طلبات غير معقولة

[راصد بيئي]

السلامـ عليكمـ ورحمة الله وبركاتة

حياكم الله وبياكم

إخواني الأعزاء

أنا لاحظت صراحة شيئ غير معقول

كل فتره أدخل الخيمة وأحصل مواضيعها طلبات فقط!!

عموما مافيه مشكله

لاكن المشكلة أن جميع الأعضاء الي يطلبون مشاركاتهم لاتتجاوز 10 مشاركات
صراحه بهذي الطريقة صعب التوزيع
ومهما وزعت ماراح تسد طلبات الناس
وممكن الواحد يدخل بأكثر من أسم ويطلب وكذا ياخذ أكثر من جرو ويحرم غيره منها

الهدف من الخيمة تنزيل صور ومقاطع الصيد والمقناص وأخذ علوم الرجال وأصحاب الهواية وتبادل الخبرات هذا هو الهدف الأسمى


وصراحه يوميا تجيني رسايل طلبات بالخاص وللحق ماني معطي إلا العضو الي مشاركاته فوق 250 مشاركة والأفضليه للي مسجل بتاريخ 2009 ودون ثم نبدأ بالذين سجلوا بعام 2010

لذلك أرجوا عدم الإحراج ...

تحيتي لكم

[رفيق الأمل]

اخي العزيز أولاً جزاك الله كل الخير على سطورك الحلوووووة وصحيح كلامك أول بأول ياطيب ولك الحق في اي قرار من قراراتك راجياً من الله عز وجل ان يوفقك فيما تتمناه وطريقك الي النجاح بالطريق المستقيم 0

[الفوار2008]

هلابك اخوي راصد

انا من رايي
انك اذا حبيت توزع وانت براحتك يعني اقتراح
ارسل للأعضاء اللي تعرفهم
قد يكون فيه ناس اهل ولع ولهم باع طويل بالسلق
وانسرقت سلقانهم او ضاعت
والحين هم بحاجه
فبإعطائهم بيكون الخير اشمل واكمل
الصراحه الحين قمنا نزمل من توزيع الجرا
الكل طاح بالمهدات وتركوا السبب الرئيسي لقنوة السلق الا وهي الصيد
اتمنى اقتراحي يكون فيه المنفعه لك وللأخوه الاعضاء
تقبل مروري وخالص احترامي وتقديري
اخوك
ابوعبدالله

[ادهم الطحاوى]

الفكره ممتازه اخى الكريم وان شاء الله بتتوفق والله يكرمك على الفكره والمشروع
والى الامام ان شاء الله
تقبل مرورى

[abo shagran]

يعطيك العافيه اخوي

والله يقدرك على الكل ان شاء الله..]


وفكرتك ممتازه لكثره الطلبات ..

[أبوسعود711]

مشكووور يا راصد بيئي وعز الله كفيت ووفيت
صراحه كنت من المعجبين بخيمة الصيد بالسلق
لكن ملينا من الطلبات اللي نخلي الواحد ما يدخل
بالخيمة وبالتوفيق للجميع

[الرحال 07]

انا والله معك بكل شيء تقوووله

[راصد بيئي]

مشكورين على تواجدكم الكريم

وأتمنى ان نتمكن من القضاء على هذه الظاهره قريبا

[وائل الهذلي]

بسم الله اخوي راصد والله موضوعك حلو وكلامك عين الصواب انا لاحظت الشي هذا انا طبعا مسجل جديد ولاكن مايحقلي مثل ماقلت والله ياجماعة الخير انها صعبة تطلب كلب وانتم بكرامة حنا ودنا نعطي مانقول لا بس للي يستاهل وهاوي الشي هذا ومغرم بالصيد ماهو لللعب والترفيه مدة بسيطة وسامحوني ياجماعة اذا غلطت على احد وارجو انكم ماتنزعجون من كلامي والله الموفق تقبلو مروري

[قناص العبله]

لو كل واحد سوى مثل راصد بيئي كان انقطعت السرقات لان الي بيسرق مراح يلاقي حد يشتري منه وبكذ نكون قضينا على السرقات

[مخاوي الليل1]

السلام عليكم

يعطيك العافيه

انا مع اخوي الفوار ابو عبدالله كثير يطلبون من غير حاجه بس طرد الجربيع

والي ضاع له سلوقي في نظري هو احق من غيره

[tiger0018]

والله يااخوان انا بخالفكم الراي مع اعتذاري لكم لاكن اذا واحد قديم في الهواية هذي نادراً انه يحتاج يطلب اقل شيء بيكون معارفه كثير في هذا المجال مايحتاج يطلب في النت وبرضو لاندخل في نوايا الناس يعني واحد يهوى الشغلة هذي ومايعرف احد وتابع خيمة الصيد بالسلق و تعلم بعض الامور وش المشكلة اذا طلب ناس اجاويد شرواكم بالعكس يزيدون الاعضاء وتكثر المشاركات ويستفيدون من خبراتكم واستشاراتكم واتوقع انها اهم من عرض مقاطع الصيد واللي يدخل بأكثر من اسم ويطلب بينكم وبينه الله اقتراحك ممكن صحيح لاكن بتضلم هاوين جدد في الخيمة وعسى الله يوفق الجميع

[star22]

ابيض وجه ويعطيك العافية

[الذود العفر]

واتوقع انها اهم من عرض مقاطع الصيد

أما بهاذي ماني معك هاذي خيمة الصيد بالسلق للتعرف على هواية الصيد بالسلق وأوصاف السلق

الطيبه وطرق تدريب الجرا ولأخذ أراء الأعضاء ببعض السلق اللي يمتلكها بعض الاعضاء وووو...ألخ

ماهي خيمة لطلبات السلق بغض النظر أن اللي طلب السلوقي يستاهله أو مايستاهله ,,

مبدع أخووي راصد بيئي وإلى الأماام ..

[q81963]

ياخووي ذلييت الرياجيل على جرو...؟!!!
خلاص ابتعطيهم عطهم وانت ساكت مو تشهر بالموظوع علشان الناس يشكرونك ومدري ويش وبعدين انت فتحت الموظوع خلاص لاتقعد تشكاا خلك قد الكلام الي تقوله وعطهم موتقعد تشكا تقول الناس واجد ومدري شنو
وخلك قد الكلام الي تقوله والرجال قول وفعل ماهو قول بليا فعل

[راصد بيئي]

أخوي الكريم

الموضوع مافيه مذله لأحد بالعكس
الموضوع كبر عن حده بزياده صار اي واحد يطلب جرو وبعد فتره يرميه
وماذكرنا اسم عضو معين عشان تقول شهرنا فيه الله يهديك
ولا ابي احد يشكرني ولا شيئ

معلومية : انا اقول وأطول ياغالي
وياليت كان اسلوبك أرقى من كذا لأن اللواحد اذا فقد الأسلوب والأخلاق وش يبقى له؟؟؟

تحيتي لك

[الفوار2008]

ياخووي ذلييت الرياجيل على جرو...؟!!!
خلاص ابتعطيهم عطهم وانت ساكت مو تشهر بالموظوع علشان الناس يشكرونك ومدري ويش وبعدين انت فتحت الموظوع خلاص لاتقعد تشكاا خلك قد الكلام الي تقوله وعطهم موتقعد تشكا تقول الناس واجد ومدري شنو
وخلك قد الكلام الي تقوله والرجال قول وفعل ماهو قول بليا فعل



هههههههههههههههههههههههههااااااي

شكلك اخوي من اللي طلبوا ومانالوا

ياخي الرجال اذا كان قول وفعل بعد لازم مايزمل يتكلم مع الرجال بكل شفافيه
والكلمه اللي تستحي منها بدها
عالعموم الموضوع ماهوب منه والا تشكي
الموضوع ان الرجال مايقدر يتحمل فوق طاقته وحب يبين هالموضوع عاد انت قدر
تقبلوا مروري وخالص احترامي وتقديري
اخوك
ابو عبدالله

[q81963]

ياخوي يالفوار انت تعلم المستقبل..؟استغفرالله
لا انا ماطلبت ولاشي ولا محتاج اصلن
بعدين احسن من الي قعد يبكي عند الخالدي علشان كلب وانتو بكرامه وهذاك سااحب علييه كااك

[الذود العفر]

الله يهديك بس ..

لاتعليييييق ..

[القـــناص]

اخوي/ راصد بيئي

تبي رأيي بدون زعل , اتمنى انك تفتك من وجع الراس وريح بالك , ومنت مكلوف في احد ..

اتمنى ان كلامي مايزعلك

[الفوار2008]

ياخوي يالفوار انت تعلم المستقبل..؟استغفرالله
لا انا ماطلبت ولاشي ولا محتاج اصلن
بعدين احسن من الي قعد يبكي عند الخالدي علشان كلب وانتو بكرامه وهذاك سااحب علييه كااك


ودي افهم وش اللي اوحى لك اني اعلم الغيب او المستقبل على قولك

ياخي انت يبيلك وزن بلوف
تسمع الكلام وتفسره على كيفك
الله يكفينا شرك بس
السلام خير ختام
وراصد انا مع اخوي القناص
هذا اللي يجيك من ضعاف النفوس يالغالي
طرار ويبي كبك بعد
سلام

[الذود العفر]

اخوي/ راصد بيئي

تبي رأيي بدون زعل , اتمنى انك تفتك من وجع الراس وريح بالك , ومنت مكلوف في احد ..

اتمنى ان كلامي مايزعلك

كلام عين الصواب ,, مالك ومال الطلايب ياراصد بيئي

ريح راسك وأفتك من وجع الراس أفعل خير تلقى شر ,,

[نايف العويمرى]

مشكوووووور...

[ابو ثآمر]

أخوي الكريم

الموضوع مافيه مذله لأحد بالعكس
الموضوع كبر عن حده بزياده صار اي واحد يطلب جرو وبعد فتره يرميه
وماذكرنا اسم عضو معين عشان تقول شهرنا فيه الله يهديك
ولا ابي احد يشكرني ولا شيئ

معلومية : انا اقول وأطول ياغالي
وياليت كان اسلوبك أرقى من كذا لأن اللواحد اذا فقد الأسلوب والأخلاق وش يبقى له؟؟؟

تحيتي لك


كفو والله

انت فــآعل خير

بس على فكره يا راصد

نص الردود اللي يقوولوون وجع رااس أكيد ان عندهم سلق

ولآ غيرهم وانا اخوووك يدوووروون لهم سنين ولآ حصلو منهم المتولعين فيها

والله يقووويك على الخير ورــآعي أوله

[ابوحمد 2009]

الله يوفقكم

[مستر غربال]

اخوي الكريم اولا اشكر جزيـل الشكر على طرح هالموضوع

وانا اشوف هنا في رجال شرواكم فيهم كرم واخلاق ويهدون الابـل

اخوي انا والله شفت ايضا ماشفت انت طلبات واجد


لاكن البدو قالوها قبلنا ((( مرضي الناس كايــد ))) مستحيل ترضي الناس


وبيض الله وجهك ياخوي وتقبل مروري المتواضع .

اخوكم


مستر غربال ~~

[الذود العفر]

كفو والله

انت فــآعل خير

بس على فكره يا راصد

نص الردود اللي يقوولوون وجع رااس أكيد ان عندهم سلق

ولآ غيرهم وانا اخوووك يدوووروون لهم سنين ولآ حصلو منهم المتولعين فيها

والله يقووويك على الخير ورــآعي أوله


ياأخي بغض النظر أن كان عندنا سلق ولاماعندنا سلق ,,

أنا أقوله وجع راس لأن الرجال فاعل خير وبعض الناس قامت

تسبه ليه يااخي كذا ,, الرجال ماهو بحال هالمشاكل وهالسب اللي

يتعرض له ..

[كمبو]

صح كلامك اخوي راصد

اغلب الطلبات للي مشاركاتهم ماتتعدى الـ 15 مشاركة

واقتراحك عين الصواب

مششكوور ع الموضوع

[راصد بيئي]

مشكورين إخواني على تواجدكم ومروركم

وانا أسمحولي اعارض بعض الإخوان الي قال ريح عمرك ولاتوزع
يعني عشان واحد سفيه وطفل سبني اقوم ابخل باللي عندي؟؟

عموما كل واحد له وجهة نظر وأنا أشوف لو الجميع امتنع عن اهداء السلق بإستمرار بتشوفون سرقات للسلق الكل راح يندم عليها
بالنسبه لي اوزع 6 جراوه ولا ينسرق كل حلالي لأن حلالي فيه شيئ ثاني غير السلق واغلى منه بواجد

تحيتي لكم