عــزم الموتر .. في هبووووووط!! وش الحل ؟

[أبو_خالد]

السلام عليكم

عندنا جيب باترول عزمه يلاحظ عليه بأنه أردى من قبل
ولا ندري وش الحل .. ؟

لدرجة إنه في بعض الأحيان أقوى شيء يوصل له في السرعة 120-130

هو موديله 2001 ،، بخاخ ،، قير عادي

غيرنا له :
طرمبة بنزين من الوكالة
صفاية بنزين من الوكالة
بواجي وأسلاك بواجي من الوكالة
مع وزن الديلكو !!

ولكن تحسن شوووووووي فقط

أما إذا نطحه الهواء ،، أو كان في صعود ،، أو غراز
فهو والله يدبل الكبد ويسود الوجه ،، الله لا يسود وجيهنا :( !!

الآن إذا كان يمشي ولا فيه هواء يعني يمكن يوصل 140-150 أو ما يوصله بعد

وحتى التسارع عنده بطيء ،، يعني تدوس البنزين على الآخر وتشوف عداد السرعة يزداد ببطء يدبل أم الكبد


يا الربع وش نسوي به ، سمعت أنا عن فلتر هواء رياضي ولا أعلم عنه شيء!!




الزبدة .. وش الحل ؟

[سوبر VTC]

المكينة صافية
قد تحتاج الى صنفرة البلوف
ربما وزن الدزق و الكلتش
اذا كان فزة الموتر بالنمرة الاولى بالزفلت قوية فالامور تمام
اذا لا فالديلكو مهب موزون مضبوط

افضل طرمبة بنزين لموديل 2001 و تحت طرمبة فتك ب420 ريال تقريبا
نفس قوة طرمبة الفكسار
و ترا طرمبة البلد غبية جدا و دايم تخرب و تضعف
الربع مايركبون الا حقت فتك لم2001 و تحت



اعانك الله

[أبو_خالد]

فزة الموتر بالنمرة الأولى ماعليها

لكن البلا والموت إذا كان يرقى سنود يموووووووت الموتر

كذلك مابه تسارع إذا كنت تمشي حتى لو ترد القير مثلا من خامس للرابع أو من رابع لثالث

تسارع بطيء جدا ويدبل الكبد !!!


لا زلت أبحث عن حل !

[سوبر VTC]

فك اللي اللي راكب على ماصورة البخاخات و ركب عليه ساعة فحص
و شف كم تضغط طرمبة البنزين افتح السويتش 3 مرات كل مرة 4 ثواني او 3
في المرة ال4 شف كم يوصل ضغط الطرمبة

انت متاكد انهم غيروا لك طرمبة البنزين ؟

تاكد من وزن الديلكو و البلوف
تاكد من خرطوش الهواء اللي بين اللهاة و القربة
عادة اذا كان منشق يهرب هواء يسبب ضعف للعزم و يكتم الموتر
يلفون عليه شطرطون عريض و يضبط
و بعضهم يحط سلقون فوق الشطرطون
و قد يكون الخلل من منظم الهواء حق القربة
او الكمبيوتر ما يعطي كهرب مضبوط الى البواجي

[حمودي515]

وعليكم السلام

اخوي ابوخالد فيه واحد من العيال معه باترول 97 وجاه مثل ماتقول وزود الجيب يرمي سالته يقول وزنت بلوفه والديلكو وغيرت صفايه البنزين بس وضبط الحمد لله
صفايه البنزين موديل 97
والله يعيننى واياك

[أبو_خالد]

الأخوة
سوبرvtc
حمودي 515

أشكركم جميعا



ولا زلت أبحث عن حل !

[برغي]

تأكد ان مافيه تنسيم بخرطوش البخاخ ترا اذا فيه تنسيم بيردي عزم الموتر كثير

[عاشق الغضا]

انا اتوقع من الديكو يبي وزن صح وشكرا

[ابو طوق]

شيك على الشكمان وفلتر البيئة يمكن يكون منسد

[ابونبيل]

كان معي ددسن نفس الحاله العزمميت بقوووه حتى اليارسات يشطوني وحدي اذا دزيت مره 140

اخر شي اكتشفت ان المروح هي البلا
الكلتش حق المروحه يخليها تحن ومكتوومه اذا كان موترك في حنه هذا السبب اكيد

علما ان الددسن حقي يوم غيرت المروحه جاب الـ180 برااحه من كثر ماهو مكتوم وتنفس

[واحد مبسوط]

اذا كان الموتر قير عايدي
شيك على الدسك والصحن والفحمة حقت القير لها دور كبير في ضعف العزم

[ali2099]

السلام عليكم
غير الكنداسة واذا ماتبي تغيرها فكها وجرب وبتشوف ان الكنداسة هي السبب
بحكم خبرتي صارت معي وغيرت كل شي وطلع العله من الكنداسة

سلام

[أبو_خالد]

الدسك والصحن مغيرهم قطع أصلية قبل 10شهور وعلى الأقل في ذاك الوقت وللحين ما تغير شيء!!

[د ك م 586]

فك اللي اللي راكب على ماصورة البخاخات و ركب عليه ساعة فحص
و شف كم تضغط طرمبة البنزين افتح السويتش 3 مرات كل مرة 4 ثواني او 3
في المرة ال4 شف كم يوصل ضغط الطرمبة

انت متاكد انهم غيروا لك طرمبة البنزين ؟

تاكد من وزن الديلكو و البلوف
تاكد من خرطوش الهواء اللي بين اللهاة و القربة
عادة اذا كان منشق يهرب هواء يسبب ضعف للعزم و يكتم الموتر
يلفون عليه شطرطون عريض و يضبط
و بعضهم يحط سلقون فوق الشطرطون
و قد يكون الخلل من منظم الهواء حق القربة
او الكمبيوتر ما يعطي كهرب مضبوط الى البواجي
اعتقد ان ماتم تلوينه بالاحمر هو السبب والعلم عند الله

[البرنس 1]

السلام عليكم ورحمة الله وبركاته .... اخوي ابو خالد الله يبيض وجهك دنيا واخره والمواتر هذى هي تزود وتنقص ... موتري باترول كربليتر ..الله اعلم انه المشكله عندك من البخاخات متصخه او تحتاج تغيير . اذا كانت السياره عزمها ضعيف في الخامس .. انت غيرت كل شي طرمبه + صفايه + بواجي واسلاك ... مابقي في العمليه الا البخاخات .. وانشاءالله تكون سهله . شف لك محل تنظيف بخاخات ممتاز ... وانشاءالله تنتهى المشكله .. دعواتك .. تقبل مروري ..

[عاشق الفتك 20]

هلابك أبـو خالد مثل ما قالوا الاخوان شيك على البخاخات
وايذا ماانفع ركــــب هـدرز مـع كــاتـم صــوت
وتـــــــــقـــــبــــــــل مـــــــــــــــروري
عــاشــق الـــفـــتـــك 20