حرارة الباترول على النص

[مداحش]

السلام عليكم ورحمة الله وبركاته
أحبتي لدي باترول 97 كان ماشي معي زي العسل , لكن من شهر تقريبا إذا بغيت أمشي واخذت 20مسافة -30 كلم تبدا الحرارة في الارتفاع حتى النص وأحيانا فوق النص بقليل , وديته الورش قالوا غير أوتوماتيك المروحة وغيرته وعلى نفس الوضع ماتغير شيء !!!! الرديتير مافيه شيء سوى إنه كان يهرب بشكل بسيط ولحمته , وش الحل يالغاليين ؟؟؟؟؟

[رفيع المقآم]

اخوي المروحه شغاله تمام نظف الرديتر والسنندر وحط ماء احمر وكاله ثم شف يمكن المكينه جايها شي الله يستر

[شقران755]

اخوي ليتك توضح اكثر ممشاك بالسرعة كم . والاديتر نحاس او المنيوم . وهل هو مع مكيف او بدون مكيف ترتفع .ولاحظ قربة الماء تنقص او تزيد.

[جهام القصيم]

وعليكم السلام ورحمة الله وبركاته

إذا كان يحتمي وانت تمشي فاتمتيك المروحة سليم عندك مشكلة في الاديتر او بلف الحرارة

وفق الله الجميع لكل خير

[مداحش]

(http://www.mekshat.com/vb/member.php?u=152215)منوتي الشاص
شقران
جهام
الله يعطيكم العافية ومشكووورين على الرد , بخصوص السرعة أمشي 120كلم , أما الرديتر توي مغير مويته " الأصلي " وبدون تشغيل المكيف , وش الحل

[شاهي ربيع]

شف تأكد من البلف
يمكن يصير منسد او متسدد
دائماً ابدأ بالاشياء الصغيره فالاكبر

[Abu Saad]

كانك في الرياض فمر ورشة باترول (ابوصالح التركي) وادع لي.

[سوبر VTC]

هل الماء ينقص هالحين ؟؟؟
هل قربة الماء تمتلي ؟
احد الربع معه سلقة باترول م91 فوق سرعه 120 تعدا الحرارة الخط الثاني
طبعا كان مركب غطاء اصلي استكر برتقالي
رجعه للوكيل و اخذ غطاء بدون استكر و نامت الحرارة
صارت بين الخطين :good:
غالب مشكلة الحرارة
من البلف اذا كان قافل او معلق بسبب الطين فان الموتر يحتمي
لان الماء مايدور بالسرعه الكافية من و الى المكينة
اذا كان الاديتر مسكر يحتمي الموتر لان الماء مايدور
افتح غطاء الاديتر و دس بنزين
اذا تحرك الماء او نزل فان الطرمبة تمام
اذا العكس فان الطرمبة مبوشة مجيمة او متاكلة الريش ماتدور الماء

[الجبخان]

أخوي أول شي تأكد من القربه ولياتها
ثانيآ مثل ماقال مشرفنا الغطاء دايم يسوي كذا
شف للربل اللي بالغطاء تالف او يمسك زين
ويسكر على المويه
ثالثا سيخ الرديتر يمكن مجاري الماء مسكره
رابعا اذا مافاد وجت الموتر حراره عاليه
وطفيت الموتر او عبيت ماء وهي مرتفعه الحراره
يعني ماحاولت تبرد الموتر بعدين صبيت ماء على طول فانه
يمكن الخلل من الراس وعسى الله يسهلها عليك

[شقران755]

اخوي شيك على الرديتر . والبلف . وتماتيك المروحة . والخراطيش اذا كانن تجاريه يحتر الموتر لانه ينصفط الخرطوش اذا مسكت خط .

[مداحش]

الله يعطيكم العافية جميعا , بيض الله وجيهكم وماقصرتم

[adil33]

غير الرديتر وبلف الحرارة اذا موجود وغطاء الرديتر وباذن الله ما تعرف الحرارة خمس سنوات ( استعمل مويا مقطره فقط ) لا اخضر ولا احمر ولا عاديه

[طائي الجبل]

أخي الغريب أن الباترول مايعرف الحرارة ماشاء الله وهذا شيء معروف خاصه مثل هذة الموديلات
اذا كان ينقص ماء الأديتر في كل مشوار فهذا تلف في غطاء الأديتر يتسرب منه الماء ويتبخر دون ما تشعر ودون ماتجد له أثر تسرب 0
وله تأثير على بلف الحرارة يجعله دائما فاتح مايعطي فرصه لتبريد الماء بالأديرترثم يعاود الفتح ثاني مرة بماء بارد نسبيا وهذة فائدة البلف وبالشتاء عكس هذة الحركة 0
غير غطاء أديترأصلي نيسان وجرب يقول أسأل مجرب ولا تسأل طبيب مع احترامي لكل الأخوة المشاركين