عطل بسبب الامطار - سيارة كراون فكتوريا 2009- الفزعة لاهنتم

[ابوشجاع911]

السلام عليكم ورحمة الله وبركاته
اخواني الاعزاء اعضاء منتدى مكشات الكرام
تعرفون الامطار التي هطلت بغزارة على مدينة الرياض الاسبوع الماضي احد الاخوان معه كراون فكتوريا 2009 جديد فاكه على يده وكالة المهم يقول انه اضطر للسير في مياه عميقة وصلت الى نصف الابواب طلعت فوق الكبوت شي بسيط يعني مقدمة السيارة كانت مغمورة المهم ستر الله عليه لم تنطفئ السيارة وسط المياه استطاع الخروج من المياه وعندما وصل الى البيت واطفاء السيارة وبردت وحاول تشغيلها مره ثانية ماتشتغل من اول مرة يسمع صوت طقة بالسلف (على مايبدو) وتنور انوار الطبلون ولا تشتغل كان البطارية فاضية وعند اعادة المحاولة مرتين او ثلاث تشتغل ولا كان بها شي وتم فحص البطارية وكانت سليمة 100% ولازال مؤشر البطارية (العين) باللون الاخضر
ولا تزال المشكلة مستمرة حتى تاريخه ولم يتم عرضها على اي ورشة ولاحتى الوكالة
فهل من احد يفيدنا جزاكم الله خيرا

[ابوصالح77]

قبل كل شيء يتأكد من الماكينة لايصير داخلها ماء
ويشيك على الزيوت
ويفحص الفيوز
طبيعي بيصير فيها إلتماس مع الماء
الله ييسر أمره وكل مسلم

[مآإآإآجد]

نصيحتي لك يالغلا اذا تبيها

اول شي افصل البطاريه وخله يوقفها بالشمس لمده ساعه او ساعتين مع فتح كبوتها وجميع الابواب والشنطه

بعدها لا ترجع نفس البطاريه روح واشتري بطاريه 70 امبير جديده وركبها

والله يسهل امرك

نتمنى منك بعد التجربه ترد لنا يالغلا

[برق عنيزة]

على حسب كلامك اخوي المشكله كلها عندك كهربائية

شيك ع الفيوزات والدنمو

[راعي الجبعاء]

سلام عليكم ورحمة الله
اخي حصلت معي المشكلة وكانت يوم أمطار الرياض دخلت مويه وصلت لحد نص الباب ولما وصلت البيت وطفيت السيارة وبعد ساعتين رجعت وشغلت وطلع طقة في السلف وفصل بعدها وفتحت الكبوت وحصلت الفيوز فاصل وغيرت الفيوز وقعد كل مادقيت يطق لين يشتغل وخليتة وقبل ثلاثة أيام سلك والحمدلله يشتغل من أول دقة ورجع زي ماكان وسيارتي فورد كراون فكتوريا 2000 وإن شاء الله اني افدتك

[تناهيت]

الحمد لله على سلامتك ونا اخوك

اخوي انصحك قبل لا توديه الورشه تعطي الحر فرصه

صارت معي في الجمس تذبذب الانوار مع رعشه واختلاف شاشة تغييرات القير يعني يعطني انه في وضه N وهو في وضع P >>>المهم فتحت كل علب الفيوزات والكبوت وخليته كم ساعه وجربت الموتر واختلف علي وبعدها صرت امشي وانا فاتح الكبوت على القفله لمسافات قليله وسرعه منخفظه والان الحمد لله الامور ممتازة

تحياتي

[hekloz]

اخوي ابو شجاع قبل كل شي فك البواجي والكويلات اذا طلع منها مويه لا قدر الله قل على المكينه السلام انا صارت لي ذاك اليوم ووضبت المكينه عند ورشه في معارض النسيم ب3000 ريال

[uhm]

من الممكن ان تكون دقمه حقت السلف
سلاام

[ابوشجاع911]

والله حيرتوني ياجماعة ولكن ننتظر لعل الله يجيب لنا رأي من خبير
اما مسالة الفيوز فلو كان محترق فما رايح تشتغل السيارة اصلا
ومسالة انه لازال فيها موية او شئ من رطوبة فهذا مستبعد ايضا فالكلام هذا صار له حوالي 15 يوم والسيارة وقفت في الشموس لين قالت بس ومشت الى اقصى سرعتها وسافر بها مشاوير طويلة
لكن المشكلة لازالت مستمرة
واقرب احتمال لها دقمة السلف
فالطقة حوله في جهته
واحتمال تاثير الماء عليه كبير
ولكن من يؤكد لنا ذلك قبل ان نخسر على اشياء مالها داعي

[راعي الجبعاء]

السلام عليكم
اخوي ابوشجاع ولا يهونون الربع المشكلة في السلف مئه بالمئه وحتمال يكون يبي تنظيف او فحمات لين السلف يجيه كهرباء ويطق لاكن مايدور لقلة الكهرباء او ثقل في السلف نفسة وحل المشكلة في السلف وهذا شي معروف لين الطقة في السلف ويمكن اني افدتك من خبرتي وتجربتي في الفورد والمشكلة حصلت معي والله يحل مشكلتك والسلام عليكم

[moooj]

انفخ علبة الفيوزات عند البنشري
واذا قدرت توصل للدينمو والسلف والتوصيلات الكهربائية
افحص الزيوت كاااااملة وتغييرها اذا لزم الأمر
والله ييسر امورك

[ابوشجاع911]

السلام عليكم
اخوي ابوشجاع ولا يهونون الربع المشكلة في السلف مئه بالمئه وحتمال يكون يبي تنظيف او فحمات لين السلف يجيه كهرباء ويطق لاكن مايدور لقلة الكهرباء او ثقل في السلف نفسة وحل المشكلة في السلف وهذا شي معروف لين الطقة في السلف ويمكن اني افدتك من خبرتي وتجربتي في الفورد والمشكلة حصلت معي والله يحل مشكلتك والسلام عليكم


اشكر جميع من شارك في هذا الموضوع وجزاكم الله خير الجزاء
وبالصدفة قمت بايصال احد الزملاء الى سيارته في ورشة مشهورة في شمال الرياض ولي سابق تعامل معهم فسالت مدير الورشة عن هذه المشكلة فقال احتمال كبير انه السلف وقال يمكن فكه وتنظيفه واعادته مرة اخرى وهو نفس كلامك اخي راعي الجبعاء وحاليا المشكلة بدات تخف قليلا فان انتهت والا فالسلف هو راس الحية :) والوعد قدام