الأرانب البرية حول الرياض

[مشغول]

السلام عليكم ورحمة الله وبركاته


يالله انك تحييهم

يوم الخميس 22/1/1426هـ كنت انا وبعض الشباب في روضة خريم الجهة الجنوبية الشرقية من جهة رمال الدهناء

وفي حدود الساعة 9 مساء وانا راجعين .. إلا وذاك الارنب اللي فز قدامنا .. ماصدقنا خبر .. وراه وطردي وقامت السيارة تزلق لأن الأرض كلها طين .. ويمن ويسار ... والأرض مليانة قشع ..والشباب يدورون الكشاف اليدوي علشان نلحقه على رجلينا .. طبعا لا سلاح ولا نبيطه .. داخت روسنا :looney: وانا نلاحقة ..

المهم خفت على موتري وخليتها تروح في حالها .. الله يستر عليها لين ارجعلها .

طيب أي واحد يروح ويلقاها ويصيدها لا ينساني .. ترا الدال على الخير كفاعله ;)

[استاذ قلق]

ماشاء الله تبارك الله ..
أرنب ؟
وقريبة ..
ياخي انا لفيت الصمان أكثر من مره ماشفت أيتها أرنب ..
الا كانها من أرانب الأرانب اللي تنقال :) ..
امزح معاك خيو ..
لكن في البر .. كل شي يصير ..
.
.
نشوف رأي البقية ..
بكل ود ..
اخوك ..
أستاذ قلق ..
دمتم ..
..

[خشم الحصان]

الاخ الغالي
مشغول
السلام عليكم
وشلونك يالغالي عسك بخير مشاء الله الله لايضرك ارنب حته وحده حنا ياخيي لو نشوفها في شبك في سوق الحمام قمنا نحوم حولها وانت الله يغفر لنا ولك تنفج في وجهك في البر الله كريم
طيب ورا ماعطيتنا الاحداثي حق الموقع او نواي تمشورنا وبالله هذا وصف
حط الاحداثي الله يثيبك ثم قل (طيب أي واحد يروح ويلقاها ويصيدها لا ينساني .. ترا الدال على الخير كفاعله)
اقول ودي ترسلي رساله خاصه وفيها الاحداثي ترا الربع مشفح والله ان يحرثون المنطقه حرث
اخوك
خشم الحصان
طبعا لا سلاح ولا نبيطه ..........................ولا ارنب بعد
والشباب يدورون الكشاف اليدوي علشان نلحقه على رجلينا ..................... ودي اصدق ;) انكم تلحقونه برجلينكم.................. اقول هذي ارنب الله يرفع قدرك............ مهوب جربوع............. :row:

[الجمس]

اخوي مشغول
الله لايشغلنا الا بطاعته , لايكون بس ترى المنطقه مليانه بساسه ؟ بعدين يوم انك مشغول وش اللي موديك هناك ؟؟؟؟ ترى امزح لاتزعل .
الله يهدينا وياك وين تبي تعلم ها المشفح !!! لاوالله الا راحت المنطقه والربيع وطي .
تحياتي

[مشغول]

هلا أخوي ... أستاذ قلق

ليس من رأى كمن سمع .. وشكرا على الارنب :rolleyes:

.................................................. .....


هلا يا خلفهم .. خشم الحصان ..

أبشرك أنا طيب وبخير والحمد لله على العافية .

أما سوق الحمام كثر منها .

وبعدين وش تبي انت بالاحداثية .. راسك كله خرايط قارمن الصحراء .. ما يحتاج احداثية ... الموقع واضح .

واذا تبي نكشت انا وإياك بلحالنا ما عندي مانع .. :)

.................................................. ...........


مراحب اخوي الجمس ..

في الحقيقة ودي أقول انه بس .. لكن معي في السيارة 5 من الشباب كلهم يقولون إنه ارنب ... وبعدين ما بيني وبينه إلا 20 متر يعني واضح .

...

وهلا بالجميع

[ناصح]

اقول لا تعلم أحد

وصدق خشم الحصان كان يجون العالم يحرثون الارض ويدوسون العشب كلة

رغم ان الارانب في سوق الحمام على عشرة ريال

[شايب الصمان]

السلام عليكم ورحمه الله وبركاته
أخوي مشغول
ماعليك من كلامهم كله الي يبي يصدق يصدق :confused:
ياخوي بعض الاخوان بهاالمنتدى عليهم بعض التعليقات ( مثل طبختي لهم يوم طلعة الاعضاء كلا يقول ويش زين الريحه ,,الجوع شين ,, ويوم أكلوا وشبعوا قالوا الي قالوا :no2: :no: ) ..
ماعليك منهم أهم شىء أنك شفت الارنب ومتأكد منه خلهم مع تعليقاتهم الحلوه :D .. تدري ليش يقلون أنهم مهب مصدقين علشان تعزمهم على المكان وتثبت لهم كلامك لكن ماعليك منهم , :light: أنا مصدقك بس أعزمني لحالي, :hot: أنت ودني للمكان فقط والباقي أتكفل به أنا أذا ودك تعزم خشم الحصان بكيفك أو الشباب الي ردوا مافيه مانع .....

[(محمد العبري)]

أنا عندي تبرير ؟؟؟
وجود الأرنب بهالمنطقة وارد لأني اعرف احد الزملاء الي له مخيم حول هالمنطقة ويربي فيها أرانب برية :confused: ايه ارانب بريه :eek: وعلى خبري انه الحين عنده حول العشرين جوز أو أكثر ماشاءالله لكنة يشتكي من عدة أمور :
1- حيوانات مفترسة ((جاب كلب كبر قريح ورتاح ))
2- البومة ((كل بين فتره ياخذ الشوزل ويتقعدله ويمسطبه )) وحط بلاكاش على اربع بلك داخل الحوش للأرانب يحتمن به
3- يترك باب الحوش مفتوح (( :what: )) ماله حل ؟؟؟
وبكذا طلع من عنده اكثر من أرنب
ولكم تحياتي
اللي يبي يشوف المخيم ...................... :cool:

[الجمس]

خشم الحصان
لاوالله الا رحنا وطي وطلعنا من المولد بلا حصه !!!!!
شايب الصمان يقول يبيها لحاله , والنقى يقول ارنب خويه ؟؟؟؟
تحياتي للجميع

[(محمد العبري)]

الغالي الجمس
ضحكتني الله يوسع صدرك
أقول تراي لو أشوف الأرنب عند الباب لقطته هالمور مابه خوي :)

[نفل]

السلام عليكم ورحمة الله

هلا اخوي مشغول

وش بلاكم على اخونا مشغول كلامه صحيح انا قبل حوالي شهر تقريبا كنت كاشت مع العائلة ( جنوب شرق الروضة ) بس الصراحة ما شفت الارنب لكن شفت جرته وتراني مصورها بس ما ني متأكد يمكن مهيب
جرة ارنب والله اعلم .
طبعا المكان عندي :D

اخوكم ابو محمد

[ابوفهيدان]

ياسلام عليك

[كوكب ازرق]

الله يعطيك العافية