أبي رأيكم يا أهل مكشات ،، حنا عندنا سالفة ولا ماعندنا في طلعتنا للصمان ؟

[التاج الذهبي]

السلام عليكم كل واحدن باسمه :burnout2:

ابيكم يا اخواني المكشاتيين تعلموني انا وأخويياي اللي كشتنا ذا الأسبوع في الصمان على سنع ولا ماعندنا سالفة ؟ :rolleyes:

ابقولكم سالفتنا /


حنا قررنا نروح للصمان يوم الاربعاء الماضي يوم 13 صفر اللي حنا فيه

طلعنا من الرياض واتجهنا على طريق المجمعة القديم الين جانا مفرق الطوقي وحفر العتش رحنا معه ومرينا على الطوقي واتجهنا للتنهات ،

جانا الدوار الأول واستمرينا وتعديناه وجانا الدوار الثاني واللوحات تقول الصمان يمين ولفينا من عنده يمين كنا طالعين من الرياض الساعة ثلاث العصر وصلنا تقريباً قبل الرفيعة ب 15 أو 18 كيلو الساعة 6 المغرب


معنا جهاز قارمن وحددنا احداثية خبرا البخراء قلنا نروح لمها لأن كثيرين من الاخوان في ذا المنتدى يمدحونها :rolleyes:


الجهاز يقولنا ان المسافة الى خبراء البخراء 27 ميــل !

سمينا بالله وتوكلنا مع نفس اتجاه سهم قارمن .

مرينا بثلاث فياض تقريباً ثنتين منها محوطة بمواصير عشان السيارات ماتدخلها

بس تدرون كم جلسنا نمشي في البر ؟

ثلاث ساعات ونص الين وصلناها ! :confused:


تكسرت ظهورنا من ذا المطبات والبطانيج الين وصلنا لخبرا البخرا


لكن حنا قبل نشق البر صفرنا عداد كيلو السيارة وحسبناها بكيلو السيارة قلنا بنقارنه مه المسافة اللي يعطينياها قارمن لقيناها 60 كيلو بالضبط من المزفلت الى خبرا البخرا


حنا كنا ستة وجلسنا بعد ما وصلنا نسولف هو حنا على سالفة في طريقنا ولا فيه طريق اخصر منه ؟


قلت اخواني المكشاتيين في ذا المنتدى الروعة يساعدونا في المعلومات لأن فيهم خبراء ماشاء الله في الصمان مب مثلنا ندربيها ولا ندري وش السالفه :D




لا تبخلون علينا في المشورة يا اخوان لأن ان شاء الله هذي مب طلعتنا الأخيرة بس قبل لا أنسى بقولكم حاجة /



والله يا خبرا البخراء شششششششششششششششششي مب معقول :looney:

قسم بالله جنة الله في الأرض خضرة وهدوء بس يبيلها اجازة اسبوع تبشك فيها وتنسى همومك :good: مايكفيها خميس وجمعة صراحة .




هلا :dance:

[الجيب الربع]

أخي التاج الذهبي

أقرب أو أسهل طريق للبخراء هو ردمية ويسمى درب الصبيات وهو قبل أن تصل الرفيعة على اليسار ردمية ومعلمة بصبات بيضاء واذا أردت المسفلت فاتجه من الرفيعة الى اللهابه ثم أدخل الأحداثية واتجه غرب حوالي 30 كيلومتر

تحياتي

[Waleed1]

السلام عليكم

يالربع طلعنا الاسبوع الفايت للصمان من القرية العليا وطختة اللفريدة واللهابة وعلى طول الى مزهرة وحقيقة أنصدمت صدمة عجيبة وقلت سبحان اللة يغير اللة من حال الى حال أنا مارة العام كانت فعلاً مزهرة وشذية بالزهور والريحة الحلوة لاكن سبحان اللة السنة مافيها الا كمخة ورحنا الى البخرة ماهى الى ذيك الدرجة وعلى طول لحسنا وشكرنا اللة حسنا روعة أكثر من العام والصمان يكسوة الصمع ومع العصر ترى الهواء العليل يموج بالصمع عموماً شباب روضة حسنا السبق وبس

والسلام

[راجع276]

.


والله شي جميل اخوي التاج الذهبي

وان شاء الله الخميس هذا انا ماشي
بس بيني وبينكم يا اخوان هل فيه وقت والا الربيع الي في الروضه يبي ينتهي

يعني توها زينه ويمدينا عليها الخميس الجاي والا لا

المقصود هنا روضة البخراء

ارجوكم




.

[راجع276]

.


اخوي Waleed1
لو سمحت احداثيات حسنا






.

[الســـاري]

هلاا اخوي التاج الذهبي
جهاز القارمن اللي معكم وحدة القياس بالميل .. و27 ميل تساوي 45 كم
ادخل على الاعدادات وغير وحدة القياس للكيلومتر
واذا بغيت الطريق الاكثر اختصار فاتبع كلام اخونا الجيب الربع ..رح للهابه ومن هناك افرق للبخرا
المهم انكم انبسطتوا والله يوفقكم

[علي الشهري]

تفضل أخوي :راجع276 هذي إحداثيات حسناء السبق

شمال 050-11-27
شرق818-24-46

[ابو سمر]

الأخ التاج الذهبي

عندما تسير بسرعة 45 كم في الساعة ، حسب عداد السيارة ، معنى ذلك ستحتاج لساعة واحدة ، لتقطع 45 كم على الأرض ، أضف إلى ذلك ، التوقف عند المطبات والتهدئة ، و هذا سيتطلب منك حوالي ربع إلى نصف ساعة إضافية .

وبالمناسبة قضيت ليلة الخميس الفائت في روضة البخراء ، يمكن بالقرب منكم ، وكانت روضة جميلة .

[الراحل]

رلنتؤيقفاتةقغاىءيلالاءيىتائسيقفالا

[الراحل]

السلام عليكم ورحمة الله وبركاته