ابيكم تفيدونيني مساعدات ويايات للجيب

[HILUXES]

السلام عليكم

ياشباب انا ابي اركب على جيب لاندكروزر 95 GX مساعدات ويايات (مورونو او استراليه)محتار وايهما افضل

رحت للرمايه قالو لي مساعدات ويايات استراليه كامله بـ2500 (مادري هي تستاهل سعرها ولا لا) وهل فيه فرق بين اليايات الاستراليه ويايات الوكاله وايهما افضل

وفيه ناس قالو لي ركب مساعدات مورونو(بكم سعرها ووين احصلها)
مع العلم يوم رحت للرمايه قالو لي ان المساعدات الاستراليه افضل من مورونو وانا مالي خبره وابيكم تفيدوني

وهل فيه افضل من هالمساعدات

[HILUXES]

ياشباب مومعقوله 15 مشاهده ولا رد :(

[أبوصقر]

حياك الله أخوي..من ناحية المساعدت خذ ولاتشاور..لأنها مريحة وكويسة بالنفوذ والموتر يكون راكد..واما اليايات فترها ترفع الموتر ويصير شاد نوعاً ما في المطب والمراقى بس مع التحميل ماينزل الموتر كثير على حسب الظغط الي أنت مركبة..والياي الأسترالي مايقارن بالبلد.. الأسترالي أحسن بواجد..ولو تكملها وتركب مساعد الدركسون استرالي راح تحس بالفرق..
وإذا كان الموتر مخصص للمكاشيت فركبها كلها وترا الدراهم فيها ميب حسوفه وترا زباين المستعمل يدورونها إذا ماجازت لك..

[HILUXES]

اشكرك اخوي ابو صقر على افادتك لي وبأذن الله هي راكبه الله لا يعوق بشر :D

ووش قصدك اخوي (الي تحتها خط)

وإذا كان الموتر مخصص للمكاشيت فركبها كلها وترا الدراهم فيها ميب حسوفه وترا زباين المستعمل يدورونها إذا ماجازت لك..

[فيصل الزلفاوي]

بالنسبه لليايات استرالي ولا تشاور
وهذا سعرهن وهن يستاهلن وللمعلوميه ترا فيه مقاسات لضغط الياي
انت خذ المنتصف احسن شئ...

[أبوصقر]

أقصد طال عمرك ان مثل هاليايات والمساعدات إذا بغيت تبيعها مستعملة راح تلقا لها زباين يشترونها منك بعكس البلد والأنواع الثانية.((تطيح في سبدك)).يعني الأسترالي جديد أو مستعمل له زباينه..

[شطب]

للمعلوميه المساعدات ترا كلها استراليه المورونو وحقت الرمايه

بس تختلف الشركه وكلها تقريبا نفس الجوده

بس المورونو ارخص لان مالها وكيل محتكرها وسعرها تقريبا 160 للواحد وتحصلها عن محلات قطع الغيار

اما اليايات انصحك تركب خلفي عشان التحميل

اما الامامي المساعدات بتساعد ياي البلد عشان كذا اشوف ماله داعي تركبه اذا كانت يايات البلد كويسه

مجرد وجة نظر وانت براحتك

ربي يوفقك