استفسار عن الدبة الهندية بريموس

[فواز الشيباني]

السلام عليكم ورحمة الله وبركاته
سؤال هل الدبة الهندية فيها عيب لاني بحثت عن اللي تمدحونه السويدي ولم اجدة لاكن وجدته عبر
المنتدى من احد الاعضاء جزاه الله خير بسعر غالي واستفساري هل لو اخذ الدبه الهندية
وارهمها عند البريه فيها خطر علي وعلى عيالي لان الموضوع فيه غاز رجاء الرد
لاني على وجه سفر واسف على الاطالة
الله يسر اموركم

[سرهيد]

السلام عليكم

وحياك الله

اخي الكريم الحجم اللي تسأل عنه ما هو ؟

لاني اعرف ان حجم 5 رطل متوفر وبكثرة وعند البرية بالذات اغلب الاحجام

عليك بالايطالية تراها ارخص ونفس الجودة حتى لو توفرت السويدية لان الصناعة اوربية وهم لهم نظام في المواصفات يخص الجميع .

مر البرية وبتلقى غرضك طال عمرك

تقبل احترامي

[ابو سيـف]

السلام عليكم وكيف حالك
شف ياطويل العمر والسلامه
انا عندي دبة 5 رطل ايطالية
ولها تقريباً 11 سنه وإلى الآن
وهي شبه جديده ولا تشكو اي
عله ولا عمرها نسمت البته
وانصحك بها بشددددده
،،،،،،،،،،،،،،،،،،،،،،،،،،،،
والسلامه من الله عزوجل
اعقلها وتوكل وخذ ايطالي
احسن لك .
اخوك ابو سيـف

[سعد سعد 99]

والله ياخوي عندي البريموس الهنديه 3رطل
لها عندي كم شهر وكارفها كرف الويل
ولا بها اي خلاف

[B A R E K]

نصيحة محب .. الايطالية لا تفوتها ..

[فواز الشيباني]

فديتكم يااهل مكشات الله يسر اموركم ويحفظكم

[ابوصالح77]

هلا بك أخوي فواز
السويدية ما تحصلها لأنها مقطوعة من زمان
وإذا حصلتها تصير بسعر غالي ومبالغ فيه جداً
ومن مميزات السويدي القديم إنه ما يثلج بالبرد( بزعمهم )

خذلك هندي( بريموس او سفتي )
أو إيطالي وكلها ممتازة وما منها خوف .
وأفضل المقاسات للرحلات القصيرة 5 رطل

أهم شيء :
إنحش عن الصيني تنيسيم وغربيل حتى لو تغير الإبرة ما يفيد
بالتوفيق

[ابوصالح77]

تروح وترجع بالسلامة