استفسار عن افضل ورشه في الرياض للجمس دفرنس وتربيط وميزان...

[فهدالتميمي1]

السلام عليكم يا إخوان ابي فزعتكم تدلوني عن افضل ورشه تربيط وميزان وفحص دفرنس في الرياض عندي جمس حوض 97 قير عادي فيه صوت بالخامس زي الونه مزعجه واذا رفعت رجلي عن الدعسه يروح وفي الغيار الرابع صوتها خفيف وفي الخامس مزعج شوي.
وعندي رجه في الموتر ويموج في الخط وبعض الاحيان مع الفرامل يحذف يمين.(عليه تباريز وبوالين)والكفر الايسر مع اللفات يحك في الصدام!
ابي أحاول اضبط الموتر بأقل تكلفه لأني ابيه استخدام في المشاوير وبذالحاله ما يصلح.
شوركم وش اصلح؟؟ ( ياليت اعرف كم راح يكلف تقريباً؟)
وانا أنشدكم من خوفي لا اطيح في غشيم ما يعرف يصلح ولا واحد يصلح اي كلام وغالي
أسف على الاطاله
اشكر لكم تعاونكم

[ابوعقل]

وعليكم السلام

وحياك الله معنا في مكشات

طيب جرب اذا حطيته بالخامس وانت مسرع فض القير

وشل رجلك من الكلتش وركز الصوت يطلع ولا لا

علشان تحدد المشكله من القير ولا من الدفرنس

الرجه من الجنوط اذا هي شنابر

ونصيحه اذا تبي تفحص موترك لازم ترجعه جنوط الوكاله

وتشوف يرج ولا لا

البالون اللي انت مركبه جديد ولا مستعمل ؟؟؟

اما بخصوص الكفر الأيسر

لازم تشوف الميزان وش يقولك يحتاج سحب ولا لازم ترفعه شوي

اذا تبي تستخدم الونيت لازم ترخي الريال شوي

اما اذا تبي تبيع بعه على حاله

[فهدالتميمي1]

هلابك يا ابوعقل والله يحييك

اذا سويت مثل ما قلت لي افضيه وارفع رجلي ما يطلع صوت

فيه حق قيور فحصه ولا ادري عنه يقول فيه مشكله في الخامس وعلاجها تغيير القير كله!!!

الشنابر جديده والبوالين وش الحل ارصصها

ووش راكم اشيل التبريزه تظر بشكل الموتر او حركته مع الشنابر

وياليت من يخبر ورشه احطها عنده وامين الله يوفقكم.

لا تخلونا
وبيض الله وجهك يا ابو عقل

[سوبر VTC]

عندك تشليح آل موسى في الصناعيه القديمه
فيه لبناني مسيحي دكتور كارونات للجمس فقط ويوزن الكوارين بالمللي
ادخل شارع العنوز وجهك شرق وخل السالم على اليسار وتعد اول محطة يبي يجيك مطعم بخاري على اليمين فيه شارع مقابله من شمال ادخل معه يجيك التشليح يسار...
والقيور فيه هندي بصناعية الخليج
دكتور قيور جموس وشفر اسمه صابر رقم الورشة 217
كاسره بالسعر لو فيه مشكلة توضيب
وفي عندك ورشة مشعل العتيبي على شارع الريم بالصناعية القديمة تخصص قيور جمس من 40 سنه
وفي عندك صناعية ام الحمام ورشة القحطاني رقم 11 سوداني فلته في الكهرباء



ما افتيك ياخوي طناف

لكن انا معي ونيت وبهذلني قبل فتره وغيرت كل شيء

وبالاخير مليت وطلبت من القصاب ( الميكانيكي) يوظب الديلكو ويغير غطاه

صرت انا راعي العلم مهوب هووو

وبالاخير الحمد لله تمام

كانك بالرياض رح لواحد بصناعية العاصمة

مخرج 29 الي يطلع على طريق المدينة .. تلاقي الصناعية على يسارك وانت رايح للكبري المعلق

ورشة الشباب

اسم القصاب : تاج

شغله زين ولكن يبطي واحيانا يفوت راسه من الزحمة الي عنده



شف أخوي ورشة بن كليب في الصناعية القديمة ( صناعية دوار الخرج ) شارع الجمعية من الورش القديمة المتميزة في أصلاحات الجموس من على وقت الفروت وأيام التهريب .

مع تحيات أخوك ابو عاذر


الاخ العزيز هناك ورشه بالصناعيه القديمه وصاحبها شاب سعودي وتجده بالورشه اغلب الاوقات
ومتخصص جموس وسيارته جمس اسمه ابو عادل
وصف الورشه
طريق الخرج تتعدا بنك الراجحي ثم يجيك ملف صغير وترابي على اليمين تفرق واول ورشه على اليسار
اسال عن ابو عادل وقله جايك من طارق ومايقصر معك ان شاء الله
الرجال يقدر السيارات الامريكيه وراعي ترهيم وخاصه الجموس

اخوك طارق


السلام عليكم
حياك أخوي طناف
مأأزيد على الأخوان - والأخ طارق ماقصر بيض الله وجهه
وأنا بادلك على ورشة في صناعية العاصمة - الدائري الغربي - مخرج المدينة المنورة - بجوار المسجد - شرق المسجد من الجهة الجنوبية - الورشة الوحيدة اللي ابوابها والشبك لونه أصفر - وأسمها - ورشة سندباد الشمال - وراعيها شاب سعودي يتواجد بها باستمرار - ولديه عمال فنيون جيدين -
تقبل تحياتي - دغيم 1
اعلاف واحد دكتور جموس يجونه من اماكن بعيده بس هو في الخبر تخصصه جموس القديمه انا مجربه في اكثر من موتر واعرفه من اكثر من 25 سنه
http://www.mekshat.com/vb/images/misc/progress.gif

اخوي طناف

اخبرلك ورشه زينه وجربته في مشاكل القير والمكينه والكمبيوتر السياره

في واحد معروف ولد الجميح ومعاه باكستانين

وورشته موجوده على طريق خريص

فيه شارع بين صاله العرض GMC وصاله المستعمل الي موجوده على طريق خريص ادخل بينهم وأمشي بتلقى على يسارك بعد ماينتهي صاله المعرض سور ابيض على يسارك امش لآخر السور تلقى باب قراش ادخل عنده وانشالله يعرف حل مشكلتك

http://www.mekshat.com/vb/images/misc/progress.gif


شف حبيبي فية ورشة ممتازة متخصص بالباترول ورشة ابو عادل
في الصناعية القديمة شفت الاشارة اللي قبل
السالم لزجاج تعدها لين يجيك بنك الراجحي بعدها فيه لفه يمين
اتركها اللفه الثانية يمين ادخلها تلقاه اول محل او ثاني محل
على اليسار ادخل وسئل عن ابو عادل ولا العامل سعيد هندي
ان شاء الله افدتك


اعانك الله

[فهدالتميمي1]

هلا والله بالسوبر هلا بالسوبر فايزر الي يبرد الكبد بيض الله وجهك وكفيت ووفيت.

بالنسبه للتربيط تخبرون ورشه ممتازه مذكور لي ورشة النويصر لكن ما ادري؟ ولا اي ورشه من الي فوق تصلح ابي تربيط جموس.

[سوبر VTC]

لاهنت و جزاك الله خير
للاسف ما عندي علم لكن على كلام الربع غالين
الافضل مر الرابطة

*~*, رابطة مـــــلاك الجموس الحوض ,*~* (http://www.mekshat.com/vb/showthread.php?t=147000)