سؤال:هل استخدام الدبل الثقيل بالنفود يضر بالسيارة

[goold6060]

السلام عليكم
مراحب للجميع
قمت برحلة للنفود وكان وعر جدا واستخدمت الدبل الثقيل لمدة تزيد عن النصف ساعة
هل شغلي هذا صح وهل يضر المكينة على المدى البعيد
لكن لاحظت ارتفاع في حرارة السيارة
وماهي الطريقة المثلى لاستخدام الدبل
افيدوني لاحرمكم الله الاجر

[واطي الجمرة]

كيف وعره؟؟؟؟؟؟؟
اخبر النفود رمله؟؟؟؟

[مطنوووخ]

ان شاء الله مايضره بس بدون سرعه اعتقد ماتمشي فوق العشرين

[بدوي جنوبي]

الدبل الخفيف افضل
لانه يريح المحرك والقير كثيرا

حاول تستخدم الدبل الخفيف دائما

والدبل الثقيل لا يضر السياره بشرط
ما تضغط عليه ،،، وارتفاع الحراره طبيعي

بالتوفيق

[حزوبر]

أعتقد الأستخدام لفترات طويله للدبل الثقيل يضر القير، وكما لاحظت إرتفاع حرارة السيارة
أنا معي سياره دبل قير تماتيك، وما أخلي من فضل الله تعالى مكان، أقصر على الهواء، واحط الدبل الخفيف، وأروح وين ما أبي
أسأل الله أن لا يضرك، ويحفظ عليك موترك

[abu fares]

إن شاء الله الأمور سلامات

لكن استعماله لفترة طويلة يتعب السيارة وكذلك السرعة

[علي عليوه]

طال عمرك عندي جيب 82 شاص كلتشه منتهي إلا شوي

من أدخل للنفود لين أطلع وهو بالثقيل ونمرة 3 وما شكيت من شئ والحرارة مع النمرة الثقيلة طبيعي ترتفع

لا يضيق صدرك ,, وكان تبي ترتاح أكثر شف راعين الاستعراض وش يسوون وما ضر مواترهم

[ابو سلطان1234]

لا تستخدم الدبل الثقيل إلا إذا غرزت السيارة فقط أو طلعه قوية مثلا

[الباثفندر 3.5]

تحذير لا تمشي على الدبل الثقيل بسرعه اكثر من 40 كم لانه كان عندنا جيب سزوكي و دخلنا النفوذ بالدبل الثقيل على سرعة من 60 الى 80 و الي صار انه تفاجانه بأنه البككس الامامي انتلف و طلع كل الزيت و الدبل انكسر و لكن الحراره ما رتفعت كلش

[ابوصالح77]

الأفضل الخفيف
لا دخلت النفود نقص الهواء شوي
وإذا عشقت الثقيل ريح الموتر بنمرة

[تناهيت]

لا تستخدمه الا في الشديد القوي مثل مايقولون .نسم الهواء وعشق الخفيف وتمش وسايس النفود وبتمشي امورك بدون الثقيل لأنه يجهد الموتر ويطلع كل طاقته واهم شي لا تكسر الطاره كامله لنه يضر التروس

تحياتي

[nayf01]

الدبل الثقيل بدون سرعة لمسافة قصيرة وضروريه ما فيه مشكلة

[goold6060]

اشكر الاخوان جميعا على الافادة والمساعدة
وننتظر المزيد من اصحاب الخبرة

[ناصر الدهمشي]

الدبل الثقيل افضل شي اذا تعلق الموتر

او انك بتسحب سيارة

وبعدين اي مكان فيه تغريز

اهم شي تنسيم الكفرات من 15 الى 20 حسب انواع الكفرات

ولا حط الدبل على الخفيف تريح المكينة والقير

لكن مادام انك شغلته ومرت على خير ان شاء الله مافيه شي

بس مره ثانيه لاتسويها :)

وانا من الناس الثقيل ناسي انه موجود بالموتر

الخفيف تقدر تحطه وانت تمشي الى سرعة 100 بالبترول مدري عن السيارات الثانيه

والثقيل لازم توقف الموتر وماتعدى السرعة 60 او 40

وذا موترك فيه كتلوج حاول تقراه وتعرف التفاصيل

ودي واحترامي

[الحرالاشقر]

السلام عليكم

ماقصرو الشباب
الثقيل للحاجه مثل السحب او طلعه قويه
ولاتتعدي فيه 40 ولاتمشي فيه مسافه طويله لانه يتعب المكينه ولاتلف فيه الى الاخر

[هاوي الصحاري]

رد على الاخ واطي الجمرة =الوَعْرُ: المكانُ الحَزْنُ ذو الوُعُورَةِ ضدّ السَّهْل؛ طريقٌ وَعْرٌ ووَعِرٌ ووَعِيرٌ وأَوْعَرُ، وجمع الوَعِرِ أَوْعُرٌ؛ قال يصف بحراً:وتارَةً يُسْنَدُ في أَوْعُرِ والكثير وعُورٌ وجمع الوَعِرِ والوَعِيرِ أَوْعارٌ، وقد وعُرَ يَوْعُرُ ووَعَرَ يَعِرُ وَعْراً ووُعُورَةً ووَعارَةً ووُعُوراً ووَعِرَ وَعَراً ووُعُورَةً ووَعارَةً.
ويقال: رمل وَعِرٌ ومكان وَعِرٌ وقد تَوَعَّر، وحكى اللحياني: وَعِرَ يَعِرُ كَوَثِقَ يَثِقُ.
وأَوْعَرَ به الطريقُ: وَعُرَ عليه أَو أَفْضَى به إِلى وَعْرٍ من الأَرض، وجبل وَعْرٌ، بالتسكين، ووَاعِرٌ، والفعل كالفعل. قال الأَصمعي: لا تَقُلْ وَعِرٌ.
وأَوْعَرَ القومُ: وقعوا في الوَعْرِ.
وفي حديث أُم زرع: زَوْجِي لَحْمُ جَمَلٍ غَثّ على جبلٍ وَعْرٍ لا سَهْلٌ فيُرْتَقَى ولا سَمِينٌ فَيُنْتَقَى أَي غليظ حَزْنٌ يصعُب الصعود إِليه؛ شبهته بلحم هزيل لا ينتفع به وهو مع هذا صعب الوصول والمَنالِ. قال الأَزهري: والوُعُورَة تكون غِلَظاً في الجبل وتكون وُعُوثَة في الرمل.
والوَعْرُ المكانُ الصُّلْبُ.
والوَعْرُ الموضعُ المُخِيفُ الوَحْشُ.
واسْتَوْعَرُوا طرِيقَهم: رأَوْه وَعْراً.
وتَوَعَّرَ عليَّ: تَعَسَّر أَي صار وَعْراً، ووَعَّرْتُه أَنا تَوْعِيراً.
والوُعُورَةُ: القِلَّةُ؛ قال الفرزدق: وَفَتْ ثمَّ أَدَّتْ لا قَلِيلاً ولا وَعْرَا يصف أُم تميم لأَنها وَلَدَتْ فأَنْجَبَتْ وأَكْثَرَتْ. االمصدر-القاموس المحيط -مختار الصحاح

[سهيل تميم]

الاكيد انه يضر مع كثر الاستعمال

انا مشيت على الثقيل اكثر من مره حول ال80 تقريباً بسبب ان فيه عرق كبير وعجزت ارقاه بالخفيف ..ولازم اقطعه..وتخبرون الشاص الجديد ماعندك احد القير يقولون كهرب

المهم الحمدالله الموتر ماضره شي ..السياره شاص 2010

[goold6060]

ذكر لي احد الخبراء ان استخدام الدبل الثقيل في الوعر افضل من الخفيف
فهو يخفف الضفط على المكينة اذا عشقت في الثاني والثالث ##

[سوبر VTC]

الثقيل بالمناطق الوعرة
طلوع و نزول ضروري جدا
حيث يحافظ على كلتشات القير :good::good::good:
بحيث انه ماتحرق
(( لان اهم حاجة بالسيارة كلتشات القير ))
خل المكينة اخر اهتماماتك
و الموتر اذا جلدته بالنفود تطعيس قوي فجر للمكينة
خصوصا بالثقيل لازم تحتمي المكينة لانه على الدبل الثقيل
مثال لتوضيح الصورة
الدبل الخفيف للقير العادي تحصل مع جلد الموتر تطلع ريحة كلتش القير الدزق و الكلتش
لدرجة انه يفوت الكلتش لانه احتمى مثل فحمات الفرامل اذا اكثرت من مسك الفرامل
ماتمسك الفحمات لان الهوب مولع نار
لذلك افضل و اسلم حل للقير العادي بالارض الرملية الشديدة و من اجل انك تحافظ على كلتش القير
انك تحطه بالدبل الثقيل :good:

ايضا بالمناطق الرمليه الهيار
غالبا انا استخدم الثقيل بالطلوع العالي
و اجلد الموتر على نمرة 3 و2 و1
و الوضع تمام الحمدلله

ادخل الرابط
تحصل ردي في الاخير
الجيب والدبل ( ( لاهل الخبر ) ) - منتديات مكشات (http://www.mekshat.com/vb/showthread.php?t=294826)

عشان تكون بالصورة
والدي خبرة و شهادة ميكانيكا سابقا ديزل و بنزين
يقول تبي القير يعيش معك حطه بالثقيل
للمناطق الهيار الرملية
طلوع عالي لنفود واقف
منحدرات و طلوع شديد
لسحب سيارة بالثقيل + نمرة 1
بالاضافة ان الكفرات لازم يكون بهن هواء
مابين 25 الى 20
اذا كانت الرمله هيار مرة ناعمة
او بغيت تسحب موتر
لازم تحط بالكفرات 15
و المكان و الوضعيه تختلف لكل سيارة مغرزة

موفق

[goold6060]

سوبر فتك انت انسان فاهم وتحب نفع الاخرين
مشكور يالغالي
لكن السؤال هل اطالة استخدام الثقيل لمدة اكثر من نصف ساعة بالوعر
والتعشيق بين الثاني والثالث والرابع يضر المكينة ام لا
تقبل التحية

[ذيبان210]

انا واقع تجربتي ان الثقيل للسحب او عندما تعلق السياره في تغريز

لانه يحكم السياره ويصير كامل الجهد على القير

امل ان وفقت ولك التقدير

[بوجندل]

السرعة القصوى للدبل العود 60 كلم

لذلك يفضل ان تكون سرعتك اقل يعني بين 30 الى 50 كلم

وكل ماتزيد السرعة تسمع صوت ونين (مش دايما بس غالبا)

اما الدبل الخفيف / الصغير

سرعتك يفضل ان لا تتجاوز 80 كلم

اما اذا كانت سيارتك شد البلد فيها دفع رباعي فهذه ليست مشكلة

حاول ان لا تنتع الموتر والدبل العود شغال لأن يضر المتحركات

مثل القير والدفرنشات وعواميد الشفت ...