المقالب حوادث لا تنتهي اتحفنا بما عندك

[تلاشت]

بسم الله الرحمن الرحيم


السلام وعليكم ورحمة الله وبركاته



اخواني
هذا موضوع لم اشاهده قبل في اي منتدى واتمنى انه يكون حصري لموقع مكشات
واطمع انه يكون موضوع لا يمل وكل يدخل له


كل المطلوب انك تدخل وتكتب ما عندك
وانا راح ابدا بسالفه لاخوي سمعتها اليوم منه


يقول
انه اتصل عليه صاحبه من الفواره وبنفس لحظه اتصاله كان الخزان مليان ويصب على المكيف وله صوت كانه مطر
قال له اسمع المطر وخويه يستانس ما شاء الله تبارك الله بعدين قال له انه الخزان


تروح الايام ويتصل اخوي عليه
ولا يرد صاحبه عليه
راح وعطا جواله ولده وقال اذا قال وين ابوك قل له انه طلع يشوف البروق
ويرد الولد
وين ابوك قال انه طلع يشوف البروق
ويستانس والله اخوي


بعدين بعد ما قال له عن السالفه
قال هذي رد للمطر الخزان


اتمنى اني ما اطلت عليكم
وانتظر ما لديكم

[برق القصيم]

عليكم السلام ورحمة الله


فعلا موضوع شيق عن المواقف الطريفه اللي تحصل بين الاصدقاء


لكن يجب ا ن نذكر انها ماتحدث الا بين اثنين يومونون على بعض ويمازحون بعض
لان البعض يرى انه شئ يضر مصداقية الشخص


وانا كنت من المحبين للمقالب مع الناس اللي ابخصهم زين.... لكني تبت عقب سالفة(هلال الغاط) اللي ذكرته بخيمة الالغاز :) تووووبه
ولعلنا جميعا نعرف سالفة قديمه اللي هي(كل واحد ياكل من زهابه) وحوادث طريفه كثيره حدثت
وايضا سالفه سمعت عنه حدثت باحد قرايا القصيم رجال كان يشتغل بحفر وطوي القلبان
وهاك اليوم الرجال عقب صلاة العصر نزل بالقليب يشتغل كالعاده وكان احيانا اذا كان القليب عميق يحتاج لمن يساعده بالنزول ...ساعدوه مجموعة رجال ونزلوا معه الهيم(المطرقه) واغراضه
وكان فيه شخص عيّار راح لبيت هالرجال وطق عليهم الباب وكانت زوجته على نياته بالحيل
قال ياام فلان مادريتي!!! ابوكم هالحين تحت الارض!!! انهبلت المسيكينه
قال والله اني انا والجماعه عقب العصر منزلينه بايدينا تحت الارض....الله يذكره بالخير
المهم ويقعدون بالبيت صياح ونياح
يوم رجع الرجال لبيته عقب المغرب ...قالت زوجته بسم الله بسم الله وقالت عجوز ثانيه كانت عنده تواسيه : يحيي العظام وهي رميم ,,يحيي العظام وهي رميم :D
قال الرجال والله انه فلان اللي سواه مابه غيره
وسلامتكم

[جداوي صميم]

انا قريت بأحد المواقع عن ذا المقلب شئ خيالي,,,

مجموعة شباب طالعين رحله للبر معهم واحد(خواااااااااف)بغو ربعه يصلحون فيه مقلب.......يوم جت حزة النوم حطو في فراشه عقرب محنطه
يوم جاء ينام قرصه واحد من العيال في رجله وصرخ(الخوااااف)اااااه وش ذا؟؟؟؟؟؟؟؟ قالو اخوياه:ياويلك يافلان عقرب تبي تموتك .........صدق المسكين وقال:ااااااااه السم بدا يسري بجسمي .............قالوا: يالله للمستشفى بسرعه قبل لا تموت...........وهو يصرخ : ااااااااااه السم وصل نص ساقي اه اه اه (خرااااااااط)
يوم انتصف الطريق قال : السم وصل بطني (كذوووووووووووووب) وهم يقولون له: تصبر.تصبر ويوم وصلوا الشله للمستشفى وهو يصيح: يا شباب حللوني انا ابموت اشهد ان لا اله الا الله وان محمدا رسول الله ..............في هذه اللحظه ما قدروا الشباب يكتمون ضحكاتهم وهم يقولون له: قم يا نصاب ما فيك الا العافيه.
هههههههههههههههههههههههههههههههه
ماشاء الله علية عاش الدور صدق

[حزوبر]

السلام عليكم ورحمة الله
في أحد الأيام أرسلت ولدي يشغل السياره الصباح، يوم طلع ولدي رجع يقولي يبه سيارتنا مهي فيه، مسروقه، والله شغلت سيارتي الثانيه ووديت العيال للمدارس، واتصلت بأحد الأخوة المتقاعدين، وقلت له ، عليك مهمة تفتش في شوارع النظيم، وأنا بتولى الثمامه ، مريت على قسم الشرطه، وابلغت عن سرقة سيارتي،واثناء وجودي بالقسم، لقيت صاحب دوريه تعاطف معي(جزاه الله خير والسامعين)وقالي عطني رقم جوالك، طلعت من القسم متجه للثمامه، وما يمديني وصلت كبري الفحص الدوري، وإلآ صاحب الدوريه يتصل، انت سيارتك جيب بترول، قلت أيه، قالي (ابشرك عقل الله سيارتك) والله فرحت وقالي كمان سيارتك سليمه ومافيها شيء.
قال تعرف جامع ..... الفلاني، قلت إيه(وأنا مندهش) قالي تروح لباب الجامع الشمالي تحصل سيارتك واقفه عند الباب، وعندها دوريه:eek:
أثاري الباب هذا إلي أخرج منه !!!
والسياره مهي مسروقه
وأخوكم من كماخته ، صلى الفجر، ورجع للبيت ، رجلي ويوم أصبحت ، ومالقى الولد السياره ، نسيت، إني ناسي سيارتي ، عند المسجد:D
قلت النكته لصاحب الدوريه، وهو يضحك ويقول ، أنا مستغرب من وقفت السياره، مهي وقفت حرام، وأقول يمكن الحرامي الضعيف ندم، وصلى الفجر، ووقفها وراح لسبيله:D

[فهد الهلالي]

السلام عليكم ورحمة الله وبركاته
اخواني الافاضل
اشكركم على تواجدكم معنا بهذه الخيمه الشعبيه
وماتطرحونه من من قصص ومواقف
وحسب رغبة بعض الاعضاء بان تكون على صفحه موضوع واحد
حتى يتم قراتها وحده بعد الاخرى وموقف بعد موقف
تم التواصل على هذه الصفحه

ولكن مثل هذا المواقف الطريفه تحتاج الى دعمكم بما تكتبونه انتم وبطريقتكم الخاصه
كلا على اجتهاده ولا نريد المنقول وحسب الموقف الذي مر به شخصيا او من شخص عزيز عليه
امل تواجدكم على هذه الصفحه والتي سوف نخصصها للمواقف الطريفه
وانتم واجتهادكم

اشكركم مرة اخرى والله يحفظكم
تحياتي

[تلاشت]

عدنا من جديد
شكرا لك اخوي برق القصيم
وشكرا لك اخوي جداوي صميم
وشكرا لك اخوي حزوبر
والشكر لمشرفنا فهد الهلالي على دعمه لنا


والشكر لك من جاء وكتب سالفه جديده
لان ما راح اخرب تسلسل السوالف بالرد على الاعضاء وعلشان تسلسل الردود
وبالنسبه لسالفه برق القصيم اللي ذكرها برده ( هلال الغاط ) اقتبستها لكم لانه سالفه تستحق القرائه واعجبتني


ابشر يازعيمنا

هذا الله يسلمك ومن يقرأ

واحد من زملاء الدراسه الله يذكره بالخير كنت دايم احب امزح معه بمقالب خفيفه بطريقة (التوريه) اقول له كلام له معنيين وهو ياخذ الكلام على وجهه طبعا وبعد ما تنطلي عليه الخدعه يكتشف المقلب
وكنت دايم استاثم به :) (يقالي ذكي) اذكر من ضمن ماقلت له :
ياخوي مادريت وش اكتشفت امس!!! قال وشو وهو مندهش
قلت له ولد الخريّف بدا يلهم من الحشيش!!!قال منهو ذا ما اعرف احد بهالاسم
قلت الا تعرفه زين وكاد مير الله يستر علينا وعليه بس خلاص لا تنشد منهو
ويجلس يلح علي فتره طويله بعدين اعلمه الخرّيف اللي هو الخروف الصغير بدا ياكل حشيش ما يرضع....
ومن هالنمونه
المراد مرت مده طويله وقضينا من المدارس وكبرنا شوي
وهو يتصل علي يوم 29 شعبان بحدى السنين حول صلاة العشاء
وقال لي تراهم شافو الهلال الليله بالغاط وحلف لي بالله ان اخوه شايفه بعينه
طبعا بهاك الوقت كلن يتحرى الاخبار والجوالات مدهره ,,,هاه بكرا صيام والا لا كل العالم تنشد
واخوكم بالله راح وقال لاهله جبنا العلم خلاص تروحوا الليله ...قالو مااعلنوه بالتلفزيون
قلت بكيفكم وانا اللي اتروح بالبيت هاك الليله
واروح اجيب مقاضي السحور وكل من في طريقي ابلغه
ولا جا في بالي اي مقلب يعني الجو السائد مايخليك تتوقعه ابد نتحرى الشهر الفضيل
والحريم ماقصرن نشرن الخبر ويسالونن وش تبون سحور
يوم جت الساعه حول 11 ونص بالليل وهو يطلع لنا سليمان العيسى بالتلفزيون ويقول وعليه فان يوم غدا هو المكمل لشهر شعباااااان ,,,وهي الانظار تتجه علي وانا ضايع وجهي واخوي يقول اكيد اللي قاللك الخبر شيعي!!!
جلست افكر بكلام الرجال وهو اقسم لي بالله واتذكر المكالمه كامله يوم ذكرت الغاط وانا اللي مثل اللي صحى من النوم وبغى يغشى علي من الضحك وعرفت اني اكلت مقلب كبييير بشر اعمالي ومن نفس الكاس (يقصد الهلال المجسم الجمالي بالغاط)
وعزالله انه اخذ حق السنين كلهن بمقلب واحد,,,,,,:D :D
صرت ليا مريت الغاط اناظر الهلال واضحك
واسف على الاطاله

[وجنت]

شكرا اخي شكرا اخي

[عجاج السناف]

http://ar-travian.com/mwaextraedit4/extra/03.gif

موضوع جدا شيق
http://ar-travian.com/mwaextraedit4/extra/105.gif
سنه من السنوات الغابره
كنت بدون عمل ولا دراسه فترة صياعه ياعم
يعني متخرج وجالس على باب الله
المهم
فيه هذا الفتره
كنت اعيش في مدينه صغيره
وعيال القريه كل يعرف اخيه
كان هناك صديق لنا ما يحب زود المشاكل ويحب
يكون مستقل عن الشله راعي عود ودنده
وهذا حنى ما نحبه
وبعكس السعالو خوييا
الرجال طق خيمه وبداء يجمع له شله
وبداء يسحب البساط شوي شوي
بديت ما اشوف احد بالديره
هووووووو
وين راحو

اليوم الاول
الثاني
الثالث لالالالالالالالا والف لالا
لازم
ادورهم واشوف وينهم
قررت اتتبعهم
شوي شوي لقيتهم
والله يابوالحبيب
فالينه دنده وطرب ام الهكي جالسه تدندن على الاود
طيب وش السوات
لو رحت اكيد ما هجو وتغبو غير عن خشتي
زين
لي صديق من قريه مجاوره معرف جدا بالمقالب
اضرب جبن ياحسن
وعلى ديرتهم
دوره دورتين وهذا هو مراكي ابليس وجالس يهاوش معه
حيالله صاحبنا
وش العلم
خبرته بالسالفه
قال اتركهم علي
وش تامر به ياعم؟
تبي بس يتفرقون او يتهاوشون؟
هذا والله هو المطلوب
من بكرا
ركبنا وعلى الخيمه قبل الجميع
وشبينا النار
وجلسنا بالخيمه تقول اصحاب محل وتروشنا بالمحكمه
ما يقلدنا احد
بس جمرة النار
بداء صاحبنا يحمي الملقاط من الجهتين
والله ثم والله انه منور تقول لنبه
بس تقبل السياره يخليه جاهز للتحرك
اول ما يقبل احد بس نعطيه امر يحرك النار يلحق الضو
الكل يفرح بهذي الحركه خاصه الملاقيف وياكثرهم
بس يمسك المقاط
عينك ما تشوف الا النور
قسم بالله واحد باينه بيده الى هالحين تقول وسم
ومن مسك الملقاط هج
الاول والثاني والثالث
وعقبه تم هجر الخيمه الى الابد
http://ar-travian.com/mwaextraedit4/extra/83.gif
هذا واحد من المقالب ارجو ان تحوز على رضاكم
ولي عوده ان سمح لي صاحب الموضوع

[شاصي 2]

لا اله الا الله

[مسيرs]

ياسلام عليك اخي تلاشت فعلا ابتكار ممتاز لم تسبق عليه فهو مفخرة لنا هنا كي يقتدى بالمنتدى وله السبق بذلك فبارك الله فيك
ولذلك حبيت اشارك بشيء بسيط للتسخين والتحريك وبداية مشوار للمشروع الرائع
_______________________________________________:

كان لنا صديق متفنن بالمقالب بشكل عجيب وله طرق ماتخطر على البال من المقالب وكان متوسع بذلك لدرجة كبيرة مع الكل. حتى انني لو احصر مقالبه التي اعرف لاحتجت لصفحات.
من الطبيعي ان من يمزح مع غيره بمقالب فليتوقع ذلك لنفسه وفي أي لحظة
في احد الايام زارني صديق حميم من ديرة صاحب المقالب وحصل ان اتصل عليه بتلك الاثناء صاحب المقالب وهو لايدري انه مسافر بل يحسبه بالمدينه اسغلينا الفرصة فقال له صديقي والذي هو ضيف عندي. يافلان فلان اللي هو انا عندي
فأخذت الجوال وسلمت عليه كي يطمئن فقال له صديقي الذي هو ضيف عندي واوهمه بانه يكلمه وهو بعيد عني قال له احضر لي غداء مندي من المطبخ الفلاني فلان مستعجل ولااريد ان يغادر قبل الغداء ,قال له ابشر وعندها قمنا بالإتصال بصديق لنا وقال له صديقي: عندي فلان ضيفا والغداء سوف يحضره فلان ونحن خارجين لمشوار قريب فالموعد بالبيت وحددنا له وقت وكان الهدف ان يكون صديقنا شاهد اثبات على صاحب المقالب حتى ماينكر ذلك المقلب ..المهم اجتمعا الاثنين امام منزل صديقي الذي هو عندي ضيفا
واتصلا فينا وينكم ولما تاكدنا من تواجدهم جميعا قلنا لصاحب المقالب كل الغداء انت وفلان فهنيئا لكم فبيننا وبينكم مسافة الف كيلو أوا ازود لم يصدق ذلك جن جنونه كيف اكل المقلب وهو ابو المقالب ولكن ماذا يستطيع ان يفعل فعنده رجل معزوم على اثبات المقلب..:)
لم ينسى حرارة ذلك المقلب. ..ولااخفيكم انه تمكن من رد المقلب بصديقي بعد فترة بمقلب مضحك للغايه.
لعلنا نعرضه في مرة قادمة ...ولكن انا لانني بعيد عنه لم يتمكن حتى الساعة من رد المقلب وانا لست مطمئنا حتى هذه اللحظة فكل شيء متوقع. مني ومنه
وفي امان الله .

[محمد..]

لا اله الا الله

:)

[ابوناصر السهلي]

الله يعطيكم العافيه

[بلقيس]

مــواقف طريفـه بــاركـ الله فيـكم:good:

[بن جعيثن]

حركات والله انك اضحكتوني جزاك الله خير نبي مزيد من المقلب

[اسير الغضا]

للللللللرفع نبي زود

[طفران بس بطران]

الاشايب عادتة المغرب يبرد يرفع رجل وينزل رجل ومرة ونا صغير يوم رفع رجلينه وحط الفنجال واخذ الصياح ثم قلبها ضحك

[سداح الشهراني]

ههههههههههههههههههههههههههههههههههههههههههههههه

طفران ياخي انت مهوووي ومنسم

[النجم السراي]

الاشايب عادتة المغرب يبرد يرفع رجل وينزل رجل ومرة ونا صغير يوم رفع رجلينه وحط الفنجال واخذ الصياح ثم قلبها ضحك


هههههههههههه:d

[ابوناصر السهلي]

بارك الله فيكم

[ولد روووووق]

يعطيك العافيه

[شباب نجد]

الاشايب عادتة المغرب يبرد يرفع رجل وينزل رجل ومرة ونا صغير يوم رفع رجلينه وحط الفنجال واخذ الصياح ثم قلبها ضحك

هههههههههههههههههههههههههههههههههههههههههه

[دليلة1]

موضوع شيق وجميل وأذكر فتحت أضن في خيمة المواضيع المكشاتيه المتنوعه موضوع بعنوان مقالبxمقالب لكن لعل موضوعك فيه الخير وأبشر بقصص المقالب وياكثرها وياجعلنا منها سالمين ..

[غرور انثى007]

كل المقالب بجد تححححححححححف رهيبه...تسلم اخوي عالموضوع...


انا بعد راعية مقالب توصل للذبح ومن ضمنها هاللي ابسرده عليكم..


زوجي يعرف ان انا واهلي عادي مثلا نسلم على عيال خالاتي وعماتي ونقعد معهم يعني بالكشتات


او الطلعات...هو عارض هذا المبدأ خصوصا ان خواله مثلنا عادي وكلن على نياته..


لكن بحكم انه من قبيله ثانيه وماعندهم هالسلم,,,فــ تفكيره بيكون غير,,


بعد ماعارض هالشي ما رفضت عادي بالنهايه هو زوجي ورضاه اهم شي...


لكن مازال مشكك اني ما طعته...وانا عجزت افهمه لانه دايم يسالني ان كان عند اهلي ضيوف:


يقول قعدتي معهم او سلمتي عليهم...(( نقعد واحنا متغطيات طبعا ))


اقول له لا وهذ كان بالماضي قبل الزواج...وخلاص بعدين كل شي بحدود حيا الله سلام ونقعد بوجود الشيبان بس..


ما يقتنع ابد..


ويوم كنت عند اهلي وعندنا ضيف بالمجلس قاعد..وانا مع ابوي وامي الله يحفظهم

بالصاله نتقهوى لان الضيف راعي محل..


ولانه شاب مع اخواني قاعد..والوالد مخليهم على راحتهم..


فـ اتصل (( حسب الله )) وقال عندكم احد قلت ايه فلان قال وانت طلعتي له...


استفزني سؤاله حيل لاني عجزت فيه وقررت اسايره قلت ايه وتراه يسلم عليك..


انهبل الرجال قال انتي قاعده عنده الحين.؟! قلت ايه .. وكل هالحكي بمرأى ومسمع من امي وابوي..


همست لي امي اعطيها الجوال عـ أساس تقلد عليه صوت رجال..


قلت تبي تكلمه قال ايه وعطيته امي ..عاد امي وما ادراك ما امي..غيرت صوتها وصار يخوف ماكنه صوت رجال


الا وحش..


: ارحب ياجال وماجور والسلامه وكيف انت وطيب ومن هالحكي...


وزوجي مااااااكل المقلب..وربي دقيقتين وهو عند الباب والشرر يطلع من عيونه..


قال اطلعي انا عند الباب...قبلها دخل دايركت المجلس شاف الرجال وسلم عليه ثم طلع..


انا تعمدت اتأخر ومابي اطلع باقي ماتعشينا لكنه اصرررر الا اطلع..


طلعت وبس ركبت السياره وهو يفرررررررررك وتعال ياسب وتعال ياهواش وخناق..


وانا اللي اضحك وازعل وابكي...قلت له انها امي ولااااحولك احد...


حتى اتصلت به امي وصدقها....قالت عشان مره ثانيه ماتقعد تسال من عنده قاعده ومن عندكم..


اعتذر بالنهايه وقال اضحكي علي باي شي الا اشياء زي كذا....



ووالله انه ماعاد سألني من بعدها....عاد انا قلت مايجيبها الا حريمها..احم..


وشكرا...بصراحه زوجي اللي دايم ياكل من مقالبي واحسها قويه بس كلها للتأديب...


اسفه عالاطاله.....