك كلام عروان

كل من شرا هلدوافير الصغيره لافهن

طق لك بريمس دبه وراس واستانس

قوي ويتحمل ويوفر

والسلام.......
شاهي منعنش
07/03/2005, 01:24 PM
الحقيقه ياابو انس الدافور علا سعره....اشوف انه مايستاهل...هالسعر...وخدمته ماراح يجملك الابغيت الشغل المظبوط ....وانا مع الاخ عروان هذولي بتطلع اغلي من بيع السوق...مايشفي الاابريموس ابودبه وتكايات.......ولاولا اختلاف الانظار بارت السلع :good2:
استاذ قلق
07/03/2005, 01:56 PM
الدافور هذا ..
سبق إني .. اشتريته هدية للوالد حفظه الله ..
وهو جميل جداً وقوي ..
وله قوة تحمل .. وناره زرقاء ..
وفيه ميزات كثيرة ..
خفّة وزنه .. قوة ناره ..
سهولة تغيير مخزنه ..
والميزه الأهم .. هو ان الغاز .. المخزن ..
إن فككته .. بإمكانك ان ترجعه .. بعكس ماهو .. ارزق ..
ان وصلته .. بالدافور .. لزم عليك لزاما أن تجعله في مكانه ..
.
وسعرة .. من السنيدي .. بـ 60 ..
والمخزن بـ 4 ريالات ..
.
نوعاً ما جيد ..
.
.
شكرا على اتساع خاطركم بسماع رأيي ..
اخوكم بكل .. ود ..
أستاذ قلق ..
دمتم ..
..
الطعس الذهبي
07/03/2005, 09:05 PM
ياأخوي ابو أنس فيه دافور صغير يدخل بالمخبات أنا مجرب مره وهربتة بمخبات سعر الدافور بثلاثين ريال تركب به علبه للغاز سعر العلبة ثلاثة ريال تكفي العلبة غدا كامل
لاندكروزرVX_R
08/03/2005, 06:58 PM
مشكور اخوي ابو انس ..

على فكره اخوي تراه ارتفع سعر لــ 180 ريال :bounce:


وبعدين النوعيه هذي تطبخلك ذبيحه كامله بصراحه اذا كان الحجم الكبير ..

ت
ح
ي
ا
ت
ي
اخوك لاندكروزر VX_R
كتاب
09/03/2005, 07:55 AM
اسمحوا لي يا إخوان ، وأنا أقل واحد فيكم خبرة ، أحب أذكر نقطة مهمة أن كل نوع من الأدوات له محل مناسب ، وهذا الدافور يا إخوان عملوه لأصحاب الرحلات التي لا تستعمل فيها السيارات ، ففي الغرب هناك نوع من الكشاتيين أو الرحالين يسمونهم ( Backpacker ) يعني يشيل شنطة ظهر ويطلع بها في الجبال ، لا عنده سيارة و لا حتى سيكل ، وهذا الدافور وأمثاله مخصص لذلك النوع من الكشتات ، صغير وخقيف ، و لا يستعمل إلا في أشياء بسيطة ، وعندهم أشجار ما شاء الله ، يقطعون منها ويطبخون على الخشب .

أما عندنا ، اللي بيروح في سيارة ، والمكان وسيع ، فالأفضل أن ياخذ له دافور أكبر .

هذا ما عندي ، وسلامتكم .