فتك 2009

[الحزوبر]

السلام عليكم ورحمة الله وبركاته

انا عندي فتك2009 ماخذه جديد من الوكاله

ودي اسال عن المشاكل اللي تطلع مع الاستخدام مع العلم اني راعي حلال واسبوعيا لازم مشوار للبر اقل شي 300كلم غير ممشا الديره

كذلك اسال عن الحلول للمشاكل كذلك الاجرائات الاحترازيه اللتي يجب فعلها واللتي سوف تمنع او تقلل مشاكل الاستعمال.

ولكم جزيل الشكر.

[HAS5SAN]

الله يعطيك خيره ويكفيك شره
وهو ذيب البراري ولا يهون أخوه اللاندكروزر
أكبر عيوبه شربه للبنزين لأن مكينته بنظام صبابات في تي سي وحجمها 4,8
أي 4800سي سي
أيضاً راح يطلع لك اصوات هرقله من كل صوب بما أنك راح تهريه بالـ300كم
إذا قيره أوتوماتيك حالو يكون ضغط الإطارات أقل من 30 ودائماً في الطعوس والمراقي استخدم
نظام التربتيك + ـــ فهو يريح القير
لو أخذت نصيحتي قبل شرائه لهذه المهمة
لنصحتك بالهدد2007 أو بالسلق (نيسان )2009

[العابر2222]

الله يعطيك خيرة ويكفيك شرره

هو الموتر .... ولابه عذاريب ... ويعزك برر ودييررة

قوة مكينة + صرفية للبنزين عادية جدا (اقل من التايوتا بواجد) + ارتفاع عن الأرض + اريح من التايوتا بواجد + نظام التربونيك اقوى من العادي بواجد + مطبة خفيف + ممشى في الخط ..... الخ

والله يقنيك بركته

[سالم11]

ما عليك عز الله خذتا موتر الله يبارك لك فيه توكل على الله وامورك طيبه ان شاء الله

فتك يطربك وسند عليه باذن الله

[ولد وايل..]

ماعليه خلاف بإذن الله ...

بس جيزه جيز اي موتر لا تهمل صيانته...

حاول ما يم ست شهور الا مويتز تحت الحفرة اما انت ولا مكانيكي ....


لا تخليه لين يقول مكاني....

[عاشق الغضا]

1/انصحك انك تحط بالكفرات 25 هواء لان كفرات الباترول برجستون قاسية بالمرة ,2/ واذا دخلت البر تحول القير للعادي تحطه بالرابع على حسب السرعة 3/ وانصحك اذاكنت راعي بر تركب مساعدات قدام وورى, قدام مرسدس اوحق جيب شاص والافضل مرسدس وورى تركب مساعدات شاص , صح الموتر بصير قاسي شوي لكن مايهابد

[قرم العيال]

بما انك راح تستخدم الاستخدام الصح للجيوب وهو الكرف والخطوط
عليك بالصيانه لا تهمله بس

وصيانتك راح تكون على الممشى يعني كل 30 الف شيك

[الحزوبر]

الله لايهينكم على المرور والنصائح الطيبه

عزالله نومستوني بمدح الفتك وللعلم انا استخدمت الباب واحد 2000 و2003 وبهذلتني خصوصا ال2003 يطفي وتوه على التمرين مامشى عشرة الاف وكل يوم وهو واقف بي على خط ولا في بر المهم زعلت على وكالة النيسان وقلت لي ابيات هجاء وحولت على الهدد الكروزر وعزالله انه شيخ المواتر شريت 2001مستعملg وبعده2003gوكاله وبعده 2006gxوكاله ولاواحد منها دخل ورشه اخرها ال2006 بعته ماشي 250000مادخل ورشه حتى زيته احيان يتعدى العشرة الاف كيلو ماغيرته وعلى قولت ابن فطيس:
وياخذ شهر مايكشف السايق عياره

المهم جيت للتويوتا الجديد ماعجبني مره لانه صار كله ازار ولاعاد فيه لامفتاح ولادبل قير صار مهو موتر بر بالعربي وكلش ولا 6سلندر هذا اردى المواتر كلها عزمه ولا عزم هايلكس قديمه

قلت ياولد مابقا من السيارات اللي تصلح للبر وللبدو اللا الفتك مفتاح وقير ارضي ودبل ارضي ودفرنشين واستخرت وشريته وعزالله الموتر مايبي حكي والموتر قير عادي ومن شريته وهواه 25 وماشاء الله عليه في الخط وفي البر بس انا حبيت اسال عن المشاكل المحتمله لاجل اتلافاها قدر الامكان

بقا الابيات اللي سبيت فيها النيسان وستثنيت الفتك بعد ماجربته:


عسى يكيّم الرختر على مصنع النيسان=ومن شدة الهزّه تخربط حساباته

شريته جديد وكل يومن وهو خربان = وزود الدهر محدن يعرف لخراباته

على سطحتن وللا يسحّب مع البرّان = وراعيه صارت شغلته ودّه وهاته

فلاشك ابستثني الفتك حيث فعله بان = يشق الرمل والخط يطوي مسافاته

ودفعه لمامي في البلد دايمن مصتان = ولامن ضربت الرمل عشّقت ويلاته

دبله ارضي ولا صنع للسايق الكسلان = ولا هو سوات اللي تعلّق زراراته


مصتان يعني مرتاح

وسلامتكم

[زمان الصمت 1]

مشاركه مميزه

[الحزوبر]

التميز مرورك يازمان الصمت