تقرير سريع + سؤال مستعجل عن الكات فيش (الدمام)

[إلنترا 2005]

حياكم الله ياشباب مكشات


هذا يا طويلين العمر طلعت اليوم الفجر متوجه للفناتير في الجبيل على أمل إني أصيد


طبعاً المشروع فشل من بدايته لان الهوا كان (ومازال :D ) شديد جداً


حاولنا نرمي رميه رميتين نجرب حظنا دامنا وصلنا...لكن ماااااااااش


خيطك ترميه قدامك تلقاه راح في أخر الدنيا


قلنا الشكوة لله وقررنا نرجع الدمام نجرب حظنا في الكورنيش


رجعنا لكورنيش الدمام وما راح احكيلكم على الوضع لكن شوفوا مقطع الفيديو التالي (تحديداً بعد الثانية 50):
http://www.4shared.com/file/254498487/443d1d1e/20100401.html (http://www.4shared.com/file/254498487/443d1d1e/20100401.html)


طبعا الصخور اللي تشوفونها هذي احنا نجلس ونصيد من عليها :eek:



و لكم أن تتخيلوا حجم الاحباط اللي اصبناه فيه قررنا نرجع بيوتنا:(
بس قلنا خل نحاول محاوله أخيرة في المنطقة اللي تجي أول كورنيش الدمام


وفعلاُ رمينا خيوطنا والنتيجه كانت معقولة


حدود 20 حبة مشكل (قرقفان+شعم+حمام)


لكن السؤال هو التالي:


أثناء الصيد ضربت معي الصنارة ضربة بنت (...)


أسحب يا ولد!!..... الوزن ثقيل وكأن الخيط (مشير) في الصخر
المهم أسحب ولا يطلع كات فيش !!
خويي حذرني أن لها شوكة سامة !!


السؤال هو التالي:
الكات فيش وش لها ووش عليها ؟
لان طلعنا حدود 8 حبات (غير ال20 اللي فوق:D ) والمشكله أن أحجامها ممتازة جداً


هل يؤكل ؟
هل لحمه سام ؟
هل شوكته سامة ؟




طبعاً بالنسبه للي ما صاده بل كذا أقوله:
صيده فيه متعه عجيبه تسحيب وروح وتعال وسعه صدر:good2:


وهذي هي صورته:
http://pond.dnr.cornell.edu/nyfish/ictaluridae/channel_catfish.jpg


عطونا معلوماتكم بالنسبه لهالسمكه
وبالنسبه للي عنده مشاريع صيد في الجبيل يكنسلها من الحين لاني خبطت المشوار على الفاضي


والله يرزقنا وياكم

[حياتي البحر]

اخوي بالفعل شوكتها اللي بالظهر سامة وتسوي حرارةة لمدة ثلاث ايام انا كنت في الكويت اصيده بس ما اكلها كان الفلبين والهنود يشيلو وياكلوه بس ما شفت احد من العرب ياكله
وفي الصيف يتعبى الخليج منه وكنت اصيد احجام توصا 8 و10 كجم

[صياد شرقاوي]

السلام عليكم
إلنترا 2005 اخوي هاذي اسمها شم وهي بالنسبة لي أكره أنواع السمك :d لأنها متواجده في هاذي المنطقة بشكل دائم وذلك لأن المنطقة رملية والسمك هذا بالذات ياكل أي شي يشوفه قدامه وفعلا له احجام حلوة وفي الصيد له متعه ولكن نصيحة لاتاكله لأن اللي ياكله هم الاجانب الفلبينيين اكثر شي وشوفه بالسوق تلقاه متواجد بكثرة لكن لدي ملاحظة الصورة تختلف كثير عن الواقع ولكن اذا ماخاب ظني فهي نفسها اللي قلت لك شم وبعضهم يسميها أبو شنب اللي بالواقع مافيها سواد

[abu majid]

السلام عليكم... قبل فترة صدتها وكانت كبيرة وقررت اخذها و اقليها بعد ما بحثت في الانترنت وعرفت انها تنباع في الاسواق على شكل سلايس او شرايح المهم قليناها و طعمها لذيذ لكن..... بعد اول تذوق ما قدرنا ناكلها لان النفس عافتها ... بس لو تروح بنده تلاقيها تنباع هناك مجمد شرايح و صنع الفيتنام.

[ابو الترك]

والله لا املك معلومة عنها لكن الشباب فوق وفو وكفو وفي انتظار خبرات اهل البحار

[فش-أندرتيكر]

أللي أعرفه عن الكات فش انه فعلا فيها شوكه سامه و مؤلمه.....
و عن نفسي كنت أصيدها في أمريكا ,,, و أستغربت يوم صدتها بنفسي من خليج سلمان في جده لأني ما سمعت قبل كذا أنه أحد صادها هنا أو عن وجودها في البحر الأحمر,,,و لو ما صدتها بنفسي كان مداني ما صدقت.....
و بالنسبه لأكلها فأنصحك بتجربتها....لذيذه و لحمها زي الزبده....
أتمنى أكون أفدتك....
تقبل مروري
تحياتي لك و للجميع

[ابو جبر 9]

اول شي اخوي اشكرك على موضوعك .. وبالنسبه للسمكه هاذي انا ما قد جربتها بس خلك مثلي انا حاط قاعده بلبحر اي شي بلبحر يؤكل .. ما عدا الشي السام وحتا الشاقه كلتها وربي ما تصدق لحمتها ابيض من السمك وحلوه وميه ميه .. وفي اخي معلق يقول ياكلونها الفلبينين .. انا احب على كلامه للعلم بس الفلبن من افضل الناس في صيد السمك وفنااانين لاني شفتهم وشفت صيدهم وفيه اخ اخر جربها ويمدحها .. المشكله اللي عندنا مع الخيل يا شقرا .. ما يعرفون الا النااجل ومزعجينا عليه ومعلومه بس عن الناجل اول زمان الشيبان ما يحبونه . وانا عن نفسي اتكلم كل سمكه بلبحر لها طعم خاص فيها ومتا تعرف الكلام هاذا اولا تكون طازه ثانيا تطبخ بنفسك وراح تشوف لكن اذا صار شغل مطاعم ما راح تلاحظ الفرق وعلى فكره انا افضل الحريد واستمتع فيه اكثر من الناجل تدري ليش لانه ما يأكل الشعب المرجاانيه ولحمته زبده وهاذي وجه نضري . واتمنى لكم التوفيق

[ابو جبر 9]

اول شي اخوي اشكرك على موضوعك .. وبالنسبه للسمكه هاذي انا ما قد جربتها بس خلك مثلي انا حاط قاعده بلبحر اي شي بلبحر يؤكل .. ما عدا الشي السام وحتا الشاقه كلتها وربي ما تصدق لحمتها ابيض من السمك وحلوه وميه ميه .. وفي اخ معلق يقول ياكلونها الفلبينين .. انا احب اعلق على كلامه للعلم بس الفلبن من افضل الناس في صيد السمك وفنااانين لاني شفتهم وشفت صيدهم وفيه اخ اخر جربها ويمدحها .. المشكله اللي عندنا مع الخيل يا شقرا .. ما يعرفون الا النااجل ومزعجينا عليه ومعلومه بس عن الناجل اول زمان الشيبان ما يحبونه . وانا عن نفسي اتكلم كل سمكه بلبحر لها طعم خاص فيها ومتا تعرف الكلام هاذا اولا تكون طازه ثانيا تطبخ بنفسك وراح تشوف لكن اذا صار شغل مطاعم ما راح تلاحظ الفرق وعلى فكره انا افضل الحريد واستمتع فيه اكثر من الناجل تدري ليش لانه ما يأكل الا الشعب المرجاانيه ولحمته زبده وهاذي وجه نضري . واتمنى لكم التوفيق :good2:

[بـو بـدر]

السلام عليكم ورحمه الله

اولا : الصوره اخي الكريم من فصيله الجم ( الكات فش ) وهي تختلف اختلاف كلي عن التي بالخليج العربي .

ثانيا : الجم ( الكات فش ) لها ثلاث اشواك بالزعنفه الظهريه 1 والزعنفتين الجانبيات
وهي سامه ومؤلمه جدا جدا .

ثالثا : لها علي جسمها ( صنق ) ماده مخاطيه فوائدها توقف النزيف ان اصاب الانسان

وهي علاج فعلي لسم سمكه الذيبه ( سمكه تشبه الزمرور ) حيث ان للذيبه شوكتين بالخياشيم ان اصابت اليد يبقي ينزف الي مال نهايه ولا يوجد علاج بالمستشفيات وعلاجه الوحيد ( صنق الجم الماده المخاطيه علي جسم الجم ) فعال وفوري .

رابعا : سمكه الجم تعتبر من الاسماك الكانسه بالبحر حيث انها تاكل اي شي وتتواجد بالاطيان بكثره .

خامسا : من ينصح من الاخوان باكل هاذا النوع من الاسماك فاليتفضل يجرب ونصيحه خلي كيس جنبك احتياط .


تحـــياتـــي

[المجنوني]

هلا النترا
كيفك
بالعافية عليك ما اعرف شئ عنها
ولكن سؤال؟
تعرف وليد الدعبلي ؟
ام لا؟

[مشاغب السقالة]

والله ياشباب حيرتونا
للاكل او مو ؟
للصيد او مو ؟
سامة او مو ؟
بتتقبلوا مرورى او مو ؟

[mjazeef]

فعلا كل مره اطلع حداق في الدمام تضرب معي واردها البحر
بصراحها سمعتها مو زينه البعض يسمونها ( الزباله ههههها ) نسبه للزبال وانتم بكرامه ,

لكن المعلوم ان البحر كل مافيه يؤكل والتجربه خير برهان جرب وعطنا رايك...

.....................................
عن أبي هريرة -رضي الله عنه- قال: قال رسول الله -صلى الله عليه وسلم- في البحر: (( هو الطهور ماؤه، الحل ميتته )) أخرجه الأربعة...

.....................................

[al3omdaah]

الموقع الي انتي تصيد فيه هذا يمين الفان تايم وهو اكثر الأماكن الي يتواجد فيها الجم

لكن روح يسار الفان تايم ( المكان الي انت حاط الفيديو ) ماراح تلاقيهم موجودين

بس الله يعينك على الزمارير ( من بين 100 زمرور بتلقى قرقفانه وحدة صغيرة )

وانا استغرب كلامك انك صدت هناك حمام وشعم


مدري يمكن رميتك بعيد وطعمك ماياكله الزمرور ( اذا طعمك ربيان او خثاق ودي تشرح لي كيف الطريقة عشان )
لأن ما قد ضرب وياي اكثر من قرقفان حجم وسط

والباقي جم وزمارير مثل النمل


بالنسبة لسمكة الجم هذي ماياكلونها الا الأجانب
احنا بالنسبة لنا غير مستساغة ريحة السمكة نفسها لأنها ريحة مقرفة بصراحة
وانا لمن ارميها حتى للقطاوة ماياكلونها

[egy lion]

انا صدتها كتير جدا في كورنيش جده
واتشكيت منها اكتر من مره واتشكيت مرتين في يوم واحد مع اني عارفها وعارف الشوك اللي فيها لكن القدر والنصيب
شكتها تسبب الم فظيع قد يصل الي حد البكاء
الم لم اري مثله من قبل
ولكن ليس لشكتها اية مضاعفات سوي ورم خفيف جدا يزول بعد ساعه او ساعتين
انما الالم فهو يستمر اكتر من 3 او اربع ساعات
لم اكل هذه السمكه
ولكن قرات عنها انها مفيده جدا في علاج حالات فقر الدم
وكل الاطباء ينصحون باكلها لمرضي فقر الدم
تقبل تحياتي

[hooo]

اخوي هذي اسمها القراميط ويحبونها الفلبنين

[Faroug]

إلنترا : الاخوان افادوك الله يعطيهم العافية زي ما قالولك , لاكن احب اصلح معلومة ترا شوكتها غير سامة (غير نوع نهري محدد) اما الاغلبية غير سامة , مؤلمة جدا لابعد من الخيال لانها اذا دخلت صعب تخرج , وهي قذرة كسمكة (من غذاء وبيئة وليس لحمها) ودائما ما يلتهب الجرح بسببها وهذا إلي يلخبط اكثر الناس ويظن انها سامة . (ثلاث مرات رحت المستشفى بسببها) طبعا الكل راح يقولي "لا يلدغ المؤمن من جحر مرتين" كانت ثلاث مواقف مختلفة تماما هههه . (اضرب انتي بايوتك وعقم الجرح ووفر على نفسك) امريكا تكلف 500$ الزيارة للطواريء (الله لا يوفقك يا كات فش)

ابو جبر : يا غالي الحريد صحيح ياكل الشعب المرجانية او ما ينموا عليها لاكن هذي اول شي يتراكم عليه التلوث والرواسب وبالعافية على قلبك واسال الله يعطيك لين يرضيك ويرزقك بالحريد إلي ياكل من انظف شعبة :)