فزعتكم ياهل حايل.. وكل من طب حائل..

[أبوياسر1]

مساء/صباح .. الخير :)

يا جماعة الخير..
حنا مجموعة من الشباب ما يتعدون ال20 ناوين الإربعاء نشد لحايل :)
المشكلة أن ولا واحد منا قد طب حائل :( ...

أبي ياالاجاويد اسئلكم وين أفضل مكان نسكنبه بحائل ..
وأتمنى إذا واحد يعطين رقم استراحة زينة يزين لي خدمة ما أنساه له :) ( ملعب زين يعني يمشي الحال دورات نظيفة و.. إلخ) ..

ووش أفضل الأماكن والمكاشيت والمعالم بحائل الي تستاهل الزيارة.. مع الإحداثيات إن أمكن ..


يله عاد استفزعنابكم ولا تردوننا.. :(
الله الله بالردود :)

[هواي البر فهد]

وعليكم السلام ورحمة الله وبركاته سجل يا بعد حيي أسماء الأماكن واسأل عنها حتى العمال يدلونك عليها ومن سأل ما ضاع :
1- ( توارن ) فيها عين جارية وفيها آثار بيوت قبل الإسلام منها بقايا قصر حاتم الطائي وآثار قبل سبعمائة سنة منها بقايا قصر أصفر من شيوخ شمر تبعد عن حائل أقل من مائة كيلو شمال .
2- ( جو ) فيه عيون جارية جميلة جدا .
3- ( الصندوق ) فيه آثار ونحوت صخرية تدل على أن المنطقة كانت مغمورة بالماء في الأزمان البعيدة لكن غيرها أحسن .
4- ( الحفير ) لها رونق حيث أنها بلدة صغيرة فيها بساتين تحيط بها النفود من جميع الجهات وتنزل لها من مرتفع رملي فتكون تحتك كأنها واحة أو دوحة شمال حائل سبعين كيلو .
5- ( جبة ) بلدة فها آثار وفيها متحف وفيها جبل سنمان عليه نقوش ثمودية شمال حائل مائة كيلو وبعدها حدود خمسين كيلو يمدحون الربيع .
6- ( طابة ) اذهب لطابة القديمة حيث تقع في فوهة بركان , ثم اذهب لجبل هتيم شرق طابة الجديدة فيه فوهة بركان عجيبة ومخيفة وانتبه ثم انتبه ثم انتبه لا تطيح انت وسيارتك لأن اللي ما يعرفها ماينتبه لعدم وجود لوحة تحذيرية أو سياج على الفوهة والطريق فجأة ينقطع على طرف الفوهة لكن فعلاً مكان جميل جداً والربيع فيه زين وترى فيه ردمية تطلع من طريق طابة سميراء على اليسار صراحة مكتوب لوحة فوهة براكين من أجمل الأماكن وزرتها قبل اسبوع ربيعها أحسن ما مر علي أنصحك بمرورها .
7- بخوص الشعبان النظيفة والزينة سجل عندك ( مشار ) وفيه منتزة وطني لا بأس به .
8- ( شعيب الشعبين ) قريب من توارن .
9- ( شعيب شوط , وشعيب حية , والتفيهي ) قريبة من الحفير يمكن أن تجعل زيارتها في ويوم واحد .
10 - ( شعيب ظلظل ) جنوب حائل حدود 45 كيلو لا بأس به .
11- ( شعبان السنيِِم ) جنوب حائل حدود سبعين كيلو .
12 - ( شعيب صحى ) جنوب حائل حدود 50 كيلو شعبان نظيفة .
13- داخل مدينة حائل هناك مطل على حائل في حديقة السمراء على رأس جبل السمراء شرقي حائل أنصحك بالنظرإلى حائل منه , كذلك المطعم والمتحف التراثي غرب برج حائل , وهناك أحياء قديمة جدا مثل : سرحة ولبدة ومغيضة فيها بيوت طين بعضها ساقط وبعضها قائم للعبرة فقط .
14 - بلدة ( عقدة ) فيها مناظر جميلة وفيها بعض السدود وفيها جماليات من صنع أهل البلدة وشعبان نظيفة وهي أقرب القرى لحائل فهي أقل من خمس كيلوات عن حائل وجديرة بالزيارة .
15 - هناك أيضا شعبان العش , والمشط , ركان ... حلوة لكن الأيام الأخيرة تزدحم وهي عادية ليس فيها ميزة تذكر .
16- بالنسبة للنفود إذا تبي نفود نظيفة يبيلك تدخل شوي عن الأزفلت , بخصوص التطعيس هاليومين ما أدري على أي طريق إذا جيت أسأل عن الإشارات والمحطات أصحاب الجيوب الشاص والربع يدلونك إما على طريق حائل جبة الجوف السريع أو على طريق حائل جبة القديم .وأسأل بعد كم كيلو بالتحديد . لأنهم يغيرون باستمرار .
هذا والله يفوقك ويسعدك ويحييك .


والمعلومات منقوله عن احد الاعضاء الله يبيض وجهه

[أبوياسر1]

فهد..
ما أقول إلا الله يجزاك الجنة..

ياجماعه الخير مازلت في انتظار ردودكمــ..
إذا أحد خابرلنا استراحة بحائل أو حوله طبعاً استراحه نظيفة به ملعب ودورات نظيفة و..إلخ ليت لو يعطين خبر ويزودن برقم الاستراحه..

في انتظار النشاما :)

[الاركان]

عندك طال عمرك
حي اليرموك
اخبر فيه استراحات واجد

وعندك في عقده استراحات ومزارع للايجار
تراها مرة ممتازة
بس انبهك لشيء ترانا مقبلين على اجازة مدارس يعني بتلقى زحمه ناس وضغط على الاستراحات يبيلك
من بدري


ولا تنسى تمرون على بقعاء وجبه
ترى كل الوناسه وسعة الصدر هناك

وليتني هناك والله كان ما تنزلون الا عندي بس للاسف ظروف العمل
ما تسمح لنا

[أبوياسر1]

الاركان..

بيض الله وجهك يالغالي وماقصرت

لكن أنا أبي واحد يعرفلي استراحه زينه تصلحلنا..
أو يعطين رقم الاستراحة أتفاهم معه..

[BLACK-_-LOVE]

وعليكم السلام اخي العزيز قبل ماتدخل عقدة تلقى على اليمين استراحات للايجار

[شاويكو]

جبه والعقده لايفوتنك
عاد السكن ماجربنا العزابيه

[الحربي حاتم]

ماشاء الله
كل هالأماكن السياحية في حايل ولا نعرفها
لازم لها زيارة إن شاء الله