مشكلة عداد البنزين في الباترول

[ramisif]

السلام عليكم

واجهتني مشكلة في عداد -امبير- البنزين الأساسي للباترول موديل 2007
يعطيني قراءة خاطئة مرة فوق مرة تحت

طبعاً أول مأشغل السيارة يعطيني قراءة OK
وبعد فترة (بين دقيقة إلي دقيقتين)الأمبير يبدا يلعب مرة فوق مرة تحت ومرة عالنصف.

طبعاً فحصت الفيوزات وفصلتها وشبكتها، وفصلت إصبع البطارية ولافية فايدة.

والصورة هذى أخذتها لموتري
طبعاً أول ماشغلت لقيت لمبة البنزين مولعة وعالطول شبكت التانكي الإحتياطي وفجأة والتانكي الإحتياطي ماتحول كلة للأساسي حصلت أمبير الأساسي فوق النصف وهذا مستحيل.

http://up.arab-x.com/Mar10/uub59181.jpg (http://up.arab-x.com/)

ياليت تفيدونا عن الحلول
وأرقام من هم ثقة في إصلاح هالمشكلة في الرياض

وشكرا

[قرم العيال]

في الرياض عندك التركي

ويجونك الشباب ويعطونك الارقام ..

لا تستعجل امره سهل يالغالي

[عارف الشمري]

انا معي نفس المشكله (مره يرتفع ومره ينقص بشكل بسيط)

اشك انها العوووووووامه 60%

موتري باترول 99

انتظر احد الاخوان المختصين

[ممدوح 2010]

اتوقع ان المشكلة بالعوامة

[سوبر VTC]

http://www.mekshat.com/vb/../pix/upload02/images54/mk58646_subtank.jpg


يتضح ان كود ( لمبة ) التانكي الاضافي مولعه SUB TANK و بهذه الحالة لا يمكن تحويل البنزين من التانكي الاضافي الى التانكي الاساسي ...


سابقاً كانت تولع و اذا احتجت البنزين الاضافي او اذا كان عندي مشوار طويل افصل اصبع البطارية و اعيده مره ثانية و تطفي و تجلس فترة طويلة - شهر , شهرين , ثلاثة شهور - ثم تولع اما هالحين ما تجلس ولا ربع ساعة الا وتولع مره ثانية و يستحيل تحويل البنزين من تانكي لاخر ؟؟!!..


شباب اللي عنده الحل ينقذنا الله لا يهينه ,,, او اللي يعرف ورشة سبق ان حلو هالمشكلة - ما احب المغامرة و تجارب العمالة - يدلني عليها ..


والله يجزي الجميع الخير والبركة ...


وما ودي اودي الموتر للوكالة مواعيد وصرف دراهم و كذب واختلاس للمسلمين ...



رد في موضوع سابق

هل خرب زر التانكي الاحتياطي مايحول ؟
هل انبير البنزين سابقا يلعب مره فل و مرة على النص
و مره على الربع
عموما
عندك ورشة التركي تخصص نيسان بالصناعية القديمة
او ورشة العثيم + ورشة يوسف الخضير في بريدة
غالبا يخرب التانكي الاحتياطي بالفتك
و شغله يكلف مع الضمان من 300 الى 500ريال
الخراب بنفس الطبلون خراب ايسي مثل ايسي ارسال الكنود او الايكوم
و قد يكون العطل
قاعدة العوامة منطلقة من محله و تسبب المشكلة
او من الفيش او كتاوت او فيوز
و لازم يتاكدون من الظفيرة
لكن غالب المشكلة من الطبلون
دام ان الانبير يلعب فالمشكلة من الطبلون باذن الله خراب ايسي بنفس بورد او خريطة الطبلون
الفتك دايم مايشتغل و السبب الكتاوت يلذع و يسوي طبقة كربون سوداء تمنع توصيل الكهرب مثل املاح اصبع البطارية
لتفادي المشكلة
ماتشغل الموتر حتى تطفى الطرمبة + تطفى لمبة التشيك بالطبلون
عندنا الكهربائي العثيم ببريدة يصلح الكتاوت على الضمان ب50ريال
الان نزل بالمحلات كتاوت جديد لونه اخضر
على كلام الاعضاء انه حل لمشكلة الكتاوت السابق لونه ارزق

فائدة لو ماشتغل الموتر اضرب الديكور يسار الدركسون و افتح السويتش
راح تسمع صوت اشتغال الطرمبة
كد صارت المشكلة لفتك م2005 + م2006 + م2008
بسبب الكتاوت مرة بالصمان و مرة بالنفود الكبير
ايضا يوجد درج صغير يسار الدركسون افتحه تحصل كتاوت زرقاء
اضرب الكتاوت اللي يمين فوق بمفك
اقنعه بالمفك عدة مرات و افتح السويتش
و راح يشتغل باذن الله

[سوبر VTC]

انا معي نفس المشكله (مره يرتفع ومره ينقص بشكل بسيط)

اشك انها العوووووووامه 60%

موتري باترول 99

انتظر احد الاخوان المختصين


صارت نفس مشكلتك لاحد الربع قبل شهر
صالون باترول م2001
طبعا التانكي الاضافي مايحول
حصل المشكلة العوامه منطلقة
دايم تنطلق و تخلي الانبير يلعب
طبعا كبس القاعده بمكانه و ربطه من جهتين بسيم

اعطال انبير الباترول كالتالي
خصوصا عدم التحويل
فيوز او كتاوت
و اذا كانن سليمات
فالمشكلة من العوامة او ظفيرة التانكي

[رابح999]

سبق وان حصلت لي هذه المشكلة على باترول 1999 والسبب اني عندما اشغل الكشافات التي ركبتها على الدعامة يتغير عداد البنزين ويعطي قراءة ان التانكي فارغ وعند اطفاء الكشفات يعود الى وضعه الطبيعي وبعدها فصلت الكشافات.

[ابو علي 99]

هذى المشكله يا رابح نقص في الماص الي رايح للتانكي ماعليك الا تزود سلك من هيكل السياره الى التانكي وتروح المشكله (( ماص ))

[ramisif]

السلام عليكم

أشكر كل من مر وأعطاني رئية

اليوم مريت ورشة التركي وقالي أصلحها لك بـ500 ريال
قلت له وش بتصلح وهل يحتاج قطع غيار قال لا بس بأفك الطبلون وأصلح شغلة في الطبلون
أنا أشوف أن 500 مبالغ فيها وخاصة أن الشغله صارت محتكرة بين التركي والعثيم في بريدة

ياليت اللي يعرف أحد غيرهم يعرف لهاشغلة وبسعر غير مبالغ فيه

بس مأقول إلا الله يهديهم بس.

[1988]

500 بس اشوف انه معقول بالنسبه للوكاله رح للوكاله وشف وش يقولون لك بيقولون لك خرفشششششش 3000وغير طبلون وما اشوف الشغله احتكار لكل مجتهد نصيب:p

[sarab88]

اخوويا بعطيك رقم محمد التركي متخصص بالباترول رح يمه وان شاء الله تتسهل اموررك تقبلووووووا تحياتي

[sarab88]

طيب اخوي انا باوصف لك محل بالصناعيه القديمه بالرياض وانت داخل من عند دوار الخرج ورحت طوالي لين تجيك الإشارة حقت قزازا السالم تعدها لين يجيك البنك على يمينك جنبه ملف تعده . الملف الثاني خش معه يمين شفه كان ماخاب ظني على اليسار على طول فيه رجال شرواكم اسمه ابوعادل مميز جداًوبطران تقبلواااااااا مروري:)

[ramisif]

500 بس اشوف انه معقول بالنسبه للوكاله رح للوكاله وشف وش يقولون لك بيقولون لك خرفشششششش 3000وغير طبلون وما اشوف الشغله احتكار لكل مجتهد نصيب:p

السلام عليكم

أنا ماقلت إنها إحتكار إلا بعد ماقالي العامل اللي بورشة التركي (ياتصلحها عندنا أو عند العثيم في بريدة والسعر واحد 500، ولا رح للوكالة خلهم يغيرون الطبلون)

طبعاً الله يرزفنا ويرزقهم بس بالكلام المعقول لو حسبناها وبالغنا بالحسبة ( فك الطبلون 150+ إصلاح المشكلة 100)

بس 500 والشغله ماتاخذ إلا ساعة ونص وأغلب الوقت يروح في فك الطبلون

حياك الله أخوي sarab88، ورشة التركي مريتة وهو اللي نتكلم عنة مع الأخ 1988، أما أبو عادل إنشاء الله بأمرهـ ووصفك واضح ماشاء الله، وسبق وأن وديت موتر واحد من الشباب عنده

[سوبر VTC]

اخي العزيز لا تكتب انشاء الله => من الانشاء و العدم
و هذا لا يجوز
بل اكتب ان شاء الله
اكتب بالقوقل الفرق بين انشاء و ان شاء

***

جرب حل مؤقت و ان شاء الله تضبط
افصل البطارية كل الاصبعين و السويتش مفتوح
و انتظر 10 دقائق او نص دقيقة

عندك الفلبيني فيلب برياض الخبراء يصلح الشغله ب550ريال
ريال ينطح ريال و لا في امل ينزل من السعر

موفق

[ramisif]

الله يجزاك خير أخوي سوبر Vtc

جربت وفصلت أصابع البطارية والسويتش مفتوح وزبطت قراء الأمبير حتي وصل البنزيم إلي الربع ومن ثم لاحظته بدا يلعب مرة ثانية.

الله يجزاك خير علي المتابعة وتقديم النصح.×

[راعي كيف]

السلام عليكم
نفس المشكله بالضبط وسويتها وتمام


صارت نفس مشكلتك لاحد الربع قبل شهر
صالون باترول م2001
طبعا التانكي الاضافي مايحول
حصل المشكلة العوامه منطلقة
دايم تنطلق و تخلي الانبير يلعب
طبعا كبس القاعده بمكانه و ربطه من جهتين بسيم

[فرغالي]

طيب اخوي انا باوصف لك محل بالصناعيه القديمه بالرياض وانت داخل من عند دوار الخرج ورحت طوالي لين تجيك الإشارة حقت قزازا السالم تعدها لين يجيك البنك على يمينك جنبه ملف تعده . الملف الثاني خش معه يمين شفه كان ماخاب ظني على اليسار على طول فيه رجال شرواكم اسمه ابوعادل مميز جداًوبطران تقبلواااااااا مروري:)

صدقت اخوي والله ابو عادل ونعم الرجل مكانيكي درجه اولا اسأل مجرب ولا تسأل طبيب انا من ضمن الى معامله اكثر من 15 سنه

[SGL]

مشكلتها بسيطه وراح يفيدونك المكشاتيه
تقبل تحياتي

[ابو عطفه]

اقولك ريح راسك ورح للعثيم بصناعية الرواف ببريدة وهو ان شاء الله عنده الحل

[راعي العشــه]

يسعد مساء الجميع
الله يكون في عونك يابو عبدالله مالقيتلها حل ؟؟؟

[1988]

اخوي ابي اختصر عليك الموضوع بدون مبالغه مالقيت احد بالرياض كله يصلح هالمشكله الا التركي مريت ناس لهم صولات وجولات بالكهرب ولا عرفو للمشكله حل ورضخت للامر الواقع وصلحته عند التركي بعد ماعانيت الأمرين مره يقطع بي الموتر على انه فيه بنزين وآخر شي يصير فاضي والأمر عائد لك اذا بتصلحه والا لا

[عاشقsgl-v]

الله حيه اخوي

انا الي منزل موضوع نفس موضوعك المهم ,,

انا والحمد لله صلحت موتري بالدمام لكن ب 600 ريال لان عندي 3 اشياء خربانه وهي

التانكي الاساسي والاضافي ومقياس الحراره

لكن والله ان كل الشغله ما تستاهل حتى 200 ريال لان كل ما في الموضوع انه غير اسيااات

محترقه وكل الشغله 10 دقايق ,, فانا اقول لك اذا تعرف لك واحد حق الكترونيات فاهم شغله

وشاطر فك الطبلون ووده له وخله يشيك لك على الاسياااات حقت البانزين اذا فكيت الطبلون بتشوفها

واضحه يغير لك الاسيات وكان الله غفور رحيم ,, بس اهم شي انه يكون فاهم واشدد على كلمة فاهم

واذا تبي رايي ادفع 500 ريال وريح بالك على شغل نظيف واهم شي انك متطمن من الي يشتغل

وهذا الي عندي والله اعلم

تحياتي لك

[ramisif]

حي لله راعي العشة الله الله المشكلة إلي الأن

بس فصلت أصابع البطارية لعشر دقايق وأنا داق السلف وبعدها زان الإمبير وصار مايلعب إلا نادرا ويعود لحالته الطبيعية

أخوي 1988 التركي إن شاء الله بنمرة أو نمر غيرة بس الواحد ياخذ رئي الثقات أولا وبعدين نتوكل على الله إن مالقينا حل

عاشقsgl-v (http://www.mekshat.com/vb/member.php?u=62121) مبروك إصلاحك للمشكلة وشكلنا بنتوكل على الله بعد تجربة كل الطرق ومشاورة أهل الثقة

[قناص البري]

السلام عليكم ,
انا عندي فتك 2004 سوبر سفاري ولاحظت فيه اخر يومين ان العداد ماهو مضبوط
وسهيت عنه وتفاجئت ان الموتر يطفي على وينتع . وقلت شكلها الطرمبه
حملته على سطحه ورحت الوكاله الجبر بالجبيل
واليوم الثاني الا يقولي الطابلون خربان ولازم تغيره ب 3000 ريال تقريبا
لان قيج البنزين خربان والتانكي الثاني ما راح يشتغل معك
وش الحل ؟ هل تعرفون ورش تصلح المشكله بالجبيل او الشرقيه
لان القصيم بعيد مره او ارقام احد او طبلون بالتشليح
تحياتي لكم

[هيار النفود]

عزيزي صاحب الباترول ..
على ما اعتقد هذا عطب فني

واكثر من واحد صارت معاه المشكلة

الراي انك تتفق مع 7 اشخاص على الاقل وإن زدت كان افضل معاهم نفس المشكلة وتنحرون الوكيل بمواتركم وتزهمون مدير الفرع وتلجون عليه كلكم يالسبعه كل واحد مع شنق

يصلحه غصب عنه


لاتنسا
الكثرة تغلب الشجاعة

[ابووو تركي]

اها

موفقين ياشباب

[سوبر VTC]

السلام عليكم ,
انا عندي فتك 2004 سوبر سفاري ولاحظت فيه اخر يومين ان العداد ماهو مضبوط
وسهيت عنه وتفاجئت ان الموتر يطفي على وينتع . وقلت شكلها الطرمبه
حملته على سطحه ورحت الوكاله الجبر بالجبيل
واليوم الثاني الا يقولي الطابلون خربان ولازم تغيره ب 3000 ريال تقريبا
لان قيج البنزين خربان والتانكي الثاني ما راح يشتغل معك
وش الحل ؟ هل تعرفون ورش تصلح المشكله بالجبيل او الشرقيه
لان القصيم بعيد مره او ارقام احد او طبلون بالتشليح
تحياتي لكم

اقرا ردي فوق بخصوص الورش
موفق

[kellahd]

عزيزي صاحب الباترول ..
على ما اعتقد هذا عطب فني

واكثر من واحد صارت معاه المشكلة

الراي انك تتفق مع 7 اشخاص على الاقل وإن زدت كان افضل معاهم نفس المشكلة وتنحرون الوكيل بمواتركم وتزهمون مدير الفرع وتلجون عليه كلكم يالسبعه كل واحد مع شنق

يصلحه غصب عنه


لاتنسا
الكثرة تغلب الشجاعة

نعم الرأي
تبي الصراحة الوكالة و الشركة من قبل ملزمة باصلاح العيب المصنعي

بس عندنا العيب فيك و ليس في صناعتهم

----------
اجل عبداللطيف جميل
صار فيه عيب مصنعي في اللندكروز الصالون من موديل 90 الى 93 في القير النمرة رقم 2
ارسلت الشركة لعبداللطيف جميل تروس كميات كبيرة لتغييرها لاصحاب السيارات
كلها عبداللطيف جميل و صار يعطيك تخفيض في شغل اليد كرم منه و يحسب عليك القطعة بسعرها
الا من له اصحاب في الوكالة اخبروه فاصلحها لهم مجانا

الله المستعان ما عندنا الا الدجة

[ALBDRANE]

هل أحد صلح المشكلة هذي الايام يخبرنا بتجربته

[sh236]

السلام عليكم
اخوي عاشقsgl-v
وين الورشة الي في الدمام انا عندي سوبر سفاري 2008 وفيه نفس المشكلة بالضبط مع عداد البنزين

[مدير الكدري]

السلام عليكم المشكله في الفتك هي العوامه في التناكي مشكله بسيطه جداا

[مدير الكدري]

الله حيه اخوي

انا الي منزل موضوع نفس موضوعك المهم ,,

انا والحمد لله صلحت موتري بالدمام لكن ب 600 ريال لان عندي 3 اشياء خربانه وهي

التانكي الاساسي والاضافي ومقياس الحراره

لكن والله ان كل الشغله ما تستاهل حتى 200 ريال لان كل ما في الموضوع انه غير اسيااات

محترقه وكل الشغله 10 دقايق ,, فانا اقول لك اذا تعرف لك واحد حق الكترونيات فاهم شغله

وشاطر فك الطبلون ووده له وخله يشيك لك على الاسياااات حقت البانزين اذا فكيت الطبلون بتشوفها

واضحه يغير لك الاسيات وكان الله غفور رحيم ,, بس اهم شي انه يكون فاهم واشدد على كلمة فاهم

واذا تبي رايي ادفع 500 ريال وريح بالك على شغل نظيف واهم شي انك متطمن من الي يشتغل

وهذا الي عندي والله اعلم
كلام صح شكراا تحياتي لك يا العاشق

[sh236]

يالربع ما فيه احد يرد علينا :( :( :(

[كديان]

يالربع ما فيه احد يرد علينا :( :( :(

و لا تزعل
اخوي ارسلت رسالة للعضو على الخاص بخصوص تساؤلك
و ان شاء الله يرد باقرب فرصة باذن الله في نفس الموضوع
اذا عندك مشكلة مر على محل كهربائي او تلفزيونات سواء فلبيني او هندي

[sh236]

جعل من جابك الجنة ماقصرت

[قصيمي تسحت]

طيب انا عندي مشكله في العداد انه اذا كان الامبير على ثلاث ارباع يكون التانكي فيه نص
واذا صار امبير على النص يكون فيه باقي اكثر من الربع
وقوه المكينه 4500 والموتر تانكي واحد فقط
فيه احد يعرف وشي المشكله

[فتى سلمى]

متابع وبقوووووووووة

[ابوعلي225]

السلام عليكم ياخوان حصلت مع نفس العله وهي كتالي :
1- علامة سب تنك تكون معلقه وهو اسبب يكون من طرنبة البنزين حقت التانكي الاحتياطي (ركب طرنبة فورد 2004)قيمتها 180 ريال افضل من شد البلد لان القوه اعلا
2- قم بفحص الطرنبه قبل التغير وهي افتح غطاء التاكي وضغط زر تعبات التانكي وتلاحظ ان البنزين يصب في التاكي الاساسي واذا كان خلاف ذلك قم بفحص الكتاوت وهي كتالي الرفع الفرشه التي تحت المقعد الخلفي وتلاحض غطاء قم بفكه ثم أفصل الاسلاك واحضر فاحص الفيوز الاسلاك اذا كان يوصل الكهرب فالعطل من الطرنبه واذا لم يوصل الكهرب فالعطل من المنضم او الكتاوت (الافضل وده للعثيم) لان مايزبطه لا كهرباءي سعودي يكون نصوح مو مثل هل الاجاني يتخبطون عليك همهم الماده لني مجرب ولي يشتغل بيده مو مثل الي مسك شغله غيره ونصيحتي لك مادام موترك غلي عليك لاترخصه للاجانب يتعلمون عليه (عط الخباز خبزه ولو أكل نصه)ونا ماخص العثيم بس (انا يوم حدت الخلل )وديته للعثيم وزبطه وله الحين سنتين والحمد لله معاليش اخوي وده ولو تخسر عليه هذا موترك

[الرهااااااوي]

الله بجزاكم خير بصراحه كنت متضايق من الباترول بسبب هل العدادات البنزيم والحين ان شاء الله لقينا الحل لهل المشكله الي بسببها مفصل تانكي ضهر احتياط والله يبيض وجيهكم ويريحكم دنياء واخره وبصراحه مع منتدا مكشات ماعاد فيه اهات ولا ونااات 0000 وتقبلو مروري