مالطريقة لادخال اسلحه للمملكه قانونيا

[ابوسعيّد]

السلام عليكم ورحمة الله
الاخوه الافاضل
انا مقيم خارج المملكه وسوف اعود باذن الله الشهر القادم باذن الله رجب
لدي ثلاث بنادق ومسدسين
ماهي الطريقه القانونيه لادخالها للمملكه

[ابوحمزة 2009]

السلام عليكم ورحمة الله
الاخوه الافاضل
انا مقيم خارج المملكه وسوف اعود باذن الله الشهر القادم باذن الله رجب
لدي ثلاث بنادق ومسدسين
ماهي الطريقه القانونيه لادخالها للمملكه

ما يسمحولك بدخولها ...وانا اقولك بيعها في بلدك

[ابوخلف الحربي]

عقب الارهاب صعب انك دخل ويبيلها واسطه قويه وتابع اجرات وزراة الداخليه
بموقعهم يمكن لها طريقه والله يوفقك..

[بدون عضويه]

احلم تدخلبها بيعها عندك ولا شغل الواسطه
ويمكن تنجح بنسبه بسيطه

[السفريF15]

ماضنيت تدخل حاول بس على مسئوليتك

[nayf01]

وانت ويش تبي بها الله لايهينك

هل هي هدايا ؟

اذا ودك تدخلها ضروري روح صوب سفارة بلادنا
واشرح لهم السالفة
واذا في الامكان يمكن يستلمونها وتستلمها هنا من قسم الاسلحة بعد ما تصرحها

والله اعلم

[Abu Sary]

أولاً: راح يكون لها شروط وقوانين ونظـام ..

ولربمـا تكون معقدة نوعاً ماهـ ..


برايفت
ياشباب مايصير الواحد يقول شغل الواسطة وشوفلك واسطة ..
اولاً هالواسطة نكبتنا ودمرت حياتنا بالوظائف حايسسين بسبب هالواسطات وكل شيء
ثانياً أحس هالكلام ينقال للصديق لا للغريب يعني صارت السعودية تعتبر ماتمشي الا بالواسطة
وحنا نحاول نحاربها بإي شكل من الاشكال وأنتم تعلنونها على الملاء وتشجعونها { مصيبة }


..


بالتوفيق للجميع ..












( اللهم حسن الخاتمة )

[HW77 ONLY]

أولاً: راح يكون لها شروط وقوانين ونظـام ..

ولربمـا تكون معقدة نوعاً ماهـ ..


برايفت
ياشباب مايصير الواحد يقول شغل الواسطة وشوفلك واسطة ..
اولاً هالواسطة نكبتنا ودمرت حياتنا بالوظائف حايسسين بسبب هالواسطات وكل شيء
ثانياً أحس هالكلام ينقال للصديق لا للغريب يعني صارت السعودية تعتبر ماتمشي الا بالواسطة
وحنا نحاول نحاربها بإي شكل من الاشكال وأنتم تعلنونها على الملاء وتشجعونها { مصيبة }


..


بالتوفيق للجميع ..












( اللهم حسن الخاتمة )

ياسلام على الدرر والله انك صادق للأسف صارت الواسطه مطلوبه حتى لو اوضاعك سليمه وماشيه على النظام.

أصبر شوي اذا ما صرنا ندور واســـــــــطة حتى في المطاعم !!!!! " يعني تخبر لي احد في مطعم ماما نورة يعجل لي طلبي لأنهم اليوم مزحوميييييين مرررررررره"

الله المستعان وعليه التكلان.

[asd112]

وانت ويش تبي بها الله لايهينك

هل هي هدايا ؟

اذا ودك تدخلها ضروري روح صوب سفارة بلادنا
واشرح لهم السالفة
واذا في الامكان يمكن يستلمونها وتستلمها هنا من قسم الاسلحة بعد ما تصرحها

والله اعلم


كلام عين العقل احسه كده :good2:
والعلم بيد من لديه العلم السفارة في البلد:good:
تقبل مرورى

[اميرالصمت]

اول شي كيف ادخله اطياره
ثاني شي اذا مسكواك وانت في السعوديه
ومعك سكتون صادروها وانت تبي ادخلها من الخارج
سبحان الله

[ابوسعيّد]

السلام عليكم
اشكر الجميع على المرور
السفاره ماعندهم مانع بس الاجراءات طويييييييييييييييييييييييييله
والاسلحه استخدام شخصي
كل مارحت للسوق شريت بندق شكل , عدا عن المسدس الجلوك والسميث

[الحربي1111]

سبحان الله وبحمده سبحان الله العظيم

[الرويضة اون لاين]

كان ودك تزور الغريفة اللي انت خابر دخلها البلد

[شوار القلوب]

السلام عليكم

يابن الناس خل الأسلحة في بلدك (الأحسن يعني)

لأنها لا سمح الله لو صار لك شي كذا ولا كذا

والله العظيم راح تندم وتكره اليوم اللي جبت فيه اسلحتك(حتى لو كانت استعمال شخصي)

لا تدخلها إلا بالسفارة والطرق القانونية (حتى لو كانت الإجراءات طويلة)

لأن الايام هذه مشددين على موضوع الأسلحة جداً جداً.

لكن تعال بدونها ولو تبغى شي في السعودية انشاء الله نقدر نخدمك.

الله يوفقك وتوصل بالسلامة

السعودية (البيت بيتك) :)

[ابوصالح3]

تبي الراي والعلم اللي يجمد على الشارب -شد الرحال ودرب عمك تدله - تعال وادخل على الامير نايف - اوالامير محمد ابن نايف -ويتسهل امرك -
وتعال برجليك احسن لك - قبل لا تجي مسحوب ومخفور ولا تدور بيننا خاين -محد يخون بلده - انا ماقول لك ان مافيه مهربين -فيه مهربين سلاح وفيه مهربين مخدرات والدولة تحاربهم - وانت تدور معصية وتبينا نساعدك في معصية ولي الامر -وتقولها جهارا -نهارا - مستحيل احد يساعدك الا واحد باخصك وعارفك زين وعارف ان اللي معك سلاح صيد -
يستعمل للصيد -يمكن تحصل مجاملة لك -عن حسن نية -وعن يقين وادراك ان سلاحك ماهو من الاسلحة الحربية- يعني شوزل اوهوائيه- و لو يدري هالموظف ان فيها حرام ومعصية مستحيل يساعدك ابد-

[ابوخلف الحربي]

ان كان على الواسطه هذا شي واقعي ياربع ولاحد ينكره هذي الدنيا معك واسطه
تمشي مامعك واسطه تخيس هذا الحق والله ياكم واحد يبي وظيفه ويستحقها والواسطه
خربت عليه..!

[سامي،،،]

لااله الا انت سبحانك اني كنت من الظالمين

[بن حران]

سبحان الله وبحمده

[ابوصالح3]

الواسطه وماادراك مالواسطه -حسبي الله على من يقدم شخص على شخص من اجل معرفه او مكانة او اشياء اخرى -لان هذا هو الظلم بعينه اللي الله سبحانه وتعالى حرمه على نفسه

[البيطار0]

عزالله انه اعطاك العلم ابوصالح
وماهي محتاجه شرح
والغريفه موجودمثل ماقال خوينا الاول
وراي عندك

[ابوسعيّد]

السلام عليكم
الغريفه ماهي لمثلي وشرواي
ويابو صالح تراك صليت بلا قبله
انا اسال عن طريقه قانونيه ولكن سريعه

[ابوسعيّد]

بعض الناس زي ابوصالح حدا امرين
اما جاهل مايعرف يقرى
او اعمى مايشوف
انا كاتب بالنص
الطريقه القانونيه

[ابومشعاب]

العلم من أخره

مافييييييييييييييييييه اي بند ينص بدخول الاسلحه ابد ابد ..
الا تهريب وعساك للقوهـ ..

[ابوصالح3]

يابوسعيد والله لاني جاهل ولاني عمى - دليتك على الطريق - انت تسأل عن طريقه قانونيه لمخالفة القانون - سؤالك هذا جوابه 0

وبصفتي عضو في هالمنتدى رديت عليك 0 وبصفتي موظف حكومي رديت عليك وعندي اطلاع على اللوائح والقوانين والتعاميم
واعرف جيدا 0 كيف يتعامل القانون مع المهربين - - ولاابي اقعد انا وياك ندخل بمهاترات كلامية فاضيه - للرجال على الرجال حق -والغلط ماله داعي
وانت هالحين بدولة وانا بدولة 0 لوانك قدامي وجه لوجه 0جاك رد كلامك لاني ماارد على الكلام بالكلام =

[saas-des]

ابوسعيّد (http://mekshat.com/vb/member.php?u=49811) صرت ارهابي وانت تستفسر كيف لو رحت
خوفي ماتطلع من الغرفه دور طلبك بديرنا افضل وامن

[Abu Sary]

ياشباب الرجال يسأل عن طريقة قانونية ، يعني نظامي يبي يمشي على نظام الدوله ماهو مخالف ولا يبي تهريب ومن هالكلام ،

هو يسألكم وش الإجراءات المطلوبه لدخولها المملكه نظامي يعني من بعد إذن الدوله ..

/

المهم يابو سعيد ، زي ماقنـالك لو كان فيه طريقة أتوقع معقدة للغاية ،
بيعه بالدولة اللي أنت فيها ، وتعال هنا ، وتحصل مطلبك إن شاء الله ..


بالتوفيق للجميع ..

















( اللهم حسن الخاتمة )

[اميرالصمت]

هذا يبي يدخلها غصب او انه في المباحث ويبي
يمسكله مهرب

[ابوسعيّد]

السلام عليكم
المواجه ماهو عيب يابو صالح
عطني عنوانك وانا اصل لحدك وعطني ردك سواء طيب او ردى

[ابوصالح3]

وعليكم السلام يابوسعيد
المواجه ماهو عيب مثل ماقلت - العيب يابوسعيد ان الرجال يغلط على رجال مثله وهو بعيد0
وان جيتني الله يحييك عزيز كريم آمن


ان جيت تلقى لك نشاما وديوان * * وسوالفن مثل القراح وشرابه
بالديرة اللي جادها غيث سلطان * امطر سحابه وانبتت خير لابه
ماهي هروج فلان وش قلت يافلان *خل العلوم اللي تراها تشابه

[راعي الوبارة]

يا أخواني الأعزاء لكل شيء نظام يعرفه من يعرفه ويجهلة من يجهلة نحن في دولة منظمة ولا مانع لدى قيادات هذا البلد المبارك من تلبية رغبات المواطنين والسعي لتحقيقها وذلك في ما هو أكبر من إمتلاك سلاح شخصي ولدينا تصاريح حصلنا عليها عن طريق قسم الأسلحة والمتفجرات وكل ما هو مطلوب من المواطن هو مراجعة القسم وتعبئة النموذج وفحص السلاح لديهم للتأكد من الرقم والنوع ومن ثم تصريحه وذلك يعتبر إثبات ملكية وتعهد من المالك بالإطلاع على نظام التصاريح سواءا إقتناء أو حمل ولا يحتاج الموضوع الى واسطات هذا ما يخص الأسلحة داخل المملكة أما خارجها فلا علم لي بذلك ويمكن مراجعة السفارة مثل ما أشار الإخوان وعموما لا أنصح بتعدد قطع السلاح مع الشخص الواحد ويكفي كلا منا ما يؤمن حمايته الشخصية حسب الأنظمة المعمول بها في هذا البلد الآمن ولله الحمد

[do_it]

يوجد بند في نظام الاسلحة والذخائر في السعودية لا اذكر نصه بالضبط

ولكن عقوبة إدخال السلاح للسعودية من الخارج تصل إلى (15 ) خمسة عشر سنة سجن مع غرامه ماليه لا اذكر قيمتها .

طبعا النظام يحظر استيراد الاسلحة قطعيا من الخارج سواء صيد او حربيه .

ويعلم الجميع والدوله تعلم بأنه توجد سوق سوداء داخل السعودية يباع فيها السلاح بخفاء وهي من وجهة نظري اسلحة أكل الدهر عليها وشرب مهما كانت نظيفه .

لم يأسرني سلاح مثل هذا / ذيب البراري 338/ Timber wolf 338 كندي الصنع يستخدمه قناصه الجيش لدينا واستعملت هالقناصه في دحر الحوثيين خذلهم الله . قيمة السلاح تصل إلى مايقارب ثلاثين ألف ريال سعودي من الشركة المصنعه ولكن فعلا قطعه تستحق الشراء والاقتناء .

يالربع مافي طريقه نظاميه نشتري هالسلاح :D

واليكم الصوره فما بعد هالقناصه سلاح


http://www.m5zn.com/uploads/2010/6/18/photo/06181015063915k0uu44bk71er.jpg

[راكان العنزي]

وعليكم السلام


أنت تقول :

( انا مقيم خارج المملكه وسوف اعود باذن الله الشهر القادم باذن الله رجب )؟؟؟


1 - هل كنت في المملكة ولا تعرف القوانين ؟
2 - هل تبحث عن طريقة قانونية لفك طريق عبر القانون ؟
3 - هل تبحث عن واسطة ؟
4 - هل تروج لأعلان عن سلاح للبيع يوجد لديك عن طريق أثارة موضوعك ؟


1 - أذا كنت في المملكة ولا تعرف القوانين فهذه مصيبة وأذا كنت تعرف فمصيبة أكبر
2 - القانون واضح وصريح وتوجد سفارات للملكة في كل الدول لتوضح وتجيب عن جميع أسئلتك ومن ضمنها سؤالك
3 - لا توجد واسطة في مثل هذه الأمور وأنما خيانة فأذا كنت تبحث عن خائن
( فلا وجود لخائن بيننا )
4 - أذا كان أعلان " فقد أخطأت الطريقة الغير مباشرة لأن الأمور سارت عكس
ماكنت تتوقع .

[Mekshaati@]

السلام عليكم

يا أخوان أعضاء مكشات قدوة للمنتديات العربية كلها في التعاون و إحترامهم لبعضهم كأخوان

وبدون منة لحد المنة لله سبحانة

أما بالنسبة لأخوي أبو سعيد عداه العيب ما أخطى و طلبة سليم 100% والرجال يستفسر عن طريقة قانونية فقط

تمنيت أن بعض الأخوان ما تسرعوا في ردودهم .اذا كنت تعرف الجواب أجب واذا ما تعرف مو

بضروري الكلام الزائد اللي لا يودي ولا يجيب .

العذر والسموحة منك يا بو سعيد لكن والله ماعرف جواب لسؤالك والا كان افدتك طال عمرك على الطاعة.

[سعد الدين]

يا اخي الكريم

ممكن تراجع السفارة السعودية وتخاطبهم اذا كانت الاسلحة قانونية لديك

وتخبرهم برغبتك وهي تتصرف معك قانونيا

وانت الكسبان

مع التحية

[ابودعسان]

بعض الشباب الله يهديهم فهموا غلط
انت مالك الا تروح للسفاره وهم اكيد بيفيدونك بكل شي

وترجع بالسلامه

[502]

السلام عليكم ورحمة الله وبركاته أقولك ياخوي أذا أنت مستعجل بعها عندك أحسن لك وبتلقى في السعودية مثله والفرق شي بسيط ولا بهذلتك في الجمرك والمشاكل وتمنى بعدين أنك دافع الي وراك ودونك علشان تفتك ماعاد تقدر وبتلقى مصرح ويتنازلك راعيه أبركلك والا أصبر على أجراءات السفارة والمدة الي راح تستغرقه ألين توصلك وبعدين المحلات راح تفتح بعد فترة في السعودية وراح يتوفر كل شي من أنواع بنادق الصيد والمسدسات ومصرحه وبعدين على حسب ماسمعت أنه ماراح يكون التصريح الا على قطعتين سلاح وحده حمل وحدة أقتناء مثل المسدس حمل والي غيرها يكون أقتناء فازوبها الاولين خمس قطع