مشوار حايل نقص الزيت فيه

[عاشق التوام]

السلام عليكم ورحمة الله وبركاته – مساكم الله بالخير جميع عندي باترول ربع 97 سلق ومشيت عليه داخل جده مشاوير قريبه والمشاوير ماتعدت ال3000 كيلو ولانقصت عن 2500 كيلو بشكل تقريبي لأن العداد واقف وماعرفت حساب الكيلو بالضبط واليومين اللي راحت رحت مشوار لحايل وقبل لا أطلع لحايل غيرت الزيت 7 علب بدون سيفون ومشواري لحايل روحه ورجعه 2000 كيلو تقريباً الزبده مشاويري داخل وحول جده مانقص فيها زيت المكينه مع العلم إني رحت عليها رابغ 400 كيلو روحه ورجعة و الشعيبه 200 كيلو روحه ورجعه ومشوار حايل نقص الزيت فيه يوم رجعت نص علبه تقريباً وعلى هذا أرجو من أصحاب الخبره في هذي المشكله لايبخلون ويعلموني وش السبب وأيضاً كيفية الإصلاح الله يعطيكم العافيه.

[ابوفارس999]

نقص نص علبه طبيعي بس ليكون زود

والله اعلم

[برايدوي عنيد]

هلابك اخوووي .......

المسافه الطويله له دوره والسرعه بعد .

لكن هل انت متاكد من الزيت وعياره قبل ماتروح لحاايل بعد التغيير

والحين ترى الزيت مو زي اووول ( صار خفيف )

ولاتقدر تحكم على السياره بمشوار واحد .

تقبل مروري ...................

[عاشق التوام]

نقص نص علبه طبيعي بس ليكون زود

والله اعلم

أخوي أبو فارس الله يعطيك العافيه طيب إذا كان النقص أكثر من النص يعني علبه مثلاً

[عاشق التوام]

هلابك اخوووي .......

المسافه الطويله له دوره والسرعه بعد .

لكن هل انت متاكد من الزيت وعياره قبل ماتروح لحاايل بعد التغيير

والحين ترى الزيت مو زي اووول ( صار خفيف )

ولاتقدر تحكم على السياره بمشوار واحد .

تقبل مروري ...................

أخوي البريداوي يعطيك العافيه ولكن الزيت مشيكه قبل ماطلع وعياره مافيه نقص والنقص بين معاي في حايل وأنا مغير الزيت بجده ورجعت على الزيت نفسه بدون مازيده من حايل لجده والنقص هو هو مازاد ولا نقص ونوع الزيت العلبه البلاستيك السودا على ماعتقد إنه (فوكس) سوبر جي تي 20/50

[MR.MOHAMMED]

هو احد امرين


اما انك مسرع


او مكينتك مشنبره واذا تبي تتأكد هل هل مشنبره ولا لا خل واحد يشغل سيارتك وطالع انت بالشمكان وقل له يدوس بنزين ان كان طلع دخان ابيض فمكينتك مشنبره


مع اني اتوقع انك كنت مسرع

[sarab88]

اخوووي نقص الزيت بالمسافات الطويله عادي حتى ولو كان معك موتر جديد واحد من ربعي معه موتر جديد وراعي خطوط طويله ينقص الزيت وشكلك انت راعي سرعه وتقبلووووووووا مروري

[عاشق التوام]

الله يعطيك العافيه يامستر محمد إذا على الدخان الأبيض الحمدلله ماحصل إني شفته من قبل مع إن الطريقه اللي ذكرتها كل ماجا مشوار بشكل تقريبي أسويها وأشيك عليها بالكامل أما السرعه أعتقد إني في الروحه أسرعت ولكن كم مادري لأن العداد مايشتغل أما الرجعه السرعه ماأعرفها من يوم مادريت إن الموتر نقص زيته صرت أمشي على هون والزيت نقص في الروحه والرجعه مانقص فيها شي.

[عاشق التوام]

أخوي سراب مشكور على المرور والسرعة كانت في الروحه بشكل تقريبي 160

[برايدوي عنيد]

هلابك اخوووي.........

انت تقول ياعزيزي نقص بالروحه لحايل وكنت مسرع يعني اما بالرجعه والنقص مازاد

والسرعه عااديه ممكن 120 كم /ساعه .

والموتر مابه دخاان ابيض

يعني ان شاء الله النقص طبيعي ووماعليك من مشوار مره وحده

والله يطعمك خيره ويكفيك شره ويتمم عليك .

تقبل مروري ................

[عاشق التوام]

يعني إن شاء الله المكينه مافيها شي والنقص على حد الردود يعتبر طبيعي على العموم مشكور أخوي بريداوي أنت وباقي الإخوان اللي ماقصروا بالرد والآن الواحد يرتاح لأن كان معاي قبله أخوه العود موديل 91 غيرت له ثلاث مكاين والمكينه الثالثه مشنبره وطلعلي النخل براسي والثمر بعد لكن مادام أنتم وأمثالكم موجودين بمنتدانا الغالي الواحد ماهو ضايع بين الورش مع موتره وتفاعلكم بيخليني أسأل سؤال ثاني لكن بموضوع ثاني إن شاء الله. وترقبوا جديدي من الخرابات ههههههه.

[عسل مول]

النقص عاديكثير من اليارات تنقص الله يكون بالعون