آرجو النصيحه في طراد 21 قدم

[Khalid-2004]

آرجو النصيحه في طراد 21 قدم...

السلام عليكم ورحمه الله وبركاته...

انا من سكان الدمام وناوي اخذ لي طراد جديد 21 قدم للفاح او الحداق ولاكن ما آعرف افضل مصنع للطردات في الخليج مع مميزات وعيوب كل مصنع...

شنهي نصيحتكم يا وجيه الخير ;) ؟؟؟؟؟

سبحان الله وبحمده

[MARINE]

السلام عليكم ورحمة الله وبركاته

حياك الله اخوي خالد في منتدى الجميع مكشات وبالاخص الخيمه البحريه

لست خبير طرادات ولكن اسمع الكثيرين يمدحون الروضان

انا جربت اكثر من طراد جربت جلف كرفت حجم 18،19

وجربت روضان حجم 24 قدم فيه فرق رهيب جدا بينهم

والروضان يكون ثقيل شوي يعني يحتاج مكينه قويه حتى تمشيه وانت مرتاح

هذا اللى اقدر افيدك فيه وان شاء الله باقي الشباب ماراح يقصرون معك

هم عندهم خبره في الطرادات احسن

تحياتي لك

MARINE

[mox600]

والله يا اخوي انا كان عندي 18 روضان كويتي عليه مكينه 140 ياماها
بصراحه الطراد راسي في البحر ومسكت
بس عيبه انه غير مريح ابداً ما فيه كراسي
يعني طق التربيعه واجلس .

اللحين انا عندي 19 صنع الامارات عليه
ماكينتين 85+85 ياماها والحمد لله تمام

بس نصيحه شوف لك شي جلسته مريحه ولا والله بتتحسف .

[Khalid-2004]

السلام عليكم ورحمة الله وبركاته

شكراً لكم على مداخلاتكم القيمه و أنا فى انتظار المزيد من المداخلات من الآخوه زوار المنتدى....

ماهو رآيكم في مصنع الدانه للطرادات الذي يوجد في صناعيه الدمام؟؟

[كشات]

بسم الله الرحمن الرحيم
السلام عليكم ورحمة الله وبركاته


من حق المنتدى علي ان ابدي رايي
فكم استفدت الكثير من الفوائد الكبيره من هذا المنتدى العريق والمفيد لنا جميعا

اخوي خالد

اولا انا لست بخبير قوارب
ولكن اللي اعرفه بقوله حتى نستفيد جميعا من خبرات بعض

بالنسبه للقارب ماهو سبب شرائك له(في الغالب)
-للصيد في مباحر(اماكن) بعيده وبحر غزير؟
-للصيد في مباحر قريبه واماكن ضحله(رق)؟

حسب معرفتي ان مباحر الدمام كلها بعيده واغلبها ورا راس تنوره او في ابو سعفه والوشير

على العموم
بكتب اللي اعرفه عن ثلاث انواع من القوارب ايجابياتها &سلبياتها
النوع الاول ((V))
ايجابياته
المباحر البعيده والغزيره غالبا يكون موجها عالي حتى لو الهوا خفيف
وفي هالحاله افضل شي القوارب اللي يكون بطنها من تحت على شكل V او 7
كلما زادت حدة الزاويه كلما كانت مقاومته للموج واختراق الموج افضل وبالتالي فالقارب لا يرقا او يعتلي الموجه واذا نزل منها كفخ صدره وسبب مطبات و راش(الماء المتطاير من الموجه) وبلل الركاب
هذا بالنسبه للايجابيات
اما السلبيات
في الوقوف اثناء الحداق يكون اهتزازه وتمايله اكثر من غيره وسبب التمايل هو وجود اكثر من شخص يحدق على نفس الجنب وهذا لابد منه
ويلاحظ هالامر اكثر اذا تحرك شخص (من الوزن الثقيل) لاي سبب من جهه لاخرى
كثرة صرفية الوقود ويرجع السبب الى حاجته لمكائن كبيره لدفعه لان الغاطس(اسفل القارب)يكون احتكاكه بالماء اكثر من القوارب الاخرى
كثرة الاحتكاك (اللحام) في المناطق الضحله (الرق)غاطس عميق + ساق المكينه

النوع الثاني (( الهامور))
ايجابياته
الاتساع وانخفاض جوانبه بالتالي يسهل رفع الصيد
رساوته اثناء الحداق وتلاحظ هالشي اذا جلس اكثر من شخص على نفس الجانب للحداق او تنقل احاب الاوزان الثقيله بين الجانبين فانه لايميل بقوه مثل النوع السابق
قلة صرف الوقود وصغر حجم المكينه ويرجع السبب في ذلك لان بطن الطراد(الغاطس)في الماء قليل وبالتالي يقلل من احتكاكه
خفة الوزن وهي ميزه تضاف لما سبق
قلة الاحتكاك بالمناطق الضحله (الرق)

سلبياته
يكسر الظهر بالموج حتى لو موج خفيف والسبب لان بطنه(الغاطس) يكون غالبا منبسط او شبه منبسط وان وجد فيه زاويه فهي منفرجه بشكل كبير (لاتكسر الموجه بسهوله) +خفة الوزن فهو لايخترق الموجه بل يعتليها واذا نزل صدره من الموجه انتظر الكفخه والراش :(


النوع الثالث ((ًًW))
هذا النوع قليل
وقليل الفوائد ايضا
بطن القارب يكون على شكل Wبالتالي فهو يحتضن الموج احتضان العاشق لعاشق :D يعني مافيه مجال يكسرها او يعتليها
اهم ميزه فيه انه رااااااااسي جدا اثناء الحداق لو يجلس عشره اشخاص على برد(جنب) مايميل

وهنا يجدر بي ذكر مفخرة القوارب وشيخهم جميعا (البوستن ويلير) فهو يجمع بين ال V وال W
لكن الجديد غالي جدا جدا :no2:

بالنهايه اخي خالد اسف على الاطاله في الشرح
واتمنى انك تزور معرض الضاعن بالبحرين عندهم 27 قدم بطنه مثل ال V وسطحته كبيره وواسعه ووزنه خفيف
وسهره جديد (قرف)فقط بحدود 22 الف او اقل بشوي

شريت 22 قدم الضاعن قبل اكثر من 10 سنوات وماشاء الله تبارك الله ممتاز جدا بس مايصلح لمباحر الدمام لانه خفيف وبطنه مسطح
احسن شي له الخبر ورقوق الخبر
واي مساعده اقدر اسويها يا اخ خالد انا جاهز


واسف للمره الثانيه على الاطاله

[Khalid-2004]

السلام عليكم ورحمة الله وبركاته

شكراً لك أخي الكريم على هذا المقال وماشاء الله كفيت ووفيت...بيض الله وجهك اخ كشات ولا يهونون الجماعه و القراء الكرام...

بس عندي كم سؤال....

وين موقع مصنع الروضان في البحرين؟؟ عندك رقم التلفون؟؟

وهل عندهم احجام قروف اصغر من 27 قدم؟؟

وكيف تجهيزات الطراد؟؟ يعني فيه كراسي ومريح في الجلسه؟؟

اما على الطرادات الآمريكية فهي فخر الصناعه وبدون استثناء وفيها مميزات تاخذ العقل وتخليك تقول عن الطراريد المصنعه في اللخلج انها ماتتعدا "اعزكم الله" بانيو الحمام بس ابماكينه :D
لاكن الشكوه لله غاليه جدا جدا....

تخيلو ياشباب انها مصممه بطريقه تمنعها من الغرق...

اقرآ بنفسك
http://www.evergladesboats.com/ramcap.html

[كشات]

الاخ خالد

وضعت لك رد في بريدك الخاص

وتقبل خالص التحيه والاحترام

[كران]

هلا بك اخوي الغالي ..

والف كبروك مقدماً الطراد .. والله يوفقك ويرزقك من واسع فضله



الروضان .. 24 قدم .. هو الافضل بنظري ..

بالتوفيق

[الاسطورة 13]

الاخ خالد بعدالتحيه0
ممكن تحط لي رقم تلفون مصنع الضاعن بالبحرين اوالاميل الخاص بهم لاني ارغب شراء طراد منهم وشكرا

[كاسر الامواج]

السلام عليكم ورحمة الله وبركاته
احب اضيف الى معلوماتك اخوي خالد ان افضل شركتين هم النورس والضاعن
وبالتوفيق انشاء الله

[سنكرس]

السلام عليكم ورحمة الله وبركاته
الاخ خالد هذا رقم مصنع الظاعن للقوارب 0097317701222
وأتصل فيهم ويحولونك على المكان الي تبيه سواء المصنع او المعرض , وياريت لو عندني فكرة بالطراريد كان خبرتك ولكن طراريد الظاعن حسب طلعاتي فيها تتميز بالخفة لهذا تجد اهل الربيان ما يستغنون عن الظاعن في وقت الممنوع. ولكن سلبيته ماينفع حق الغزير واذا صار بالطراد 6 او 7 اشخاص ممكن يدخل عليك الماي من المرازيم, وعندك مصنع الشرق للقوارب (النورس يمدحونه بس ماجربته)
وعندك قوارب الدرازي وانا استخدمتها وهي ممتازة ثقيلة ورزينة على الماية ما شاء الله عليها .
ان شاء الله اكون افدتك

[فوار استروك]

:no: :no: :rolleyes: :rolleyes: :cool: :eek: شباب انتوا ماعندكم خبر عن الطراريد الموجوده في الامارات افضل واحسن من الضاعن والروضان بالللللللف مره اسألوني عنهم انا عندي اربع انواع منهم 1-بركودا 2-الرهيب 3-السندباد 4-صقر الخليج يناس لايفوتكم شي عجب والله والي يبي يستفسر هذا اميلي/ a5545@hotmail.com

[UAE HUNTER]

السلام عليكم

كلامك صحيح يا فوار استروك

[qwas]

النوع الثاني (( الهامور))
ايجابياته
الاتساع وانخفاض جوانبه بالتالي يسهل رفع الصيد
رساوته اثناء الحداق وتلاحظ هالشي اذا جلس اكثر من شخص على نفس الجانب للحداق او تنقل احاب الاوزان الثقيله بين الجانبين فانه لايميل بقوه مثل النوع السابق
قلة صرف الوقود وصغر حجم المكينه ويرجع السبب في ذلك لان بطن الطراد(الغاطس)في الماء قليل وبالتالي يقلل من احتكاكه
خفة الوزن وهي ميزه تضاف لما سبق
قلة الاحتكاك بالمناطق الضحله (الرق)




اذا تحب طراد جديد اسمع نصيحتي واشتر هامور
عندي هامور 24 قدم يتميز باتساعه ومقاومتة للامواج
والافضل أن تعملة بالبحرين لفارق السعر وجود الشغل
واذا احببت عنوان المصنع بالبحرين فنحن بالخدمة

[gulfhunter]

السلام عليكم ورحمة الله وبركاته

حياكم الله اخواني الموضوع قديم لكن زين انكم حطيتو خبرتكم

واللي ودي في من الأخوان فوار استروك و UAE HUNTER انكم تحطون صور الطراريد ان وجدوا وميزاتهم

الله يوفقك ويبارك فيكم

تحياتي لكم وللجميع

[II^العازمي^II]

أنـا افضل الاتحاد 18
لأن أخفف من الروضان . أو مادري عنه من ناحيه السعر .؟.؟
او قصته ممتازه
بس اذا بتاخذ اخذ القياده مو بالوسط اريح و اوسع
وشكرا


مع تحيات : العازمىى

[riyadco]

اخوي سلام الله عليكم جميعا
جعل الله ما كتبتموه في ميزان حساناتكم ..... امين انا قرأت الموضوع واشكركم على هذه المعلومات القيمة بس الزين ما يكمل مثل ما يقولون ياليت انها مدعمة بالصور . على العموم انا اتمنى من احبابي ان يتكرموا بأرسال ارقام وعناوين المحلات التي تبيع هذه الطرادات سواء في المملكه او دول الخليج مع ذكر القيمة التقريبيه وجزاكم الله عنا كل خير

[Alhzzen]

والله مالي خبرة في الطرادات

[Alhzzen]

والله مالي خبرة في الطرادات

شكرا

[القبقب]

عندك شركة أنمر (القوز الصناعية)في دبي مر عليهم وفالك طيب

[بحريني]

سلام عليكم شباب
انا عندي طراد ( نورس 24 قدم ) من مصنع الشرق للقوارب ، وعليه ماكينة وحدة ( ياماها 200 حصان )
بصراحة الطراد ممتاز ومناسب إلى كل الظروف

[ابوجواهر]

انا من رأي المتواضعه قوارب ياماها أو كييلوا في السعودية ( جدة ) بس شوي غالي ( 29 ) قدم مريح في المشي وفي الصيد وحتى لو معاك شباب يجمل وعليه (2) مواتير 100 ياماها ماشاء الله والله تدعيلي .

[Skyline]

معلومات قيمة من الأخوان
أنا أرغب بطراد صغير يعني تقدر تقول للنزهة ،، صيد على خفيف باللفاح ، يعني مش شغل صيادين
ايش تنصحوني به يا أخوان