المساعد الشخصي الرقمي

مشاهدة النسخة كاملة : ياجماعة شوفوا لنا حل مع هالمشكلة اللي جننتنا


معاذ 2008
15/06/2010, 01:06 PM
إن مالقيت حل أبا ابيع السفاري بكلب سرق اهله
أبي حل للمكيف حار جدا جدا
هل العيب من المصتع !!!!!!
عبيت فريون أصلي مافية فايدة
نظفنا مافية فايدة
ولكن هل فيه كمبروسر يركب على السفاري موديل 98 بدل الكمبرسور اللي فية سمعت إن حق الددسن موديل 97 يركب علية هل هذا صحيح
وشكرا
بدون لوحات
15/06/2010, 01:21 PM
وش المشكله اشرح المشكله والشباب مايقصرون غى حلها
ساري 111
15/06/2010, 01:37 PM
اذكر الله .. ووسع صدرك

وان شاءالله الشباب مهب مقصرين معك
معاذ 2008
15/06/2010, 05:30 PM
المشكلة ياجماعة المكيف مايبرد أبدا
طرحت موضوع بالمنتدى وجت الردود مختلفة
واحد يقول لاتتعب نفسك هذا هوالنيسان ومكيفة دمار
وواحد بقول عب فريون أمريكي أصلي عبينا وحصل تغير بسيط مايذكر أبدا
وأنا مادري وش أسوي
سوبر VTC
15/06/2010, 05:52 PM
معروف ان النيسان سواء الباترول او الددسن او الصني
مكيف ثلوج ما يحتاج
لكن عندك مشكلة بلف ثلاجة او ترموستات الدبة اللي بالرفرف
او الثلاجة تحتاج تنظيف
و انصحك تغسل المواصير + اديتر المكيف لانه اذا كان مسكر
مايبرد المكيف + خراب الكمبرسور لان السدد و رايش البساتم تعدم لك الكمبرسور
و اذا كان فيه مكيف خلفي
لازم يشيك عليه خصوصا البلف الخلفي
الغسيل مثل البنزين خاص بغسل الاديتر و المواصير

طيب موقعك يدلونك الربع على ورشة جيدة ؟؟؟

تبي مكيف ثلوج حط مرواح كهرب سوبارو بدل من مروحة المكينة
و ترى الحرارة هالوقت دمار و مواتر جدد حرارتهن على النص
الحرارة الان حول 54 او 53



اعانك الله
د ك م 586
15/06/2010, 05:56 PM
المشكلة ياجماعة المكيف مايبرد أبدا
طرحت موضوع بالمنتدى وجت الردود مختلفة
واحد يقول لاتتعب نفسك هذا هوالنيسان ومكيفة دمار
وواحد بقول عب فريون أمريكي أصلي عبينا وحصل تغير بسيط مايذكر أبدا
وأنا مادري وش أسوي

مرت على بواترول واجد واشوف ان تبريدها ثلوج ماشاء الله العله بموترك وليس بالبواترول بشكل عام
اللي بصورة التوقيع 98 مثل موترك عليه تبريد ماشاء الله تبارك الله ثلوج بمعنى الكلمة
تاكد من المراوح اللي قدام اديتر المكيف لعل العله منها والاحتملات واجد ومنها:

الكمبروسر ضغطه ضعيف وفي هالحالة يطلع صوت ونه .
الثلاجه وسخانه وفي هالحالة يكون دفع الهواء ضعيف .
سير المكيف قد يكون مرتخي .
اديتر المكيف جايه وسخ واوراق شجر وحشرات مع ممشى السيارة بالبر (او حتى طين) يتنظف من برى بتسليط الماء عليه عند محلات البستم او حتى بالمنزل اذا كان دفع الماء قوي.
المراوح الكهربائية عطلانه .
بلف الثلاجه يمكن يكون مسدود ويحتاج تنظيف او تغيير.
كلتش (قابض) الكمبروسر ضعيف .
اذا كان المكيف مايبرد اثناء وقوف السيارة يمكن يكون محتاج وزن منظم ابنص المكيف (يرفع بنزين السيارة) بالاضافة على التشييك على المراوح.
الله يعينك ابدأ بالاسهل والارخص
د ك م 586
15/06/2010, 06:01 PM
فيه ورشه في الصناعية القديمة تخصص مكيفات اسم الورشة فؤاد للتكييف كل الشباب يمدحونه بشغله بس اهم شي يحط لك فريون جينيتور
معاذ 2008
15/06/2010, 11:14 PM
جزاكم الله خير على هالردود
حقيقة إنكم وسعتوا صدري
أنا بالقصيم وش أحسن ورشه
s1s1
16/06/2010, 02:23 PM
اذا انت من القصيم رح للمقيطيب حق مكيفات وممتاز شفه ببريدة بشارع الاربعين
سوبر VTC
16/06/2010, 02:47 PM
ورشة العثيم بصناعية الرواف من شمال

ورشة الحسون هندي جيد اسمه احمد جنوب صناعية الرواف

ورشة المقيطيب بالشارع التجاري محلين متقابلين
واحد يفتح شرق و الاخر غرب
بس مادري ايهم احسن