الفزعه يالربع انكسر البوجي داخل المكينه أكسبدشن 2005

[معلق رجل]

الفزعه يالربع بالراي والتجربه
جيت أغير البواجي أكسبدشن 2005 وانكسر واحد من البواجي داخل المكينه
نوعية هالبواجي أول مره أشوفهن . يعني السنه انفكت وطلع البوجي برى لكن فيه جزء من البوجي طوله تقريبه 2 سنم بقى ناشب داخل المكينه حاول الميكانيكي وأنا موجود كل شي وقال مافيه حل الا نفك الراس قلت اصبر أبا أشوف
الموتر هالحين يشتغل بسبع بواجي بس
اللي مرت عليه هالحاله ياليت يفيدنا
ووش رايكم بفكة راس المكينه هل يطلع الراس بدون ما يفك باقي المكينه من الكراسي علما" أن الورشه راح يتحملون كل شي بس أنا متردد يمكن القى حل بدون فكة الراس مع العلم ان البوجي المكسور هو أبعد واحد من جهة اليمين يعني أقشر مكان
واحد من الأعضاء ذكر شي يسمى ( زرقينه ) هذا وين ألقاه ببريده أو اللي يعرف ورشه ببريده يمكن عندهم حل لا يبخل علينا واعذروني على الأطاله والله أن هالسالفه سببت لي قلق ونكدت علي اجازة الأسبوع لكن يالله الخيره

[سوبر VTC]

الله يسر امرك اخوي
دام البوجي ناشب فاكيد السنة ماسكة بنفس جرم راس المكينة
هل انت متاكد ان ان السنة طالعة ؟؟؟؟
انا اشك ان اللي فك البواجي
جاء يبي يفك و قام يربط :mad:
مثل اللي يفك الكفر المبنشر يقوم يربطه :mad: مهب يحله
طيب الموتر باي صناعية ؟ الرواف ؟ او السليم ؟ او الرشودي ؟ او الشارع التجاري ؟
وش اسم الورشة ؟

[sultan911]

اخوي لابد من فك راس المكينه ولا يحتاج فك المكينه كامله يفك الراس بس تراك بتغير وجيه المكينه بعد الفك لا تخليه يركبها على الوجيه القديمه وقد صارت مع واحد من الربع بس مانكسر البوجي اعدم السنن حقت البوجي وضطر لفك الراس وفتح في الراس فتح اكبر من البوجي ووضع قطع محلها يركب فيها البوجي والله يعينك ويرزقك بواحد يصلح سيارتك

[بدوي جنوبي]

روح لمحلات المخارط هذي شغلتهم
عندهم ادوات تساعدهم على الفك
ممكن تصورنا لنا البوجى المكسور
ومكانه فى الراس
عشان نستفيد وممكن نجد طريقه للفك

بالتوفيق

[صحاري 97]

لا تفك راس المكينه
ورح للمخرطة واكيد ان شاء الله بيفكونه لك

[فايق ورايق]

فكت الراس شي سهل ولا فية مشكلة بالعكس انت تستفيد جب وجية للراس عشان يغيرونة بطريقهم طبعا المخرطة بتفكها بس عندي ان فك الراس دامة على حسابهم افضل بدال ماتخش بمشاكل رح وتعال
بالتوفيق

[القنبر]

ماادري بس في طريقه واحده يمكن ان يفك سخن السياره الى والان تواصل النصف حتى يسخن مكان البواجي واقوال بسم الله ثم فك اخوك بوحسن

[قمة افرست]

فك الراس افضل حل
المخارط يمكن عندهم

السؤال ليش الفورد دايم ينكسر البوجي داخل المكينة
قد سبق صارت بورشة لميكانيكي اعرفه شاطر ماهو غشيم انكسر معه ونفس السيارة اكسبديشن

[qwazi]

مثل ما نصحوك الشباب لا تفك دور حل ثاني!!

[اذاني]

لا تفك الراس

شف لك واحد فنان يلحم صيخ علي البوجي وبعدين يفكه

المخارط يعرفون ها الشغله

[نايف الكشات]

اذا انكسر البوجي لاتحاول تفكه بمفتاح البواجي
حاول تفكه بواسطة حبه والطريقة( فك بوجي من البواجي ودور على حبه نوع اصلي تكون نفس مقاس البوجي بالضبط + وصله مناسبه لمكان الفك اهم شي تكون في فراغ يسمح بوزن المفتاح ) ثم حاول تفك البوجي طبعا مع الضغط للداخل واللف لليسار حتى ينفك البوجي باذن الله
اذا لم تجدي هذه الطريقة مثل ماقالوا الاخوان روح للمخرطة يفكون البوجي من 250 الى 300 ريال

[رفيع المقآم]

الله يعينك قسم بالله انها مشكله

[فايق ورايق]

والله ياشباب ان الموضوع سهل اللي كسر البوجي يفك الراس الله لايهينة ويطلع البوجي

فك الراس سهل جدااا السياره ماتخرب اذا فك راس المكينة اكثر من مرره

[سوبر VTC]

لا تفك الراس

شف لك واحد فنان يلحم صيخ علي البوجي وبعدين يفكه

المخارط يعرفون ها الشغله




هذا افضل حل و مجربه :good:
عند المخارط

[waledsaleh]

السلام عليكم ياجماعة بالنسبة للإكسبدشن بواجيه تختلف عن البواجي العادية لان مكينته 5.4 والبوجي له غطاء من الحرارة يمسك داخل بس الورشة مالها دخل يعني لا تحط بذمتك بس اللي يبي يفك مثل النوع من البواجي نصيحتي قبل ما يفك يحط على البواجي بخاخ صدا لمدة ساعة او ساعتين و بعدين يفكها بسهوله وبالنسبة لك ياراعي الاكسبدشن توكل على الله وخلهم يفكون الراس ما تحتاج الا وجه قيمته تقريبا 120 ريال والسلام عليكم

[معلق رجل]

حياالله الشباب
اشكر كل المتفاعلين مع المشكله وأحذر كل ملاك الأكسبدشن من 2005 وفوق من تغيير البواجي عن أحد مهما كان غير الوكاله لأنهم راح يتحملون كل شي لو أنكسر البوجي داخل المكينه زي ما صار معي .
المهم يا أخوان أنا حاولت كل شي يمكن مع سبع ورش كبيره في بريده وكلهم ما قدروا ورحت للوكاله وقابلت مدير الصيانه وشرحت له المشكله قال مافيه حل الا فكة الراس وقال ان هالمشكله كثير تقع مع هذه السياره لأن الورش الخارجيه تفك البوجي والسياره بارد ه ونوعية البواجي يمكن تنكسر لكن عندنا بالوكاله لنا طريقة خاصه بفك البوجي ولو انكسر حنا راح نتحمل فكة الراس وقطع الغيار اللي يمكن يحتاجها وبالنسبة لسيارتي قال راح تكلفك 3500 ريال
المهم رجعت للورشه وقلت توكلوا على وفكو الراس وابشركم نجحت العمليه طبعا كلفتني قطع غيار وجه راس وصوفة صدر وما رديتر تقريبا" 320 ريال وعطيت الورشه 600 ريال ويالله لك الحمد رجعت سيارتي أحسن من أول وتوبه من الروحه لغير الوكاله بمثل هالأمور

[مهندس ميكانيك]

الحل عندي بإذن الله :)
0597875050