مانستغني عن نصايحكم يأهل الجيوب وبالأخص باتروول

[حرباش]

السلام عليكم
اخواني الإعزاء
انا مقدم على شراء سياره باترول 2005 ان شاء لله واريد آخذ بعض نصايحكم بالنسبه للآتي
1- كفرات البالون ( ماهو علاج الرجه )
2- اجهزه تحديد المواقع
3- اجهزه الإتصال الاسلكيه
4- اهم الأدوات التي يجب توفرها في سياره الدفع الرباعي
5- بعض النصائح التي يجهلها المستخدم الجديد والتي تتعلق بسيارات باترول والتي اكتسبها اصحابها من خبره الإستخدام من ناحيه الأشياء التي تحتاج مراعاه وصيانه مستمره

وزي ماقلتلكم ياشباب لاحد يبخل علينا بأي معلومه يعرفها وكل على حسب خبرته في النقاط الي سبق طرحها
ونأسف على الإطاله
تقبلو تحياتي اخوكم حرباش :)

[عاشق الحماد]

اخي حرباش\

بالنسبة للكفرات البالون لاادري

اما جهاز تحديد المواقع عليك بقارمن بلس ثري

اما جهاز الندا عليك ب الايكوم الفين ومية

بالنسبة للوازم السيارة والبر خصوصا اهم شي عدة البنشر ومنفاخ الهوا والاضاءة-لمبة كبس


وسلامتك\يمكن فية اشياء وانواع اخرى يفيدونك الشباب

[حرباش]

بيض الله وجهك اخوي عاشق الحماد وماقصرت

[الشوق]

أخي الكريم الله يوفقك وأحسنت الاختيار

صدق صقر الصحراء موتر ماعليه كلام أبد


أما بالنسبه لكفرات البالون فنصيحه من أخو لك لا تقربها أبد
الا اذا بغيت تطلع للبر أما عشان التشخيص فوالله انها بتعدم موترك وحرام وهو جديد تخلي الكفرات تلعب فيه

لأنها اولا تسبب رجه
ثانيا ثقيله جدا على الموتر وتتعب الدفرنس
ثالثا تعدم الفرامل وتطول مسافة التوقف وتزحلق بالموتر

ثم ان السفاري اصلا بالكفرات العاديه اذا نسمت له يطلع مجنون بالبر حتى بدون دبل


وأهم شيء أول ماتطلعه على طول للغرابي لبس الارضيه بلاستيك كامل

ويبي لك ماطور هواء وواير سحب قوي
والعفريته الي تنشبك في الشكمان تراها مفيده بالبر


وأهم شيء الصيانه الدوريه للموتر

والله يعطيك خيره ويكفيك شره مقدما

واسف على الاطاله

[حرباش]

اخوي الشوق الله يجزاك خير وماقصرت ونصيحه طيبه من انسان طيب
شاكر لك اخوي الشوق

[طحنون]

هلابك اخوي حرباش
على البركه انشاء الله
بس ونا اخوك عندي وجه نظر
لاتأخذ قير تماتيك اذا انك تروح للبر بصفه يوميه اواسبوعيه خذ القير العادي افضل
مع ان القيرالتماتيك ممتاز تربونيك يعني تماتيك وعادي بنفس الوقت
ولاتبعد عن رقم 2 سفاري 2
والله الله بالصيانه والتربيط المستمروتشييك ضغط الكفرات بشكل اسبوعي
والبالون لاتقربه مثل ماقالوالشباب
أسف على الاطاله

[اسيزو 4x4]

الله يبارلك ياخوي حرباش

احسنت الاختيار الباترول موتر برويعتمد عليه

وزي ماقالو الاخوان الكفرات البالون تلعب بالسياره لعب

واهم شي الصيانه الدوريه للموتر

ومن ثم التنجيد الداخلي الكامل(تنجيد الارضيه - وتلبيس الطبلون والدركسون)

ونش -توانك ماء-اجهزه ملاحه -شبك لتحميل اغراضك فوق التنده -اكباس هيلا الالمانيه - ماطور هواء -والله الله بالقير العادي

اخوي الغالي الله يبارلك مقدما ويعطيك خير هالموتر ويكفاك شره

تحياتي لك

اخوك ابوحمود

[حرباش]

اخوي طحنون ماقصرت يالغالي وهي النيه ان شالله سفاري 2 اما التوماتيك الله ماعطاني حبه
والاخ اسيزو ماقصرت وبالنسبه لكبوس هيلا هذي اول مره اسمعبها ودي تعطيني فكره عنها هل هي من الانواع اللي تتثبت امام السياره او الكبوس اليدويه

ماقصرتو وبيض الله وجيهكم

[صقر]

مبروك مقدما واحسنت الإختبار ... فهذه السيارة هي ( في نظري ) سيارة البر

وممكن أفيدك من خلال تجاربي مع هذه السيارة

كفرات البالون : أنا اختلف مع الاخوان ... فهي كفرات مخصصة للبر ومميزاتها هي :
- تخفف المطبات بنسبة 30% وتمتص الصدمات بشكل ملموس.
- هذه الكفرات مصنوعة للحماية من الحصى والتشقق فالحصى ينزلق من تحتها ويجنبها التشقق.
- عريضة بشكل يساعد في القيادة في المناطق الرملية .

عيوبها : قصر عمرها ... فعمرها الافتراضي يصل الى 6 شهور فقط مع الاستعمال الكثير وتتراوح نسبة العمر لهذه الكفرات من 6 الى 12 شهرا كحد أقصى.

ثقيلة عندما يكون الهواء خفيف وتبطيء من سير السيارة ... لذا يجب ملؤها بالهواء في المدن والطرق السريعة.

============

أنا مركب تانكي ماء بشكل عرضي خلف المرتبة الخلفية يتسع لـ 130 لتر ويعبأ من الداخل ويكفي لرحلة عمرها ثلاثة أيام لشخصين

التجهيزات الاخرى المهمة

قارمن 276 وهو احسن الموجود في أسواق العالم
آيكوم جهاز اتصال رائع ويعمر طويلا ومعقول من حيث المسافة
ماطور هواء ( camel) وهو من أفضل المواطير وسعره معقول جدا.

هناك تلبيسة للقير فيها حوالي ثمانية مخابيء ومهمة لهذه السيارة.

[ساكن البراري]

السلام عليكم أخوي
أولا حبيت أقول لك الله يعطيك خيره ويكفيك شره

أخوي مسألة التربيط إحذر أنك تربط السيارة في كل رحلة أو كل ما طلعت للبر لأن التربيط المستمر يسبب إنحلال المسامير وبالحالة هذي تضطر أنك تربط السيارة كل شهر سواء طلعت للبر أو لا

أخوي بالنسبه لتوانك المويه أنا ما تعجبني فكرة التوانك الثابته لأنها عرضه للصدأ أما إذا كنت تميل إليها فأفضل شيء أنك تركب توانك ستيل لأنها أقل عرضه للتلوث مع مرور الوقت

بالنسبه للكفرات البلون ما أرجحها لأنها قد أنفقع علي أثنين في طرق جبليه وبعدين الوكالة حقيقة كفراتها ممتازة وتتحمل والدليل إني رجعت لها ويقول المثل: قديمك نديمك ولو جديدك أغناك

وأعذرنا على الإطالة :burnout2:

وأتمنى لك رحلات موفقة

[حرباش]

اخوي صقر سوبر مشرف
<<<<<<< خاف يوم شاف اسمك خخخخخخخخخخخخخخخخخخخخخخخخ
يعطيك العافيه اخوي صقر على هذه المعلومات القيمه صراحه وفكره التانكي فكره حلوه وزي ماقال الاخ ساكن البراري يفضل انه يكون استيل
والأخ ساكن البراري عطيتنا فكره حلوه بشأن التربيط ونورتنا الله يزيدك نور ان شالله ويعطيك العافيه

بالنسبه لكفرات البالون
انا اكثر رحلاتي تكون في مناطق رمليه واعجبتني فكره حلوه يقوم بها بعض الشباب وهي كالتالي :-
يقوم بشراء طقم جنوط اضافي ويركب عليه كفرات البالون ، وغالبا مايكون هذا الجنط من نوع استرالي ومتعارف عليه بسم الجنط الإسترالي ، وهذا الجنط خفيف جدا وله طاقه تحمل حلوه.
فلمن يصير طالع البر يركب الجنط الأسترالي عليه ويخليه في المشاوير البسيطه واذا كان عنده مشوار بعيد او مسافات طويله ركب جنط الوكاله وعليه الكفر الي يجي شد بلاد .
البعض يقول هذي شغله مالها اول ولا آخر لكن اللي اشوف ان البر له اوقات وفكره الشباب 100 على ميه 100 من وهجه نظري ولا ادري عن وجهه نظر الآخرين يعطيكم العافيه ونأسف على الإطاله

[ابو هشام]

الباترول مايحتجله كفرات بلون عشان التغريز او المطبات. حط الهواء على 20 وانطلق بسرعة 100 الى 120 في اي مطبات واي تغريز.

له معاي 6 سنوات ما قد خيبني في اي شيء سوى ان حديده خفيف.

[حرباش]

مشكووور اخوي ابو هشام على النصيحه وبيض الله وجهك

[اسيزو 4x4]

الغالي حرباش

كشافات هيلا تركب على الصدام وهي من نوع ألماني ممتازة جدا للنفود وقت الليل

ميزتها تجي سخيفة من الجنب

وقوية وتستحمل

ولا تحترق شمعاتها بسرعة

ويمكن تركيب شمعات زينون عليها

وتوجد عند بعض محلات الزينة

وأي أستفسار أنا تحت أمرك يالنشمي

وأسف على تأخري بالرد

[محب الشمال]

اخوي حرباش الله يعطيك خيره ويكفيك شره
الباترول سياره ما شاء الله قويه وتستحمل كان عندي واحد موديل 97 ورحت في الصمان والبران والثمامه وطمرت عشرين رصيف وكرفته كرف ماهو طبيعي ولا عمري رصصته ابداً ابداً
بالنسبه للتجهيزات في اعتقادي والله اعلم ...
تانكي ماء ( المويه اهم شي في الرحلات وغير الرحلات )
تانكي بنزي احتياط
منفاخ هواء نوعيه ممتازه وكفر سبير ثاني احتياط اذا امكن او انه يكون معك عده رقع
قارمن وكنود
بالنسبه للكنود انا كنت مركب واحد في الباترول عندي بس بطريقه حلوه كان مخفي يعني كان عندي فتحة بسقف الجيب من الخلف خليت العامل يركب قاعده الاريل عن طريقها ويمد الاسلاك من تحتت الفرشه والبلاستيك الي على ارضيه الباب لين عند الطبلون وخليته يشبك الكهرباء من البطاريه ويدخلها من الكبوت على الطلبون مباشره عشان تصير مخفيه الاسلاك ويصير المنظر احلى طبعاً عطيت العامل خمسين ريال عشان يسوي لي هالحركه هذي وانا سويتها عند شمالات في المرسلات
واذا طلعت للبر ونويت تروح مكانات بعيده لازم والافضل بعد توفيق الله انه يكون معك كمية من التمر والماء الوافر من باب الاحتياظ عشان لا سمح الله تتعطل معك السياره او يخرب معك جهاز
اسأل الله أن يحفظك ويعافيك ويسهل لك طريقك دوماً وابداً ويستر عليك ويوفقك
وسامحني على الاطاله

[الجاهز]

الاخ حربااااش الغالي ... والله انا ما عندي اضافات الاخوان ما قصروا .... ولولا اختلاف الاذواق لبارت السلع وكلن وتجاربه والمطلوب اننا نطلع بالفايدة للجميع .. ولاكن انا لي رأي شخصي بحت وهو ان تجهيز السيارة بكل التجهيزات اللي ذكروها الاخوان راح يخلي السيارة كنها سيارات المغامرات اللي في السباقات العاليمة ( شد علوي وتوانك ما وونش وكشافات وماطور هوا ودعامه و.و.و ..يووووه سالفة الف ليلة وليلة) تخيل شكل السيارة بعد اضافة كل هالزوائد .. هذا غير ان الباترول ما يحتاج كل الاضافات اللي ذكروها الاخوان او على الاقل اكثرها ليس بالضروري جدا .. وفي صورة اخرى تخيل شكل السيارة بشكلها الطبيعي بدون اضافات كثيرة وقارن بين الصورتين ..
انا ارى انك توفقت ان شاء الله في اختيار السيارة الممتازة فالباترول كنج في الصحاري والمدن ومميزات الشد بلد ممتازة وتقدر تروح بالسيارة لأي منطقة مهما كانت وعورتها بالكفرات الاصلية والمميزات الاصلية المتوفرة في السيارة مادامت دفع رباعي فقط عليك بماطور هواء فقط... وباقي الاغراض تقدرها في كل رحلة حسب الحاجة والسيارة واسعة وتقدر تاخد اللي تبي .....وقلل العفش !!!!


وسلامتكم والاخوان ..

[حرباش]

أخوي الأسيزو يعطيك العافيه يالغالي على هذه الإفاده الحلوه وماقصرت ولازم نشوف الكبوس ذي
========
اخوي محب الشمال حركه التسليك المخفي مهمه جدا للمنظر وبرضه لسلامه الأسلاك وسهوله التركيب
ويعطيك الف عافيه على هذه النصائح القيمه حقيقه
========

والصراحه اسرني كثيرا انضمامي لهذا المنتدى للتعرف على رجال شروى من رد على هذا الموضوع والذين قامو بإفادتي بالكثير الكثير من تجاربهم وافكارهم ولا يهونون البقيه طبعا وان شالله تروني دائما على استمرار معكم ولكم تحياتي

[الطعس الذهبي]

انت جازم تشري باترول يمدحون الباثفيندر 2006 يقولون بيطلع قوي ثنين من الربع ينتظرونه

[أبو سعـــد]

نصيحتي لك


معروف ان النيسان يتكسر على طول ويبيله كل شوي تشديد

اذا تبي تطلع للبر ركب البالون او وقت الشتاء والطلعات وفلة الحجاج ركبهن ولا جا الصيف فكهن لانهن يمسحن ويعدمن النيسان على ما قريت من احد اخواني الاعضاء


تحياتي

[المرنقط]

اولا الله يعطيك من خيرها ويكفيك من شرها

ثانيا - اشوف الشباب مشددين على نقطتين الا وهما ( كفرات البالون - وتربيط الموتر )
ياخوي انا معي باترول 2001 والحمدلله ما باقي مكان ما رحت لة والحمد لله من ناحية التفكك والتربيط ما احتجت لها ابدا لانة سمعة اكتسبها الباترول في الموديلات القديمة من 97 وتحت
اما الجديد فما اشوف منها شي ابد ولله الحمد وعندنا باترول 98 ماشي فوق 300 والحمدلله ما تسمع لهة شي
بس اهم ماعليك الصيانة للموتر

اما بالنسبة للبالون فهي رجة وثقل على الموتر واذا كان على النفود ترى التنسيم على كفرات الوكالة البرجستون او الدنلوب احسن من البالون لان البالون سريع الفصخ من الجنط ومتعب تفخة

اما بالنسبة للاجهزة الاسلكي فعندك 2100 يكد ويمد و الياسو بعد

واحرص على التلبيسة الخلفية ( الشنطة ) في الغرابي تحمي لك الديكورات وانصحك تحطها قبل ما تحمل اي شي اسال مجرب

وسلامتك يا الغالي

[اسيزو 4x4]

انا مع المرنقط

الباترول الجديد ما يتفكك أبد

صح القديم من 97 وأنت نازل يتهربد ويتفكك مع الاستعمال الأقشر

لا كن 98 و 99 و2000 و2001 الى 2005 متين ولا يحتاجلة تربيط كل شوي !!

.

[محب الشمال]

اخوي حرباش انا ذكرت في ردي الاول اني ما رصصت الباترول ولا مره
لا اقصد ولا مره ربطت الباترول على كثر الكرف الي كرفته
بس كلام الناس عن تربيط الباترول وحده من ثنتين يا اما
انه فيه ناس مطلعين هذي اشاعه من زمان او انه هربد مع واحد وصار هذا الشي على عموم الباترول
او انه فعلا يحتاج تربيط بس الموديلات القديمة

اسال الله انه يعطيك خيره ويكفيك شره

[ماجد الشمري]

اخوي حرباش ...
السيارة ما تحتاج مدح وذم لأنها الاقوى والافضل ...
وانا انصحك انك ترش السيارة قار من تحت عشان تمنع الصدا وتخفف صوت الشارع ...
وبما انك راح تركب اجهزة كهربائية على السيارة فأنا انصحك بـ Grounding Kit عشان يعزز الدائرة الكهربائية عندك ويزيد عزم السيارة ...
لا تبالغ بتركيب الاشياء الظاهرة على جسم السيارة ويكفيك زينون عالي وواطي بالبر .. وماتحتاج كشافات تحطهن فوق ...
ونصيحة اذا جيت تركب ماطور هوا لاتركب الا افضل نوع حتى لو كان غالي عشان ماتندم بعدين ويصير شغلك ماشي صح ....
اهم شي تليين السيارة وهي جديدة لازم يكون على خفيف وما تضغط على الموتر ولاتشغل الدفع الرباعي بأول 1000 كيلو ...
انصحك بالتيبترونيك لأنه مريح بالبر وينفعك بالتطعيس لأنك احيانا تبي ترد من الثاني للاول ومع المناقز ما تقدر تضغط الكلتش بسرعة لكن التيبترونيك يرد بسرعة وبدون تعب وما يسبب انقطاع للعزم مفاجئ ...
والله يعطيك خيرها ويكفيك شرها ...






اخوكم ماجد الشمري