سالفتنا مع طيور الكازاخستاني ..... وتصديرها للسعوديه والامارات [الأرشيف]

مشاهدة النسخة كاملة : سالفتنا مع طيور الكازاخستاني ..... وتصديرها للسعوديه والامارات

منصور بن محمد

21/04/2010, 12:24 AM

السلام عليكم ورحمة الله وبركاته

كيف حالكم يالربع :)

حقيقه في بالي موضوع شاغلني هاليومين ... وابي شوركم

وانتم اهل عرف وخبره

اولاً الوقت غير مناسب لطرح هذا الموضوع .. ولكن الهوجسه حدتني على طرحه بهذا الوقت واعذروني

جاني مرسال من رفيق لي ولبيت

عسى خير يابو عبدالرحمن ؟

قال خير .. تقهوى وعين خير

بعد ماتقهوينا قال العلم وسلامتك
اتصل علي واحد من الربع يقول هالسنه طيوركم من كازاخستان !

قلت ايه ... ويش المطلوب

قال ابد كلمت الرجال اللي في كازاخستان وقال الطير اللي تبيه يصلك
يرسل صورهن وتخير

قلت كم اسعارهن ؟

قال من الخمس الاف دولار ودون واصل

قلت يابو عبدالرحمن والدفع شلون ؟

قال كاش ! قبل مايرسل الطير ودراهمه عنده

قلت وشلون بيرسل الطيور

قال التوصيل في الامارات

قلت طيب والسعوديه ويش امرها

قال ابد كلن وسعره على كلام الرجال الكازاخستاني

طيب يابو عبدالرحمن الرجال تعرفه ؟

قال ابد ماعرفه لكن جابه لي فلان وفلان جابه عن طريق الانترنت :D

:D يابوعبدالرحمن انت ويش يعرفك بالنـتـنـته ؟

قال ابد هذا العلم

أنتم ويش تقولون يارجال ؟
بوه احد تعامل مع رجال ثقه في كازاخستان يدلنا

ابو عبدالرحمن ملزم :D

أبو فيصل

21/04/2010, 12:59 AM

:no2: :no2: :no2:

والله لو أعطي رجال 10000 ريال وأنا طبعآ راضي ..... أنه أهون من ريال يوخذ مني غبن في مثل ذالسوالف ...

وألاّ الدراهم وأنا أخوك تجي و تروح عند خلق الله كلهم الغني و الفقير.

يمكن ما يعجبكم الرأي لكن أفضل أزود على قيمته طبعآ بعد ما أقلبه على يدي في السعوديه وأتأكد أنه يسوى وطبعآ وأنا مرتاح البال

أنت منتب شاري من رجال معروف علشان تحول له فلوس مقدم

هواي داورد

21/04/2010, 02:59 AM

الرجال إلي جاكم جاني

وأسعاره طيبه بالحيل للي بيتكسب واللي بيقني

بس تراه مايدخلها لسعودية ......

وأنا والله ترددت مثلك ثم هونت وعساها خيره

راعي غضبان

21/04/2010, 03:33 AM

انا اقول صعب اني اثق في شخص مااعرفه وحتى خويي الي بيدلني عليه مايعرفه هذه مجازفه ياتتجي ياتروح والاحسن اشتري من هنا والا من رجل اثق فيه والف شكر لك

أبو رداد

21/04/2010, 03:40 AM

وعليكم السلام ورحمة الله وبركاته
هذا الموضوع يمكن ينفعك يبو عقاب
ހƴϞރ صقور مفخخه ހƴϞރ (http://www.mekshat.com/vb/showthread.php?t=139570)
تحمل لايطق عليك اللغم هههههههههه

طيرالحمــــاد

21/04/2010, 05:10 AM

مغامره انت وحظك

قنيص غير

21/04/2010, 06:39 AM

مغامره انت وحظك

جم ولسن JW

21/04/2010, 10:40 AM

نصيحه لوجه الله
لاتشتري سمك بالماء
الطير كان ماتنقله وتقلبه وتشوف ريشته ولو بزياده 10000
ولا يجيك نصاب وياخذ فلوسك كلها , ولا من الطير ولامن الفلوس
الا هل بلغت الله هم فشهد

حامل المسك 1

21/04/2010, 11:36 AM

نصيحه لوجه الله
لاتشتري سمك بالماء

النـادر

21/04/2010, 12:30 PM

خذ العلم

تريح انت وابو عبدالرحمن من الروحات والجيات هذي مغامرة غالبها الفشل والخساير. بعدين 50000$ واجد مره هذي تشريبها طير وحش عابر ملون وانت في ديرتك

هذا اول شي واذا كنت ملزم على السفر والمغامره رح الروس او كازخستان واشتر من هناك شوف عينك ولايكلفك 1000$ للطير وخوض المغامره لان به ناس ترسلها في طائرات شحن اللحوم للامارات طبعا فيها مغامره لكن الخساير اقل ويبي لها شوي معارف

وفيه طريقه ثانيه اشتر لك تصريح مقناص هناك ب 20000$ وخذلك حيالله طيور من هنا واشتر هناك وفك الكسر اللي انت ماخذها معك وارجع بطيور زينه مايكلفك الواحد مشرا من هناك اكثر من 1000$

وتطلع عليك التكلفه اقل من سوالف الرجال راعي النت

هذا من باب النصيحة دامك طلبتها وانحش من الحراميه العرب اللي هنااااااااااك ياكثرهم

النادر

ابوسمرى

21/04/2010, 12:55 PM

الموضوع فيه مجازفه

يمكن الرجال يكون صادق ويرسل الطير بس مايدخل لسعوديه وابلش وين الطير والرجال يقول ارسلتلك الطير ولا علي منك...نصيحتي اول الموسم وعلى خير اشتر طير لوتدفع زود 10000 بس تاخذه وانت مرتاح ومقلب الطير وفاحصه...
تقبل مروريـــ

ربع خالي

21/04/2010, 01:21 PM

الربع ماقصروا ودلوك على الطريق الصحيح لاهنت ولاهانوا , وأزيد على الكلام اللي جاك بان الامارات مايدخلها طير مافي رجله حجل فيه اسم المزرعه ومصدرها والاوراق حقة السايتس , الا بالواسطه القويه ,,,
تقبل مروري
تحياتي

ولد الذيد1

21/04/2010, 01:22 PM

الموضوع صعب شوي
الله يوفق الجميع

جير دبي

21/04/2010, 01:23 PM

شوري من شور اخونا (الرمال المتحركه).....

الصارم1

21/04/2010, 01:36 PM

اقول اذكر الله وخل فلوسك عندك والله يرزقك احسن من الي عنده

بصراحه مغامره واذا الله رازقك وانت مراح تنغبن لوراحت افلوسك ادفع

بس الله يعينك

القطامي82

21/04/2010, 01:44 PM

السلام عليكم يا اخواني كيف الحال طيور كازاخستان السنه هذي اكثرها متعوره ومملوعه وانا ماخذفرخ شاهين بحري والله يا الربع ما فرحت فيه وسعره غالي بس اقول الحمد لله ويوم دعيت الشاهين شفت جناحه الايمن رايح فيها مع اني مقلبه قبل ما اشتري ويكفخ طبيعي ويوم شفت الجناح معاي واحد من الربع قال الطيره هذي مكسوره قلت كلمك يمكنه صحيح علا طول من البر الي البيطري وانا اسوي اشعه علا الجناح ويطلع الجناح مافيه شي قلت حق الدكتور الطير مايطير قال ممكن مملوع قلت اكيد يعني مملوع جايب شي من عندك المهم دقيت علا راعي المكتب قلت يابو فلان الشاهين مايطر قال مملوع قلت خلاص انا ابي اريحه 20يوم بس ابيك تقول حق راعي الشبه الي جيبها انه الطير مايطر الرجال راعي المكتب ماقصر دق علا الرجال وقله ثم رد علي قلي يابو عبدالله الرجال يقول مالك شي عندي قلت السالفه نصب يعني قال الطيرفيه كسر قلت لا قال خلاص الطير مايرجع قلت خير ان شاالله المهم ان الشاهين مسكت وسره وعيون ومناكب ويداين عقب المهم سالت عن باقي الشياهين الي في الشبه كلهن موليات بس الحمد لله الله ستر عليها وصت فيها 3كروين اخر اخر الموسم والحين مربوطه ونبي نشوفها في اخر شهر 9 الحين لو تقولي فيه شبه كلها شياهين من كازاخستان والله ما اشرف عليها والله كريم

عتيج الصوف

21/04/2010, 01:47 PM

استخير اول ... " وما خاب من استخار " افضل

يدوي الشرق

21/04/2010, 02:06 PM

السلام عليكم ورحمت الله وبركاته

اخوي الناس هزمان ماهي سوا ودنياء ماتغيرت الناس تغيرت وفلوس تغير النفوس

هل الرجل يكفله احد وعرف الرجال زين ولا هي تداول الاخبار وتجارب بناس

لين يطيح الفائس برائس وتروح الفلوسك ونت مخدوع عليك

ممكن يكون الرجال يتقي الله سبحانه لاكن الطيور كلن له نظر وله ميزه بطير
من حيث انه يبي اطير كذا او كذا

انا اخاف انك تدفع بطير ومايجي نظرك به او وسرته حلوه وبوزه ما هوزين
او إلى اخره انا انصحك لا زم انك تروح لرجال بنفسك وتشوف الى يناسبك

وللمعلوميه الصور دائمآ تعكس وجهت الطير ممكن يكون الطير زين

وصوره مشينته ممكن الطير شين وصوره مزينته انت لا تحكم على الصوره بس انت بنفسك شف الطير وحكم عليه هل يناسبك وتوكل على الله سبحانه

لاكن للمعلوميه الطيور ماراح تدخل السعوديه إلى بأمر من الاسره المالكه

تحياتي,,,,
ارجو ان تقل مروري

سلق المجمعة

21/04/2010, 03:00 PM

مشكور اخوي

ham.ha

21/04/2010, 08:27 PM

السلام عليكم ورحمة الله و بركاته
الاخ المحترم ابو عقاب

الاحسن ان تكون متواجد بعين المكان. نصائح الاخوة هامة و مفيدة جدا و يجب أخذها في كل خطوة تخطوها...!
الحذر و التأكد يا أخي!!!
والله أعلم
اتمني لكم من الخالق عز وجل التوفيق و النجاح في عملكم هذا.

حمدي هيبة

منصور بن محمد

21/04/2010, 09:46 PM

حي الله الرجال

اخوي ابو فيصل

سلم راسك وكلامك في محله

وانا ماطرحت هالسالفه الا ابي رايكم ورايك وانا اخوك في محله
.....

الرجال إلي جاكم جاني

وأسعاره طيبه بالحيل للي بيتكسب واللي بيقني

بس تراه مايدخلها لسعودية ......

وأنا والله ترددت مثلك ثم هونت وعساها خيره

هلابك يالنشمي

ويش اسم الرجال اللي جاك ؟

قال ادخلها السعوديه بس يزيد عليك السعر

وطريقة دخولها للسعوديه تهريب
.....
راعي غضبان

ياغناتي شي طبيعي انك ماتثق في احد ماتعرفه خصوصاً في البيع والشراء الخارجي
.....

السلام عليكم ورحمة الله وبركاته

المرحله الاولى
صور حرار تعور القلب لا ... الا تشلع القلب من عروقه
والاسعار خياليه والمستهلك اصحاب السمو
(وتلاقيه حافظ اسمائهم واسماء طيورهم وعنده كل علومهم !!)

المرحله الثانيه
بناء العلاقه وانسان طيب وردود طيبه ...

المرحله الثالثه
رسائل خاصه وتبادل في عنوان البريد والماسنجر

المرحله الرابعه
صور طيور طيبه (سريه ورجاءا لاتشوفها لااحد)
وماتعرف كم كلفت ؟؟؟ هههههههه بسعر التراب

المرحله الخامسه
الشكوى لله الطيور كثيره وطرحها سهل لكن ادور على شريك !!
(يعرف ناس تدفع ويصرف الطيور بقيام حلوه)
منو الي يكره يشاركه ؟؟؟؟

المرحله السادسه
ياخي جماعة البيئه والجهات المختصه هنا بلشتهم بلشه
ماينفع الشغل الا (دهن سير) ومحتاجين تمويل للصيادين !!

اخينا في الله ( نيته سليمه)
رزق حلال وربح واجد (واكثرهم يقول ماريد من الربح غير طير طيب)
حول الي قاسمه الله (من فلوسه وشقاه وتعبه ورزق عياله)

ينتظر ....
وينتظر ...
وجاري الانتظار ...
الله يعينه (بعد حتى ام العيال ماوده يشوفها)

حتى تجي المرحله السابعه والاخيره
(وتنفجر المفخخه)
وهذه المرحله تنوعت هههههههه الي سمعنا فيه
اما يقله صادروها في المطار ...
واما المافيا سرقوه ...
واما يختفي ....

,,,

احذروا ياخوان احذروا
انا اعرف ثلاثة اشخاص من منتدانا وقعوا في هذا الفخ
والله اعلم وشعندهم من طرق احتيال ونصب جديده
الطير اذا ماتشوفه بعينك وتنقله على يدك
لاتدفع درهم لو كان ابيض قطامي

,,,

ثم ودي اسولف بسالفة الطيور الي تطرح قرب مواكرها
1 / طيور لاتمتلك خبره (شكل من غير فعل) ...وقللت من مستوى الوحش
2 / زبدة فلوسها تروح للعصابات والمافيات والمهربين
3 / المساعده في انقراض الطير الطيب خصوصا
4 / حرمان اخوانا الطواريح في ارض العرب
وكلنا يعلم ان موضوع طرح الطيور
تعيش عليه ناس مابين صياد وتاجرومستهلك
وفلوس الطيور لهم وليست للمافيات
(لان الطيور الي تطرح قرب مواكرها نفسها الي تطرح بهذه البلدان
مع فارق كبير بالفعل لان الطير قد تمرس وشد عضلاته وطير له سمعته)

والسلام

هلابك يابو رداد

والحمد لله على السلامه عودتكم من مقناص العراق
صايد وفايد

وانا يابو رداد نزلت الاقتباس من موضوعك لكي يستفيدون الاخرين

وكلامك صحيح

وكان فيه رد للاخ المزروعي يقول

أشهد أنك حطيت إيدك على الجرح يابورداد !!

يا ما راحت علي طيور من إيران !! مره يقول لي صادرتها البيئه و مره يقول لي راعي اللنج سرقها !!

و الله العظيم نسرق عندي جرناس إيراني خلوي شاريه 45,000 ألف درهم و يسوى في الإمارات أقل شي 90,000 ألف و للأسف تم بيعه في قطر و أنا ما أدري .

هذي الشغله دخلوا عليها ناس مش من أهلها .
و أخيرا بيض الله و جهك يا بورداد .

الله ان يعوضه بالنادر

طير الحماد

والله اظن اني بجرب :D

على قول راعي البيت

الخساير عندنا مثل شرب الفناجيل :D

عاد ياغناة الذيب يافقره
.....
رمال متحركه

هلابك وانشاء الله ان بختنا طيب بنجرب
.....
جم ولسن يابعدي

السالفه كلها ماتجي 8 الاف ودون

بنشوف ويش امره وويش عنده من طيور
.....
حامل المسك

شكراً على النصيحه

اخوي يالنادر

وين 50.000 الف دولار :eek:

الشغله الف دولار والفين والتوصيل الف وميتين :D

وكلامك ونصيحتك مقبوله

تسلم يمناك
.....
ابو سمري

كلامك سليم

وادري انها مجازفه

وكلن عقله براسه عاد ياتصيب ياتخيب
.....
ربع خالي

والله الرجال كلمته بالجوال

قلت انت تعاملت مع ناس في السعوديه قال ايه

قلت منهم ؟

قال ماقدر اذكرلك اسمائهم وخلها بوقتها

وقال انا مجر وسيط

وفيه من يهربهن للسعوديه والامارات

يعني ماهيب بشكل رسمي :)
.....
ولد الذيد

جزاك الله خير

GeeR

شورك وشور الرمال المتحركه على ساس وعلم طيب

تسلم يالنشمي
.....
الصارم ياخوي

لا اله الله ومحمد رسول الله

ويش شايفنا نخم القروش بكريك :D

الدعوى ياتصيب ياتخيب وقروشها ماتطرح الرجال
.....
القطامي

معوض خير انشاء الله

لكن يالقطامي الرجال اللي تعاملتم معه ويش اسمه ؟
.....
عتيج الصوف

انشاء ابي استخير

جزاك الله الجنه
.....
يدوي الشرق

حياك الله يا غناتي

كلامك صحيح

ولكن الشغله كلها تهريب

والرجال يقول انه وصيط وتعامل مع رجال بالسعوديه وبالامارات

ويقول ان الطيور اللي يطرحونها طيبه

وانا وابو عبد الرحمن ماحنا شارين ومرسلين دراهمنا لين انتأكد من الناس اللي تعامل معهم من قبل

ونشوف الرجال وشهو من لحيه
.....
سلق المجمعه

جزاك الله خير

وهذي الحوارات انشاء الله تفيدك وتفيد الاخوه المهتمين بهذه الهوايه
.....
حمدي هيبة

هلابك ياحمدي

كلامك سليم وجزاك الله خير على الدعاء

ALAMIR

22/04/2010, 02:37 AM

قووله فلوسي عندي والطير عندكـ

اتركه ما تعرف وش وراه ووش قدااامه

النمران

22/04/2010, 04:48 AM

حياك الله على الموضوع

انا اعرف واحد نفس الموضوع وراحت عليه افلوسه وكله كلام فاضى

ولك جزير الشكر

محمد النعيمي

22/04/2010, 07:40 PM

لاتشتري الاعلى نطرك لوتزودشوي

ابو امنه

24/04/2010, 02:26 PM