مشكلة من بديت أشغل المكيف .. تكفون أفزعوا

[ملقاط بن جمر]

بسم الله الرحمن الرحيم السلام عليكم ..يا اخوان .. المشكلة بدت من يوم صرت أشغل المكيف مع بداية الصيف ..اذا طفيت السيارة اشوف فيه ماء ينقط ..أول شيء شفته تقريبا نقطتين إلى 3 نقط .. وبعدين جلست حوالي اسبوع ماشفت شيء ..بعدين صرت اشوفه يوميا تقريبا اذا وقفت من مشوار وانا مشغل المكيف .. أما بدون مكيف ما فيه شيء ابد ..المكيف برودته مثل العادة ولا تغيرت ..اليوم خليت الموية تقطر في يدي لقيتها مويه باردة وواضحة البروده فيها ..طبعا الأكيد إنها مو من الاردتر لأن الماء لونه عادي ولاهوب أخضر ..وش رايكم يالربع .. السيارة لومينا ال اس 2005 وترا خبرتي في السيارات مثل خبرة جدتي في الذرة .. يعني لا أوصيكم ..اللهم يامنان ياقوي ياقادر .. وفق أي شخص يساعدني او يقدم لي المشورة وإجزه خير الجزاء وبارك له في وقته وجهده وماله .. إنك على كل شيء قدير ..

[ساري 111]

اذا الماء بارد مثل بروده المكيف لاتقلق تراه عادي وكل السيارات بهالشكل خصوصاً بالاجواء الرطبه

[b.l.z 2007]

هلا بك اخوي ملقاط بن جمر ...

يشرفني اكون اول واحد يرد علا موضوعك ...

المويه هذه طبيعيه في كل السيارات مويه مكيف حتى وانت واقف ومشغل المكيف تلاحظ انه يقطر ماء
مثل باقي المكيفات


ارجو اني افدتك ....

واي استفسار انا حاضر ...

[ولد ميسان]

عادي ولا تشيل هم بس المهم إنك تتأكد إنها مويه عادية مو زيت أو موية ملونه زي موية الرداتر . وهذا شي طبيعي يعني حط في بطنك قرع مو بطيخ صيفي و ناااااااام

[عقـــــــــاب]

أخوي ملقاط بن جمر

مثل ما أفادك الإخوان هذه مويه طبيعيه وفي كل السيارات لاتشيل لها بال

والسبب والعلم عند الله وتراها من عندي يعني لاتاخذ بها

هي بروده مواسير المكيف مع حراره المحرك ينتج عنه رطوبه وتكثف ومن ثم تساقط

قطرات ماء خفيفه .

وكل السيارات يحدث بها هذا الشيء

والله يطول بعمر جدتك على الطاعه ويحفظها لك بس أهم شيء ماتسولف لك عن

تريتره وعن السعلوه هههههههه

[فهد773]

عادي وانا اخوك هذا بعد دليل على انه المكيف ممتاز وبرودته عاليه في المواصيرمع حرارة المحرك ينتج كثافة

[الركن الهادي]

انشاء الله مافيه مشكله؟؟؟؟؟؟؟؟

[عبدالعزيز-1]

طبيعي

كل السيارات كذا

سيارتك سليمه ومافيها شي

[راعي البهقا]

حياك الله اخوي ملقاط بن جمرة
هذا امر طبيعي جداً وهو عبارة عن تكثف ماء وتجمدة على أنابيب وموصير الكنبرسر وهذة علامة على ان الفريون ممتلئ ولزم تفرح ياحبيبي لان ذلك يدل على نظافة المكيف ماشاء الله تبارك الله لا حول ولا قوة إلا بالله .
وشكراً لكم جميعاً. ،،،
محبكم راعي البهقا ،،، ×

[abo fai9al]

هذا طبيعي وانا اخوك المواصير تثلج وبعدين يميع الثلج ولو تلاحظ ما يطلع الماء ذا الا بعد مشوار مع المكيف يعني بعد فتره من تشغيله (((( لا تشيل هم )))

يا حليل مشكلتك قدام مشاكلي ههههههههه


الله يوفقك تحياتي

[ملقاط بن جمر]

بيض الله وجيهكم جميعا .. الحمد لله إنكم طمنتوني .. لاحرمكم الله الأجر من عنده ..

[رفيع المقآم]

احمد ربك ياؤجال هذي مويه المكيف يالغالي عاااااادي لا تشيل هم