للبيع ددسن غمارة نظيفه..

[فرامل]

السلام عليكم ورحمة الله وبركاته

وأسعد الله أوقاتكم بالمسرات..

أعزائي

لدي سيارة ودي ابيعها وسأطرحها بين ظهرانيكم وعسى الله يطعمني وياكم الحلال.. قولوا آمين.

سيرتها الذاتيّة :)

داتسون غمارة ( الحمراني )

موديل : 1998

اللون : أبيض

الممشى : فوق 400 ألف كيلو

حالة المحركات : نظيفه ولك الفحص

حالة البودي : تم رشها كامل لتجديد الصبغ مع أن فيها من الأول طقيقات وسمكرات بسيطة لكن حبينا نطلعها عروسة :d
أمّا سالفة صدمات قوية داخلة على داخل فأبداً لم يحصل لها ذلك ولله الحمد وعلى الشرط

الحالة العامة : تمّ التشييك عليها كاملاً وهي في وضع مطمئن ولله الحمد

الاستمارة : جاري تجديدها حالياً

الكفرات : نظيفة وطقم ، مع وجود اسبير يمشي الحال

المكيف : لا يوجد مكيف .. يوجد هواية!

الدرقسون : لا هوا ولاهم يحزنون بل عادي

الصندوق : نظيف ومرشوش كامل..

من الداخل : وضعها طيب ونظيفه مع وجود بعض التنجيدات

السوم : ماسيمت

الحدّ : مالي حدّ

نسمع سوماتكم لو تبدأ بألف ريال..

الرجاء لا يسوم أحد إلا صامل لأني ممكن أبيع في أي لحظة

نرحب بالجادين في السومات من الشريطيّة ومدورين الرزق الحلال ومن الذين يرغبون الاستخدام..

لن تجدوا هنا الا كل ترحيب.

شعارنا ( الزعل مرفوع ) سم وانت صامل إن رغبنا بعناك وإن لم نرغب فحلالنا عندنا وفلوسك في جيبك والله يوفقنا واياك للأصلح ..

[فرامل]

للرفع رفع ا

[بواردي الدلم]

الله يرزقك إن شاء الله

ويعجبني اللي مثلك مايزعل من السوم

[ابو العزي]

ابغى اشوف الصور

[metub1404]

ممكن صور ياراعي الموتر

[البهبان]

السلام عليكم

اسومة 10 الاف وياليت تذكر الموقع

[الوسمي 99]

علي بــ 10500 بعد المعاينه طبعا
اخوك ابوعبدالرحمن 0504466880
والله يوفق الجميع

[هامورشخيب]

على با11000 الف ريال سعودى

بعد المعاينه
جاد جدآ
0506445868
الرد برساله

[albrens]

بالاول وين مكانك

وإنشاء الله الموتر يكون من نصيبي وانا طالب بالجامعه وابي استخدمه

جوالي 0550088979

[فرامل]

مرحبا مرحبا مرحبا بالجميع

هلا والله بأهل مكشات

هلا باللي يترزق الله وهلا والله بقضـّــاي اللزوم

ومعليش على التأخر في الرد لأني كنت مسافر أمس آخر النهار ولا رجعت الا اليوم العصير..

سومات طيبة ومليانة من وجيهن طيبة ومليانة نور..

يا إخواني يا أحبابي اللي يسألون عن الصور والله ما بعد صورت السيارة ولكن بصورها في وقت لاحق بإذن الله
ولا يحتاج صور في ظني.. ددسن والددسن معروفه بيضاء ساطعٌ لونها.. واللي بيشتري راح اتواعد انا وياه بمكان ولا اواعده يسير علي وفنجال وعلوم رجال وان شرا والا الله يحفظه بحفظه ، رايح يشوفها بعيونه التي في رأسه.. ويقرر يشتريها او يستخير عنها...

أمّا الذين يسألون وين مكاني فأنا في الرياض..

بالأخير.. ما أقول الا الله يختار لي وللجميع الأصلح..

للغالين الذين سامو أقول : سومات طيبة جداً من وجيه أطيب لكن نبي من الله أكثر..

[الوسمي 99]

اخوي كم حدك طيب
يكون افضل على شان نفرمل مثلك
والله يرزق الجميع

[الخفاق]

السلام عليكم ورحمة الله وبركاته
اخوي الله يكثر من امثالك ويبارك لك في مالك واهلك
اعجبني سعت صدرك وسردك للموضوع ولك مني كل الشكر والتقدير
اما من ناحيت السياره
فاسومها 11500 شرط الفحص
0504487809

[البتار2011]

الله يبارك لك في حلالك ..

[خوي السرور]

اشكرك لاسلوبك الطيب وحسن اخلاقك
بعض الشباب اذا عرض سيارته كأنه سيهديها علينا يهدد ويتوعد

[فرامل]

اخوي الوسمي 99

والله يا اخي ما اقدر احدّ أنا رجال جازم في البيع
ونشوف كم توصل؟.. وبناء عليه بنبيع بحول الله
لكن بسعر السومات ذي والله ما اقدر ابيع ، تدري ليش؟
لأن تضبيطها كلفني والله ، والاستمارة لوحدها ستكلفني فوق2500 ريال تخيل!..
الله يرزقنا وياك يا وسمي .. ويرزقنا بالمطر في أول الوسمي (0_0)..
تحياتي لشخصك الكريم

...


اخوي الخفاق..

الله يستجيب دعاءك ويجعل لك بمثل مادعوت لي به
وسعة الصدر على قولتك هي الأصل في كل مسلم بس حنا اللي نتجانف عنها!
أما من ناحية سومتك .. فأقول الله يبيض وجهك وسومتك طيبة مثل راسك.. وتسلم ويسلم راسك
لكن والله ما تخارجني بهالسومة.. نرجو الكريم رب العرش العظيم بأفضل..
تحية ودّ لشخصك الكريم..

.......

الفاضل البتار..

اللهم آمين ولك بالمثل..
يعطيك العافية على مرورك هنا..
تحية لك عزيزي..

......

خوي السرور

لا شكر على واجب
وأنت صادق.. بالفعل نقرأ لبعض الإخوة إذا عرض سلعة بدأ يزمجر!
يا رجال الدنيا ماتسوى كل هالزمجرة والله..
وكما قال الشاعر الجاهلي :
وسع صدرك وطوّل بالك.. تلقا الله حلها لك..<<< واضح من اللغة أنه من العصر الجاهلي!..

لكن في المقابل فيه ناس تسوم بسومات ترفع الضغوط والسكاكر والكلسترولات وتنفخ القوالين في بطون خلق الله.. أنا أتساءل وش ذنب قوالين خلق الله اللي ننفخها ببعض تصرفاتنا اللي تمحر الكبد؟!

والله قد قابلت واحد يسوم سيارة واحد بعشرة الاف وهي تاصل الاربعين!!!
يا عالم.. الله تعالى يقول : (ولا تبخسوا الناس أشياءهم)
يا خي أنا اذا كنت بستخدم باخذ بسعر السوق أو أعلى شوي لاجل حاجتي وما بتفرق معي..
واذا بترزق الله باخذ بأقل شوي علشان اكسب بس ما أمحط بسلع الناس..
وبعض الناس اعرفهم يقولون ما يمكن ابيع على شريطي!! طيب ليش؟ حسد؟ يقول لا لأن الشريطي ما يعطي السلعة حقها! ولا يشري من شريطي تقول له ليش؟.. يقول لأنه ما يبيع مثل العالم.. يمحش محش! فيعممون ذلك على كل الشريطية..
أنا لا أنكر حقيقة هذا فهو موجود ولكن ليس الكل.. ولو ان الشريطية راعو الله فاشتروا بالمعقول وباعوا بالمعقول ما قالوا الناس كذا.. وتعميم ذلك على الشريطية وعلى اهل السلع من الظلم.. إذا باع الواحد لا يقفلها قفل.. وإذا بغا يشتري لا يتحنكل <<< يبدو تحتاج شرح!!

على العموم.
أشكرك على مرورك العطر.. والسلام عليكم

[دواك عندي]

تستاهل كل خير يافرامل الله يرزقك القيمه اللي في بالك :good:

[ابوريما99]

ومازالت الأمطار مستمره في سماء الرياض
ومازالت السومات للأفضل يا أخوي فرامل

وانا أزود بـ 12000 صاااااااافي لك حلال

والله يرزقنا وياك وكل مسلم

[عبدالمحسن 1]

خوي السرور تحيه طيبه لك
انت ارسلت لي رساله خاصة وانا ما اقدر ارد لاني ماوصلت 50 رد ..
ارسلي ايميلك .. علشان ارد عليك .. واعذرني .. ماقدرت اوصلك الا بكذا ..

اشكرك لاسلوبك الطيب وحسن اخلاقك
بعض الشباب اذا عرض سيارته كأنه سيهديها علينا يهدد ويتوعد

[ريكو]

علي بـ 12500 صافي بشرط الفحص

[ابوريما99]

13000 ريال سعودي
وذلك بعد المعاينه

[فرامل]

الفاضل : دواك عندي

يعطيك العافية على مرورك العطر ودعائك الطيب..


................


أبو ريما
الله يخليلك ريما ويصلحها
وسوماتك الأولة والثانية طيبة مثل وجهك الطيب.. ولكن لا زال الرجاء في مدّ الله مستمراً
الله يرزقنا وياك رزقاً حلالاً من حيث لا نحتسب..


..........

عبد المحسن 1
نورت المتصفح
المتصفح حلالك.. لاهنت

........

عزيزي ريكو
سومة طيبة من وجه طيب
لكن والله ما تجي.. نطمح من الله بأزود..
تسلم يا غالي..

[فرامل]

للرفع لـ فوق!

[ابوعقرب]

الله يرزقك يافرامل بهوبات طيبه
اهههههه
سامحني بس اعجبني الاسم
الله يرزقك بالسعر الىيسرك ويبارك للمشتري

[فرامل]

ابو عقرب..

الله يصلح لك عقرب هههههه
تسلم على مرورك ، وروحك الطيبة..

[صويااان]

اللله يرزقك000

[هوايتي مكشات]

الله يرزقك ويبارك فيك ويبارك للشاري

[فرامل]

الأخ صويان
الأخ هوايتي مكشات

جزاكما الله خير على الدعوات الطيبة
شكراً لكما...