سؤال يبي توضيح شوي

[falcon 1]

السلام عليكم ..صبحكم الله بالخير يالنشاما

حنه كلنه ندري انه الحمام بخرب الطير بالذات اذا دايما تهد طيرك على حمام حمام حمام ..هالعاده تخرب طيرك....لكن سؤالي هو لو تلوح لطيرك بحمامه حية..هل هذا يوثر على الطير ايضا ولا لا ؟

نبي نسمع اراكم يا اهل الخبرة ..وانشاءالله هذي تكون معلومة طيبة لاي صقار مبتدا

تقبلو تحياتي الطيبة اخوكم فالكن 1

[تـقوى الهجـر]

السلام عليكم

اخوي حياك الله

لاكن من يقول انه تخرب طبعه

والشيبان كل يوم يدعون بحمام وهم ابخص

والسلام

[الطبشي]

والله انا من نضريتي ان كثره الهدد على الحمام فيها شوي مشكله على الطير 00 اما الدعو ما اشوف فيها اي شي لاكن حلل الحمامه اول واذا تعلم طيرك على التلواح افضل

[عزوتي وايل]

أنا من وجهة نظري تخرب طبوع طيرك كثر الهد والدعو على حمام ان كان بغيت دعو فا عليك بالتلوح (جناح حباره) وان كانك بغيت هد وتبي تشوف طياره وز بري اللي لارتكز مايلحق حتى فروخ الشواهين والا على صلال (نورس) جسره على الصيد السمين عشان لاهديته بكره على صيد مايعودلك يدور الحمام..........!

[770]

السلام عليكم
اخي الكريم يسعدني ان اكون اول من يرد على الموضوع ....
لا يجوز تعذيب البهائم ولا ننسى حديث الرسول صلى الله عليه وسلم ( دخلت امراة النار بسبب هرة.......)
فكيف نعذب طير على حساب طير اخر!
اعتقد انه ليس فيه فرق بين الحمامة الحية والميتة بالملواح . والي اعرفه ان الملواح هو تعليم الطير بأن هذا الملواح علف له.ففائدة الملواح تحسين لياقة الطير بعد المقيض او جلب الطير عند الإفلاس من الفريسة.ليسى بتحسين اطباع الطير؟ وشكرا

[جير دبي]

السلام عليكم ورحمه : نعم الحمامه تخرب الطير اذا كثرت وايد منها

[محمد النعيمي]

كلام اخونا الطبشي صحيح100%

[بوميحد 11]

ماقصروا الاخوان .. يعطيهم العافية ..

والافضل بالتلواح جناح الحباره ..

اما عن الحمام الحي .. هذي فيها تعذيب للطير ( الحمام ) مثل ماقال اخوي 770 ..


والسموحة

[راعى شاهين]

عندى طير اهده على حمام ولا عرف الشلو حمام وبس وقنصنا على الحد اول طير يطلع هو ويذبح وانا اشوف الطير الطيب طيب لو تهده على عصافير

[طير الهقاوي]

السلام عليكم ورحمة الله وبركاته

اذا جيت تلوح بحمامه حيه لطيرك
اذكر الله سبحانه وتعالى
وعرف انك تعذب نفس
ودينك لايسمح لك بهذا
ذك الحمامه ولوحبهاا ميته
واجابه لسؤالك
الهدد لطير العالم (الصايد ) حمام لايضره اكثرت ام قللت
وعرف ان الطير يصيد لنفسه ليس لك
هذا والله اعلم
تقبل مروري
اخوك طير الهقاوي

[حمد العذبي]

من وين جبت هالمعلومات بارك الله فيك؟!!

انا من يوم يبرد الوقت وتاخذ الطيور ليقاتها الطبيعية اهدها على الحمام إذا مالقيت هدد على صيد وخصوصاً إذاالارض سهل وتساعد على الطرد والحمدالله ما تغير شي في صيد الطيور وطبوعها

ملاحظتي الوحيده على هدد الحمام ان الطير يتثقل على الشلو!!

[الرااسي]

السلام عليكم من وجهت نظري ان الطير الي يهد على الحمام دايم وينخرم راسه على الحمام هذا خراب ان كانك تبيه للصيد اما تبي حمام وبس هذا شي راجعلك وبالنسبه للدعو في حمامه حيه انا مع راي الاخوان لان فيه تعذيب البهيمه حللها او علمه على اللوح فاضي والله اعلم

[falcon 1]

مرحبا بكم جميعا ..اشكركم يالنشاما على ردودكم وانا داري انه تعذيب الحمم ..بس حبيت اتاكد ..انا ما عمري هديت حمام هدد....اشكركم شكرا جزيلا ..وبيض الله وجيهكم جميعا
تحياتي الطيبة
اخوكم فالكن 1

[دعاس]

مساء الخير اخوي/ بالنسبه لما طرحت بالموضوع السابق: انا اقول ان بعض الشيبان ما يهدون خاصه الفروخ على حمام اول مايبدا يقوم بتنسير الفرخ بوضع العلف داخل الملواح ويفضل جنحان حبارى وبعد مايوالف الشلو يمكن يهد له حمام مشان يشوف مداه وصملته وارتفاعه وبعدها يقطع الحمام لفتره لبعد ما يصيد الفرخ وانا من واقع تجربتي بالفروخ كان عندي فرخ انهبل مع الحمام وبعته بقيمه طيبه واللي اخذه يقول كشفه على حبارى درج وقام الفرخ يناظر فوق يدور الحمام وعيى يطلب الحبارى وهدوا عليها وعزلوها وعلموه وصاد ومافيه مشكله واستهد وفي بعض الطيور ماترغب الحمام لانها استهدت بالحباري كم سنه وماعمرها شافت الحمام على الاغلب.
وافادوك الاخوان عن الدعو بحمامه حيه انه مايجوز للحرمه لانه في تعذيب للحمامه
وبصراحه الطير اللي مايطرد حمام هالايام ماهو مرغوب زياده لان الصيد قل والناس تهد الحمام للوناسه
واسف على الاطاله
ابو نواف