اميمتي ذبحها الحر تكفون

[binmegrin]

بسم الله الرحمن الرحيم
سؤال لاهل العلم والعلم عندالله

عندي فورد جراند ماركيز أمريكي 2008 المكيف مايشغتل مع الفتحات الاماميه ولا من تحت بس من فوق الطبلون
الله يجزاكم بالخير المساعده قبل لا اوديه للحنشل (الورشه)
ونا متأكد ان فيكم النخوه والفزعه والله ما اقولها مجامله لا والله لان هالمنتدى مجلس رجال وأهل علوم طيبه

حفضكم الله

[عبدالرحمن1980]

شف مالك الا انك تطق على المكيف الامامي الى ان يشتغل

[ابن الحاره]

السلام عليكم اخي الكريم
من وجهة نظري ومن واقع تجربة ايضا اذا كان يطلع صوت قوي لكن بدون هواء فما عليك الا ان تقوم بتنظيف فلتر الهواء فقط وباذن الله تبرد وتبرد امويمتك.
الله بحفظها لك ويجعلك من البارين بها.

[ابو سلطان1234]

نوع المكيف لمس او فرارات ؟؟
الفاصل اللي يغير اتجاه الهواء داخل البلون اكشف عليه

[binmegrin]

يامال العافيه والله يجزاكم خير
يا ابوسلطان : وش البلون وينه فيه ومكيفي لمسات
ابن الحاره :المكيف بارد الله يعافيك
عبدالرحمن 1980 ابجرب طريقتك واشوف

[ابن الحاره]

اخي في الله
الفلتر مهمته تنقية الهواء من الشوائب والاتربة لذلك دائما يتسكر من كثر الغبار العالق به ويمنع مرور الهواء الى الفتحات الامامية. جرب وباذن الله تنحل.
دمت بخير

[binmegrin]

اخوي ابن الحاره
الله يجزاك خير اذا تقصد فلتر الهواء حق المكينه فهو نظيف واذا فيه فلتر ثاني فنا مدري وينه
شكرا على حرصك

[محمد آل مغيرة]

يا قلبي يا ميمتك الله يارب يحفظها ودي ان عندي معلومة أفيدك بها حتى تدعي لي الوالده الله لا يخليكم منها .............. الله الله فيها تكفى.........الله يسر أمرك

[_دربيل_999]

اخوي
المشكلة ترى بسيطة..
تروح لاي فني مكيفات وتخلبه يوزن لك موزع الهواء من داخل الطبلون وانت لاتحرك زرار موزع الهواء ابد ويستمر معك ويجي الهواء من قدام..

تحيتي

[moooj]

اتذكر فيه موضوع لأحد الأعضاء الله يجزاه بالخير واياكم , فيه شرح مفصل بالصور عن مشكلة موزع الهواء بالفورد وطريقة اصلاحها
كانت نفس مشكلة موترك اخوي وهو ان موزع الهواما يشتغل
طبعا الموزع ورا لوحة تحكم المكيف وفيه تيوبات هوا داخلة على الموزع ولها ربلات تكون متأكلة ولا تقوم تيوبات الهوا بعملها الي هو تحريك الموزع للأتجاه المطلوب
اذا تقدر تفكها وتصلحها فخير وبركة
او تروح لكهربائي زين وتقول له يصلح موزع الهوا او على اقل تقدير يلغي الموزع ويحركه ليكون من الأمام ويبقى كذا على طول
الله يوفقك وييسر امرك

[البدوي الفاهم]

السلام عليكم
اخوي هاذي مشكلة كهرب
خابرواحد من العيال معاه كران فكتوريا يعاني من المشكلة وراح للوكالة وقالو لة مالها حل ال.... خرابيط حرامية
ووداها عد واحد فني كهربائي وعدلها بلي وحركات وصارات احسن من الوكالة

[ahmad413]

يا اخي الفاضل انا معي جراند ماركيز 2008 وتوني قبل يومين انتهيت من حل المشكله هذي اللي دوختني لي اسبوعين والحل سهل جداً .


هذا عيب طال عمرك في جميع الفوردات الجديده او الماركيز ((مكيف لمس)) والحل طال عمرك يا انك تغير الجهاز كامل ((جهاز المكيف وسعره 1900 ريال بدون تركيب)) وهذا الحل غالي ويرجع يخرب لك بعد فتره

يعني ما كأنك استفدت شي .


والحل الثاني والاهم :
((الله يجزى اللي دلني على ذا الحل كل خير))


انك تروح لكهربائي وتخليه يفصلك القسام حق الهوا موجود تحت علبه سوده تحت الطبلون عند رجل الراكب الامامي ((طريقة تركيبه سهله جداً وبدون فك طبلون حتى لو انك قريب مني كان فكيتلك انا القسام ))
وتركب بداله قسام ثاني يوجد عن اي كهربائي فورد ومايكلفك 70 ريال مع التركيب


الموضوع جداً بسيط لاتشيل هم والله يخليلك الوالده ويرزقك برها


اتمنى اني افدتك واذا حبيت تتصل علي واشرحلك اياه انا حاضر


أخوك أحمد

[VIP-503]

الله يجعلك بار بامك والشباب ان شاء الله يفيدونك لان انا مالي خبرة بالفوووورد لك احترامي

[binmegrin]

:c بسم الله الرحمن الرحيم :lr
اللهم يا كريم يا عليم ترزق كل من رد وجاوب على مشكلة موتري ومن قرا ئها وتجاوب معي اللهم وفقهم لما تحب وترضى ويسر لهم امرورهم يا حي يا قيوم
وأخص بالشرك والعرفان للاخوة الاعزاء
عبدالحمن 1980
ابن الحاره
ابو سلطان 1234
محمد ال مغيره
دربيل_999
moooj
البدوي الفاهم
أحمد413
vip-503
تحياتي الحاره للجميع ولهذا المنتدى الرائع
واقول ( اذا عندك مشاكل ومعضلااااات مالك إلا منتدى مكشاااااات )
والسلام عليكم ورحمة الله وبركاته