لاندكروزر Vxr 2001 لمبة الكبروسور تشر !!!

[kaaaatm]

بسم الله الرحمن الرحيم


لاندكروزر VXR 2001 لمبة الكبروسور تشر !!


وش الحل يا شباب

أول ما يشتغل المكيف ما عندك أي مشكلة

بس لمى يطول شوي فجأة تبدى اللمبة حقة الفريون تشر!!!

[الوسم]

طيب !!! ممكن تصورها علشان نشوف لمبة هالكومبريسور وشلون شكلها ؟؟؟

[مراسل وراط]

يظهرلي لازم تغييرالكمبرسور لان في حساس الكتروني اذا خرب لازم يغير الكمبرسور

[kaaaatm]

يا شباب سألت أحد الزملاء وقال الإتماتيك بس هل له علاقة؟

[ستار سات]

نفس المشكلة عندي ... معي فكسار 98 أول ما اشغل المكيف يكون بارد .. وبعد ربع ساعة يبدأ الهواء يسخن وتبدأ لمبة زر المكيف تشر (تومض) ... أريد تشخيص المشكلة مشكورين .

[التاكسي]

شيك علي الفريون تلقاه ناقص

[kaaaatm]

يا شباب الفريون ماليان وإلا الآن ما لقيت الحل...

ورحت لم واحد وقال لا تغير الكومبروسور لأنه ما فيه أي مشكلة ...

[ذري1000]

انا مرة حصل لي تقريبا نفس الشئ (عدا عدم وجود اللمبة اللي تقول)بس على كرسيدا رحت لفني تكييف وفصل حاجة كهربائية سلك طوله تقريبا 12 سم في طرفه قطعة سوداء (ماني متأكد لطول المدة) جنب الكمبرسر وقال ما تأثر على الكمبرسر (التغيير كان في ثواني)
قيمة التصليح 15 ريال ورجعت البرودة زي أول بس الظاهر انه ما كان يفصل لكن طول معي على هالحالة لين بعت السيارة

[ARB]

هذا حساس ففوق الكمبرسر يغير الحساس و يرجع زي الحلاوة

[الطا مس]

حسب خبرتي المتواضعه انه العطل في بلف الثلاجه حقت المكيف لانه مايدوور الفريوون زين ويحتر الكمبرسر ويفصل وتشر اللمبه ولا عاد يبرد الين تطفي المكيف فتره الين يبرد وبعدين تشغله يرجع يبرد زي الحلاوه واذا احتر يفصل وتشر اللمبه

[أبوحمييد]

تأكد من سير المكيف يمكن فيه مشكله اذا كانه خربان ولا يبيله شد...

[سلطان 997]

تاكد اخوي من كلتش الكمبروسر

[kaaaatm]

انا مرة حصل لي تقريبا نفس الشئ (عدا عدم وجود اللمبة اللي تقول)بس على كرسيدا رحت لفني تكييف وفصل حاجة كهربائية سلك طوله تقريبا 12 سم في طرفه قطعة سوداء (ماني متأكد لطول المدة) جنب الكمبرسر وقال ما تأثر على الكمبرسر (التغيير كان في ثواني)
قيمة التصليح 15 ريال ورجعت البرودة زي أول بس الظاهر انه ما كان يفصل لكن طول معي على هالحالة لين بعت السيارة


واحد م الزملاء صار له نفس الشيء وقال ان السالفة صارت كهرب ....


شكلي بمر كهربائي وشوف

[البرق 2009]

نفس المشكله معي بيوكن وغيرت الكمبرشر وماكو فايده
ذبحني والله لمبة التشغيل تفصل وتشتغل

[kaaaatm]

المشكلة موجودة إلى الآن

[البرق 2009]

الله يعينك اذا لقيت الحل قلي لاتبخل على نفس المشكله عندي بيوكن

[ستار سات]

المشكلة انحلت عندي _ولله الحمد_ وكان الحل : تنظيف (اديتر المكيف) وتنظيف (أنابيب المكيف) وكان (بلف المكيف) فيه مشكله وصلحناه بدون تغيير . . . . . فكسار 98 . . . وسلامتكم .

[kaaaatm]

ياشباب المشلكة إلى الآن موجوده

لا وبعد هذه الايام صاير كأنه صحراوي

[؟؟؟شادي نجد؟؟]

السلام عليكم ورحمة الله وبركاته

اخوي مكيف الجيب معقد جدا والله يعينك عليه

اولا نظف الثلاجه الخلفية وهي بالجهه اليمنى اذا فكيت الشنه تحت القزازه اليمنى

وحاول تغير الفريون مره ثانية يمكن منها وتأكد من الفريون الاصلي الامريكي وقمته 120 ريال تقريبا

وتأكد من الحساسات حقت المكيف والثلاجه

هي عادة اللي تخرب باللاند

انا معي لاندكروزر بهذلني من المكيف واخرتها وانا اخوك لقيت المشكلة بالثلاجه وحساساتها هي اللي تقفل وتكتم المكيف

وحاول تلحق الثلاجه قبل لا تعدم عليك الكمبرسر لأنه لو احرت واجد خرب عليك وبلشت بلشه تكلف اكثر من 3000 ريال فأحرص انك تسويه حاليا وتقلل استخدام المكيف الفتره هذي

هذا والله اعلم

[سوبر VTC]

صارت المشكلة لهايلوكس م2006
و هي انه بعد اشتغل المكيف و بعد ما يثلج
يفصل على الرغم ان لمبة المكيف والعة لكن الكمبرسور فاصل
و راح لورشة ثقة ببريدة
و صار الخلل من بكرة السير خربانه تحتاج وزن مثل الكلتش
او تغير الكلتش ب700ريال
طبعا قبل الاصلاح كل يوم تشغله ربع ساعة بعدها يفصل نهائيا و اللمبة والعة و مايشتغل او مايشبك الا من بكرا

نقطة اخرى

سالت كهربائي ثقة عن مشكلتك
يقول لازم تسوي غسيل كامل للمكيف بواسطة غسيل خاص دبة برتقالية رقم11 + غسيل تنر + تنفيخ المواصير بالهواء
بعده
تحط فريون اصلي 134 امريكي + زيت فريون اصلي من تويوتا تقريبا ب80ريال علبة كبر الفنجال مرتين
+ تغيير الفلتر الابيض حق اديتر المكيف ب130ريال
وا بشر بمكيف ثلوج و تدعي لي

لو كان كلتش الكمبرسور خربان فسعره تقريبا ب200 و زود


اعانك الله

[ملوسن]

ياجماعة أنا عندي نفس المشكلة ..

الكمبرسور يحتر ( يسخن ) وبعدين يفصل وتبدأ اللمبة تأشر ..

رحت لحقين التكييف ، واحد قال لي بـ 1200 ، مع فك الثلاجات وتنظيفها وبـ 800 ، بدون فك الثلاجات ، وبدون ضمان بعد ، والغسيل عليه والفريون عليه..

والثاني قال بـ 800 بدون فك الثلاجات ، ومع الضمان ( أسبوعين ) والغسيل عليه والفريون عليه .

والثالث إللي لحس مخي ، قال بـ 400 ريال ، والغسيل عليه والفريون عليه ، وبضمان أسبوع الظاهر ..

وش رايكم في الأسعار ، ياليت إللي قد صلح هالشغلة يعلمنا كم كلفت عليه ..

وجزاكم الله خير ...

السيارة VXR 98

[kaaaatm]

والثالث إللي لحس مخي ، قال بـ 400 ريال ، والغسيل عليه والفريون عليه ، وبضمان أسبوع الظاهر ..

وش رايكم في الأسعار ، ياليت إللي قد صلح هالشغلة يعلمنا كم كلفت عليه ..

وجزاكم الله خير ...

السيارة VXR 98

بصراحة رأي حلو مررررررررررره

وانا رحت لواحد قال بـ 400 ريال

مع الفريون وراح أغير لك فلت اللي في القارورة اللي عند الرديتر

وإن شاء الله يضبط معك

[ملوسن]

سويت غسيل للمواصير ، بالدبة البرتقالية 11 ، وشيكت على البلف الأمامي ومافيه مشكلة ، ثم عبيت فريون ، ولا زالت المشكلة موجودة ..


شكلي بوديه للجابري ،

[قمري قيال]

اخوي هذا على ما اعتقد الكمبيوتر فلا تخاف من سالفه الكمبيوتر
افصل اصبع البطاريه اكثر من ثلاث ساعات وشف ان ماضبط خل كهربائى يفحص الاسلاك حتى اللي بالطبلون
وان مانفع الله يعينك
رح للوكاله او اي واحد يبرمجه لك
وترى فيه من يقولك غير كمبيوتر فلا تغيره برمجه وان مانفع فيه حل جذري للمشكله مسويه بكامري
بس حسوفه على الجيب تسويه فيه وما ابي اذكره علشان ما احوسك وفلا تغير شي غالي من كمبرسر وغيره قبل ماترد
على اللي قلتلك وترى الحل هذا مو مكلف

[ابو خالد 1992]

وجهة نظري انك ما تشغيل المكيف إلى بعد ماتعرف المشكلة قبل لا يجيم عليك الكمبروسر وتاكد اخر مرة عبيت فيها الفريون هل هو اصلي و لا صيني وبدا بالأسهل سير المكيف وفلتر إذا فيه و الثلاجة وتاكد من نفس الجرم اليصير ملتف عليه سلك او سيخ نظف مجاري المكيف كاملة . وعطنى خبر و ش يصير معك

[العنقري]

اذا كان يفصل المكيف على طول بالنسبه لليوكن فشيك غلى مرواح السياره اما بالنسبه للجيب فهناك بلف فى الرفرف الامامى الايسر بجانب علبة الفرامل فيه فيش كهرب شيك علبه دائم يخرب يالجيب

[ستار سات]

وش صار على المكيف يالكاتم ؟

[ملوسن]

المشكلة موجودة عندي ، والمشكلة لها عدة أسباب ، مهوب سبب واحد ..

أنا سويت نفس إللي سويته من تنظيف وتغيير الفلتر ، ولكن ما انحلت المشكلة .

وهالحين له 5 أيام عند الجابري ، لقوا المواصير متسددة إلييين قالت بس ، لأن راعي الموتر قبلي يعبي فريون صيني ، حسبي الله على هالفريون ، دمر المكيف ودمر الكمبرسور والبلوف والثلاجات ، وكلش ..

الزبدة غيرت الكمبرسور واليوم إن شاء الله يطلع الموتر ، ونجرب ..

[e7sas_dim]

صباح الخيــر للجميــع
انا كانت عندي تقريبا نفس المشكله و السيارة vxr 2000
اذا شغلت المكيف و طول خصوصا فالسفر لمبة الـ A/C اللي فالصورة

http://dc07.arabsh.com/i/01837/qcarhv04eji1.jpg (http://arabsh.com/qcarhv04eji1.html)
تبدأ تأشـر و يفصل الكومبرسر و عبيت فريون وضبط اسبوع ورجعة نفس المشكلة
وديته لكهربائي وقال لي غيــر فلتر مكيف يجي على ما أظن بجانب الأديتر سعره وكاله " 140 " تقريبا
و الحمد الله من غيرته و هو ما شاء الله تبارك الله تمام التمام

[e7sas_dim]

بعد إذن أخوي سوبر VTC
هذا رد يوضح شكل الفلتر وصورته طبعا هذا نفس اللي غيرته انا
و ان شاء الله تحل مشكلتك يالغالي


http://www.blogautoparts.com/images/dessicant-element.jpg


هذا فلتر اديتر المكيف يجي بالتويوتا سواء جيب او كامري او كورولا.....الخ

[ملوسن]

جزاك الله خير ..

وبيض الله وجهك ..

هذا الفلتر غيرته ، وسويت غسيل وما نفع معي !

آخرتها غيرت الكمبرسر وجاري التجربة ..

[الانيس66]

ياليت تغير هذئ التوقيع ما اقدرانظرالية

[عبدالاله]

نفس المشكله معي في اكس ار 98 واللمبه تشر ويفضى الفريون بعد عشر ايام من التعبيه والله اني

تعبت كل واحد يعطيني مشكله قالو الكمبورسور لازم يغير وتغير الرديتر حق المكيف وتسوي غسيل

للثلاجه والمواصير وتغير بلف وما بقي شي انا ودي اغير الكمبورسر لان فيه صوت قرقعه زي الجرش تقول رمان يحك في داخله وعندي مشكله ثانيه وهي مروحه المكيف ما تشتغل اتوقع يكون منها لانه يسخن وتبدا اللمبه تأشر ياليت يا هل الخبره تدلوني وين المشكله ومتابعين معك يا راعي الفكس

[4w4]

انا حصلت معي المشكلة بس كامري رحت للكهربائي وسوى في السلك اللي رايح للكمبرسور تقوية ماخذ اكثر من 3 دقائق وراحت المشكله و ممكن مروحة المكيف ماهي شغاله عشان كذا يسخن

[الو11111في]

يااخوان وش الحل
ابي احد يساعدني
والله اعاني من هالمشكلة من فترة
اللمبة تأشر ويطلع هوا حار
السيارة جيب فكسار 2009 فل

وآمل من العضور ستار سات او اي احد يعرف محل متخصص بالرياض يرسلني له
الله يسعدكم ولايحرمكم الاجر

[لهايب نجد]

هلا بالغالين
انا صارت معي المشكلة بجيب لكزس وصارت من كتاوت الكمبرسر غيروها 120 واحد مستعمل وضبط والظاهر موقعها في الفيوز اللي في الكبوت كاني مانيب واهم

[عمر الشريف]

تأكد من بلف السياره مثل ماقال أحد الأخوان إذا مايدور الفريون زين يسبب بتسخين الكمبروسر ويفصل

[قوقل النفود]

هذا كمبروسر المشكله هذي بحميع السيارات الحديثه لابد من تغيير الكمبروسر سؤال/انت بأي مدينه ممكن ادلك على فني ممتاز

[الو11111في]

يااخوان الكمبرسر يكلفني فوق 3500 وبدون ضمان

ابي احد يدلني على ورشة متخصصه
الله يسعدكم
انا في الرياض

[HAS5SAN]

يمكن المكشلة
من نفس ضاغط الآي سي
داخل طبلون السيارة
شوف كهربائي يشيك عليه
http://dc07.arabsh.com/i/01837/qcarhv04eji1.jpg

[ابو تركي المطيري]

المشكله الكويل حق الكمبرسر يمسك ويفصل شيك على فيش الكويل شوفه راكب مضبوط او لا اذا راكب مضبوط ودها فني خله يشيك على الكويل

[رحال7]

ممكن صوره للفلتر

[المستحيل2006]

المشكلة عندك كهربائية
شيك على الكتاوت لاتغير الكمبرسر الا بعد ما تتاكد

[lo8oo8ol]

نفس المشكلة موجودة عندي بالفكسار 98 بختلاف بسيط انها غير مستمرة يعني كل فترة (كل 6 شهور) تحصل مرة او مرتين ...

رفع للموضوع للوقوف على الحل الاكيد للمشكلة ... لتعم الفائدة ...

[خالد711]

يجب عليك ان تتاكد من لي الكبس الذي يوصل من الكمبرسر الى الاديتر (المبرد) لانه سواه معي في لاندكروزر 2003 في اكسار وانا مسافر كان المكيف زي الحلاوة وحطيت مويه وعصير في الثلاجة وشغلتها وبعد يمكن ساعتين تغير الهواء وصار حار وكانت لمبة الي عليها علامتة A/C تشر وقفت وطفيت المكيف وخليته حول عشر دقايق ثمن شغلته ورجع كويس وبعد فتره رجع يشر وانا على ذي الحال لين وصلت وادي الدواسر وفحصو الفريون وقالو كويس ومشيت ولمن وصلت الرياض ماخليت ورشه الي يقول كلدش وليقول مغناطيس ولي يقول بلف ولي يقول مواصير ولي يقول تنظيف ومره جيت عند يماني بالصناعية القديمه وقال فريون قلت انت متاكد قال نعم وقلت وان مانحلت المشكله قال شغل بلاش وانا عاد قلت هذا المطلوب ان زانت ولا ماخسرنا شي وقال قبل لاعبي لازم نفحصة تفضل قام وعباه هوا بماطر معه لين 300 وخلاه نصف ساعه ورجع فحص ضغط الهواء لقاه ناقص قال فيه تهريب وقام بمويه وصابون وفحص المواصير ولا طلع فيها شي قام وصب الماء على اللي الذي يوصل من الكبرسر الى المبر الي يمر من عند الاديتر ولقاه يهرب قام فكه وقال جب زيه رحت وكبست واحد جديد عند حقين الهدروليك ومشاء الله الين الحين وهو ياسلام فانت تاكد من هذا اللي

[الصقر الحربي]

تأكد من الكهربا إذا كانت ضعيفه مايدفع الكمبرسر صح

أنا صارت معي نفس المشكلة وكان السبب إن سير الدينمو كان مرتخي وشديته وراحت المشكلة

شد السيور حقت المكينة والدينمو

[أبو راكان]

نبي الفزعة اعاني من نفس المشكلة وغيرت الكمبرسر وكلاتشه وجميع البلوف الثلاثة وحطيت زيت اصلي للكمبرسر ونضفت بفريون 111 وعبيت فريون اصلي على كلامه وحسب اتفاقي مع بس ما كنت عنده لأتأكد من مصداقيته نرجو المساعدة والفزعة والتأشير تصير كل يومين مرة او مرتين ولكم الشكر

[lo8oo8ol]

ابو راكان اذا كانت تاشر لمبة المكيف وانت مشغل المركزي (المكيف الخلفي) فارجو ان تنظف الثلاجة الخلفية وتشييك على بلف التنظيم او المنظم ( بلف زي بلف الغاز اللي بالبيت ) تحصله بجانب الثلاجة الخلفية

صارت معي وكنت بالطائف ومريت على كهربائي وقل لي جب المنظم هذا من قطع الغيار اصلي للاسف لم اجد الاتجاري فقال لا تغييره خلاص بنظفه لك وبعدين اشتر الاصلي وركبه
وفعلاً تم تنظيفه وتركيبه ولله الحمد ضبطت

دعواتكم

[faisal7]

شف فيه كتاوت في علبة الفيوزات اللي في الرفرف شيك اي واحد للمكيف وغيره تروح المشكلة وتدعي لي باذن الله لان المشكلة صارت معي بس في كامري وكل النصابين اللي في الصناعية يقولون غير الكمبروسر بس بحثت في النت ولقيت واحد يقول غير الكتاوت وضبط الموتر ولله الحمد

[عبدالله المطيري]

انا عندي نفس المشكلة بفكسار بس اذا شغلت الثلاجة والمكيف على طول تقعد تشر لمبة الكمبروسور

[ابن حرمل]

هلا وغلا اخوي
انصحك تروح عند ورشه فؤاد بالصناعيه القديمه عند التشتاليح الي فوق
المشكله كانت عندي وصلحها ونظف المكيف كامل وطلع زي الفل
وتمنا لك التوفيق

[أبو راكان]

الله يجزاكم خير علما اني منظف الثلاجات ومغير البلوف كلها لكن باقي اقتراح الاخ فيصل بجربة على ان الورقة اللي فيها اسماء الفيوزات والكتاوتات منقشرة وضايعة لكن بدور موتر لزقته فيه وبحدد ان شاء الله كتاوت المكيف وبغيره وان شاء الله يزين وبعلمكم علشان يستفيد الجميع ودمتم اخواني

[أبو راكان]

غيرنا الريليه وما صلح تعطل اليوم المغرب وطفيته وبعد ما برد شغلته بعد فترة حوالي ربع ساعة واشتغل
يالله ان تعينا

[جو واب]

يا أخوان المشكله عندي .. لكن بالنهارفقط ..

يعني اذت مسكت لي خط بالنهار على الشمس .. تكون عندي هالمشكله ..

لكن باليل .. تختفي !!! ويشتغل زي الحلاة

الي عنده علم لا يبخل علينا تكفون ..

[جو واب]

وش تشورون علي يالربع ..؟؟؟

[عبدالاله]

اللي عند اللمبه تأشر يتأكد من المراوح انها تشتغل مروحه قدام الرديتر والثانيه خلفه وتأشيره اللمبه وفصله المكيف بسبب الحراره

[راعي - عديم]

أنا صار معي تشر لمبة المكيف يشتغل ربع ساعه وبعدين يبدا يطلع هواء حار

جيت كهربائي وفك الأسلاك اللي فوق الكمبروسر وبدل فيها وزبطة المشكله والحمد لله لي 6 شهور شغال أحسن مايكون