قرقشة بـvxr

[عبود بلاص]

السلام عليكم
اخواني اعضاء وزوار ومشرفي منتدي مكشات الكرام
تحيه طيبه
المشكله :
عندي جيب Vxr موديل 2000فيه صوت قرقشه عند المشي على المطاب يعني اي طريق فيه حفروايضاً في البر بطرق البطناج يطلع الصوت واغلب ضني انه من الفرامل الي وراء يعين يمكن بالكليبر الصوت بس مااجزم الي عنده نفس المشكله هذي ويعرف حلها ارجوه رجاء خاص يقولي كيف اصلحها وله مني دعوه من القلب .... دمتم سالمين

[طير شلوى نجد]

مثل ماقلت ولا ازود عليك اغلبية الاند يسير فيه فضوه بالكليبر شد عليه وامورك انشاءالله بخير

[_دربيل_999]

اخوي...اذا إشتريت الفحمات الآصلية فقط,,
يجي معها قظع معدنية رقيقة تأخذ شكل الفحمة,,
هذه القطع المعدنية تركب في الفحمات من الخلف وهي اللي تثبت الفحمات في الكليبر عشان ما تقرقش..
وسبب ثاني القطع المعدنية المدورة اللي تدخل معها مسامير الكليبر لازم تستبدل لانها تتوسع وتصير القرقشة مضاعفة....
خالص تحياتي لك

[سلطان ولدتميم]

اخوي جرب وانت تمشي في ابوطناج اسحب الجلنط شوي وانت تمشي اذا راح الصوت فان الجلط يبغاله شد من عند الهوبات وليس من الواير الي تحت الكارونه

[سامي سليمان]

انا عندي نفس المشكله في 98gx

[ملهوي]

نفس المشكله في Gxr2005 ونشد الجلنط من عند الهوبات ويخف الصوت شوي ولكن بعد اسبوعين إلى ثلاثه يرجع نفس الصوت


لكن أنا عندي صوت قوي كأنه صوت شي ثقيل مره يتحرك من مكانه يعني (مهوب صوت قرقشه أوطقطقه )
وهذا في الجزء الخلفي من السياره علماً انه مايظهر إلا أثناالمطبات القويه أو أثناء المرور بأرض وعره جداً
طبعاً يكون الموتر مهدي


علماً أني مركب ياي استرالي


ودخلنا المتوتر الورشه ولهطودراهمنا كالعاده غيرو كراسي القير والمكينه وجميع الربلات ولاتغير شي


الي مرت عليه هالسالفه ولقا حلها يعلمنا الله يجزاه خير

[هوايتي مكشات]

يمكن مساعدات .......

[ملهوي]

غيرت المساعدات مافيه فايده
لكن هل من الممكن الياي الإسترالي يسبب مثل هالمشكله
وفيه واحد من العيال يقول تأكد من أن البدي مربوط صح على الشاصي هل هذا ايضاًيسبب مثل المشكله

[ابو مريم]

يا اخوان يا اعزاء هالمشكله سويت انا وهي مسلسل حلقاته فوق الـ 300
اوجعت راسي وادوخت راسي بشكل ما تتصورونه
والمشكله كثر الشغل في منطقه الهوبات والشد كلهم يزيدون الصوت
والصوت اللي تذكرونه صار بموتري مدبول خمس مرات بدون مبالغه
المهم تذكرت لي هندي يشتغل في ورشه قلت خل امر عليه
جيت مدير الورشه وقال نصلحها ب 100 قلت تم اشتغل الهندي والله وانا اقوم واطلع خمسين ريال قلت اشتغل بذمه وضمير كنه موترك هالكلام تقريبا الساعه 2 ما خلص من السياره الا بعد المغرب المهم يالربع انه فك الهوبات والقماشات والفحمات اللي ورا نثر العده كله وانا واقف عنده المهم بداية الاكتشاف رافع راسه الهندي وقام يضحك ويحرك له شي هو اللي يسبب الصوت قلت الحمد لله تم الاكتشاف وعلى ما اذكر القطعه هي اللي يدخل منها واير الجلنط لجرم الهوب واكرر ترا العامل نثر مجموعة الفحمات والقماشات والسبرنقات نثر وبعد اصلاح القطعه على ما اذكر ركب فيها وردات وكبسهم قام باعادة التركيب من اول وجديد
اخواني ارجوا اني افدتكم واعذروني على الاطاله