وش الحل ادخل المفتاح في السلف بس مايدور ابد

[ابن عكاش]

السلام عليك ورحمة الله وبركاته
يالله حي الشباب عساكم بخير عندي مشكه وإن شاء الله إنها بسيطه وقلت مالي إلا اخواني اهل مكشات بيعطواني الحل المناسب بإذن الله
السياره لاندكروزر 2000م جيت اشغلها بالمفتاح واحاول في السلف بس مايدور ابد يعني مايدق سويتش ولا شي لدرجة اني بغيت اكسر المفتاح وانا احاول الف به رحت للشايقي قلت يمكن من البرمجه قلت ابي مفتاح بدون ريموت اصلي وسو له برمجه عطاني مفتاح وقال بـ120ريال قلت صلح راح يشوف البرمجه في الجهاز رجع وقالي مافيه برمجه موديل 2000م وتحت مافيه برمجه وعطاني مفتاح بـ20ريال قلت لو ما اشتغل رجعته المهم واجرب ونفس المشكله طبعاً لو المشكله في البرمجه كان يدق سلف بس مايشتغل
قالي واحد من الربع صارت له نفس المشكله ان الدقمه على مرور الأيام دخلها وصخ فلازم تفكها وتنظفها وتضبط
ودي تعطوني رايكم واللي قد صارت له يفيدني وهل فيه فني في الرياض تنصحون به
الله يجزاكم ألف خير ويعطيك ألف عافيه آمين

[ابن عكاش]

سبحان الله وبحمده سبحان الله العظيم

[سوبر VTC]

قصدك ان المفتاح يدور لكن السلف ما يشتغل ؟؟؟
عموما كد صارت المشكلة لجيسكار م2000
و كانت البطارية جديدة
و صار الخلل من كيبل الكهرب حق البطارية + الموجب
صنفره بورق حق صنفرة و حط شحم
و اشتغل الموتر باول دقة
السلف له كتاوت + فيوز عادة كبير قد يكون الخراب منهن
اذا صار منهن مايدور السلف
احيانا تكون اسلاك علبة الفيوزات اللي بالكبوت راخية و ما توصل كهرب مضبوط
بعضهم يطقطق العلبة تكميخ :d و تقنيع و تزين
اعانك الله

[ابن عكاش]

هلا والله بمشرفنا الغالي والمبدع اشكرك على سرعة ردك الله لايهينك
المشكلة ان المفتاح مايدور ابد حطيت بخاخ البراغي ولانفع ويقول لي واحد حط زيت فرامل وبنجرب وبنشوف

[VXR.2007]

شف الدركسون لايكون قفل عليه حرك الدركسون وانت تدق في نفس الوقت يمكن يتحرك معك

او حاول تدخل المفتاح وتطلعه بسرعة مع الهز المفتاح خفيف حاول كم مره

[ن م ر]

شف الدركسون لايكون قفل عليه حرك الدركسون وانت تدق في نفس الوقت يمكن يتحرك معك

او حاول تدخل المفتاح وتطلعه بسرعة مع الهز المفتاح خفيف حاول كم مره



انا اتفق مع كلام اخوي لأنها قد صارت مع واحد من الشباب في لكزس 400 ولي رجعة بإذن الله

[abc-00-abc]

و عليكم السلام ورحمة الله وبركاته
نفس المشكله صارت معي في جيب شيروكي
وكان السبب من الدقمة مكسوره من الداخل

[ابن عكاش]

اشكركم على تفاعلكم وابشركم الموتر اشتغل سويت الطريقة اللي قالها لي خويي حطيت زيت فرامل على المفتاح ودار المفتاح واشغل الموتر والحمد لله لكن اتوقع المشكله ما انتهت لآني الاحظ ثقل في عمليت دوران المفتاح وتوقع ان الدقمه يبغالها تنظيف بس وين اللي يفهم فيها

[الطرفيه]

فيه بخاخ لونه أزرق بصفر مكتوب عليه w40بخه بالسويتش ودخل المفتاح وطلعه ونظف المفتاح من الزيت لماينظف أن مثلك سويته والى يومك الحمدالله يصير السويتش جامع وسخ وغبار

[nayf01]

لديك الان حل وقتي والحمدلله اشتغلت السيارة

تبي المشكلة تنتهي ولاتعود مره ثانية

غير الدقمة بجديدة وكاله

حيث الزيت الذي وضعته يمكن يسيل الى داخل افياش الدقمة ويعمل لك مشكلة اخرى تندم على وضعك

لزيت .

[ن م ر]

الحمد لله ان المشكله انحلت

لكن هذا حل جزئي

وترى الزيت يجمع الغبار والاوساخ وتتراكم وتسبب مشكله مره ثانيه


وبالتوفيق

[خالدي البره]

صبحك الله بالخير

اتوقع المشكله في السنن حقت الدقمه تخرب مع الوقت

صارت لي في لومينا ووديناها لواحد وفك الدقمه وضبط السنن ورجعت زي اول واحسن

تحياتي

[سوبر VTC]

الحمدلله

عندك حلين

بخاخ 40w حق الصدا تبخ بنفس الفتحة و تخليه دقايق و تنفخه بماطور هواء مثل حق البناشر
و اللي ازين منه بخاخ ايسي ديلكو رغوة ممتازة جدا له مفعول السحر يحل جميع الرواسب اللي بالفتحة


لازم في النهاية تنفخه بالهواء نفخ قوي
لانه مع الايام راح يمسك غبار و يجمع رواسب شوي شوي
و يرجع لحالته الاوله


اعانك الله

[هوايتي مكشات]

الله يوفقك يالغالي

[ابن عكاش]

اشكر الجميع على تفاعلكم وهذا ماهو غريب على اعضاء مكشات وعز الله انكم نشاما
ابحاول افك الدقمه عند فني وانظفها او اغيرها وإن شاء الله لي رجعه علشان اعلمكم وش صار معي
والله يوفق الجميع

[ابن عكاش]

الحمدلله انحلت المشكلة وذلك بعد توفيق الله رحت للشايقي اللي على شارع الأبراج وجاء وجرب المفتاح وقال لي لازم نفك الدقمه ونظف السنن ويرجع 100% قلت بكم قال بـ120ريال وبعد المكاسر خلاها بـ100ريال قلت كم يبيك قال نصف ساعة رحت للصراف ورجعت ولقيته فكها ثم قعد ينظفها طبعاً قد يبخها ببخاخ مدري وشو واشوفه فك الخابور حق المفتاح ونظف السنن المهم بعدها ركبها وجربه وقال لي تمام وجيت وجربت وفعلاً 100%
هذا اللي صار معي اتمنى ان الشباب يستفيدون من تجربتي البسيطه
اكرر شري لكم وبالتوفيق للجميع