الآن السدا بدأ يثقل على الرياض الله كريم

[((أبو أسامة))]

الآن السدا بدأ يشاهد على الرياض من الغرب والشمال الغربي وبدأ يثقل عسى الله يأمره ويولف بينه

الخير في الطريق انشالله هذه آخر صورة للسحاب
http://www.mekshat.com/pix/upload/images8/mk14779_me_satintl_440_mdy_y.jpg

عطونا اخباركم ياهل حايل ياهل القصيم ياهل الزلفي ياهل سدير ياهل الوشم ياعموم اهل نجد وش جاكم وش عليكم

واقول لاخواني رواد الخيمة ما تحسون اننا تعودنا على السحاب والخير ولا عاد نصبر على الصحو والا لا

وانا عندي احساس بأن الله سبحانه جامع لنا صبة طيبة وكمخة عظيمة على نجد في الأيام القادمة

والله سبحانه ليس لكرمه حدود

اللهم اغثنا اللهم اغثنا اللهم اغثنا برحمتك يا ارحم الراحمين


استغفر الله استغفر الله استغفر الله

[إبراهيم الفوزان]

فتى الحريق الحين الساعة الرابعة بالقصيم والجو روعة تقول باريس وسبحان اللة السحاب ثقيل موب مزن تقول خيال ديم سبحان اللة

[مخايل المزون]

الله يجيب المطر الي يغسل ذنوبنا إن شاء الله وإنت يافتى الحريق إذا عندك رحلة مكوكية ثانية لاتنسانا

[العنبري1]

أخوي فتى الحريق
من الظهر إلى المغرب ما شفنا الشمس إلا شوي في شقراء

بس الظاهر والله العالم إن السحاب متوسط وعالي

الله يجيب الرزق.......

[أبــوريـــان]

فتى الحريق الحين الساعة الرابعة بالقصيم والجو روعة تقول باريس وسبحان اللة السحاب ثقيل موب مزن تقول خيال ديم سبحان اللة


صحيح اخوي فتى الحريق الجو عندنا مثل ماقال اخوي الكليبين

حائل جاهم رش ع صلاة الفجر

تحياتي اخوك
ابوريان

[""الشاهين""]

هبت علينا مساء اليوم رياح شمالية قوية وباردة تقول في الشتاء سبحان الله والجو ماشاء الله من الصبح هو مغيم

[خالد العوض]

السلام عليكم ياخوان
بالنسبه لتوقع هطول امطار في الايام العشره القادمه محتمل لكن الفرصه بدات تقل يوم عن يوم
لكن اذكر في سنه من السنوات هطلت امطار في اخر يوم من الصيف بعضكم يقول كيف عرفت ان هذا اليوم هو اخر يوم
اقول شفت بعين ظاهره اول مره اشوفه وهي ان السحب الي امطرت اليوم جاء بعده بيوم واحد فقط قطع مزن من جهت الجنوب الشرقي وقدوم السحب من الشرق اكبر دليل على انتهاء الصيف ومنها الاعصار الي يضرب السواحل العمانيه وهذا باقي
عليه والله اعلم 15 يوم والله يستر عليهم

[((أبو أسامة))]

اليوم في قناة المجد هطول امطار على الطائف

اقول يا خالد لاتضيق صدورنا

ترا ما خذنا حقنا من مراوح الصيف

الخير في الطريق انشالله

انتظر أيام وتجيك الأخبار من نجد

باذن الواحد الأحد

[حـــادي]

طبعاً كل شي بأمر الله وموسم الأمطار شارف على الإنتهاء إن لم يكن بالفعل انتهى والسحب المشاهدة اليوم ماهي الا سحب عالية خفيفة وليست من النوع الممطر أو تدل على قرب المطر وليست بسدا الذي يسبق السحب الممطرة والله أعلم .

[خالد العوض]

صحيح اخوي حادي
كل شي بأمر الله وترى القيض بعض المرات يجي فيه مطر على الوسطي خاصة
اذ كان فيه رطوبه محسوسه على سطح الارض
http://www.arab7.com/up/file/1117256395802.jpg

[""الشاهين""]

إحتمال ياخوان إن وقت المطر إنتهى والدليل استمرار الرياح الشمالية الغربية ويمكن هي رياح البوارح لأن الفلكي جبر يقول إنها تتهب في ألأيام المقبلة وعلى فكرة ترى شهر جماد الأول والثاني بتصير الرياح السائدة الشمالية الغربية يعني بداية موسم البوارح والله يعين بس تراهي تلطف الجو وتخفف من حرارة الصيف