يا شباب .... وش أنواع مّطارات الماء وش أحسنها ؟؟

[المعزب]

يا شباب وش أحسن أنواع المّطارات :D ( ما عرف لها أسم ثاني ولا لا ) وأين توجد وكم قيمتها
وبعدين هل تنقع في الماء قبل إستخدامها وتعبئتها :j

[الراعي الرسمي]

تجدها عند السنيدي الجرده بريده

بس حاول تتركها في الماء ثلااث ايام

سعره يمكن ثلاثين ريال الزينه ..............

[عجمي]

السلام عليكم ورحمة الله وبركاته

حياك اللة اخوي المعزب.... :D

بالنسبة للمطارة الزينة مكتوب علية - وارد الكويت - وتلقاة غالباً عند اي محل للرحلات وسعرة من عشرين الى ثلاثين ريال ........

واذا شريتة جديدة احسن لك تنقعة بالماء كم يوم

وكان تبي شوري عليك بالقربة :good:

والسسسسسلام .........

[المعزب]

أخواني _ الراعي الرسمي - عجمي
مشكورين يالنشاما والله لا يحرمنا طلاتكم الحلوه ..

[ابو ســــاره]

كلها مكتوب عليها وارد الكويت
ولكن الزينه حسب علم مكتوب عليها وارد الهدلك او الهدلق
والله اعلم .

[المعزب]

أخوي أبو ساره جعل الله كل أيامك ساره
فعلاً كما ذكرت ولكن يا شباب عندي وحده تقطر مويه على طول ينزل منها الماء فهل هذا شي طبيعي
أرجوااا الإفادة

[حافي]

خوي المعزب لاتعزب حالك مثل ماقلو المصريين
فصل مطاره او بدره او كما قيل فصله تفصيل المقاس اللي تحب نوع القماش روسي او باكستاني (22) اخضر
او اشتر قربه صغيره شفه عند المحاط اللي على السريع وحلوه وتبرد بس (لازم تقصر على تبريده ولا تتعور حلقك)

[المعزب]

أخوي حافي ( كما قال أبو حمد يا حافي الإقدام في دربك أشواك )
حلوه مره متعزبش نفسك ولكن أخوي وش معنى (22) لو تكرمت يالذيب

[حافي]

ودي اكتبه باللغة الصحيحه اللى هي ما تعزب حالك بس حرف ال...... اللي بعد الرء ما يكتب عندي بالجهاز فيه خلل وصاير شامي على مصري بس حتى يزين الحرف
اما عن رقم (22) فهو رقم الشراع او القماش فيه (18) و(16) وثقيل مره مثل (28) ما يندي الماء يعني مايبرد ونصيحتي لك استعمل القرب الصغيره شريت قبل يومين وحده لتر ونص صغيره وحليله جلد طبيعي شفهن بالمحط الخارجيه او بسوق الباديه 0
وحياك يامعزب الاجواد

[سيف السيف1]

أخوي أبو ساره جعل الله كل أيامك ساره
فعلاً كما ذكرت ولكن يا شباب عندي وحده تقطر مويه على طول ينزل منها الماء فهل هذا شي طبيعي
أرجوااا الإفادة

نزول الماء غير طبيعي , لكن كما ذكر الشباب نقعها في ماء مع شوية طين وتضبط بإذن الله..

[سنعوس نجد]

السلم عليكم ورحمة الله وبركاته

افضل مطارات الماء هي (جركل الرعيان)

وهو عباره عن جركل 2لتر ماء اخضر تقوم عليه بعد التنضيف الجيد بلف قطعة خيشه حقت رز

وتقوم بربطها جيدا وتحطها في الماء لمدة ست ساعات فقط وبعدين تشوف كيف البروده

والسلام ختام ..............................

[الجيب الربع]

أخي المعزب

أنا لدي وحدة مكتوب عليها وارد الهيبي الكويت ومكتوب تحت DESERT وماشيه تمام لاني أول ماشريتها نقعتها 4 أيام ولكن نصيحة للجميع لا أحد يحط موية من موية البلدية لان ريحة وطعم الكلور تمسك بالمطارة فترة طويلة


أجمل تحية

[محافظ وطي]

انا مدري ليش انا احبك يالجيب الربع؟!!! وشكرا لصاحب الموضوع

[الجيب الربع]

السلام عليكم ورحمة الله وبركاته

أخي العزيز محافظ وطي

الله يحبك وجزاك الله خير

[شيخ الصقور]

اخواني
انا ابي مطاره الي تتعبأ مويه وتبرد الي خيش او مدري وشي المهم ابيها وين يبعوها

[محافظ وطي]

اقول ياشيخ .... خذ لك قربه ( سعل ) ولبسه خيشه بعد .... وشرب مويه على كيف كيفك ...... واول ما تشتريها نقعها في ماء وملح يوم او يومين ... واغسلها وصب ماك ..... وهني

[شيخ الصقور]

والله مافهمت
انا بس ابي اعرف وين يبيعونها

[محافظ وطي]

في الجنادريه/ سوق الابل ( في الرياض) عند الحريم اللي يبيعن شغلات الابل
وفي كثير من المحطات اللي على الطرق السريعه ... واعتقد بعض محلات الرحلات ..... وارخص واجود شي اللي في الجنادريه...والله اعلم
هذا بالنسبه للـ " قرب " جمع قربه .... اما المطارات (بتشديد الطاء) تحصلها ايضا في محطات البنزين اللي على الطرق السريعه، في الغرابي، محلات الرحلات

تعبت وانا اكتب.... وش تبي بعد يا شيخ؟؟

[شيخ الصقور]

ههههههههه تسلم تسلم

خلاص عرفتهاااااا

[سفير الجزيرة]

السلام عليكم ورحمة الله وبركاته
يا أخوان أنا جربت كل أنواع المطارات ولا فيها واحدة مظبوطة لا السنيدي ولا اللهيبي ولا حتى التفصيل
واللي كانت فعلاً مظبوطة انقطعت من السوق وهي المطارة الكويتية وارد الصباحية هي فعلاً جيدة لكنها انقطعت من الأسواق السعودية منذ سنوات .

هذا ما عندي ولو تحطمتم من كلامي .