أبي حل للفتك دوخن ولا صحيح النيسان يرجع نيسان

[الجبخان]

السلام عليكم ورحمه الله وبركاته
أنقردت وشريت باترول 2006 سوبر سفاري ومن خذيته مابه عيضه عزم حمار مردوف واليوم أنا داخل على الله ثم عليكم ياأهل مكشات أفزعولي خسرت عليه واجد ماودي أبيعه وأشري تويوتا قديم لان مافيه نظيف والجديد خايس
وصف الحاله:
الموتر صافي من أحسن مايكون وهو واقف واذا دعست صافي بس إذا عشقت الموتر كأنه يكن معاها تقطيع بسيط وياقف على 140 او 120
اللي بدلت به واللي سويته :
صفايه هواء مع صفايه بانزين 9 مرات مع بلف رجيع مع تبديل جميع الكتاوتات بيهن مع تغيير زيت القير مع فحص القير عند الوكاله مع تبديل الطرمبه مرتين مره بالوكاله مع فك الشكمان كامل مع وزن الديلكو مع تبديل بواجي مع فحص الكمبيوتر أكثر من21 مره كل ماأجي ورشه يطلبون فحص كمبيوتر مع أنه مافيه لمبه والعه
هذا اللي أذكره والخافي أعظم باقي الكويلات مادري هل تسوي كذا
وديته يم ورشه التركي مرتين ماعنده سالفه مع احترامي لشخصه يوم بلش قال الموتر سليم يوم ألحيت عليه قال جيبه مره ثانيه وخليته يومين وادق عليه مايرد وبعدين قفل الجوال ومريت الورشه وسحبت الموتر
أفزعولي ماهي معقوله الفتك عزمه كذا ومدح الناس وينه ماشفته من شريته
وكانه كل فتره يخرب حساس انا ابي ابيعه لاني اطلع مقانيص وعر وشكله مايتحمل حساساته واجد وكهربه شغله

[Abu Sary]

الله يعوضك خيـر ،

لكن إن شاء الله تطب بالخراب ،

ويرجع ولا أحلى ،


النيسان عدو الإنسـان


بالتوفيق أخوي ،









( اللهم حسن الخاتمة )

[فهد773]

عايدي هو ولا اتوماتيك

[السفاري وبس]

شيك على منظم البخاخ تراه يسوي كذا وسعره بالوكاله 1250 ريال الله يعينك وتاكد من الصفايه الصغيره اللي تجي تحت باب الراكب الخلفي تراه تخلي الموتر يوقف على 120 لو تحرقه حرق والسياره ما عليه كلام النيسان على كل لسان

[الجبخان]

الجربوع الله يعطيك العافيه ومشكور على المرور
فهد الموتر تماتيك ماهو عايدي
السفاري وبس بدلت اللي تقول تحت الراكب الايمن الخلفي هي صفايه البانزين 9 مرات أبدله وعندي 3 شبه جدد

[الجبخان]

ياأخوان باقي أسلاك البواجي شلون أفحصه أنا شاك فيها واما منظم الهواء فصلته وطفى الموتر وولعت لمبه المكينه معناته شغال

[Fahad saleh]

مرحبا اخوي
كد صارت لي نفس مشكلة بالضبط حتى يزود التقطيع اذا عشقت الموتر بنمرة والمكيف شغال تدوس وتمشي ماتشوف اي تقطيع وزود عليه ذبحن بصرفية البنزين, بالنسبة للعزم كان لاباس عليه.
الحل رحت الى ابو ابراهيم العثيم بالقصيم فحص لي الموتر من الى كل شي سلييييييييم قال الرجال الله يذكره بالخير عندك برمجة الكمبيوتر ضاربة غيره وفعلا غيرته والى يومك الموتر سالك ومافيه اي مشاكل الكلام هذا له حول السنتين.
بالتوفيق اخوي.

[كودو]

الله العالم ان موترك فيه عين قويه:eek:

سوى زي ما يقول Fahad saleh او افصل اصابع البطارية تقريبا ربع او نصف ساعة وشف

[ابومعزي]

تاكد من حساس الهوا

[1988]

صف النيه يرزقك الله .............كل شي ولا الغيبه يا اخوي الجبخان ما تدري عن الرجال وش عنده من ظروف.... بالعكس انا اعرف الشخص لي اكثر من 10 سنوات والله ثم والله انه يبدي شغل الناس قبل اشغاله سواء بمجال عمله او بمجال العمل بالورشه ولاتحسب اني اتعذر للرجال ولكن كلمة الحق لازم تقال
وانا متاكد لو ترجع له راح يحللك المشكله بأذن الله لأني واثق من الشخص ومن تمكنه بمثل هذي الأمور
والأمر راجع لك يأخي الكريم

[ابن الجهراء]

السلام عليكم اخوي
شوف اذا فيه تهريب هواء بالشوتا يصير فيه كتمه
تاكد منه عزيزي

[طايش 06]

انا وأنا ما ادري
اقولك رح لأبو إبراهيم محمد العثيم ببريده بصناعية الرواف وهو يطلع لك العله من تحت الأرض
ما شاء الله عليه والله يوفقه

[هوايتي مكشات]

الله يعينك ....

[الإستراتيجي]

انا وأنا ما ادري
اقولك رح لأبو إبراهيم محمد العثيم ببريده بصناعية الرواف وهو يطلع لك العله من تحت الأرض
ما شاء الله عليه والله يوفقه


مع أني ما أعرفه لكن أنصحك من نصيحة أخوك رح له منت خسران شيء

وقل له أني غيرت كذا وكذا وكذا بالتفصيل حتى ما تروح تغيرها مرة ثانية ...


وأعتقد أن شغلتك برمجه أو كمبيوتر أو قريب منها

[الجبخان]

أخوي فهد
الظاهر ماباقي الا البرمجه ويعطيك العافيه لكن كم سعره تبديل الكمبيوتر كامل ولا البرمجه فقط
كودو
يعطيك العافيه على المرور
أبو معزي
مشكور على المرور وفحصته سليم
1988
أخوي النيه صافيه إن شاء الله والرزق عند العزيز الحكيم وأنا ماسبيته كشخص أنا أقول اللي شفت بعيني لأن كل المنتديات خلوه أفضل من الوكاله يمكن انه طيب ويستاهل إن شاء الله ولكن اللي من بعيد ويجيه مخصوص أقوله لا يتعنى لان الامكانيه اللي عنده عند غيره بأي مكان ،أما كشخص ونعم فيه ومقابلته حيه ورجال حي ولكن يوم عجز عن معرفت العله قال الموتر سليم يبي يقنعن أنه سليم وقال أرجع به مره ثانيه ورجعت به وقال يومين ثاني يوم اتصل فيه مايرد بعده مقفل طيب ليش مايقول ماأعرف متكابره الناس على الفطره مخلوقين وكلن طلع مايفهم وهذا المقصود ومشكور على مرورك أخوي
أبن الجهراء
الشوته سليمه ومافيه اي تهريب ويعطيك العافيه
طايش 06
والله الظاهر مابه الا هو ومشكور على المرور
هوايتي مكشات
جزاك الله خير على النيه الطيبه وكثر الله من أمثالك ويعننا الله وكل مسلم
الاستراتيجي
الظاهر مالي الا ابو إبراهيم ويعطيك الف عافيه ماقصرت

[سوبر VTC]

عندك الكهربائي العثيم او يوسف الخضير في بريدة
يوسف راعي مرهمات خصوصا مكاين الفتك و خبرة كهرب و برمجة :good:
الاسبوع الماضي اخذ المركز الخامس في سباقات الامارات


لاحظ هنا مشاركة و موتر يوسف من الثانية 31 سلقة باترول ازرق
http://www.youtube.com/watch?v=8qpN1Tof5WQ


القير اذا كان يريح يعلق بنمرة مثلا
يكون الحل برمجة للكمبيوتر ب300ريال تقريبا
او تغيير خارطة القير

[Fahad saleh]

أخوي الجبخان
والله ناسي التكلفة لاني كان عندي كذا شغله اذكر اني دفعة حول 2700 بس مو للكمبيوتر لحاله كان عندي اكثر من شغله مرواح وخرابيط واجد بالكهرب.
الشي الثاني بالنسبة لسوالك هل يكفي البرمجة والا لا ؟
هذا تحدده اذا اكتشفت المشكلة بالضبظ بالنسبة لي كان عندي الكمبيوتر ملعوب فيه شوي لذلك مارضيت بحل الوسط وانما استبدلته وسلك الوضع على طول.

[رفيع المقآم]

الله يعينك انت وسيارتك

[S E 3 5 0 0]

جرب هالحل وان شاءالله تدعيلي

فيه عند المحطات او ساكو أو العليان الي بخريص

ماده تنباع تضاف مع البنزين الظاهر سعره بحدود الـ 20 ألى 30 ريال

عب موترك بــ 20 ريال 95 وصب الماده بالتانكي

ومسكلك خط ولا ترحم الموتر اعلكه علك ونشاءالله يضبط

تحياتي

[الجبخان]

سوبر vtc
الله يعطيك العافيه على المرور ولا هنت أبي رقم يوسف الخضير الله لا يهينك ومشكور اول وأخر


أخوي فهد
بيض الله وجهك ومشكور على النصح

منوتي الشاص
الله لايهينك ويعين كل مسلم والله يحقق لك منوتك الشاص ولو انا وحداني كان شريته وماشاورت الله يستر عليك

s e 3 5 0 0

الله يعطيك العافيه فعلا جربت السائل اللي تقول ومافاد قالوا الاصلي عند شركه متسوبيشي وشريته 210 ريال
ومافيه فايده وغسلت البخاخات بجهاز الغسيل ومافيه فايده وفكيت الليات اللي تجي من الطرمبه لصفايه البانزين ولقيته وصخه وبدلته بالكامل قلت يمكن يظبط مافيه فايده ولو البرمجه أو الكمبيوتر به شي كان مايقرأ القوه للمكينه والقير صحيح ولكن العله وعلمها عند الله
كان الكويلات أسلاك البواجي تسوي كذا مادري وياليت اللي صار معاه كويل اللي هو سلك البوجي يعطينا علمه كيف يصير بالموتر لاني جازم ماباقي الا هو،ومشكور والله يعطيك العافيه

[وايلي شمالي]

السلام عليكم ياخوي اذا مالقية العلة ترا موترك مضروب عين والله اعلم

[ساري 111]

اتوقع مشكلتك بمنظم الهواء


والنيسان نيسان ولو رصع بالذهب لايزهى لك

[قرم العيال]

انت بموترك شيين

يا عين .. ما هنا شي ما سويت ولا نفع .. لو تبيعه شرط ان يسلك مع الي بعدك

او انت اخذ موتر خليجي ومكروف .

[عميد سامودة]

الله لا يقردنا

[وشو ذا]

الموتر والله اعلم محتاج الى معايرة صبابات وديلكو
ايسمونها تايمنج الله يفرج همك0000
تحياتي

[الجبخان]

وايلي شمالي
الله يعطيك العافيه على المرور

ساري 111
يعطيك العافيه منظم الهوى اذا كان قصدك الحساس حق منظم الهوى سليم وبالنسبه للنيسان والله نكرفهن كرف مع العيال مايبرد زيتهن وهذا اللي معجبن فيهن واول تجربه للنيسان ماندري وش تاليه

قرم العيال
الله يكفينا العين وشره وبالنسبه للموتر حتى المشي مامشى واجد وجلست ادور 4 شهور نظيف لين لقيت هالموتر ونظيف الله يستر علية بس هذي علته الوحيده ويعطيك العافيه

عميد ساموده
القرد من التطير وانا أخوك ويوم اني اقول انقردت بموضوعي من باب المزح وجزاك الله خير

وشو ذا
والله ياخوي مدري وش أو وشو ذا الصبابات اللي تقول عنها نعرف بلوف وكويل وديلكو ليتك تشرح لنا عنها

[ممدوح 2010]

الله يعينك واشكرك على صراحتك وبعدك عن المجاملات

[ممدوح 2010]

صريح تعجبني ماعندك مجاملات

والله يكون بعونك

[ممدوح 2010]

صررريح تعجبني ماعندك مجاملات
والله يكون بعونك

[قرقور الأول]

أخوي الكريم جبخان ...

مشكلتك صارت عندي في موتري بالضبط ...
تصدق اني أسافر الظهريه و انا طالع من الجامعه و الطريق 180كم ما امشي الا 100 ~ 110

لا و ازيدك من الشعر بيت ..

ان كانها هابه هواء و لا قابلتني طلعه ...يخلف الله .. أدور لي باص وانشب وراه و لا ما يردني الا 90 الى 95 و بدون المكيف و لا مع المكيف ينزل شوي ...

وديت الموتر لكهربائي هندي كيرلاوي.. عندنا جني >> صدق تراه جني...

قالي موترك ما فيه اي شي لكن ما عندك الا هالخبيث و يأشر له على شيء..

قلت وش هو ؟؟

قال هذا ..
هذا لا هوب اللي يخرب و تدري عنه .. و لا هوب اللي يعطيك عمره و يطلع الموتر سليم ..
قلت و شسمه؟؟
قال حساس الهواء..

قلت طيب ..

و اجي للوكاله قلت بكم الحساس حق الهواء قال ب 500 ريال
المهم واطلع و خفت من دفعة ال500 و لا يطلع هو البلى..

قلت مالك ياولد الا تروح للدريبي <<الظاهر اسمه كذا لكن وصفه على شارع عبدالرحمن بن عوف حول معارض النسيم يفتح غرب ..

المهم فحص لي الموتر قال عندك منظم الهواء و نبي نسوي تصفية و و و و...
قلت خلاص خلاص بس مع السلامة..
و اروح للوكالة و اشتري الحساس و فكه على طول بدون برمجة و لا خرابيط .. فك له مسمارين و فك الفيش و طلعه و ركب الجديد و طق المسامير و ركب الفيش...

أقسم بالله ان طريق مخرج 15 من الجهة الشرقية للدائري اني ما كنت اجيب فيه بالطقاق الا 80 ..

يوم ركبت الحساس الجديد ما رد موتر ي الا 180 كم
و لا خليت شارع في الرياض الا ورحت له من زود لبفرحة اختبره...

الخلاصة ..

شف لك واحد من ربعك و خله يفك حساسه و يركبه مكان حساسك ثم شف الانطلاقة..

الله يوفقك و يعينك و ييسر لك امورك

[هاوي غماره]

شف ياخوك وده لابو عادل الغميز

واحد من الجماعه نفس سالفك بغى يبيعه الا دقيقه ووداه لاابو غميز وضبطه له

[الجاعد2005]

السلام عليكم شف حساس الشكمان
افصله وجرب

[سوبر VTC]

لاهنت
لك رسالة على الخاص
موفق


رد في موضوع سابق


غالب المشكلة من كتاوت المكينة اللي بالرفرف الايسر
بدل الكتاوتات مع بعض
+
قنعهن بالمفك

كد صارت مشكلتك لموتر احد الربع فتك
ولعت لمبة المكينة
و السرعة ماتتجاوز 80




افتح كبوت سيارتك


وافتح بوكس الكتاوت اللي بين فلتر الهوا والرفرف

واتبع التعليمات اللي بالصورة . تبديل كتاوت لمبة الريوس مع كتاوت المحرك المهم جرب بين الثلاثة

وأنا وضعتها في نيسان أرابيا لأن هنام موضوع سابق لي لنفس المشكلة


http://www.nissan-arabia.com/vb/attachment.php?attachmentid=2061










المشكله من الكتاوتات اللي بالرفرف الايسر
خصوصا كتاوت المكينه + القير
طقطقهن بالمفك قنعهن + فصل البطارية
او بدلهن مع بعض و جرب





احيانا اذا خرب حساس اللهاة
يسوي لخبطة لحساس منظم الهواء
كما يسوي لخبطة لحساس الصرقعه
و يسوي لخبطة لحساس الدعسه
يعني بسبب حساس واحد يحوس كل الحساسات
و السبب انه يعطي قراءة خاطئة الى الكمبيوتر
بدل الكتاوت مع فصل البطارية
اذا مانفع تنضف اللهاة + برمجه الكمبيوتر





موفق

[سوبر VTC]

ارجو كتابة ردود لائقة
قل خيرا او اصمت
الرد الغير لائق يعرضك للانذار او الايقاف

[Fahad saleh]

السلام عليكم
الله يفك عوق موترك وتبشرنا بالاخبار الحلوة مع العلم قيه ردود تضيق الصدر ودك تبيع الموتر.
لايضيق صدرك ولا شي , مشكلتك بسيطه بس وشلون تكتشفه هذا شي, الصبر و التروي في الامور ذي هو العلاج والفحص نقطة نقطة .
الشي الثاني لاتغيير وتخسر قطع وانت مانت بحاجته شف لك موترك نفس موترك وغير وفك وركب وقارن .
بالنسبة لقتراح اخوي سوبرvtc ارشحه لك وبقوه وماراح تخسر شي مالعلم مابعد كلام الاخ سوبر vtc هرج.
وبالتوووووووووفيق

[الجبخان]

قرقور الاول
الله يعطيك العافيه جربت الحساس بس ماصار هو الله لا يهينك ماقصرت

هاوي غماره
بعيد عن الغميز ولا كان جيته بيض الله وجهك

الجاعد 2005
عز الله انها ولعت معاي لمبه المكينه قبل فتره ووديته يم الكمبيوتر وقال حساس الشكمان إذا ولعت معاك مره ثانيه مرنا وبدل الحساس قلت وش سويت به قال مسحته من قارئ الكمبيوتر الله يذكرك للشهاده لأن من بعده تدهور الموتر ابي امرهم العصر واجيب العلم مشكور

مشرفنا الغالي سوبر بيض الله وجهك على الرساله اللي بالخاص وعلى تفاعلك معاي ومع أي فرد من أفراد
المنتدى وهذا من عوايدك السبق للطيب وعسانا نرد لك الجميل وأنت ثمره المنتدى
بالنسبه للكتاوتات بدلت وطقيت ونظفت واخر شي بدلت بجديد مافيه فايده
مشكور ماقصرت

ألاخ فهد
مالي الا العثيم على كلام الشباب وبالنسبه للكتاوتات مافاتت علي بس مافيه فايده
اما بالنسبه للردود مادريت عن شي ماهو زين ويضيق الصدر كل كلامكم عسل وطيب نيه
وكلامكم واقعي واذا فيه رد مادريت فيه من فوق راسه بطحى يحسس عليه بعض الردود
تجاريه بحته بعيده عن الواقع،وان شاء الله بالاجازه نبي يم العثيم ونجيب الخبر كان ماظبط
وألف ألف ألف شكر لك أخي فهد وعساك ماتشوف مكروه يالغالي

[Fmejrad]

الله يكون بعونك ويحل مشكلتك يالغالي

[جهام القصيم]

نسأل الله تيسير امورك وننتظر النتائج الاخيرة مع العثيم

[الجبخان]

Dar4arab
الله يعطيك العافيه ومشكور على الدعوه

جهام القصيم
الله يجزاك خير ويعطيك العافيه

[الجبخان]

السلام عليكم ورحمه الله وبركاته
أتقدم بالشكر الجزبل لكل من تفاعل معي في موضوعي وحاول يحل المشكله ولو بدعوه أو كلمه أو مرور
طيبه
وأتقدم بالشكر الخاص لأخوي الغالي سوبر vtc ولأخ فهد صالح ومقدر معروفكم معي ولن أنساه


بالنسبه للعطل مدحلي واحد من الشباب ميكانيكي ممتاز قال رح يمه ، ولكن صاحبكم مال وعايف من
كثر الورشات اللي على قل سنع ،قلت خير ان شاء الله يوم انه ألح علي أنه ممتاز ومن الكلام المهم
رحت يمه ، يوم جيته قال وش سويت قلت كذا وكذا وكذا قال بس خلاص افتح الكبوت واذا تبي تروح رح
لاني اطول بعد ثلاث ساعات أخلص أو خذ الموتر وتعال الصبح بدري واحل المشكله وانت واقف.
جيته الصبح فر الديلكو قال جرب يوم خف صوت البلوف بدون فايده ورجعت له قال نزله ومع صلاه الظهر تعال تلقاه جاهز.
الصدمه جيته قال جرب الموتر قلت خلص قال ايه نعم وبكل ثقه وانا مصدوم قال جرب الموتر واذا ضبط
تعال ومعاك 200ريال
جربت الموتر ماشاء الله عليه كأنك مكتفه ومربطه وأنطلق ياخفه خفاه عزم وفزه لا اله الا الله
المهم رجعت ماحسبته موتري
قلت اللي صلحته وشو قال ماصلحت شي بس وزنت الديلكو مع الزنجير لان اللي وازنه مايعرف، صوت البلوف
عالي وقلت وغيره قال سلامتك .
قلت يارجال انا منزله بالوكاله اسبوع وقبله ورشه ابو تركي بالرياض ورشه باترول ووزن لي الديلكو وقبله ورشه بالقصيم ووزن لي الديلكو وقبله ورشه ثالثه ووزنو الديلكو بعد طلب مني لان المشكله كهربائيه
بحته ومافيه فايده قال ماعندهم سالفه المهم هالحين يجيب 180 براحه لا وكفرات بالون حجم 900 ماشاء الله
الزبده اللي معاه باترول وقطع تقطيع بواجي او اسلاك بواجي والبواجي جديده يعني كهربائيه يكون وزن ديلكو
ولازم يطابق الزنجير واذا ماطابق الزنجير مع وزنه الديلكو مافيه فايده
والحمد لله انتهت الازمه وسلمنا من سالفه البيع
وجزاكم الله الف خير

[دانكن]

ارسل لي وصف الورشة مع الرقم بالخاص يالغالي ,,

واحد من الشباب جيبه مايمشي .. :) ..

[جهام القصيم]

مبروك الحمد لله على العقلان والله يجعلها نهاية الاعطال والله يطعمك خيرة او يكفيك شره

[صلفان.نجد]

مثل هالميكانيكي لازم انك تكافئه بنشر رقمه وموقعه للفايده للجميع.والمره الثانيه لاعاد تستعجل بالخساير وانت من اعضاء مكشات.والحمد لله اللي سهل امرك.

[Fahad saleh]

ماشاء الله تبارك الله
الله يبشرك بالخير
فرحتنا بهالخبر الله يمتعك فيه ويطعمك من خيره ويكفيك شره.

[ترابيع]

والله فرحت لك اخوي الكريم ..

و هذي فيها فايدة بعدم الاستعجال .. و وصف اي مشكلة بانها عين او حسد ..

الله يبارك لك في حلالك .. ويوفقنا واياك لما يحبه و يرضاه ..

[العبله]

ما شاء الله تبارك الله
والله اني فرحت لك يوم زان موترك الله يعطيك من خيره ويكفيك شره.
بس لو ترسلي رقمه او مكانه على الخاص لا هنت.

[صباح القايله]

الحمد الله ان الله وفقك بواحد جيد
الله يطعمك خيره ويكفيك شره
زي مقلوا الاخوان يليت الوصف او الرقم

[الجبخان]

مشكورين والله يعطيكم العافيه
بالنسبه للوصف الورشه بحائل
ولكن الرقم ماخيته منه او خذيته وضيعته
لكن لعيونكم بكرى امره واخذ رقمه
واللي طلبن رقمه على الخاص اعذروني
لاني المنتدى مايسمح لي الردود وسط
ولكن راح اجيب لكم المعلومات كامله
وانتظروني
والف الف شكر لكم وماقصرتوا

[امبراطوور]

لو تعرف احد عنده فتك
جربوا تفكون شي من موتره وتحطه بموترك
الشغال شغال والخربان غيره وكاله