المساعد الشخصي الرقمي

مشاهدة النسخة كاملة : تهريب زيت الجير ؟


فايق ورايق
30/04/2010, 12:08 PM
السلام عليكم

للاسف طفيت سيارتي الشروكي98 واشوف تحت الموتر عند الجير بركة زيت احمر ورجعت شغلت السياره واحط الجير على الروس مايلقم وال d مايلقم
طليت(وزت-يويز) تحت السيارة وهي غارقانة زيت احمر والكارتير تمام مافية شي الصواميل ماسكة والتهريب موب من عنده وش ذالمنفجر

هقوتكم من وين هالتهريب والا الجير يبي لة تغير الله يستر

تحياتي
بدوي جنوبي
30/04/2010, 02:42 PM
عليكم السلام
ممكن من الطنجره( البطيخه_ البروانه_محولة العزم)

او من صوفة القير الاماميه .
فايق ورايق
30/04/2010, 03:10 PM
رحم الله والديك واعتقد انة من الصوفة الامامية لان التهريب جاي قبل كارتير الجير
بس تهقون محلات قطع الغيار يفتحون يوم الجمعة

تحياتي
سوبر VTC
30/04/2010, 03:43 PM
الموتر طبيعي ما يتحرك
لانه لايوجد زيت
و غالب المشكلة بالشيروكيات
انطلاق الليات
اللي بين القير و مبرد القير عند الشبك
ليات راكبه على يمين القير من جهة الراكب
لي خروج و لي دخول
مختيار
30/04/2010, 03:44 PM
الله يعينك اخوي..
اعتقد يفتحون بعد صلاة العصر.
موفق.
فايق ورايق
30/04/2010, 06:46 PM
شكرا على مروركم جميعا

انا طعست بالموتر بس بدون هبال تطعيس على خفيف

عقب مارقيت كم طعس وجازي ذالطعس وافرش فرشتي ونظبط القهوه والعشاء مالكم باكثر البربره
عقب ماشغلت السياره اسمع صوت شي يون بدون ماتحرك بالموتر يعني وهو واقف يوم طلعت على الزفلت صار التهريب واضح جداا ودخنة

سؤال : كم سعر الجير كامل ؟
وديتة لمكانيكي العصر قال احتمال صوفة او طرمبة الزيت
وعقب ماشغلت الموتر سمع الصوت قال احتمال الطنجرة

يبان كلش اذا نزلت الجير

اذا كانت الطنجرة سعرها مثال 800 ريال موب اشتري جير كامل افضل؟

سمعت بشي يقولون مبرد جير كراون فيكتوريا اعتقد انة مو راكب بسيارتي وعقب التطعيس سخن الزيت وسبب هالمشكلة بس مافهمت وش موضوع مبرد الفورد

سوبر فتك كما عودتنا بجابتك المفيده الرجاء توضح لي ولباقي الاعضاء
تحياتي للجميع
بدوي جنوبي
30/04/2010, 11:13 PM
مبرد الزيت وظيفته يبرد زيت القير
ويحمى القير من الحراره الزايدة

شوف صوره للمبرد قدام الرديتر
http://www.mekshat.com/pix/upload04/images162/mk32037_tc.gif
سوبر VTC
01/05/2010, 03:58 AM
انا ماقدر احكم على موترك
العطل يختلف من موتر لاخر
صوفة طنجرة تهريب لي
و غالبا المشكلة من
اللي مواصير البارد و الحار
يلحم المونيوم يكون منشعر
لاتستعجل بالتغيير على غير فايدة :no2::no2::no2:
لازم تمر على الاقل على 5ورش
او تمر ورشة كرامه او ورشة ابو فهد الهاشل اضمن لك
القير كامل ياباني نظاف وجدد مع التركيب
قيور يابانية
على كلام الربع بالصناعية القديمة ب1200يا بلاش
طبعا قير تماتيك

موفق
راعي البهقا
01/05/2010, 02:08 PM
الله يكون بعونك يااخوي
ن م ر
01/05/2010, 02:24 PM
اتوقع انه من مواصير مبرد زيت القير لأنها قد انفكت من مكانها من عند الراديتر ونزل الزيت اللي في القير كله وصارت السياره ما تمشي لا بالـ D ولا بالـ R ولا حتى بالـ X

والحمد لله صلحتها والقير ما جاه شي
فايق ورايق
01/05/2010, 08:24 PM
شكرا على مروركم جميعا
الميكانيكي الله يسلمكم يقول التهريب من طرمبة الزيت فقال لي جب طرمبة زيت وطنجرة وكلتشات قلت لة هذا توضيب المهم بشتري راسي واشتري جير اصرف لي

رحت الصناعية ومادراك ماالصناعية .....(القديمة)
الجيور على 2500 عند هالسورين وكل سوري يقول الزوود عندي ولا ويكلمونك من طرف خشومهم كأنهم بيعطوني اية ببلاش
ومن كثر هالدوران لقيت واحد موب سوري قالي 1300 ريال بس قال انة لموديل96
وسيارتي 98 قلت لة اطمر للمطويع واسألهم يركب والا لا
وكانت الاجابة لا
وبالاخير يالله لقيتة عند يماني سمح باعني 1500 وقال لي انة استعمال ياباني عساه يكون مضبوط ان شاء الله

عند كم سؤال لأخوي سوبر Vtc ......؟
- سبق قريت لك مشاركة تقول فيها ان جير لكزس300 يركب على الشروكي هل الكلام صحيح وهل يحتاج ترهيم ومن يصلحة لاني لقيته رخيص جداااا 800 ريال بس

- هل فعلا موديلات الجيور حق 94-95-96 مايركب على موديل 97-98-99-2000-2001 ؟

بس اللي فعلا اتمناه ان اللكزس يركب لانة متوفر كثير ورخيص

تحياتي للجميع
سوبر VTC
02/05/2010, 09:38 AM
سؤال يفرض نفسه
ليش مارحت لم فهد الهاشل ؟؟؟
وش يدريك انه طنجرة مهب ليات ؟
هل عبيت القير زيت وشفت من اين مصدر التهريب ؟


قير م96 يركب ل م97 و طالع
لكن لازم تبدل افياش الاسلاك مع تبديل بعض الاسلاك
القير راكب بعنيزة مع الضمان من 1500 الى 1700
قير استخدام ياباني :good:


قير الشيروكي سواء سعودي او استخدام امريكي او ياباني
كلهن معروفات انهن قيور لكزس 300 شد بلد
دور على جنب القير من يمين
تحصل استكر اخضر مكتوب
مكتوب كمبني ايشين شركة اسيا صنع باليابان
دنمو كهرب شد بلده ياباني شركة دينسو اليابانية
عندك خلف العدادات صنع في اليابان
فايق ورايق
02/05/2010, 11:43 AM
رحم الله والديك
خلنا من موضوع جير سيارتي الخربان
انا ادري ان جير الشروكي ياباني الصنع بس سؤالي الله يحفظك لو شريت جير لكزس يركب على طول والا لازم ترهيم او ناخذ كلتشات وطنجره وطرمبة اللكزس ونركبها بجرم جير الشروكي وهل مر عليك بحكم خبرتك بالشروكي مركب جير اللكزس

ان شاء الله تكون مازعلت من كثر حنتي واسالتي
تحياتي للجميع
فايق ورايق
02/05/2010, 03:11 PM
فضلا عطنا رقم فهد الهاشل اذا كانة بالرياض

نستفيد منة لقادم الايام

تحياتي