مغاليس
05/05/2010, 10:18 AM
صباحكم او مسائكم خير أن شاء الله .
بعد الربطه عدنا لكم يا احلى منتدى .
اليوم عندى لكم قصه وقصيده ان شالله تعجبكم وتسليكم لين النقله الله يجيبها على خير.
بدايات الموسم الماضى شريت لى طير بكر مربوط على وحاشه يعنى ما دهل عدل المهم
دهلت الطير وزينت طبعه ولو ان طبعه حيل صلف ولازال صلف وهذا اللى محببنى فيه. ويوم قام يجى على الملواح قمت ادعيه يوميا عشان اعطيه حقه باللياقه
ويجى يوم الجو الغيم والبر يشرح الصدر وانا بالمدعا الا هذاك الجيب مولع الليت ويطرد زاجل يبى يرميه بالبندق ولا قدر من سرعته طبعا يوم قرب عرفته واحد من الربع وكان يبى يرمى الزاجل عشان مايفلس منه طيره الجير لانه تعب ولا قدر يلحق من قو الزاجل
لحقت الزاجل وهديت عليه ابى اشوف طيرى على الصيد شلون طرده وما اقول الا ماشالله تبارك الله ماطول الا والزاجل بكفه وكانت بدايه حلوه لانه بعدها اردفت فيه على طيور وعلى شياهين بعد قولو ماشاالله :mad:
المهم قلت بيتين :
اللـــــــه يستر على عفات
......... يومه لحقله سما وعلق
زاجل مروح على الجيبات
.......... وشفط على الجير والبندق
المهم ردينا للعزبه وتقهوينا والعلم انتشر ويسأل واحد الربع عن الهدد اللى صار وعن جناح طيرى عفات ويرد عليه اخوى و الظاهر انه يبى يغيضنى عشان اتهيض تعرفون معايا صقاقير
جناحه جداً عادى !!!!!
قلت ::
قالوا جناحك حيل عادى وطنشت
........................ ماكنى اسمع يا العديم النداوى
صقار وافهم بالموارى ولا طشت
....................... وادرى جناحك بالمعاند رهاوى
لاهنت يا عفات لو حشت ما حشت
......................... ماكل بشتٍ لا لبسته حساوى
يا قبلة الله يا حجاجك ليا ششت
....................... وعيونك اللى لا نظرتك تداوى
جرحى وفيها سجتى لا تبلشت
.........................واشوف فيها للمعشا حراوى!
ولارحت تطرد فى رهاوه ولكشت
........................تسر قلبٍ من عنا الوقت ذاوى
والله على توريدتك لا تخفشت
.................... واهويت مثل شهاب نجم ٍ سماوى
من وين ماجيتك وحفتك وفتشت
....................... اشوف بطرافك كبار الهقاوى
ان عاش راسى وانت لى بالزمن عشت
......................... مارد للى بالصقاره عماوى
محشوم يا عفات عن كل ما حشت
..................... ماكل بشت ٍ يا النداوى حساوى
واتمنى انها عجبتكم اخوكم ::: :l
مطلـــــق الفزران
بعد الربطه عدنا لكم يا احلى منتدى .
اليوم عندى لكم قصه وقصيده ان شالله تعجبكم وتسليكم لين النقله الله يجيبها على خير.
بدايات الموسم الماضى شريت لى طير بكر مربوط على وحاشه يعنى ما دهل عدل المهم
دهلت الطير وزينت طبعه ولو ان طبعه حيل صلف ولازال صلف وهذا اللى محببنى فيه. ويوم قام يجى على الملواح قمت ادعيه يوميا عشان اعطيه حقه باللياقه
ويجى يوم الجو الغيم والبر يشرح الصدر وانا بالمدعا الا هذاك الجيب مولع الليت ويطرد زاجل يبى يرميه بالبندق ولا قدر من سرعته طبعا يوم قرب عرفته واحد من الربع وكان يبى يرمى الزاجل عشان مايفلس منه طيره الجير لانه تعب ولا قدر يلحق من قو الزاجل
لحقت الزاجل وهديت عليه ابى اشوف طيرى على الصيد شلون طرده وما اقول الا ماشالله تبارك الله ماطول الا والزاجل بكفه وكانت بدايه حلوه لانه بعدها اردفت فيه على طيور وعلى شياهين بعد قولو ماشاالله :mad:
المهم قلت بيتين :
اللـــــــه يستر على عفات
......... يومه لحقله سما وعلق
زاجل مروح على الجيبات
.......... وشفط على الجير والبندق
المهم ردينا للعزبه وتقهوينا والعلم انتشر ويسأل واحد الربع عن الهدد اللى صار وعن جناح طيرى عفات ويرد عليه اخوى و الظاهر انه يبى يغيضنى عشان اتهيض تعرفون معايا صقاقير
جناحه جداً عادى !!!!!
قلت ::
قالوا جناحك حيل عادى وطنشت
........................ ماكنى اسمع يا العديم النداوى
صقار وافهم بالموارى ولا طشت
....................... وادرى جناحك بالمعاند رهاوى
لاهنت يا عفات لو حشت ما حشت
......................... ماكل بشتٍ لا لبسته حساوى
يا قبلة الله يا حجاجك ليا ششت
....................... وعيونك اللى لا نظرتك تداوى
جرحى وفيها سجتى لا تبلشت
.........................واشوف فيها للمعشا حراوى!
ولارحت تطرد فى رهاوه ولكشت
........................تسر قلبٍ من عنا الوقت ذاوى
والله على توريدتك لا تخفشت
.................... واهويت مثل شهاب نجم ٍ سماوى
من وين ماجيتك وحفتك وفتشت
....................... اشوف بطرافك كبار الهقاوى
ان عاش راسى وانت لى بالزمن عشت
......................... مارد للى بالصقاره عماوى
محشوم يا عفات عن كل ما حشت
..................... ماكل بشت ٍ يا النداوى حساوى
واتمنى انها عجبتكم اخوكم ::: :l
مطلـــــق الفزران