ماهي الطريقة المقترحة الحفظ قطع السلاح بالمنزل

[مأمور]

السلام عليكم ورحمة الله وبركاته
موضوعي هذا جديد و قدبم في نفس الوقت
وبحكم ثقتي باخواني المكشاتية نود مناقشة كيف تحفظ قطع السلاح في المنزل
بعيد عن يد العبث من قبل اهل المنزل وبعيد عن يد الحرامية
انا بحثت عن صندوق خزنة (تجوري) كبير وجدت الاسعار تتراوح بين 3000/10000 ريالا للمقاس الذي بكون ارتفاعة من الخارج (170)سم ويصفي من الداخل (145)سم من الداخل
وهو قوي الى حد ما علمآ ان بعض محلات ادوات الصيد عراضين انواع حلوة بس الاسعار نار
وش رايكم مع خاص التحية والتقدير للجميع

[قنآص زهرآن]

والله بالنسبه لي..اسلحتي حاطها في مجلس الرجال عاجبتني طريقة الرفوف للاسلحه..فمعلق الاسلحه تحت بعض..وبالنسبه للبيت محد يقدر يلمسها لان عقاب اللمس شديد وبالنسبه للحراميه والله انك صادق الخوف يسرقونها وراح اتابع الموضوع والافضل من الاقتراحات راح اسويه..يعطيك العافيه

[عين حصنان]

بسم الله الرحمن الرحيم

السلام عليكم

بالنسبه لي انا

مفصل دولاب المونيوم من المقاس المتين السميك جدا

في غرفه جانبيه للمجلس

والدولاب الالمونيوم محشور بين جدارين و مثبت بالجدار

يعني من جميع الجهات جدران وماعندك الا الواجهه مسافة مترين تقريبا

يعني لا احد من اهل البيت او ضيوف او حرامي يستطيع فكه مثل التجوري

ولا يطلع من مكانه او يتحرك

هذي صور دولابي

http://www.mekshat.com/pix/upload04/images153/mk125800_dscn4285.jpg


http://www.mekshat.com/pix/upload04/images153/mk125800_dscn4287.jpg

[بريداوي اصليm]

أنا مثل الأخ الكريم (قناص زهران) بمجلس الرجال
وأنا كد سرقت مني أم صتمه ديانا حطيته ع الكبوت حق السيارة
باليل تونا جاين أنا والوالد من البر يوم نزلت العزبة بالحوش رجعت ما لقيته الله يخلف سرقت

مشكور أخوي ع الموضوع

[ابو سمسم]

السلام عليكم انا من ناحيتي

حاطها بغرفها لوحدها ومقفل عليها وكل سلاح له جراب

وبعد ماحطها بالجراب ادخلها بالدولاب

[ناصر الدهمشي]

اول شي تحط السلاح بجراب

ثاني شي تخفيه بمكان بعيد عن عيون الاطفال والمراهقين

مثلاً فوق دولاب غرفة النوم وتحت دولاب او بالمطبخ

بمكان محد ينتبه له لا الورعان ولا السارق

يعني بأختصار مكان غير متوقع

[قنآص زهرآن]

اخوي عين حصنان

بصراحه طريقتك رهيبه وممتازه..وجاري تفصيل دولا مثلها خاصه وان اسلحتي كثيره فوق سبع اسلحه والرصاص كثير ..طريقتك مرتبه ومريحه...تقبل مروري

[سعود الروقي]

اسمحولي باضافه بسيطه


من الخطاء وضع ابنادق العباريد مثل القناصات والخرزات في دولاب يشكل مسنده على راس الماصوره مثل اللي بالصوره فوق

والصحيح تسديح البندق فوق او تحت دولاب وهي في جرابها


المعلومه هذي مستقيها من كبار السن والسبب حتى لا يختلف عيار البندق او بالاصح خوف من ان يحدث صده في الماصوره


ودمتوووووو

[مأمور]

السلام عليكم
اسعدني مرور ومشاركة اخواني وتفاعلهم
مع هذا الطرح
اخونا قناص زهران
شغلك مرتب وعليه ملاحظ بسيطة
1- مهما يكون الامنيوم ثقيل فهو غير حصين من الحرامية .
2- انا مع راى اخونا سعود الروقي في عدم حفظ السلاح واقف
ولافضل حفظها نابمه.
اخوى عين الحصنان الله يحفظ عينك من كل شر قل امين ياحبي للحصنان 911 انا مجربها وقت طويل ذكرتنيها جزاك الله خير
اخونا ناصر الدهمشي فوق الدولاب مكان مكشوف والمطبخ ومكان غير متوقع فكرة طيبة جدآآآآ
اخونا ابو سمسم غرفة مستقلة وباب قوى شى طيب وهي اكثر امان
بريداوي اصلي الله يعوضك اطيب منها دنيا واخرة ومن سراقها الله يضيق علية رزقه وينتقم منه ومن على شاكلتة امين
سعود الروقي (هوانت خالي ولا)حياك الله ودايم افكرك وطرحك مفيد جداآآآآآآآآآآآ

[z71-badr]

بنسبه لي افضل تفكيك السلاح قطعه قطعه وتنضيفه وبعد ذالك مسحه بزيت مخصص للاسلحه او مسحه بديزل ووضع كل قطعه من السلاح في قطعه من القماش القطن او الخام العادي هذي افضل طريقه لحفظ السلاح وهذي الطريقه متبعه لدى الجيش الامريكي وانا اخذت الفكره منهم وتقبل مروري واتمنا الكل يستفيد من هذه الطريقه لانها افضل طريقه وافضل طريقه لحفظ السلاح من السرقه يعني حتى الي يبي يسرق السلاح ماراح يستفيد ماراح يلاقي السلاح كامل لانه مفكك وصعب انه يسرقه بسهوله

[عبرود النيمس]

في خزنة خاصة للسلاح شاريها من ساكو وزنها 17 كيلو وضد الحريق تشيل خمسة بنادق وفيها ادراج للرصاص

[القنـاص2008]

من ناحيتي في جراب متخصص ودولاب لها خاص

[MR.RHAL]

والله أفضل طريقه الخزانه الحديد

وحـطه بغرفة النــوم وريــح بالك

[سوالف]

افضل طريقه لحفظ السلاح فك السلاح لقطعتين
وبعدها حفظها في الجراب الخااص لهاااا
وبكذا تسلم من العبث فيها من قبل الاطفال او اي واحد

[طير شلوى 999]

اخواني المكشاتية حطها بالجراب و فوق الدولاب وترتاح لا العيال يمديهم عليها وانتهى الفلم

[مطفش الطيور]

بنسبه لي افضل تفكيك السلاح قطعه قطعه وتنضيفه وبعد ذالك مسحه بزيت مخصص للاسلحه او مسحه بديزل ووضع كل قطعه من السلاح في قطعه من القماش القطن او الخام العادي هذي افضل طريقه لحفظ السلاح وهذي الطريقه متبعه لدى الجيش الامريكي وانا اخذت الفكره منهم وتقبل مروري واتمنا الكل يستفيد من هذه الطريقه لانها افضل طريقه وافضل طريقه لحفظ السلاح من السرقه يعني حتى الي يبي يسرق السلاح ماراح يستفيد ماراح يلاقي السلاح كامل لانه مفكك وصعب انه يسرقه بسهوله
فكره جميله جدا وحتا السارق يبي يصير عجل يعني مهب مركب ولا هب مفكر فيها

[aflaj12]

انا شريت خزنه من ساكو وارتحت بحمد الله من عبث الآخرين

[القناص 200]

ياشباب انا داسها تحت السرير لأن عندي فتحة كبير تحت السرير للاغراض اللي خايف انها تنسرق ولازم تحتها بالقشاط او بالجراب