الطير ماحذف

[ولد السبع]

السلام عليكم ورحمة الله وبركاته


ياربع انا عندي طير قرناس ثنو للحين ماحذف ومادري وش الطريقه ابي رايكم لاتبخلون علينا

[ابـــًًو تركـــًي]

عليك بالجرابيع
والبيض

[عتيج الصوف]

اولاً قبل الربطه افحص وثانياً ارتك عليه بالعلف ريوق وعشاء وعادةً اتكون منزل الطير دون اتعاعبه وثمه ترهي عليه بالوجبات ولا يطوفك التنويع جرابيع .. حمام حاشى ووو + الفيتامينات ... والاخوان يفيدونك ان كان طافني شيئ

[ابوناصر السهلي]

عليك بالجراذيه خل جو المربط مايل للحراره شوي واذا مانفع يمكن مدهنة الطير فيها شي

[yasser1389]

افحص مدهنة الطير وحاول تقصر على الطير بالعلف

[قلب ذيب]

الله يحييك .
ماقلت لنا .
1 - هل الطير هازل , وكيف هو لون وشكل محط الطير ؟
2 - كم للطير منذو ربط !
3 - هل الطير مرقع بشي من الريش القديم .
4 - اوصف لنا غرفة مربط الطير , وهل الطير مربوط لحاله ام معه طيور ؟
5 - مانوع العلف الذي تعطيه للطير ؟
6 - هل الطير اصله خلوي ام مطروح فرخ ؟
وان شاء الله بنعلمك مانستطيع مساعدتك به .
تحياتي .

[ابوسمرى]

اخوي اجب عن الاسئله من اخوي قلب ذيب علشان نستطيع تحديد المشكله ان شاء الله...

[صاحب نوماس]

اخوي طيرك شكلة ضعيف وشكلك مهمل من ناحية العلف


شكلك تعلفة يوم وتترك يومين الطير اذا ماصتك مايحذف تراة

وعليك بتنويع العلف حاول تجيب لة جراذي وجرابيع ولحم حاشي وحاول تعلف غداء وعشاء

وعسى ربي يوفقك

[راعي طلاع]

ان كان توه مطروح الزمان اللي راح يعني وحش
فالامر هذا طبيعي اعرفلك طيور فروخ وقرانيس ووحوش ما حذفت
وان كانه بيتي فشيك على مدهنته يمكن ناشفه دق مدهنته وارفع الطير ونوع بالعلف
مثل ما قالو الاخوان ولايكون المكان بارد جدا الطير اذا كان الجو حار شوي الطير يحذف
وفيه طيور وانا اخوك السنه ذي غريبه وهي قليله للحين ما حذفت وانشا الله طيرك يصف مع اول الطيور
اتمنى اكون افدتك

[دعاس]

مسيت بالخير بالنسبه لطيرك اذاانه بيتي وانت خابر يوم ربطته كان نازل او مغلق اذا كان نازل مفروض تغديه وتعشيه وتشكل له بالعلف, واذا ربطته وكان صنيع وماحذف احتمال فيه ديدان او مدهنته فيها شي امسك الطير واوزنه واذا ريشه مشهب وما فيه لمعه احتمال مدهنته وارمه, و شف لك واحد يضفه زين وشف مدهنته اذا وارمه ومائل لونها للزراق لازم تدقها واذا امافييها ورم او تسريب عطه كورس علاج الديدان(الامعاء/المعلف/الكبد) وان نفعت ماتضر والمفروض قبل تربطه تشيك عليه لان اذا به ديدان ماراح ينتفع من العلف ويضل هزيل,, واذا طيرك السنه هاذي وحش وربطته لازم يفحص قبل الربطه ولو هو سليم ومربوط طلقل يهاب الطيور ويخلي علفه و راح يتاخر بس لازم يكون زات السوابع وانت تقول ماذب شي امسكه وشيك عليه,,,وتقبل مروري
ابو نواف

[ولد السبع]

الله يحييك .
ماقلت لنا .
1 - هل الطير هازل , وكيف هو لون وشكل محط الطير ؟
2 - كم للطير منذو ربط !
3 - هل الطير مرقع بشي من الريش القديم .
4 - اوصف لنا غرفة مربط الطير , وهل الطير مربوط لحاله ام معه طيور ؟
5 - مانوع العلف الذي تعطيه للطير ؟
6 - هل الطير اصله خلوي ام مطروح فرخ ؟
1- الطير وزنه 1050 محطه ماشفته الطير مقيض هدد
2- الطير شاريه اخر الوقت من راعيه وله من ربطه عندي تقريبا شهر ونصف
3- لا ماهو مرقع
4- الطير هدد مع طيور
5- يشكل له العلف مره سمن مره سيقان دجاج ولي ثلاث ايام اعطيه فيران
6- والله مادري بس على كلام الرجال انه فرخ

[قلب ذيب]

ارحب ياولد السبع .
طيرك ان شاء الله مافيه شي وبيحذف قريب . الطير هزيل شوي ( يمكن الطيور الاخرى تطرده من العلف )
عطه ( فخوذ دجاج / سمان - وعليك بالجرذي البري ) تحذر تعطيه لحم حاشي فلحم الحاشي صعب يدرجه الطير , كذلك لاتعطيه الجربوع ! لحمة الجربوع مثل لحمة الارنب ماتعد الطير .
الجرذي عطه اياه بدون الذنب فذنب الجرذي صعب على الطير ادراجه .
تأكد من محط الطير بحيث لايكون اخضر ( كوكسيديا ) او على شكل عقد قريب من محط السمان . معناه دود بطن , اذا ماحذف بعد 20 ليل من الافضل عرضه على البيطري . والله نسأل التوفيق .

[ولد السبع]

الله يعطيك العافيه
الله يسمع منك انشاالله يحذف قريب

[صياد سكاكا]

عليك بالجراذيه خل جو المربط مايل للحراره شوي واذا مانفع يمكن مدهنة الطير فيها شي