مشاهدة النسخة كاملة : اللغز الثاني والعشرون...........<<اللغزمحلول>>...........(((صاح ب الحل:عاشق الصحراء)))
السمح
26/06/2002, 01:49 AM
تمشياً مع الخطة المقترحة نستأنف ألغازنا بهذا اللغز الذي يقول فيه صاحبه :
يا ويش عود ٍتَحَسْب حْسابْه الناس= البـدو واللي يســكنون القرايا
إلى حـضر تَريَّـحـوا عـقـب الاتعـاس= وابْعد عن الفلاّح راعي الرعايا
صالح2
26/06/2002, 01:58 AM
اخوي السمح
هذا طال عمرك الربيع ولا يهونون الخوان .
السمح
26/06/2002, 02:26 AM
حياك أخوي صالح .. وياهلا بك ..
لا مالك لوا مهوب الربيع ..
تحياتي
صالح2
26/06/2002, 08:06 AM
وحياك اخوي السمح واباحاول مره ثانية واقول انه المطر !
مع الشكر .
الهيثم
26/06/2002, 03:06 PM
السلام عليكم ورحمة الله وبركاته
الحمدلله على السلامه ومن طول الغيبات جاب الغنايم
أضم صوتي مع اخوي صالح2 واقول المطر أو الوســـم , وش رايــك أثنين ضد واحد .
ولك تحياتي ,,,,,,,,,
السمح
26/06/2002, 03:31 PM
هلا بك صالح مرة ثانية ..
غير صحيح مهوب المطر ..
وإن كنت قريب ولكن مع الأسف لا ..
===================================
الأستاذ الهيثم ..
تسلم يالغالي وشاكر على شعورك النبيل .. وابشر بكل الغنايم ..
أيضا حلك قريب ولكن لا مهوب الوسم ..
تحياتي لكم ..
المسفهل
26/06/2002, 04:57 PM
هذي محاولة وإذا لم تكن صحيحة خلها بيني وبينك
يمكن يكون فصل الشتاء أو الربيع !!!!
السمح
26/06/2002, 06:42 PM
هههههه حلوة يالمسفهل ..
يالله علشانك أبخليها بيني وبينك :D :D
ولكنكم يالربع والله قريبين ما نتم بعيدين ..
الهيثم
26/06/2002, 07:39 PM
عندي رمعتين وشكلهن مع درب اللي قبلها بس ماعليه محاوله ولكل مجتهد نصيب .
وش رايك في السيل أو العشب
ولك تحياتي ,,,,,
السمح
26/06/2002, 08:17 PM
لو إن كلامك صحيح كان قايلين صح لصالح من مبطي ..
لا مهوب صحيح ..
تحياتي ..
عاشق الصحراء
26/06/2002, 08:46 PM
وايت الماء (التنكر ) يخلي راعي الرعايا ياخذ راحته بالمرعى.
السمح
26/06/2002, 11:24 PM
والوايت ياعاشق الصحراء تحسب حسابه الناس .. :confused:
على طاري الوايت يقولون واحد اشترى وايت .. وقال والله إن ودي أشري غنم لهالوايت ..
شكراً على كل حال .. ويعطيك العافية ..
مع التحيه أخوي السمح والله انا ابدخل خضم المعركه والله يعين عندي رمعتين اما انه الزرع او التمر وش رايك:light:
السمح
27/06/2002, 09:31 AM
حياك أخوي تعرض ...
وسلامتك لا مهوب الزرع ولا التمر ...
ولك إن تستمر في المعركة في محاولات أخرى ...
المسفهل
27/06/2002, 01:34 PM
عند رمعة والظاهر إنه زامه بس قايله قايله الله لايعوق وش رايك بعيد الفطر ؟؟؟؟!!!!
السمح
27/06/2002, 02:16 PM
أقول المسفهل .. هذي مهيب زامة وبس إلا ضاربة بالضلع الله يدفع البلا ..
بس هالمرة مانيب مخليها بيني وبينك .. :D أبخليها بيني وبين الشاشة ..
لا لالالا :no2: مهوب صحيح ..
بانتظارك يالمسفهل .. وعلى الله ما تصير المرة الجاية هافية ..
المجًفل
28/06/2002, 02:11 AM
مساكم الله بالخير
يعطيكم الله العافيه جميع
اخوي السمح خذ هالرمعهالليل
عاشق الصحراء
28/06/2002, 10:31 AM
و الله اعتقد ان الجواب هو نجم سهيل
و الله ان الشباب ما قصرو و كلهم حول النيشان , بس اعرفك تقول منتم حوله تبي تضيعنا
عن المكان اللي به صيد و تخلي الصيد لك انت لحالك يا بو تركي.
تر ما تمشي علينا حركاتك.
السمح
28/06/2002, 04:19 PM
المجفل :
حياك الله .. ومعليش مهوب الليل .. وخيرها بغيرها ..
===========================================
عاشق الصحراء :
مسكين اللي ما له عاشق صحراء تسلم لي والله عز الله إنك جبتها , وصحيح الإجابة سهيل .. والله الفرق بين الوايت وسهيل :bounce: وكنت يوم تقول الوايت كتبت .. كل وايت وانت بخير، ولكني رجعت ومسحتها خوفاً من الحساسية واكتشفت إنك تتقبل المداعبات والمزح ونفسك خفيفة مع ثقل عقلك ( وش جاب ) .. :D :D
عاد هالحين دورك ياعاشق الصحراء عطنا لغزك الله لا يهينك وليكن عنوانه ( اللغز الثالث والعشرون ) ، ولا تبطي علينا الله لا يصغرك ..
============================================
أشكر كل من شارك وحاول في حل اللغز ..
الهيثم
28/06/2002, 04:31 PM
مشكور ياعاشق الصحراء وصح السانك عزالله إنــك جبتها وصح السان اخوي السمح على اللغز الجيمل ولا يخفيك عقدنا شوي والبركة في عاشق الصحراء بيض الله وجهه .
ولكم تحياتي
Powered by vBulletin® Version 4.2.3 Copyright © 2024 vBulletin Solutions, Inc. All rights reserved, TranZ by Almuhajir