أطرف أو أصعب موقف مع السحب

[تباع المزن]

السلام عليكم و رحمة الله و بركاته :

أقصد هنا أن يكتب المكاشيت الأعزاء لنا قصصهم التي حدثت لهم .. إما موقف طريف أو صعب لكن بشرط أن تكون القصة حدثت في أجواء سحب وأمطار ولها علاقة مباشرة بمتابعة السحب أو هطول الأمطار أو جريان الشعاب أو سقوط البرد ..... الخ ، أتمنى أن يتفاعل الجميع لنستفيد و نفيد .

[حـــادي]

للـــــــــــــرفع .
ومشكور أخي على الفكرة الجيدة وياليت يتفاعلون الأخوان مع الموضوع وخاصة أخونا خالد العوض فقد وعدنا بالكثير وأحداث مؤرخه لديه .

[خالد العوض]

ابشر من عيوني

[خالد العوض]

وهذي قصة رقم واحد
اذكر مره من( المراة ) وحطيت قوسين بين المراة يمكان وحد من العيال (الشلة )يقراء الموضوع لانه كثيره المواقف
الله يسلمك كنا طلعين نصيد الضبان ايام الكنة طبعاً الجو في هذي الفتره حار المهم وحنا راجعين زان الخيال حول بعد العصر
وقامت تبرق وترعد المهم مشت بعض المسايل الصغيره تركنا الضب وقمنا نتمشا وجلسنا نتقهوى يوم جاء اليل
غيرنا المكان والله مشينا مسافة المهم جينا شعيب كبير فيه بطحاء يسما عندنا وادي النساء المهم طبخنا الضبان الي معنا
وتعشينا وسهرنا شوي بعد العشاء بس التعب كان اقوى المهم جدعن فرشنا في الشعيب ونمنا يوم انتصف اليل حطيت ايدي على الارض لمست ماء تحت فراشي وانا نيم اقول وش ها البراد والله فلة المهم تقل بدية اصح من النوم وادقق شوي وش الي تحت فراشي ما امدي اقوم الا واحد من العيال نط مثل الجني قال الشعيب جاكم قومو والله واشيل فراشي واحط رجلي ما ردن
الا الحزوم النعال والعدة حقات الطبخ يوم اصبحنا رحنا ندورهن كل قطعه بمكان هذي السالفة ترها قديمه ايام المتوسطة
يعني لاتشرهون علينا شباب طايش وسلمكم

[عالي الشان]

سالفتي ( الصعبه ) كانت مع البرد اللي ضرب الرياض للمره الاولى ( عام 1988 م ) اذا ماني غلطان واللي كسر السيارات .
هذاك اليوم كنت مع اخوي في طريق العروبه ( لما كان بمساره القديم ) وكنا موازين لاسواق اليورمارشيه ..
الجو لا يمكن وصفه مهما كتبت .. الدنيا ليل على انه الوقت كان العصر والبرق يشاهد والرعد ما يتوقف أبد ...
هذيك اللحظه بدأ البرد ينزل علينا وحنا بنص الطريق وكنا وسط السياره ونشوف قزارها يتكسر وصوته وهو يضرب بودي السياره كان مرعب والمشكله اننا ما كنا نعرف هل بيطول الوضع او انه مجرد ثواني .
المهم كانت دقيقه او دقيقتين حمدنا الله انها ما كانت اكثر .
الصعب في الموضوع شيئين :
1- ما كانت لنا تجارب سابقه في البرد وماكنا نعرف انه ممكن ينزل بهذي الاحجام وبهذي الكميه !!
2- انه كنا في مكان مكشوف لا نقدر نروح لا يمين ولا يسار .

* فيه شريط فديو اتمنى احصل عليه صور كل هذيك اللحظات ( من مكان ثاني ) وان شاء الله في حالة حصولي عليه بنزله في المنتدى

تحياتي ..

[أبو يحيى]

الأخ تباع المزن/ حشرتنا بجو المطر والسحب الله يحشرك مع المتقين ........ قل آمين.

ولا أكيد إن فيه شباب عندهم مواقف بالبر بس بدون الي ذكرت....... ولا وش رايك.

ليس انتقاد بس والله مشتهين السوالف...........

[تباع المزن]

أشكر جميع الأخوان على تفاعلهم ... و بالنسبة للأخ أبو يحي ... أنا قصدت من ذلك كي لا تطول السوالف ، يمكن يجينا واحد يسولف عن الربيع وآخر يسولف عن القيظ وآخر يسولف عن الصيد ثم تطول السواليف وتكثر التشعبات ... لكن ماعطيتنا قصصك ؟؟

[الكونترولCONTROL]

كنت في بر بعيد عن الديار لوحدي ... و كنت وسط وادي ....... توقفت و فتحت القزاز ... كنت اسمع الأرض كأنها تتشقق وقت الرعد .... أصابني خوف و روعة شديدة ... (( تشهدت )) كانت الأرض تقول اععععععع اوووووووو اعععععع

لمدة تصل الى دقيقة مع كل رعدة .... و كنت أرى البرق كالمسطرة (( رأسيا و ليس أفقياً كأنه يدخل في الأرض
و أعجب ما شفت برقين متوازيين من الشماء الى الأرض و لونهما أحمر مخيف سبحان الله

[مريوس قدام]

السلام عليكم

الحقيقه موضوع جدا شيق أما انا فقصصي حدث ولا حرج اخوكم راعي كنس وطرد ورا الخيال حتى خيال الجنوب
(ابها الباحه والأنفاق ) ما سلمت . ومن القصص بسرعه .
1- اطرد سحابة حول الدوادمي (عرجا) الين صارت عنا قبله وقعدنا نحتريه وتفنن بالتصوير وهي مقبله ورعده مايفصل تقل مدرج طائرات ويومن انها وصلت وبادا وبله ثمن البرد واثري متشطر بعيد ومعي الكميره ولا تشوف
الا رابحه بالمقدمه واتجه للسياره ابروح جهة اقرب مكان احتمي عن البرد يوم ركبة ابشغل السياره والا انا وين اثري مرتبة ورا
وخويي مغشي عليه من الضحك :D
2- كنت انا وخويي خرمانين خيال علينا صحو من مده ما شفنا روس المزن ولو طرف خيال حولنا طفينا الجوالات
وبعد ست ساعات فتحناها . دق احد الخويا علينا قال وينكم قلنا قريبين قال وين قلنا غرب الخرمه نستبرق بخيال
الطائف (طبعا حنا من الرس)
3- سحابه امكناها ويومن الدعوه صارت الامور على ما انتمنى اوله برد ثمن سيل لا قالو سيل صح ما تشوف
الي قدامك من غزارة الما وفي خضم وقمت الا ستمتاع بصوت المطر وانا انواع التشقق ومطفي الموتر الا وهذاك
الصوت طععععععع بجنب الموتر الأيمن بالحديد وانا دورن انواع المطامر والمناقز ضرب الراس بالدريشه الكميره
ما أدري وين راحت يرجال خله على الله الحال في ذيك اللحظه الله واعلم به . انا قلت هذي صرقعيه رحت فيها
....ويوم هدا الوضع واناظر وتدرون وش طلع لوح شينكو حديد من القديم الرمادي طاير مع هوا السحابه .

[برق الحيا]

موضوع جميل أخوي ....

السالفة الأولى / كانت في سنة 1991 خيمنا بالبر شهر 3 وكان اخر 3 ربيع طيب وعشب على نهايته ذاك السنة كنا رايحين عايلتين ونصبنا 4 خيام وخذينا لنا هاك الحمام الله يعزكم >>> خشب وحفرناله بالارض المهم 4 أيام شقى على الخيام وسنعها ..... بيتنا يوم وليلة وكان الهوا متناوح في اليوم الثاني وكان الجو صااااااااافي المهم ,,,,, تعشينا وسالفنا وماكان عندنا بزران ابد >> عجايز وحريم ويوم عدا الساعة 11 كلنا قلنا بنام عشان بنفقع الصبح .... نمت وقمت بروحي الساعة 12ونص بالليل ........ قمت اقضي لي حاجة برع .... مب متعود على الحمامات :p المهم سبحان الله الله قومني في هاك الساعة وفي هاك الدقيقة ... بعدت عن الخيام وقضيت حاجتي وانا توني بأقوم .... الا هاك العج اللي قايم علينا .... التفتت ورى ابغا اشوف الخيام ماشفتها ابد من العج كنت حول الكيلو ..... وبقدرة الله جريت صوب الخيام ماوصلت الا الوالده طول الله في عمرها قالت لي الله يستر الظاهر سرايات .... قلت خلنا بالاخيام اهون ويوم نطرنا شوي وصفا الجو مع شدة الهوا الا طوفة بيضا جايتك وصوت الرعد فيها قصف ... والسحاب ابببببييض وقريب من الارض ماجانا طرفة الا الخيمة اللي قاعدين بها محولة نصها ... قلت خلنا نروح بالسيارة اهون ويوم عديت اللي عندنا 11 واحد مع صبي قلت يالله سترك وشغلت هاك ال 1991 وجانا مطر ( حبال ) حشرنى المهم الله ستر علينا وجينى الصبح الا الخيام ( خاوية على عروشها ) ..... الحمد لله وكان ذا اغرب وأخس مشكلة مع المطر
ومن بعدها تبت ابيت بالبر في حزة السرايات ... سبحان الله تجيك عز الليل وانت غافل عنها ...




والسالفة الثانية / ماكنت انا موجود فيها بس كانت مع واحدن من قرايبي ( شيبه ) جاهم حقاب فرسية يعني هاك الحقاب مقبل من الشرق ... يعني العكس

شهر 5 قبل المغربية الدنيا غدت ليل ماتشوفها الا اذا ظربت البروق طفت الكهربا المهم السالفة ... انه الرجال رايح عزبته يروحها كل يوم ويوم جا الحقاب ضيع وقعد يناظر بالسما ويوم جاه الغرق حلول له بمكان طينه لينه وغاص موتره لين النص المهم مشى لين عزبة جمبه وقعد لين الساعة 11 وجوله يوم عدا الصبح الا المنظر الله لايرويك ...>>> ودي احط الصوره لكم بس الرقم ظاهر مب عدلة :D

[حـــادي]

المواقف كثيرة والسبب حبي وتولعي في تتبع الغيم والسيل من كنت صغير وأذكر لكم أول موقفين صارت لي والباقي في الطريق ان شاء الله .
الموقف الأول : قبل يشتري لي الوالد سيارة لي كنت اتعذب ( ويجيني شي بسم الله الرحمن الرحيم ) اذا شفت الغيم وامنيتي في الحياة كلها أكون تحت السحابة وبس إلي فيها برق ورعد وإذا جا من بكره ودي أروح أشوف السيل بس الشكوى لله إلى أن جاء الفرج وشرى لي الوالد سيارة وأنا في الثانوى وبتحديد قبل البردية إلي ضربت الرياض في مارس عام 1416هـ وشراها لي الوالد قبل البردية بـخمس أيام فقط وكان محرصني ومشدد علي السيارة انها من البيت للمدرسة ومن المدرسة للبيت وبس .

المهم اليوم الي جاء فيها البرد طلعت من المدرسة والخيال زين مره وجاني شي بسم الله الرحمن الرحيم وقلت بمر على ولد خالتي في الدرعية والتغداء وياه في أحد الشعبان ونتفرج على الغيم ومايكون إلى خير مع الوالد ، طلعت للدرعية وسلمت على خالتي وشوي وجاء ولد خالتي من المدرسة وطلعت معه على سيارته وسيارتي وقفتها عند بيت خالتي ، قلنا ناخذ غدانا المنتدي من الرياض ثم نطلع ندور مكان نتغدا فيه ، وكان السحاب يخوف عنا شمال غرب وسحابة ما عمري شفت مثلها الى الحين ، يوم صرنا بالظبط في طريق الأمير عبد الله قدام بوابة جامعة الملك سعود وبداء برد بدون مطر وبرد كبار وشوي برد مع مطر ولا عاد صرنا نشوف شي انعدام تام في الرؤية الأفقية على قولت ( حسن كراني ) ونمشي نمشي ما درينا عن أنفسنا إلى وحنا في المحطة الي قدام جامعة الملك سعود وداخل مغسلة السيارات والله مدري وشلون خشينا فيها ، وحولنا من السيارة وجلسنا نتفرج وسبحان الله برد ومطر لا يوصف ، يوم خف المطر إلا كل الطرق في شمال الرياض مقفلة والسحاب يخوف قال ولد خالتي خل أرجعك للسيارتك وأرجع بيتنا يوم بغينا نرجع للدرعية اثاري كل الطرق مقفله ونقعد نحوس نحوس ومن شارع إلى شارع ما في امل نوصل للدرعية والمغرب قد قرب وفيه سحابة كبيره جايه ما تفرقها من السحابة الأوله واجد قلت لولد خالي امش معي للبيت واذا خف المطر طلعنا لبيتكم وكنا ساكنين في المعذر الشمالي وضربتنا السحابة وحنا راجعين للبيت يوم وصلت للبيت الا الوالد والوالدة الله يطول في أعمارهم مرتاعين مره الدنيا مطر والولد طالع من الصبح لا حس ولا خبر ولا فيه جوال ولا بيجر وشف هواش وتهديد بظرب والطرد وكلام طويل عريض وكبير المهم يوم جت الساعة 10 الليل وقلبي مع السيارة طلعت أنا والوالد للدرعية وطول الخط طبعاً يهاوش ويهدد الله يطول عمره لين وصلنا بصعوبة للدرعية الحمد الله السيارة ما تأثرت من البرد الى بشي بسيط لا يذكر بس المشكلة أني كنت مخلي قزازة السواق مفتوحة ما قفلتها والمويه دخلت جوا السيارة ورجعنا للبيت وأنا القط وجهي قدام أهلي وأخواني وصار قرارت ذيك الليلة تعسفية ضدي ومن القرارت الي صارت 1- سحب السيارة نهائياً مني طول السنة ( يا فرحة ماتمت ) 2- تعرفون من بكره كانت إجازة من المدارس وصدر قرار بمنعي من الخروج من البيت .

الموقف الثاني وأنا بأول سنة لي بالجامعة وكانت الرياض ممطورة مطر طيب قبلها بالليلة والشعبان الي حول الرياض كلها ماشية يوم صلينا الظهر وكان الوالد معزوم في البر وطلع عقب الصلاة للبر وأجيك للبيت والاقي الهايلوكس قدامي قلت ياولد الوالد مو فيه وبطلع اتمشى اتفرج على السيل وبيمدني أرجع قبل يجي الوالد وكان الوالد محمل أغراض بصندوق الهايلوكس كم مكيف وأغراض أخرى لأننا كنا بنشد من بيتنا الي في المعذر ، المهم واتصل على اثنين من الشباب وقلت لهم ناخذ غدانا ونطلع نتمشى ونتفرج على السيل يوم طلعنا وكنا في طريق القصيم ومرينا من عند شعيب بنبان وكان يمشي بقوة خشينا للشعيب وجينا بنقطع الشعيب وكان خبري مو عميق تقدر السيارة تقطعه والعالم تأشر لي لا تخش، وأخوياي الي معي في السيارة يشجعوني ويقولون خش المهم قررت أخش يوم صرت وسط الشعيب وتطفى السيارة علي والموية بدت تخش من القزاز الي على جنب وشوف الموية ترتفع وسط السيارة وحسيت ان السيارة هي الي تنزل بوسط الموية قلت اكيد تحتنا طين والسيارة قاعده تغرق ونطلع مع فتحات الشباك ونصير فوق السيارة والسيارة مغطيتها موية والعالم قاعده تفرج وشكلهم يقولون يستاهلون ما جاهم المهم جاء ابن حلال وربطنا السيارة بلواير ودفيناها الى أن طلعت وجلسنا نحاول نشغلها الى الساعة 10 الليل والحمد الله اشتغلت والمكان الي حنا فيه مافيه بث للجوالات وطلعنا لأقرب محطة وعايرنا الزيت ولقينا الموية خاش في الزيت وغيرنا زيت السيارة والحمد الله على كل حال ما صار الي أشياء بسيطة مره مره المكيفات والأغراض الي في الصندوق الله يخلف على ابوي مراتب الهايلوكس جاها مويه وانشفت بعد كم يوم وعقبها طلعت ريحة مو طيبة من المراتب والسيارة ماش ماهي السيارة إلي على خبرك والوالد اظطر أنه يبيع الهايلوكس ، ومررررررررررره ابعد ما زعل علي الله يطول في عمره .

هذي موقفين ان شاء الله تكون أعجبتكم .

[خالد العوض]

الله يعطيكم العافية ذكريات حلوه الله يعيد الزين منها

[بركان]

ومن المواقف الطريفة عن السحب ان احد الاصدقاء المولع بمطاردة السحب وفي احد الايام شاهد (خيالا) يتكون من الغرب وعلم بشدة برقه ورعده من خلال الراديو فاخذ اطفاله الصغار واعتلى قمة ليرصد السحب وبروقها وعند اقتراب السحب وفجأة تعالى صراخ بناته الصغار تدرون لماذا ؟؟؟؟
لأن شعور رؤوسهن وقفت الى الاعلى وبشكل اخافه وبقية اولاده حيث خشي على بناته من الصعود الى اعلى السماء وكان شيء يسحبهن من شعورهن ومما زاد الموقف صعوبة هو سماعهم لأزيز اثار الرعب فيهم جميعا
. طبعا السبب معروف وهو ان المنطقة العالية التي كانوا متواجدين فيها كانت منطقة تفريغ للشحنات الكهربائية النازله من السحب.( يعني الجو كله مكهرب)فسحب اولاده على عجل وادخلهم السيارة وغادر المكان وحمد الله كثيرا على سلامته وبناته.

[تباع المزن]

لا أدري ما أقول .... !!

بصراحة أنبهرت و أعجبت جدا بقصصكم الرائعة فعلا ، لكن قصة مريوس يوم يركب ورى يبي يشغل السيارة تقطع من الضحك .

الله يعافيكم يا شباب فعلا قصص رائعة جدا و نستفيد منها جدا

[طير المطر]

بسم الله الرحمن الرحيم
الحمد لله رب العالمين والصلاة والسلام على رسول الله
اخواني قصصكم جميلة وعجيبة
وقصص محبي الامطار كثيرة ولا تخلو من المغامرة (حفظنا الله وإياكم)

مرة وانا في المرحلة الثانوية شفت سحب بعد الظهر وعادتي ماشوف سحاب الا تحته قريب ولا بعيد (استغرب من نفسي ليه اسوي كذا وبعد كل مطره اقول توبة ما عاد اكررها وخل تجي سحابه تروح كل العلوم وتبداء المغامرة) نرجع للقصة شفت السحاب واول مافيه جوال ودورت خوي معي لاني اكره المشي لوحدي مالكم بطوالها ماحصلت احد يخويني ذاك اليوم ابد ورديتها على الحريم وش اسوي :) كلمت الوالدة وقالت مانقصني وجع ظهر :)) قلتلها على مهلي قالت مع السلامة لفيت على اخت لي متزوجه وعندها ولدين قدرت اقنعها بس خايفه على اولادها قلتلها نخليهم عند جدتهم وافقت :)))
حركنا السيارة صوب السحاب وانا لي نظرة بالسحاب فيه مطر ولا مافيه كنا نمشي مع الاسفلت وشوي واشوف ذيك السحابة تسحب مطرها شلال واحد ولفيت السيارة عليها وطردي واختي تقول ردني ردني بيتي نزلني والسحابة كانت بعيدة شوي ودي اكون تحتها وقربنا منها وسرنا تحتها والمطر يهطل وشوي وصوت الكفرات اختفى والسيارة مالها صوت اثرينا طرنا فالهواء وانا مدري وش السالفة شوي وذاك الصوت اللي يرعب احسبني صدمت جبل وهبطت الطيارة قصدي سيارتي في حفرة شيولات يعبون التراب في القلابات طولها يمكن 9 متر والله اعلم بس من حسن الحظ ان اتجاهي مع مخرج القلابات في الحفرة وهذا من لطف الله السيارة تبهذلت واختي تصيح وسط الحفرة وتقول الحق علي انا اخويك :) وانا ساكت وش اقول :( واختي حرمت ماتمشي معي وقت مطر طول حياتها :( وبصراحة انه موقف مخجل ومخيف
اعلنت التوبة يومين وجات سحابه وطردتها لحد ماجبنا خبرها وعرفت ان فيه ناس مثلي ماينام الليل ولا يرتاح الا تحت السحاب وناس عندها احلى نوم وقت المطر :( !!!!!

عندي كم قصة عن مشاكل المطر بس يمكن مايعجبكم كثر القصص او السرد
والله اعلم
سبحان الله وبحمده سبحان الله العظيم

[صوت المطر]

قصص رائعة وفكرة أروع ... وليست غريبة من محبي متابعة السحب والأمطار ..

أما عن نفسي فالقصص كثيرة .. لكن نعطيكم الموقف الصعب اللي حصل لي ..


مره من المرارير .. وكان الجو في نشوء سحب الصيف القوية اللي بعد العصر .. وبينما الجو يزدان

من الحين للآخر إذ بسحابة قوية شمالنا تقريبا على عيون الجواء ركبتلي واحد من الزقرة وكان

المسكين زواجه بعد يومين فقط .. وأول مره يخاطر معي في المغامرة في مطارة السحب ..

إيه تسلم .. الحاصل إني سبقت السحابة وجلست انا والخوي بمكان قبل وصول السحابة وهي الآن

غربا لكن عليها بروووق الله لا يوريك تنزل بالأرض كانت هذه السالفة أيام الثانوي يعيني (قلب ميت)

الحاصل إنها خلاص قربت السحابة الرفيق توحش صواعق ومادري إيش يله ودني أنا وراي وراي ..

ومن هالكلام .. أنا الحقيقة بنفس الوقت خفت البروق صارت من كل جهة والوقوف أصرف لنا ..

لكن ما ادري ويش اللي خلانا نمشي جهة الديرة والبروق تضرب من كل صوب وبينما نحن في الطرق

إذ بصاعقة تقصف خلفنا مباشرة وتضرب بالزفلت ياجماعة خلفنا يعني خمس امتار فقط ..

أصابنا الذهول وإنعمينا من قوة البرق وقفنا من الخوف رفيقي الله لا يوريكم شتم ولعن وقال إنت ؟

قلتله بدال ما تلعن يا اخي سبح وهلل نحن الآن في رحمة الله .. المهم هدا شوي وقال بسرررررررعة

البيت .. وانتهت السالفة .. وكلما شاف برق وشافني تذكر الموقف ..

وسلااااااااااااااااامتكم ...

[تباع المزن]

تسلمون يا جماعة ... قصص رائعة جدا

[الربذي]

اثاري كل الناس مثلي انا احسبني الوحيد الي اتابع السحب والبروق واشوف المغامرين بالتلفزيون وهم يحكون مغامراتهم ويعرضون قصصهم طبعا كلهم غربيين ودايم اطلع عن الديره بس عشان اخيل البروق
بصراحة اتحفتونا بقصصكم الرهيبة والمخيفة وبعضها كوميدي
وانا بصراحة عندي فزع من العجاج فزع غير طبيعي اذكر مره كنا طالعين وبالليل سمعنا صوت مخيف طبعا سكون والي معي ماهمهم قالو وش هالوحيفه !!!!يعني صوت وشوشه قويه مره مره وحنا مانشوف شي باليل المهم قالو اهه !!عجاج انا استحيت منهم بس خوفي خلاني اتوطاهم !!!وانثر واحوس الاغراض!! وانسى البس نعولي واقمز للسيارة واقفل على نفسي !!!!!!!!!!!!!!!!!!!!!!
مالكم على دين لو السيارة مقفله اني ليغما علي من الخوف واركب وانا خايف وضربات قلبي 150
والحكي هذا من خمس سنوات تقريبا وصار عجاج بس خفيف لكن صوتة بالشجر قوي
وتصدقون مايمر اسبوعين الا احلم اني بوسط عجاج يروع وعلى هذا الحال من وانا صغير (متعقد من العجاج )
((((((اذكر قصة حدثت قبل سنه انا واخوي ومعنا واحد طبعا كلمو على وكان علينا مطر وانا اتمشي فيه المهم مرونا وركبت معهم على الربع موديل 99 لخوي وكان شعيب اديرع يمشي والناس متهوله من هالسيل ويجي اخوي الله يهديه يبي يطب قلت له وقف وقف قوي قوي قاتل لالا ماعليك نبي نقطعه حدور ومن تحت الكبري وجنب الحافه بين جدار الكبري والسيل يعني مع السيل بس مع طرفه طبعا طبينا والله اني احسنت انا دخلنا تحت الارض يارجل اشهد ان الربع سياره اثاري الله لايوريك قدامنا حفره والماء مغطي المكان وعميق طبعا تصدقون اني اذكر انا نمشي عادي ومسرعين وبواحد وغطسنا مره مره و ان الماء غطانا الى فوق التنده اول صفرت الدنيا وبعدين ماتشوف الا المياه من كل جنب يعني صرنا غواصه اخوي دعس مره وطلعنا لكن الجيب طفا والما صار يدخل علينا وحنا بوسط الشعيب تحت الكبري وانا على الجنب وادودل يدي واصل الماء الى نص الباب اخوي قام يدق بالجيب وهو بواحد نتع بس والحمد لله البطاريه قويه ويوم قام يمشي شوي شوي الناس بواري علينا وصياح هذا الي عندهم وبالاخير تحصل المعجزة وشهي !!!!!!!!!!الحيب اشتغل تصدقون ويدوس عليه ويتفتف يالله يالله لين طلعنا ونفتح البيبان ويقعد الماء يصبصب علينا وخوينا نكتي يوم الماء يصب من السياره يقول السمك صيدو السمك والعالم مستغربه وشلون طلعنا طبعن كنا باليل والنور مولع لكن الماء تصدقون ملي المنبات لانه مركب
غاز ويدخلهن الماء
الخلاصه ستر علينا الله جل جلاله
وانا اشهد ان الربع سياره فوق العاده
وتعتبر سفيره مشرفة لتويوتا والي معه لايبيع لو ماعندي بزاريبن اشتريت واحد لوهو مو مريح بس خيال وقصه ثانيه لشرطي يبي ينقذ صاحب سياره جرفه السيل وطب بادوريه في موقف بطولي لايمكن احد
اقول تصبحون على خير
اشكر اخوي متابع السحب والمزون على هذا الطرح الحلو
محبكم

[الكونترولCONTROL]

ابو عوض !!! يا زين البطحاء اللي دون سد العواجي بعد المطر !!!!! شي يهول
=============================================

[ثعل البرد]

موضوع قديم ويستحق فعلا أن نعيده لصفحة البداية - بعد إذن المشرفين -

[ثعل البرد]

مشرفينا الكرام ... ما رأيكم بتثبيت هذا الموضوع ؟؟

[جدة غير]

كنت في الطائف في صيف 2004 أو 2003
المهم شفنا قطع من المزون جهة الشفا
ورحنا للشفا (( الحدبان )) وزاد تكاثف السحب الركامية ولكن مو مرة (( ماخذة جزء من السماء خاصة فوقنا ))
المهم وش ما يصفق ذاك الرعد الذي لم أسمع مثله في حياتي ، العادة أن البرق ومن ثم الرعد ، لكن سبحان الله ذيك المرة جاء برق قوي ورعد أقوى في نفس الوقت تقريبا وفوقنا طبعا هذا شيء خطير جدا وخاصة أننا في مناطق مرتفعة (( الحمد لله الذي سلمنا )) ويوم جاء الرعد طبيت في السيارة من شدة الخوف وكان معنا بنت أختي تبكي من الخوف ، صراحة ما تلام
سبحان الله رغم أن السحب لم تكن كثيفة جدا
وبعدين جاء مطر ولكن مو قوي.
هذا أقوى رعد سمعته في حياتي .
ومرة التلفزون السعودي عارضين مطر في التلفزون في نجزان ويصفق رعد قوي ، خفت لأنه كان شديد هذا وهو في التلفزون عاد كيف لو كان في الواقع.
أما أقوى (( يمكن )) برق رأيته كان في جدة كنت مصوره بكمرة فيديو وو قفت اللقطة عليه ، صراحة برق منظره عجيب وهو سريع جدا .
سبحان الله العظيم ، ودي أوريكم إياه وهو كان يوم 19/3/1426
والله تعالى أعلم

[جدة غير]

وعليكم السلام ورحمة الله وبركاته

قصة حب
عام 1413 تقريبا
كنت أبلغ من العمر 6 سنوات
المكان جدة
في ليلة من الليالي المطيرة ذات الصواعق الشديدة
قمت من النوم وأخذت أجلس بجانب ولدتي وأنا خائف (( أرتجف )) وكان وقتها صواعق شديــــــد جدا على جدة في تلك الليلة ، وأبي وأخي وخالي ينظرون من خلال النافذة ، أما أنا لم أنظر لأنني خائفا جدا إلى درجة أنني أصابتني الرعشة ، وولدتي تسألني ماذا بك يا ولدي ؟ وأنا أقول لها :- بردان ، وأنا في الحقيقة لست بردان وإنما أرتعش (( أرتجف من شدة الخوف ))
و بعد تلك الليلة عشقت المطر والحمد لله رب العالمين .
والله تعالى أعلم

[ثعل البرد]

بالنسبة لي ...

سبق ان مريت بموقف صعب ومحرج ومضحك بنفس الوقت ألا وهو :

أني كنت أمشي مع طريق دخنة طالع من الرس وكان الوقت بعد الظهر وكان فيه نشو مزن زين توه مسدي جهة جنوب غرب ... وأنا أسوق لم أكن مركز بالطريق بل كنت مشغل الرادو أسمع البرق ونظري وتركيزي كله على السحابة ...

بعد فترة من المشي بسرعات مختلفة مرة أمشي 140 ومرة 60 حسب المزن ومشيه ... تفاجأت أن صدمت بجانب سيارتي صبة الجسر الرابع ( شعيب أبوعشر) وكان وراي سيارات فقاموا يضربون بواري بشكل مستمر على بالهم أني نعسان وما يدرون أني هواوي مزن وخيال وستر الله علي والسيارة انعدم الجنب كله لكن تمشي ما تأثرت ألا طعوج ومخوش وبعد ذلك حطيت رجلي 150 عشان ألحق السحابة ولحقت عليها بمفرق الشبيكية والطريف أني بالطريق تجاوزت الذين ضربوا لي بواري وشكلهم مستغربين من سرعتي وأنا توي صادم جسر

أتمنى أن تعجبكم