فزعة اهل مكشات

[عز نفسك]

بسم الله الرحمن الرحيم
السلام عليكم ورحمة الله وبركاتة


اولا اتشرف بإنظمامي الى هذا الصرح العملاق والى اخواني العزيزين والغالين واشكركم على هذا المجهود الطيب الذي تشكرون علية من داخل الاعماق ,,,

ابي الفزعة منكم يالذيابة انا توني مشتري سفاري 2001 ربع فل كامل نضيف الموتر لكن عزمة ماهو كويس واذا جاب 140 وقف وينزل بعد وقت الى 160 وابي الفزعة منكم يالوجية الطيبة ومشكورين مقدما

اخوكم محمد الشمري

بإنتظار الردود على احر من الجمر

[ابوطاقية]

لاتضيع دراهمك المكينه ضعيفه
غير الي يحتاج تغيير اسلاك بواجي وبواجي وصفاية هواء ويمكن يهديه الله ويمشي فوق 140 بعدين ترى السرعه ماهي زينه ارفق الله يزوجك

[عز نفسك]

والله يالغالي مااضن المكينة ضعيفة الى هالحد

[f 16]

كهرب السيارة يبيلة فحص كمبيوتر رح اقرب ورشة ببريدة يفحصلك كمبيوتر
بصناعية الرواف اوبالتشليح

[بدوي جنوبي]

ينقل لقسم الاعطال

[سفاري959]

من يقول ان المكينه ضعيفه اسمحلي ما عنده سالفه كان معي 98 مكينته 4200 ويجيب طبلونه وكان جديد توه ماشي 20000 وواحد من اخوياي كان معه ربع 2003 ماشاء الله عليه يقاوم ارباع التايوتا وهو بلد شف لك مهندس معروف وافحص موترك الموتر ماهو طبيعي اتمنى اني افدتك

[سوبر VTC]

نتشرف بك اخو عزيز

و ان شاء الله تجد ما يسرك
تفيد و تستفيد
الله يطعمك من خيره و يكفيك شره

عدة نقاط له دخل بالعزم
صفاي بنزين
اسلاك بواجي
بواجي
وزن الديلكو اهم نقطة
وزن البلوف
تاكد من كلتش المروحة لا يكون مجيم ثقيل
الموتر كلبليتر ؟
مقاس الكفرات خصوصا اذا كانت كبيرة
نقص هواء الكفرات
تنسيم هواء بخرطوش اللهاة حق القربة اذا كان بخاخ
تنسيم هواء بوجه الثلاجه اذا كان بخاخ
انسداد دبة التلوث اذا كانت توجد
انسداد فلتر الهواء يكب بنزين على حساب نقص الهواء
موقعك ؟ هل مريت على ورش ؟ وش قالوا ؟ :)

[ساري 111]

والله نصيحه لك من اخو لاتضيع دراهمك على الفاضي ..

اقوله لك من تجربه لباترول ربع سفاري بخاخ 2006

الموتر شد بلد حده الـ 160
لكن اذا صار معه الهواء والخط متواسي يوصل للـ 180 واقرب طلعه تهين عزمه

إلا عاد تبي ترهمه وتحط فلتر و ... الخ هذا كلام ثاني

[الجبخان]

ياخي بعض الردود تطفش وترفع الضغط
محمد ماعليك من الردود هذي
الموتر بخاخ ولا عادي ؟
مريت ورشه ولا لا؟
اذا انت بحائل انا ادلك بورشه مظبوطه
طلعوا علت موتري فتك على طول
مع اني نزلته عند ورشه باترول بالرياض 5 ايام
وبالوكاله حول الاسبوع بس ماعندك احد
اذا بغيت علمن

[عز نفسك]

الله يبيض وجيهكم وماقصرتوا انا مريت لي كم ورشة وماعطوني علم لكن ابي اشوف الاعطال الى عطيتوني واشوف وجزاكم الله كل خير

[عز نفسك]

ياخي بعض الردود تطفش وترفع الضغط
محمد ماعليك من الردود هذي
الموتر بخاخ ولا عادي ؟
مريت ورشه ولا لا؟
اذا انت بحائل انا ادلك بورشه مظبوطه
طلعوا علت موتري فتك على طول
مع اني نزلته عند ورشه باترول بالرياض 5 ايام
وبالوكاله حول الاسبوع بس ماعندك احد
اذا بغيت علمن

الموتر كبليتر
حبيبي لا عدمناك وشي الورشة الى تقول؟؟؟
مع العلم اني بحايل
وجعلها بموازين حسناتك