المساعد الشخصي الرقمي

مشاهدة النسخة كاملة : ابحث عن محادق في الشرقية


Keynes
28/05/2005, 02:05 AM
السلام عليكم
بداية احب ان احيي رواد هذا المنتدى الجميل من مشرفين واعضاء
في الحقيقة انا تعبت وانا ادور عن مواقع حداق (سيف) في المنطقة الشرقية ... وانا الحين ابى نصيحتكم (وين احدق؟؟) .. الرجاء اللي يعرف اي مكان في الشرقية عساه اخر الشرقية يدلني ..
و سلامتكم
Keynes
28/05/2005, 12:25 PM
....................... :)
منتظر ردودكم
MARINE
28/05/2005, 12:28 PM
السلام عليكم ورحمة الله وبركاته

حياك الله اخوي keynes ايش نوع الحداق اللي تبي وانا حاضر

تحياتي لك

MARINE
Keynes
28/05/2005, 12:33 PM
حداق من السيف بالسنارة .
gulfhunter
28/05/2005, 01:04 PM
السلام عليكم ورحمة الله وبركاته

حياك الله Keynes في منتديات مكشات وبالأخص خيمتنا البحريه..... وان شاء الله تلاقي اللي يودك فيه وازياده........

شوف الرابط اللى تحت وابشر بالخير ..... واذا عندك اي استفسار ...... حاضرين .....


http://www.mekshat.com/vb/showthread.php?t=22802

http://www.mekshat.com/vb/showthread.php?t=21406

GULFHUNTER
Keynes
28/05/2005, 07:13 PM
والله مشكور Gulfhunter .. ماقصرت ..
بس عندي كم استفسار..
ممكن تعطيني نبذة بسيطة عن المواقع التالية : (مثلا طبيعة المنطقة, كم كيلو تبعد عن الدمام (بشكل تقريبي) , تحتاج تصريح او لا ؟ )
أبوقميص, راس الزور, راس الغار,راس مشعاب, راس أبو علي, العقير,راس مشعاب ,سلوى ,تناقيب، السفانيه
اتمنى بعد الشباب اللي عندهم خبره يشاركونا ويفيدونا
MARINE
29/05/2005, 12:15 AM
السلام عليكم ورحمة الله وبركاته

حياك الله اخوي keynes ما شاء الله عليك شكلك تبي تعرف كل شئ عن الخليج

اسمع طال عمرك عندك من الخفجي الى منيفه اخوي ابو عبدالله يقدر يفيدك (gulfhunter)

اما انا ابقولك من عند الجبيل طبيعة البحر هناك متنوعه رمليه وصخريه في بعض الاماكن

ونوعية الحداق مشكل شعري فسكر سبيطي شعوم دويلمي

اما بالنسبه للدمام فيها سبيطيه وشعري وقرقفان وفسكر وهوامير بس للي خابر مناطق زينه

وفي موسم الكنعد مالك محل .

الخبر حداقه عسر جدا بسبب التيارات القويه يعني ما تصلح الا بقارب

القريه فيها شعري سبيطي عريضي هوامير وهم بعد للي خابر المنطقه

العقير نفس الشئ لان العقير تبعد عن القريه تقريبا 20كم لكن ما يعرف للعقير الا

الناس اللى تعرف البحر من قبل 20 سنه ومحدقها صعب جدا

نجي حق ابو قميص وهذا افضل مكان تقدر تروحه وابعد مكان في نفس الوقت

ويحتاج الى تصريح من سلوى قبل ماتروح لابوقميص

وتبعد من الدمام قرابة 500كم تقريبا والحداق فيها اغلبه شعري يحبه قلبك

مخدات ماهو شعري لكن يبيلك ناس خابرين المنطقه زين حتى توسع صدرك لانه

مو من جاك صاد في هالمنطقه ...

تحياتي لك واتمنى اني افدتك وما طولت عليك واتمنى لك التوفيق

MARINE
Keynes
29/05/2005, 01:26 AM
مشكور اخوي Marine على الرد الوافي ماقصرت ياخوك



اما بالنسبه للدمام فيها سبيطيه وشعري وقرقفان وفسكر وهوامير بس للي خابر مناطق زينه
انا جربت الفن تايم .. ماادري هل في محل احسن؟؟


القريه فيها شعري سبيطي عريضي هوامير وهم بعد للي خابر المنطقه
وين القرية؟

العقير نفس الشئ لان العقير تبعد عن القريه تقريبا 20كم لكن ما يعرف للعقير الا الناس اللى تعرف البحر من قبل 20 سنه ومحدقها صعب جدا
وين اتصير العقير ؟ كم تبعد عن الدمام؟


نجي حق ابو قميص وهذا افضل مكان تقدر تروحه وابعد مكان في نفس الوقت

ويحتاج الى تصريح من سلوى قبل ماتروح لابوقميص
هذا شكله في العطلة انشالله رايحين له.

، :)
Keynes
29/05/2005, 01:33 AM
اسمع طال عمرك عندك من الخفجي الى منيفه اخوي ابو عبدالله يقدر يفيدك (gulfhunter)
الاخ gulfhunter بما انك الخبرة في الشمال .. ودي تقولي وين افضل مكان للحداق في منيفة لاني صراحة رحت مرتين من قبل والصيد ماكان لهناك .. على مااذكر حداقنا كان عند القصة اللي اهناك.
معليش تحملوني شوي اذيتكم بكثر الاسئلة ...
gulfhunter
29/05/2005, 06:43 AM
السلام عليكم ورحمة الله وبركاته

حياك الله أخوي Keynes .... ابد خذ راحتك...... بالنسبه إلى الحداق في المناطق السيفيه..... لازم تحط في بالك ان السمك جوال ولا يجلس في مكان ....... ويمكن تصيده اليوم في مكان بكره ماتلاقيه....... وانت عارف انك كل نوع له فتره يكون متواجد فيه بكثره....... وهنا يكون وقت الحداقه في ملاحقته من مكان إلى مكان.....

بالنسبه إلى منيفه .... وين القصه...... ياريت لو توضحلي.......

بالنسبه إلى التصاريح تلاقيها في نفس المناطق اللى بتروح لها ...... الأ المناطق الممنوعه...... لازم من القياده......

شوف الرابط اللى تحت وان شاء الله تلاقي اللى ودك فيه عن منيفه......

http://www.mekshat.com/vb/showthread.php?t=16197

GULFHUNTER
Keynes
29/05/2005, 10:57 AM
مشكوووور Gulfhunter الرابط ممتاز جدا ماقصرت ... شرح وخرايط ماشاالله عليك .
Keynes
29/05/2005, 10:59 AM
للمشرفين .. ليش ماتجمعوا المواضيع اللي تتعلق باماكن الحداق الزينة وتحطوها في موضوع واحد (روابط)
لان البحث في المنتدى مايساعد .. كل مرة ابحث عن حاجة مايطلع لي نتيجة.
gulfhunter
29/05/2005, 11:09 AM
السلام عليكم ورحمة الله وبركاته

حياك الله أخوي Keynes.... أنت تامر ....... وانا والأخوان حاضرين للطيبين اللى مثلك وشرواك.....

بالنسبه إلى طلبك الثاني .......... المشرفين يسنعونه.........

GULFHUNTER
MARINE
29/05/2005, 01:33 PM
السلام عليكم ورحمة الله وبركاته

اخوي keynes كيف حالك ان شاء الله بخير

القريه طال عمرك نقول انك جاي من الدمام ورايح على الهافمون تعرف شاليهات الخليج

فيه قبلها لوحات اعلانيه كثيره وإحدى اللوحات تلقى مكتوب عليها

ميدان الرمايه جو ارض خذ معه يمين وفيه لفة يسار رح معها

امش طوالي الى ما يجيك شاطئ ارامكو القريه طبعا اذا كنت من عمال ارامكو

او عندك ID يمديك تدخل اما اذا ما عندك حظ اوفر

كمل الطريق على طول راح ينعطف الطريق فيك لانه مقابلك معمل تبع ارامكو

اتبع الطريق حتى يقابلك معمل سكيكو انعطف يمين وروح اى نهاية الطرق

مع نهاية الطريق T خذ يسار ورح على طول حتى تجيك العقير

اما بالنسبه لابوقميص ما انصحك تروح في الصيف

لان درجات الحرارة عاليه جدا والصيد قليل

استنى الموسم الجاي والله يوفقك

تحياتي لك

MARINE
Keynes
29/05/2005, 02:37 PM
مشكور اخ Marine على الشرح الوافي انشالله في الاجازة نروح انجرب العقير ونجيك بالاخبار الزينة
Keynes
29/05/2005, 02:52 PM
gulfhunter ممكن شوي من وقتك .. واذا بعد صاحب الخريطة ابو راشد موجود ياريت يساعدني لاني ابي توضيح بسيط بالنسبة للخريطة حق منيفة
http://www.mekshat.com/pix/upload/images8/mk15145_mnifah094map.jpg
انا اذكر كم حاجة من الخريطة .. بس ابيك اتاكد لي هالمعلومات عشان اقدر احدد المواقع ..
1. بالنسبة لرقم 6 .. ممنوع او لا؟؟ (لاني سمعت انه ممنوع فياريت توضح لي)
2. موقع رقم 2: انا لما رحت شفت جزيرة صغيرة مو بعيدة واجد عن السيف,اذن احدق مقابل راس الجزيرة صح ؟؟؟
3. موقع رقم 1 : على ما اعتقد هذي القصة (او الضلع : ماادري ايش اسمها المهم هناك المويه عميقة
واخيرا في شي لفت انتباهي في الموضوع اللي في الرابط (ابو راشد)

( احذر ) منيفة ترى فيها صبخ اقشر فانتبه من اي صبخه ولا تغامر وانتبه من الرمل والتغريز
معليش شباب بس وش معنى (صبخة ) :j
وفي الاخير تحية شكر مزدوجة لكل من Gulfhunter و Marine و ويعطيكم العافية وماننسى ابوراشد على الخريطة العجيبة
gulfhunter
30/05/2005, 07:36 AM
السلام عليكم ورحمة الله وبركاته

هلا بك اخوي Keynes .....خذ راحتك ........

بالنسبه إلى رقم (6) يوم ممنوع ويوم مسموح ... يعتمد على خاطر اللى انت رايح له.... :eek:
بالنسبه إلى رقم (2) زي ماتفضلت .... ولاتنسى احساس الحداق بوجود السمك والمكان الزين... وهذي اسياف...
بالنسبه إلى رقم (1) هذي حاله تطلع إذا كان البحر جزر(المايه ثابره) ويصير طريق إلى دردور وفي نهاية الطريق بيظهر قص ..... تحدق عنده...... لكن انتبه إذا سقت المايه.......

الصبخ شلون اشرحلك ايها............. شكلك رايح منيفه من قبل ......ok .... إذا دخلت منيفه ومشيت لك مسافه ...يجيك منحنا وبعده أعمدت الكهرب (الخشب) اللى قبل المنحنى من يمين ويسار الخط هي الصبخ......
والصبخ بحد ذاتها المكان اللى يتجمع فيه الماء وبعدين ينشف ويكون مكان طيني ولكن القشره الخارجيه تخدع.....

وان شاء الله اني قدرت اوصلك ولو جزء من الي انت تبيه.........

والله يوفقك بالصيدالطيب........

GULFHUNTER
Keynes
30/05/2005, 05:22 PM
مشكور ياخوك

بالنسبه إلى رقم (1) هذي حاله تطلع إذا كان البحر جزر(المايه ثابره) ويصير طريق إلى دردور وفي نهاية الطريق بيظهر قص ..... تحدق عنده...... لكن انتبه إذا سقت المايه.......
هذا المكان ادله (الخور) ... بس اذا قررنا نروح .. (بعد اسبوعين تقريبا) ابيك تساعدني في اوقات المد والجزر بحكم ترددك على المنطقة.
وعلى العموم مشكور يا Gulfhunter ماقصرت صراحة
gulfhunter
31/05/2005, 07:31 AM
السلام عليكم ورحمة الله وبركاته

حياك الله أخوي Keynes .... حاضر باللي تبي...... وبالنسبه إلى المد والجزر بعد اسبوعين إذا تقصد الأسبوع 06/08...... بتكون المايه الفجر طاقه طبوله (( أعلى المد)) وبعدين ثبر إلى بعد المغرب..... يعني الخور صعبه عليك....

GULFHUNTER
Keynes
31/05/2005, 12:09 PM
هلا اخوي Gulfhunter

بتكون المايه الفجر طاقه طبوله (( أعلى المد)) وبعدين ثبر إلى بعد المغرب..... يعني الخور صعبه عليك....
اي والله الخور ماينطب بالليل :j ..
نحدق في الاماكن الثانية .. وانشالله خير ... الارزاق بيد الله
mr-albreak
18/07/2011, 08:30 PM
وين ياالحبييب وين كنت تحفر وطلعت هاالموضوع ؟؟؟:confused: